Tula Lukwikilu na Ndinga ya Baprofete ya Nzambi!

“Beto ke tula ntima na nsangu yina ya baprofete vandaka kuzabisa.”​—2 PIERE 1:19.

1, 2. Inki kele mbikudulu ya ntete ya bo sonikaka, mpi nki ngyufula yo basisaka?

YEHOWA muntu kutubaka mbikudulu ya ntete ya bo sonikaka. Na nima ya disumu ya Adami ti Eva, Nzambi songaka nyoka nde: “Mono tatula kimbeni na kati na nge ti nkento mpi na kati ya nkuna na nge ti nkuna na yandi. Yandi [nkuna ya nkento] tanyata nge na ntu, ebuna nge tatatika yandi na kisingini.” (Kuyantika 3:1-7, 14, 15, NW) Yo lombaka nde bamvu-nkama mingi kuluta na ntwala bantu kubakisaka mbotembote mambu yina profete kutubaka.

² Mbikudulu yina ya ntete vandaka na kivuvu ya kyeleka sambu na bantu ya masumu. Na nima, Masonuku kubingaka Satana Dyabulu nde “nioka yina ya ntama.” (Kusonga 12:9) Kansi, nani zolaka kuvanda Nkuna yina Nzambi kusilaka?

Beto sosa nkuna

 3. Inki mutindu Abele kutulaka lukwikilu na mbikudulu ya ntete?

³ Ata tata na yandi vandaka mbi, Abele yina vandaka kutina Nzambi boma, kutulaka lukwikilu na mbikudulu ya ntete. Ntembe kele ve nde Abele kubakisaka nde yo vandaka mfunu nde menga kutyamuka sambu na kukatula masumu. Yo yina lukwikilu kupusaka yandi na kupesa kimenga ya mbisi yina Nzambi kundimaka. (Kuyantika 4:2-4) Kansi, zina ya Nkuna yina Nzambi kusilaka vandaka kaka diswekamu.

 4. Inki lusilu Nzambi pesaka Abrahami, mpi nki kima yo monisaka sambu na yina metala Nkuna yina yandi silaka?

⁴ Bamvula kiteso ya 2 000 na nima ya ntangu ya Abele, Yehowa kupesaka mfumu ya kikanda Abrahami lusilu mosi yina kuvandaka mbikudulu: “Mono ta pesa nge mpi dikanda ya bantu mingi. Bana na nge ta vanda mingi-mingi bonso bambwetete na zulu. . . . Ebuna [na nzila ya nkuna na nge bantu ya makanda yonso tabaka mpenza lusakumunu, NW].” (Kuyantika 22:17, 18) Bangogo yina kukotisaka Abrahami na kulungana ya mbikudulu ya ntete. Yo monisaka nde Nkuna yina Nzambi tasadila sambu na kufwa bisalu ya Satana zolaka kubutuka na kikanda ya Abrahami. (1 Yoane 3:8) “Abrahami katulaka lukwikilu na yandi ve, yandi mpi vandaka na ntima zole ve sambu na lusilu ya Nzambi” ata bambangi ya Yehowa yina kuzingaka na ntwala ntangu ya Bakristu yina “kubakaka ve mambu yina ya yandi silaka bo” kusalaka mutindu yina ve. (Roma 4:20, 21; Baebreo 11:39) Na kifulu ya kusala mpidina, bo tulaka kaka lukwikilu na ndinga ya baprofete ya Nzambi.

 5. Lusilu ya Nzambi yina metala Nkuna kulunganaka na nani, mpi sambu na nki nge metuba mpidina?

⁵ Ntumwa Polo pesaka zina ya Nkuna yina Nzambi kusilaka ntangu yandi sonikaka nde: “Nzambi tulaka balusilu na Abrahami ti na muntu mosi [“nkuna,” NW] ya dikanda ya Abrahami yina bikaka kubutuka na nima na yandi. Mukanda ya Nzambi ke tuba ve nde: ‘na bantu [bankuna] ya dikanda na yandi,’ bonso nde bo vandaka mingi. Kansi yo ke tuba nde: ‘na muntu mosi [“nkuna,” NW] ya dikanda na nge,’ disongidila nde muntu mosi mpamba yai, Kristo.” (Galatia 3:16) Nkuna yina na nsadisa na yo makanda zolaka kudisakumuna bo mosi vandaka kutadila ve bantu yonso ya kikanda ya Abrahami. Nzambi kusadilaka ve bana ya mwana na yandi Ismaele ti bana yina yandi butaka ti Ketura sambu na kusakumuna bantu. Nkuna yina yandi sadilaka sambu na kusakumuna bantu kubutukaka na divumu ya Izaki mpi ya ntekolo na yandi Yakobo. (Kuyantika 21:12; 25:23, 31-34; 27:18-29, 37; 28:14) Yakobo kumonisaka nde “bantu” zolaka kulemfuka na Silo yina vandaka na kikanda ya Yuda, kansi Nkuna zolaka kubutuka kaka na kikanda ya Davidi. (Kuyantika 49:10; 2 Samuele 7:12-16) Bayuda ya mvu-nkama ya ntete vandaka kukinga muntu mosi yina zolaka kukwisa bonso Mesia, to Kristu. (Yoane 7:41, 42) Ntembe kele ve nde mbikudulu ya Nzambi sambu na yina metala Nkuna kulunganaka na Mwana na yandi, Yezu Kristu.

