Nge Lenda Vanda Kaka na Bikalulu ya Mbote

“Kana beto ke zolaka Nzambi, yo ke songa nde beto [fwete zitisa] bansiku na yandi.”​—1 YOANE 5:3.

 1. Inki luswaswanu kemonanaka na luzingu ya bantu bubu yai?

BAMVULA mingi meluta, Nzambi kupesaka profete Malashi mpeve na yandi sambu yandi zabisa ntangu yina luzingu ya bantu ya Nzambi tavanda ya kuswaswana ngolo ti luzingu ya bantu yina kesadilaka ve Nzambi. Profete kusonikaka nde: “Bantu na mono ta mona diaka diswaswanu na mambu yina ta bwila bantu ya mbi ti bantu ya mbote, bantu yina ke sadilaka mono ti bayina ke sadilaka mono ve.” (Malashi 3:18) Mbikudulu yai ke na kulungana bubu yai. Kuzitisa bansiku ya Nzambi, ti yina kelombaka beto na kuvanda na bikalulu ya mbote na yina metala kuvukisa nitu, kele nzila ya mayele mpi ya mbote ya kulanda na luzingu. Kansi, yo kevandaka ve ntangu yonso nzila mosi ya pete. Yo yina, Yezu kutubaka nde Bakristu fwete tula ngolo sambu na kuguluka.​—Luka 13:23, 24.

 2. Inki mambu ya kesalamaka na luzingu yina kevandaka na bupusi mingi ya kekumisaka kuvanda ntangu yonso na luzingu ya kukonda mvindu mpasi?

² Sambu na nki yo kele mpasi na kuvanda na mabanza ya kukonda mvindu? Kikuma ya ntete kele nde mambu mingi ya kesalamaka kevandaka na bupusi na luzingu na beto. Bakompani yina kebasisaka bafilme kesalaka bafilme yina kesongaka bantu kevukisa nitu na mutindu mosi ya kepesaka bantu yankaka mpusa ya kusala yo, bonso kima ya kepesaka bantu kyese, mpi bantu yango kevandaka bambuta, kansi bo keyindulaka ve ata fyoti mambu ya mbi yina yo tabuta. (Efezo 4:17-19) Bantu mingi ya kesalaka bansaka ya kuzolana yina bo kesongaka na bafilme, kevandaka ve bankwelani ya kyeleka. Mbala mingi, bafilme ti bansaka yina kelutaka na televizio kesongaka mutindu bantu yina mekwelaka ve ke na kuvukisa nitu. Mbala mingi, bantu yango kesonganaka ve zola ti luzitu. Bantu mingi meyikanaka na kutala mambu yina banda bumwana. Dyaka, bupusi ya banduku kevandaka ngolo ya kepusaka bana na kusala mambu yina bo mosi kezola mutindu bantu yonso kesalaka, ebuna bayina kesalaka mutindu yina ve bo kesekaka bo mingi to bo kemoninaka bo.​—1 Piere 4:4.

 3. Inki bikuma kesalaka nde bantu mingi na inza kusala mansoni?

³ Bampusa yina beto kevandaka na yo na nitu na beto mosi kesalaka mpi nde yo kuma mpasi na kuvanda ntangu yonso na mabanza ya kukonda mvindu. Yehowa kusalaka bantu ti mpusa ya kuvukisa nitu, mpi mpusa yango lenda vanda ngolo. Mbala mingi mpusa kekatukaka na mambu yina beto ke yindulaka, mpi mansoni kekatukaka na bangindu yina kewakanaka ve ti bangindu ya Yehowa. (Yakobo 1:14, 15) Mu mbandu, bangyufula ya bo mekatuka kuyula bantu ntama mingi ve yina kubasikaka na zulunalu mosi (British Medical Journal), kumonisaka nde bantu yina kuvukisaka nitu mbala ya ntete kusalaka yo kaka sambu na kusosa kuwa kana kuvukisa nitu kevandaka nki mutindu. Bankaka kuyindulaka nde bantu yonso ya bo kele na bo mvula mosi kevukisaka nitu, yo yina bo mpi zolaka kuvidisa kimwense na bo. Kansi, bankaka kutubaka nde kima kukusaka bo vandaka mawi na bo mosi to bo “laukaka fyoti malafu na ntangu yina.” Kana beto kezola kupesa Nzambi kyese, beto fwete vanda ti bangindu ya kuswaswana. Bangindu ya nki mutindu tasadisa beto na kuvanda ntangu yonso na mabanza ya kukonda mvindu?

