Biblia mpi Luzingu na Nge na Bilumbu Ke Kwisa

YINDULA nde nge ke tambula na mpimpa na nzila mosi ya mudidi. Ata ntangu dindaka dezia ntama, nge kele ve na boma ya kuvila, sambu nge kele ti torshe mosi ya ngolo. Ntangu nge ke songa yo kaka na ntwala na nge, nge ke mona bima yonso yina kele pene-pene. Mpi ntangu nge ke songa yo na mwa ntwala, yo ke pesa nsemo na nzila na nge mwa ntama.

Na mambu ya nkaka, Biblia kele bonso torshe yai. Mutindu beto monaka yo na masolo me luta, Ndinga ya Nzambi lenda sadisa beto na kununga mambu yina kele kaka na ntwala na beto—bampasi yina beto ke kutanaka ti yo konso kilumbu na nsi-ntoto yai ya mudidi. Kansi Biblia ke salaka mambu mingi. Yo ke sadisaka beto mpi na kumona mbote mambu yina ta salama na bilumbu ke kwisa, na kumona mpi kulanda nzila yina ke nataka na kiese ya kukonda nsuka. (Nkunga 119:105) Inki mutindu?

Beto tadila mitindu zole yina Biblia ke pesaka beto kivuvu sambu na bilumbu ke kwisa: 1 Yo ke sadisaka beto na kukuma ti lukanu na luzingu na beto mpi 2 yo ke songaka beto mutindu ya kusala kinduku ya mvula na mvula ti Ngangi.

Biblia ke pesaka beto bandongisila ya mbote sambu na kunwana ti bampasi, ata mpidina yo kele kaka ve mukanda yina ke sadisaka bantu na kuyidika bo mosi makambu na bo. Na kisika ya kusiamisa beto na kutula dikebi kaka na basusi na beto mosi, Biblia ke songaka beto na kudimona na kati ya kimvuka mosi ya nene. Luzingu na beto lenda vanda na kiese kaka kana beto ke sala mutindu yai.

Baka mbandu ya munsiku yai ya Biblia: “Kiese ke vandaka mingi na kupesa, kansi na kubaka kiese ke vandaka fioti.” (Bisalu 20:35) Keti nge ke yibuka kilumbu yina nge sadisaka muntu mosi yina vandaka na mfunu ya lusadisu? To mbala ya nkaka ntangu nge widikilaka na dikebi yonso nduku mosi yina vandaka kusonga nge mambu yina vandaka na ntima na yandi? Keti nge waka ve kiese sambu nge salaka mambu yina pesaka muntu mosi kikesa?

Beto ke bakaka kiese ya mingi ntangu beto ke pesaka kukonda kuvingila nde bo vutudila beto kima ya nkaka. Nsoniki mosi tubaka nde: “Yo ke vandaka mpasi kibeni na kupesa kukonda kuvingila nde bo vutudila nge bima ya nkaka—katula kaka kana nge pesaka ve ti ngindu nde bo ta pesa nge lufutu.” Kansi, kana beto ke pesa, mingi-mingi na bantu yina kele ve ti bima ya nkaka ya kuvutudila beto, beto ke bakaka lufutu. Beto ke kumaka na kati ya kimvuka mosi ya nene. Ya kieleka, beto ke salaka kumosi ti Ngangi, yina ke tadilaka mambu yai ya mbote bonso bima ya beto me defisa yandi. (Bingana 19:17) Yandi ke bakaka na valere mingi mambu yina beto ke salaka sambu na bansukami, mpi yandi ke silaka na kufuta beto luzingu ya mvula na mvula na paladisu awa na ntoto—kivuvu ya kiese kibeni sambu na bilumbu ke kwisa!—Nkunga 37:29; Luka 14:12-14.a

Kima ya kuluta mfunu, Biblia ke longaka beto nde beto lenda vanda na kiese na luzingu kana beto ke sambila Yehowa, Nzambi ya kieleka. Ndinga na yandi ke siamisaka beto na kupesa yandi nkembo, lukumu, mpi bulemfu yina yandi me fwana na kubaka. (Longi 12:13; Kusonga 4:11) Ntangu beto ke salaka mutindu yai, beto ke salaka kima mosi ya kuyituka kibeni: Beto ke pesaka Ngangi na beto kiese. Ya kieleka, yandi ke songa beto nde: “Vanda mayele mpi pesa ntima na mono kiese.” (Bingana 27:11) Yindula fioti—ntangu beto ke bakaka na mayele yonso balukanu yina ke wakana ti minsiku ya Biblia, beto ke pesaka ntima ya Tata na beto ya zola kiese. Sambu na nki? Sambu yandi ke kudiyangisaka sambu na beto mpi ke zolaka nde beto baka mambote ya kulanda lutwadisu na yandi. (Yezaya 48:17, 18) Ya kieleka, kusambila Mfumu ya zulu ti ntoto mpi kuzinga na mutindu yina ke pesaka ntima na yandi kiese kele lukanu ya nene kibeni!

Biblia ke longaka beto mpi na kusala kinduku ti Ngangi. Yo ke tuba nde: “Beno kwenda pene-pene na Nzambi, ebuna yandi ta kwisa pene-pene na beno.” (Yakobo 4:8) Bantangu ya nkaka beto lenda ndima kibeni ve nde beto lenda kuma banduku ya Ngangi nkwa-ngolo yonso. Kansi, Biblia ke ndimisa beto nde kana beto “sosa Nzambi,” beto ta “mona yandi kibeni,” sambu “yandi kele ntama ve ti konso muntu na kati na beto.” (Bisalu 17:27) Ndongisila ya Biblia ya kukuma nduku ya Nzambi kele mfunu kibeni sambu na luzingu na beto na bilumbu ke kwisa. Inki mutindu?

Tadila mambu yai: Ata beto sala nki mutindu, beto ta kuka ve kutina mbeni yai ya ngolo—lufwa. (1 Bakorinto 15:26) Kansi, Nzambi ke zingaka mvula na mvula. Yandi ta fwa ve ata fioti, mpi yandi ke zolaka nde banduku na yandi mpi kuzinga mvula na mvula. Biblia ke sadilaka mambu yai ya kitoko sambu na kutubila mambu yina Yehowa ke zolaka sambu na bantu yina ke sosaka yandi: “Bika beno vanda na luzingu kimakulu.”—Nkunga 22:26.

Inki mutindu nge lenda sala kinduku ya mvula na mvula ti Nzambi? Landa kulonguka mambu ya me tala yandi na Ndinga na yandi Biblia. (Yoane 17:3; 2 Timoteo 3:16) Lomba yandi na kusadisa nge na kubakisa Biblia. Biblia ke ndimisa beto nde kana beto ke “landa kulomba na Nzambi” mayele na masonga yonso, yandi ta pesa beto yo.b (Yakobo 1:5) Yo yina, sala bikesa ya kusadila mambu yina nge ke longuka, bika Ndinga ya Nzambi kuvanda bonso “mwinda sambu na dikulu na” nge mpi “nsemo sambu na nzila na” nge—banda bubu mpi mvula na mvula.—Nkunga 119:105.