Mayele Yina Kekatukaka na Nzambi Yo Kemonanaka Nki Mutindu?

“ATA muntu ke yindulaka ve nde nsukami kele mayele ti kulanda mambu ya yandi ke tubaka.” Ti bangogo yai, Ntotila ya mayele, Salomo, kusukisaka disolo ya muntu mosi ya mpamba-mpamba, kansi ya mayele, yina kugulusaka mbanza ya mvimba na lufwa. Kansi, yo kele mawa mingi na kumona nde: “Ata muntu yindulaka yandi [nsukami yango] ve.”​—Longi 9:14-16.

Bantu kevandaka ti kikalulu ya kumona bantu yina kele na bima mingi ve mpamba, ata bansukami yango mesalaka mambu ya mbote mpenza. Dyambu yai kusalamaka mpi mutindu mosi na Yezu. Yezaya kutubaka dezia na ntwala mambu yai sambu na yina metala yandi, nde: “Bantu vandaka kusaula yandi ti kubuya yandi; yandi vandaka kumona mpasi mingi.” (Yezaya 53:3) Bantu mingi vandaka kusaula Yezu kaka sambu yandi vandaka ve na kisika to lukumu yina bamfumu ya nene ya bilumbu na yandi vandaka na yo. Kansi, yandi vandaka na mayele mingi kuluta mayele ya konso muntu yina ya kukonda kukuka. Bantu yina vandaka kuzinga bwala mosi ti Yezu kubuyaka na kundima nde “mwana ya sharpantie” yai kumonisaka mayele ya mutindu yina mpi yandi salaka mambu mingi ya kuyituka. Kansi, dyambu yina vandaka kifu mosi ya nene, sambu disolo kelanda na kutuba nde Yezu “salaka bidimbu mingi ve kuna, sambu bo vandaka kutula yandi ntima ve.” Bantu yina kukondaka mambu mingi ya mbote kibeni!​—Matayo 13:54-58.

Bika beto sala ve kifu ya mutindu yina. Yezu tubaka nde: ‘Mayele ke monikaka ya kieleka na bisalu na yo.’ Bo kezabilaka ve bantu yina kesalaka kisalu ya Nzambi mpi kepesaka bantu yankaka mayele ya zulu na biyeka to kisika ya bo kele na yo na luzingu, kansi bo kezabaka bo na “bambuma ya mbote” yina bo kemonisaka: lukwikilu ti bisalu na bo ya mesimbama na Biblia.​—Matayo 7:18-20; 11:19.