Ndimisa ntima na nge ngolo

 4. Inki beto fwete sala sambu na kubikala na mabanza ya mbote?

⁴ Sambu na kuvanda na bikalulu ya mbote, beto fwete ndima nde kuvanda na luzingu ya mutindu yina kele mfunu mingi. Mambu yai kewakana ti mambu yina ntumwa Polo kusonikilaka Bakristu ya Roma: “Beno ta zaba mambu yai ya Nzambi ke zolaka: mambu yina kele ya mbote, mambu yina ke pesaka yandi kiese, mambu yina ke na kifu ve.” (Roma 12:2) Kuzaba nde kuvanda na mabanza ya kukonda mvindu kele mfunu mingi kelombaka kusala mambu mingi kuluta kuzaba kaka nde Ndinga ya Nzambi kebuyisaka mansoni. Yo kelombaka kuzaba bikuma ya Nzambi kebuyisilaka mansoni mpi nki mutindu beto kebakaka mambote na kuzitisa yo. Disolo yina kulutaka kutubilaka mwa bikuma yango.

 5. Sambu na nki kikuma ntetentete Bakristu fwete vanda ntangu yonso na mabanza ya kukonda mvindu?

⁵ Kansi, ata mpidina sambu na Bakristu, bikuma ya ntetentete ya kepusaka bo na kubuya kusala mansoni kekatukaka na kinduku yina bo kele na yo ti Nzambi. Beto melongukaka nde yandi mezaba mambu yina kele mfunu mingi sambu na beto. Zola na beto na yandi tasadisa beto na kumenga mambu ya mbi. (Nkunga 97:10) Nzambi kele Mupesi ya “makabu yonso ya mbote mpenza.” (Yakobo 1:17) Yandi kezolaka beto. Kana beto kelemfukila yandi, beto kemonisa nde beto kezolaka yandi mpi beto kesepilaka ti mambu yonso yina yandi mesalaka sambu na beto. (1 Yoane 5:3) Beto kezolaka ve ata fyoti kupesa Yehowa mawa na ntima mpi mpasi na kukonda kuzitisa bansiku na yandi ya lunungu. (Nkunga 78:41) Beto kezola ve kusala mambu na mutindu mosi yina tasala nde bo tuba mambu ya mbi na mpeve santu na yandi mpi na lusambu na yandi ya lunungu. (Tito 2:5; 2 Piere 2:2) Kana beto kele ntangu yonso na luzingu ya kukonda mvindu, beto kepesa Muntu ya Kuluta Zulu kyese.​—Bingana 27:11.

 6. Inki mutindu kuzabisa bantu yankaka bansiku yina beto mebaka desizio na kulanda na luzingu kesadisaka beto?

⁶ Kana beto mebaka desizio ya kuvanda ntangu yonso na mabanza ya kukonda mvindu, kima fwete tanina beto kele kuzabisa desizio na beto na bantu yankaka. Zabisa bantu yankaka nde nge kele nsadi ya Yehowa Nzambi mpi nde nge mebakaka desizio ya kuzitisa bansiku ya kuluta zulu ya Nzambi. Bansiku yango kele luzingu na nge, nitu na nge, mambu ya nge kepona. Inki kima kele na kigonsa ya nge fwete tanina? Kinduku ya mbote ti Tata na nge yina kele na zulu. Monisa pwelele nde nge tandima ve kusala mambu ya mbi sambu na kuvidisa kwikama na nge. Vanda na kyese na kukotila Nzambi na mpila nge kezitisa minsiku na yandi. (Nkunga 64:10) Kuwa ve nsoni ata fyoti na kusolula ti bantu yankaka mambu yina metala malongi ya nge mendimaka. Kutubila yo tasadisa nge, yo tatanina nge, mpi yo tapesa bantu yankaka kikesa ya kulanda mbandu na nge.​—1 Timoteo 4:12.