Mesia Mebasika!

 6. (a) Inki mutindu beto fwete bakisa mbikudulu yina ketubila bamposo makumi nsambwadi? (b) Inki ntangu mpi nki mutindu Yezu “kukatulaka masumu”?

⁶ Profete Daniele kusonikaka mbikudulu mosi ya mfunu ya ketadila Mesia. Na mvu ya ntete ya Dariusi muntu ya Media, yandi monaka nde bamvula 70 yina Yeruzalemi vandaka ya kubwa na ntoto vandaka penepene na nsuka na yo. (Yeremia 29:10; Daniele 9:1-4) Kaka na ntangu Daniele vandaka kusamba, wanzio Gabriele kwisaka mpi songaka yandi nde ‘bamposo makumi nsambwadi yina bo tulaka yo sambu na kulolula bo sambu na masumu ya bo mesala.’ Bo zolaka kufwa Mesia na kati-kati ya bamposo makumi nsambwadi. “Bamposo makumi nsambwadi ya bamvula” kuyantikaka na mvu 455 ya N.T.B., ntangu Ntotila ya Persia Artazersesi I ‘basisaka ndinga ya kutunga dyaka Yeruzalemi.’ (Daniele 9:20-27; Moffatt; Nehemia 2:1-8) Mesia zolaka kukwisa na nima ya bamposo 7 ya keyikama na bamposo 62. Bamvula 483 yai kuyantikaka na mvu 455 ya N.T.B. tii na mvu 29 ya T.B., ntangu Yezu bakaka mbotika mpi ntangu Nzambi kupakulaka yandi mpeve na yandi sambu yandi kuma Mesia, to Kristu. (Luka 3:21, 22) Yezu ‘kulolulaka masumu’ na mpila yandi pesaka luzingu na yandi bonso nkudulu na mvu 33 ya T.B. (Marko 10:45) Yai kele bikuma ya mbote kibeni ya kutudila lukwikilu na ndinga ya baprofete ya Nzambi!a

 7. Sadila Masonuku sambu na kumonisa nde Yezu kulungisaka mbikudulu ya metadila Mesia.

⁷ Lukwikilu na ndinga ya baprofete ya Nzambi kesadisaka beto na kubakisa zina ya Mesia. Na kati ya bambikudulu yina vandaka kutubila Mesia yina kele na Masonuku ya Kiebreo, bansoniki mingi ya Masonuku ya Kigreki ya Bukristu vandaka kulungisa yo mbala mosi na Yezu. Mu mbandu: Yezu kubutukaka na mwense na Betelemi. (Yezaya 7:14; Mishe 5:1; Matayo 1:18-23; Luka 2:4-11) Bo basisaka yandi na nsi ya Ezipte, ebuna bo fwaka bana ya fyoti mingi na nima ya kubutuka na yandi. (Yeremia 31:15; Ozea 11:1; Matayo 2:13-18) Yezu nataka kilo ya bamaladi na beto. (Yezaya 53:4; Matayo 8:16, 17) Mutindu bo zabisaka yo, yandi kotaka na Yeruzalemi na zulu ya mwana mpunda. (Zakaria 9:9; Yoane 12:12-15) Bangogo ya muyimbi-bankunga kulunganaka ntangu bo fwaka Yezu na zulu ya nti ntangu basoda kukabulaka bilele na yandi mpi kubudila bilele na yandi ya kati zeke. (Nkunga 22:18; Yoane 19:23, 24) Mutindu mikwa na yandi kubukanaka ve mpi nde bo kotisaka yandi dionga kulungisaka mpi mbikudulu. (Nkunga 34:20; Zakaria 12:10; Yoane 19:33-37) Yai kele kaka mwa bambandu ya bambikudulu ya ketubila Mesia ya bansoniki yina Nzambi kupesaka mpeve na yandi na kusonika Biblia kusadilaka sambu na kutuba mambu yina kulunganaka na Yezu.b

Beno yamba Ntotila yina kele Mesia!