 7. Inki mutindu beto lenda kangama na desizio na beto ya kuvanda ntangu yonso na mabanza ya kukonda mvindu?

⁷ Dyaka, kana beto mebaka desizio ya kuvanda na luzingu ya kezitisa bansiku mpi beto mezabisa pozisio na beto na bantu yankaka, beto fwete sala yonso sambu na kuzitisa desizio na beto. Mutindu mosi ya kusala yo kele kukeba na ntangu beto kepona banduku. Biblia ketuba nde: “Kana nge landa bantu ya mayele, nge ta kuma mpi mayele.” Sala kinduku ti bantu yina kendimaka bansiku mosi ti nge; bo tapesaka nge kikesa. Verse yai ketuba mpi nde: “Kana nge landa bazoba, nge mpi ta kuma zoba.” (Bingana 13:20) Kana mpila kele, kuvanda ve kisika mosi ti bantu yina lenda lembisa nge na kuzitisa desizio na nge.​—1 Korinto 15:33.

 8. (a) Sambu na nki beto fwete disaka mabanza na beto ti mambu yina kele mvindu ve? (b) Inki bima beto fwete buya?

⁸ Dyaka, beto fwete disaka mabanza na beto ti mambu yina kele ya kyeleka, ya luzitu, ya lunungu, ya kyese, ya lukumu, ya mbote, ti ya bo fwete zitisa. (Filipi 4:8) Beto kesalaka yo kana beto kepona mambu yina beto ketala mpi ketanga mpi miziki yina beto kewa. Kutuba nde mikanda yina ketubilaka kuvukisa nitu kevandaka ve na bupusi ya mbi kele bonso kutuba nde mikanda yina kelongaka mambu ya mbote kele ve na bupusi ya mbote. Yibuka nde, bantu ya kukonda kukuka lenda bwa kukonda mpasi na mansoni. Yo yina, mikanda, bazulunalu, bafilme, ti miziki yina kepesaka bantu nzala ya kuvukisa nitu lenda kuna nge bampusa ya mbi, ebuna nsukansuka, bampusa yai lenda nata nge na kusumuka. Sambu na kuvanda ntangu yonso na mabanza ya kukonda mvindu, beto fwete fulusa mabanza na beto na mayele yina kekatukaka na Nzambi.​—Yakobo 3:17.

Mambu yina kenataka muntu tii na mansoni

9-11. Mutindu Salomo kutubaka yo, inki mambu kunataka fyoti-fyoti leki mosi na mansoni?

⁹ Mbala mingi, kele ti mambu ya mezabanaka mbote yina kenataka muntu tii na mansoni. Na nima ya kusala dyambu ya ntete, yo kevandaka mpasi na kusuka pana. Tala mutindu bo ketubila yo na Bingana 7:6-23. Salomo kumonaka “leki mosi ya zoba,” to ya kukonda mayele. Leki yango “vandaka kutambula-tambula na balabala penepene na kisika vandaka nzo ya nkento [ya ndumba] mosi. Yandi vandaka kuluta pana na nkokila ntangu mpimpa me bwa.” Yai kifu ya ntete ya yandi salaka. Na nkokila, ntangu mpimpa zolaka kubwa, “ntima” na yandi kutindaka yandi ve na balabala yankaka, kansi kaka na kisika ya yandi mezaba nde yandi lenda mona ndumba mosi.

¹⁰ Na nima, beto ketanga nde: “Ebuna nkento yango monaka yandi. Nkento vandaka me lwata bonso ndumba, ke yindula-yindula bamambu na yandi ya luvunu.” Ntangu yai leki yina memona yandi! Yandi lendaka kubaluka mpi kuvutuka na nzo, kansi mpila ya kutina kele dyaka ve, mingimingi sambu mabanza na yandi mekuma ya kulemba. Nkento yina mesimba yandi mpi mepesa yandi beze. Na nima ya kundima beze na yandi, leki yai meyantika ntangu yai na kuwa mambu ya luvunu yina yandi kesonga yandi na mawete yonso sambu na kubwisa yandi nde: “Mono vandaka na mfuka ya kupesa makabu [ya kinduku], bubu yai mono me lungisa yo.” Bo vandaka kupesa bima yai sambu na makabu ya kinduku: mbisi, fufu, mafuta, ti malafu. (Levi 19:5, 6; 22:21; Kutanga 15:8-10) Ntangu yandi vandaka kutanga bima yina, ziku yandi vandaka zola kumonisa leki yina nde yandi kele na kimpeve ya mbote mpi, ziku yandi vandaka kumonisa yandi nde yandi kele na bima mingi ya kudya ti ya kunwa na nzo na yandi. Ebuna nkento yango yantikaka kubondila yandi nde: “Kwisa beto kwenda. Beto kwenda lala mpimpa ya mvimba. Beto ta vanda kiese na kusimbana na maboko.”

¹¹ Yo kele mpasi ve na kuzaba mutindu mambu yina kusukaka. “Yo yina yandi kusaka leki yina na kitoko na yandi ti na munoko na yandi ya sukadi.” Leki yina kulandaka yandi na nzo na yandi “bonso ngombe ya bo ke kwenda kufwa,” mpi “bonso ndeke ke kota na bukondi.” Salomo kesukisa ti bangogo yai ya kepusa beto na kuyindula: “Yandi zabaka ve nde luzingu na yandi kele na kigonsa.” Yo vandaka kusimba moyo, to luzingu na yandi, sambu “Nzambi ta pesa ndola na bantu yina ke salaka pite.” (Baebreo 13:4) Yai dilongi mosi ya nene mpenza sambu na babakala ti bankento! Beto fwete buya kusala ata kitambi ya ntete na nzila yina tanata Nzambi na kubuya beto.

12. (a) Ngogo “zoba” kezola kutendula inki? (b) Inki mutindu beto lenda kuma ngolo na mabanza?

¹² Simba nde leki ya bo metubila na disolo yai vandaka “zoba.” Ngogo yai kezola kusonga beto nde bangindu na yandi, bampusa na yandi, mambu ya yandi vandaka kuzola, mawi na yandi, ti balukanu na yandi na luzingu vandaka kuwakana ve ti mambu yina Nzambi kezolaka. Sambu yandi vandaka na mabanza ya mbote ve, yo nataka yandi na kusala mambi. Na “bilumbu ya nsuka” yai ya mpasi, yo kelombaka kusala kikesa sambu na kuvanda ngolo na mabanza. (2 Timoteo 3:1) Nzambi kepesaka beto bima mingi yina lenda sadisa beto. Yandi kepesaka beto balukutakanu yina beto kesalaka na dibundu ya Bukristu sambu na kupesa beto kikesa ya kutambula na nzila ya mbote mpi yandi kesalaka nde beto kutana ti bantu yina kele ti lukanu mosi bonso yina beto kele na yo. (Baebreo 10:24, 25) Beto kele na bankuluntu yina ketwadisaka beto mpi kelongaka beto banzila ya lunungu. (Efezo 4:11, 12) Beto kele mpi ti Ndinga ya Nzambi, Biblia, yina ketwadisaka mpi kesongaka beto nzila ya kulanda. (2 Timoteo 3:16) Mpi ntangu yonso, beto kele na nswa ya kusamba sambu na kulomba nde mpeve ya Nzambi kusadisa beto.​—Matayo 26:41.