 8. Nani kele Nkuluntu ya Bilumbu, mpi nki mutindu mbikudulu yina kele na Daniele 7:9-14 kulunganaka?

⁸ Na mvula ya ntete ya Ntotila ya Babilone Baltazare, Yehowa kusongaka profete na yandi Daniele ndosi mosi ti bambona-meso ya kepesa boma kibeni. Profete kumonaka ntete bambisi iya ya nene. Wanzio ya Nzambi kutubaka nde yo vandaka “bamfumu iya,” ya kele kifwani ya bangolo ya inza ya mvimba yina zolaka kulandana. (Daniele 7:1-8, 17) Na nima, Daniele kumonaka Yehowa, “Nkuluntu ya Bilumbu,” yandi mevanda na lukumu yonso na kiti na yandi ya kimfumu. Yandi kesambisa mpi mebedisa bambisi yai yonso iya, yandi mekatula bo na kimfumu mpi yandi mefwa bo. Ebuna, Nzambi mepesa kimfumu yina fwete yala kimakulu na zulu ya “bantu yonso ya nsi-ntoto ata bo kele nki dikanda to nki ndinga” na “[muntu mosi yina vandaka kumonana bonso mwana ya muntu, NW].” (Daniele 7:9-14) Yai mbikudulu ya kyese mpenza ya ketubila kubaka kiyeka ya kimfumu yina “Mwana ya muntu,” Yezu Kristu, kubakaka na zulu na mvu 1914!​—Matayo 16:13.

9, 10. (a) Bitini ya kuswaswana ya kiteki yina ya ndosi vandaka kutendula nki? (b) Inki mutindu nge tatendula kulungana ya Daniele 2:44?

⁹ Daniele kuzabaka nde Nzambi muntu ke “tulaka bantotila ti kukatula bo.” (Daniele 2:21) Sambu yandi vandaka kutula lukwikilu na Yehowa, “Nzambi yina ke songaka mambu ya kinsweki,” profete yai kubakisaka ntendula ya ndosi ya nti ya nene mpi ya nda yina Ntotila ya Babilone, Nabukodonozore kulotaka. Bitini na yo ya kuswaswana vandaka kubasika mpi kubwa ya bangolo ya inza bonso Babilone, Medo-Persia, Grese, mpi Roma. Nzambi kusadilaka mpi Daniele sambu na kusonga mambu yina tasalama na inza banda na ntangu na beto mpi mata.​—Daniele 2:24-30.

¹⁰ Profete kutubaka nde, “Ntangu ya bantotila yina ta yala, Nzambi ya zulu ta tula ntotila mosi yina ta yalaka tii kuna; ntotila yina bantotila ya nkaka ta bedisaka yandi ve, kansi yandi ta fwa bantotila yonso ebuna yandi ta yalaka tii kuna.” (Daniele 2:44) Ntangu “ntangu ya bo tulaka sambu na bantu ya makanda” kusukaka na mvu 1914, Nzambi tulaka Kimfumu ya zulu na nsi ya kiyeka ya Kristu. (Luka 21:24, NW; Kusonga 12:1-5) Na ngolo ya Nzambi, Kimfumu ya Mesia ya bo mefwanisa na “ditadi” bo katulaka yo na zulu ya “ngumba” ya kimfumu ya Nzambi ya ntoto ya mvimba. Na Armagedoni ditadi yango tabwisa kiteki yina mpi kukumisa yo putulu. Luyalu yina kele bonso ngumba ya mesimba “ntoto yonso,” Kimfumu ya Mesia tayala kimakulu.​—Daniele 2:35, 45; Kusonga 16:14, 16.c

11. Kubaluka yina Yezu kubalukaka vandaka kifwani ya nki, mpi nki mbona-meso yina kusalaka na Piere?

¹¹ Sambu yandi vandaka kuyindula kiyeka ya Kimfumu na yandi, Yezu zabisaka balongoki na yandi nde: “Mono ke tubila beno mambu ya kieleka: Bantu ya nkaka kele awa, bo tafwa ve tii kuna ya bo ta mona Mwana-muntu me kwisa na Kimfumu na yandi.” (Matayo 16:28) Bilumbu sambanu na nima, Yezu nataka Piere, Yakobo, ti Yoane na ngumba mosi ya nda, kuna yandi balukaka mutindu yankaka na meso na bo. Ntangu dituti mosi ya nsemo kufikaka bantumwa, Nzambi kutubaka nde: “Yai kele Mwana na mono ya mono ke zolaka mingi; mono ke na kiese mingi sambu na yandi. Beno wila yandi!” (Matayo 17:1-9; Marko 9:1-9) Dyambu yai vandaka mpenza kifwani ya nkembo ya Kimfumu yina Kristu tavanda na yo! Mpila ya kuyituka kele ve kana Piere kuvilaka ve mbona-meso yina ya kusimbaka ntima na yandi mpi yandi tubaka nde: “Yo yina, beto ke luta kutula ntima na nsangu yina baprofete vandaka kuzabisa.”​—2 Piere 1:16-19.d