Beto baka dilongi na disumu ya Davidi

13, 14. Inki mutindu Ntotila Davidi kudikotisaka na disumu mosi ya nene?

¹³ Kansi, yo kele mawa na kumona nde, ata bansadi ya ngolo ya Nzambi kebwaka na mansoni. Mbandu ya muntu mosi ya kubwaka na mansoni kele Ntotila Davidi, yina kusadilaka Yehowa na kwikama yonso bamvula mingi. Ntembe kele ve nde yandi vandaka kuzola Nzambi mingi kibeni. Kansi, yandi kudikotisaka na nzila mosi ya masumu. Kaka mutindu Salomo kutubaka sambu na leki yina, kuvandaka na mambu mingi ya Davidi kusalaka yina kunataka yandi tii na masumu mingi.

¹⁴ Na ntangu yina Davidi vandaka mekuma bakala ya kikesa, ziku ti bamvula kuluta 50. Ntangu yandi vandaka na zulu ya ludi ya nzo na yandi, yandi monaka nkento mosi ya kitoko na zina ya Batsheba keyobila. Yandi sosaka kuzaba nkento yango mpi kuzaba zina na yandi. Yandi sengumunaka nde bakala na yandi, Uria kuvandaka na kati ya basoda yina kwendaka kunwanisa Raba, mbanza ya bantu ya Amoni. Davidi kutindaka bantu na kwenda kubinga nkento yango sambu yandi kwisa na nzo na yandi ebuna yandi ladisaka yandi. Makambu kukumaka ngolo, sambu na nima Batsheba kumonaka nde Davidi metula yandi divumu. Sambu Davidi kuyindulaka nde Uria tandima kulala ti nkento na yandi na mpimpa, yandi tindaka ndinga nde bo binga Uria yandi bika bitumba yandi kwisa kuvutuka. Mpidina, Uria zolaka kuvanda tata ya mwana yina Batsheba zolaka kubuta. Kansi, Uria kukwendaka ve na nzo na yandi. Ntangu yandi monaka nde yandi menunga ve na kubumba disumu na yandi, Davidi kuvutulaka Uria na Raba ebuna yandi pesaka yandi mukanda yina yandi sonikilaka mfumu ya basoda sambu na kusonga yandi nde yandi fwete tula Uria na ndonga ya ntete, kisika bitumba keluta ngolo sambu yandi kufwa. Yo yina Uria kufwaka, ebuna Davidi kukwelaka mufwidi yina na ntwala dikambu na yandi kuzabana na bantu yonso nde yandi vandaka na divumu.​—2 Samuele 11:1-27.

15. (a) Inki mutindu disumu ya Davidi kuzabanaka? (b) Inki Davidi kusalaka ntangu Natani kunganinaka yandi na mayele yonso?

¹⁵ Yo kemonana bonso nde, mayele ya mbi ya Davidi ya kubumba disumu na yandi kunungaka. Bangonda mingi kulutaka. Batsheba kubutaka mwana ya bakala. Kana Davidi vandaka kuyindula mambu yina kubwaka ntangu yandi sonikaka Nkunga 32, yo kemonana pwelele nde kansansa na yandi vandaka kutungisa yandi. (Nkunga 32:3-5) Ebuna, Nzambi kuzabaka disumu yango. Biblia ketuba nde: “Mambu ya Davidi salaka yo pesaka Mfumu Nzambi kiese ve.” (2 Samuele 11:27) Yehowa kutindaka profete Natani, yina kuzabisaka Davidi na mayele yonso mambu yina ya yandi salaka. Kukonda kusukinina, Davidi kundimaka disumu na yandi mpi yandi lombaka Yehowa na kulolula yandi. Sambu yandi balulaka ntima na masonga yonso, kinduku na yandi ti Nzambi kuvutukaka dyaka. (2 Samuele 12:1-13) Davidi kubuyaka ve ndongisila yina bo pesaka yandi. Kansi, yandi monisaka kikalulu yina bo ketubila na Nkunga 141:5 (NW): “Kana muntu ya ntima ya mbote kupesa mono ndola, yo tavanda mutindu ya kusonga mono zola; ebuna kana yandi nganina mono, yo tavanda bonso mafuta na zulu ya ntu na mono, yina ntu na mono lenda buya ve.”

16. Inki lukebisu mpi ndongisila Salomo kupesaka sambu na yina metala masumu?

¹⁶ Yo fwete vanda nde Salomo, mwana ya zole yina Davidi ti Batsheba kubutaka kuyindulaka dikambu yai ya mpasi yina kubwilaka tata na yandi na luzingu. Yo yina yandi sonikaka nde: “Luzingu na nge ta bonga ve kana nge meka kubumba masumu na nge; ndima yo, balula ntima na nge, ebuna Nzambi ta wila nge mawa.” (Bingana 28:13) Kana beto mesala disumu ya nene, beto fwete landa ndongisila yai ya bo sonikaka na mpeve ya Nzambi, yo kele lukebisu mpi ndongisila. Beto fwete tuba na Yehowa mpi kukwenda kumona bankuluntu ya dibundu sambu bo sadisa beto. Bankuluntu kele na mukumba ya nene ya kusadisa bantu yina mesala masumu na kutomisa dyaka luzingu na bo.​—Yakobo 5:14, 15.

Kundima mpasi yina masumu kenataka

17. Ata Yehowa kelolulaka masumu, na nki mambu yandi ketaninaka beto ve?

¹⁷ Yehowa kulolulaka Davidi. Sambu na nki? Sambu Davidi vandaka muntu ya kwikama. Yandi vandaka kuwila bantu yankaka mawa, mpi sambu yandi balulaka ntima na masonga yonso. Kansi, Nzambi kutaninaka ve Davidi na mpasi yina kulandaka na nima. (2 Samuele 12:9-14) Bubu yai mpi yandi kesalaka kiteso mosi. Ata Yehowa kepesaka ve bantu yina mebalula ntima ndola, yandi ketaninaka bo ve na mpasi yina mambi ya bo salaka kenataka na nima. (Galatia 6:7) Na kati ya mambu yina mansoni kenataka, beto lenda tanga kufwa makwela, kubaka divumu ya kukonda kukana, maladi yina bo kebakaka na nzila ya kuvukisa nitu, mpi bantu tatulaka nge dyaka ve ntima mpi bo tazitisaka nge dyaka ve.

18. (a) Inki mutindu Polo kusongaka bantu ya dibundu ya Korinto na kuzinga ti muntu mosi yina kusalaka dyambu mosi ya nsoni mpenza? (b) Inki mutindu Yehowa kemonisaka zola ti mawa na bansumuki?

¹⁸ Kana beto mosi kusalaka disumu ya nene, yo kele pete na kulemba nitu ntangu beto kemona mambu yina masumu ya beto salaka menata. Ata mpidina, beto fwete bika ve kima ata mosi yo pimisa beto na kubalula ntima mpi na kusosa kuvutula kinduku ti Nzambi. Na mvu-nkama ya ntete, Polo kusonikilaka bantu ya Korinto nde bo fwete basisa na dibundu muntu yina kusalaka pite ti muntu mosi ya dibuta na yandi. (1 Korinto 5:1, 13) Ntangu muntu yina kubalulaka ntima na masonga yonso, Polo kulombaka na dibundu nde: “Beno fweti lolula yandi, beno fweti pesa yandi kikesa sambu yandi vanda ve na mawa ya kuluta nene. Yo yina mono ke lomba beno na kusonga yandi nde beno ke zolaka yandi.” (2 Korinto 2:5-8) Na nsadisa ya ndongisila yai ya kupemama, beto kemona zola ti mawa yina Yehowa kevandaka na yo na bansumuki yina kebalulaka ntima. Bawanzyo na zulu mpi kewaka kyese kana nsumuki mebalula ntima.​—Luka 15:10.

19. Kuwa mawa ya masonga sambu na mbi ya beto salaka lenda nata nki mambote?

¹⁹ Ata beto kewa mawa sambu na mbi yina beto salaka, mawa yina lenda sadisa beto na ‘kusala diaka mbi ve, mpi na kubika mbi.’ (Yobi 36:21) Ya kyeleka, mambu ya mpasi yina masumu kenataka na nima fwete katula beto nzala ya kusala dyaka disumu. Dyaka, Davidi kusadilaka mawa yina yandi waka sambu na masumu ya yandi salaka sambu na kulongisila bantu yankaka. Yandi tubaka nde: “Bantu ya mbi, bayina ke bebisaka bansiku na nge, mono ta longa bo mambu ya nge zola nde bo sala, mpidina bo ta kwisa kuvutuka na nge.”​—Nkunga 51:15.

Kusadila Yehowa kepesaka kyese

20. Kulemfuka na bansiku ya Nzambi kenataka nki mambote?

²⁰ Yezu kutubaka nde: “Kiese na bantu yina ke waka nsangu ya Nzambi ti ke landaka yo.” (Luka 11:28) Kulemfuka na bansiku ya lunungu ya Nzambi kepesaka kyese ntangu yai mpi luzingu ya mvula na mvula na bilumbu kekwisa. Kana beto kele ntangu yonso na luzingu ya kukonda mvindu, bika beto landa luzingu ya mutindu yina mpi bika beto landa na kubaka mambote ya bima yonso yina Yehowa kepesa sambu na kusadisa beto. Kana beto bwaka na mansoni, beto simba na ntima nde Yehowa ke ya kuyilama sambu na kulolula bantu yina kebalula ntima na masonga yonso, mpi bika beto baka desizio ya kuvutukila dyaka ve masumu.​—Yezaya 55:7.

21. Kulemfuka na nki ndongisila ya ntumwa Piere lenda sadisa beto na kuvanda ntangu yonso na luzingu ya kukonda mvindu?

²¹ Ntama mingi ve inza yai ya kukonda lunungu taluta, kumosi ti mambu na yo yonso ya nsoni. Kana beto kele ntangu yonso na luzingu ya kukonda mvindu, beto tabaka mambote ntangu yai mpi mvula na mvula. Ntumwa Piere kusonikaka nde: “Bampangi na mono, ntangu beno ke vingila kilumbu yina, beno tula ngolo na kuvanda bantu ya mbote ti ya kukonda kifu na meso ya Nzambi, beno tula mpi ngolo sambu na kuzinga na ngemba. . . . Beno zaba ntete mambu yina. Yo yina beno keba, mbaimbai bantu ya mbi ta kotisa beno na nzila ya mbi, ebuna beno ta tula ngolo diaka ve.”​—2 Piere 3:14, 17.

Keti Nge Lenda Tendula?

• Sambu na nki yo lenda vanda mpasi na kuvanda ntangu yonso na luzingu ya kukonda mvindu?

• Inki mambu lenda sadisa beto na kusimba ngolo desizio na beto ya kuzitisa bansiku?

• Inki malongi beto lenda baka na masumu ya leki ya zoba yina Salomo kutubilaka?

• Mbandu ya Davidi kelonga beto nki sambu na yina metala kubalula ntima?

[Kifwanisu ya kele na lutiti 25]

Kusonga bantu yankaka mabanza na beto na yina metala bikalulu ya mbote kele lutaninu

[Kifwanisu ya kele na lutiti 29]

Sambu Davidi kubalulaka ntima na masonga yonso, Yehowa kulolulaka yandi