12. Sambu na nki yai kele mpenza ntangu ya kumonisa lukwikilu na beto na ndinga ya baprofete ya Nzambi?

¹² “Ndinga ya baprofete” kezola kutuba ve kaka Masonuku ya Kiebreo yina ketubilaka Mesia, kansi yo kele mpi mambu yina Yezu kutubaka nde yandi takwisa na ‘ngolo ti lukumu ya nene.’ (Matayo 24:30) Kubaluka yina Yezu kubalukaka kusongaka nde ndinga ya baprofete kele ya kyeleka sambu na yina metala kukwisa ya lukumu ya Kristu na kiyeka ya Kimfumu. Kubika fyoti, kusonga na yandi na lukumu tatendula lufwa ya bantu yina kekwikilaka ve mpi yo tatendula lusakumunu sambu na bantu yina kekwikilaka. (2 Tesalonika 1:6-10) Kulungana ya bambikudulu ya Biblia kemonisa nde yai kele “bilumbu ya nsuka.” (2 Timoteo 3:1-5, 16, 17; Matayo 24:3-14) Muntu ya Ntete yina Yehowa tasadila sambu na kulungisa luzolo na yandi, Mishele, yina kele Yezu Kristu, kele penepene sambu na kukwisa kusukisa inza ya bima yai ya mbi na ntangu ya “mpasi ya nene.” (Matayo 24:21, NW; Daniele 12:1) Ebuna, yai kele mpenza ntangu ya kumonisa nde beto kele na lukwikilu na ndinga ya baprofete ya Nzambi.

Vanda kaka na lukwikilu na Ndinga ya Baprofete ya Nzambi

13. Inki kima lenda sadisa beto na kuvanda kaka na zola na Nzambi mpi kulunda lukwikilu na beto ngolo na ndinga na yandi?

¹³ Ntembe kele ve nde beto vandaka na kyese ntangu beto longukaka mbala ya ntete mutindu ndinga ya baprofete ya Nzambi ke na kulungana. Kansi banda ntangu yina, keti lukwikilu na beto mekuma fyoti mpi zola na beto mekulumuka? Beto meka ve kukuma bonso Bakristu ya Efezo yina ‘vandaka kuzola dyaka ve mutindu bo vandaka kuzola ntete.’ (Kusonga 2:1-4) Ata beto mesadila dezia Yehowa bamvula ikwa, beto mpi lenda vidisa zola na beto, katula kaka kana beto ‘landa kaka na kusosa ntete Kimfumu ya Nzambi ti mambu yina ya yandi ke zolaka’ na mpila nde beto bumba kimvwama na beto na zulu. (Matayo 6:19-21, 31-33) Kulonguka Biblia na mudindu, kukwenda mbala na mbala na balukutakanu ya Bukristu, mpi kusala kisalu ya kulonga Kimfumu na kikesa yonso tasadisa beto na kuvanda kaka na zola na Yehowa, na Mwana na yandi, ti na Masonuku. (Nkunga 119:105; Marko 13:10; Baebreo 10:24, 25) Ebuna, mambu yai tasadisa lukwikilu na beto na ndinga ya Nzambi na kuvanda kaka ngolo.​—Nkunga 106:12.

14. Inki matabisi Bakristu ya kupakulama kebakaka sambu na lukwikilu na bo na ndinga ya baprofete ya Yehowa?

¹⁴ Kaka mutindu ndinga ya baprofete ya Nzambi kulunganaka na ntangu ya ntama, beto fwete tula mpi lukwikilu nde mambu yina yo ketuba sambu na bilumbu kekwisa yo talungana mpi mutindu mosi. Mu mbandu, kuvanda ya Kristu na nkembo ya Kimfumu mekuma kyeleka ntangu yai, ebuna Bakristu yina kele bapakulami yina kubikalaka ya kwikama na ntwala ya lufwa kemona bubu yai kulungana ya lusilu yai ya kele mbikudulu: “Na bantu yina ta nunga, mono ta pesa bo nswa na kudia bambuma ya nti ya moyo kele na kilanga ya Nzambi.” (Kusonga 2:7, 10; 1 Tesalonika 4:14-17) Yezu mendima na kupesa bantu yai ya tanunga dibaku ya kitoko ya “kudia bambuma ya nti ya moyo” na “paladisu ya Nzambi.” Na lufutumuku na bo mpi na nsadisa ya Yezu Kristu, Yehowa, “Mfumu ya nene yina kele ya mvula na mvula. Yandi kele Nzambi yina ke fwaka ve, yina ke monikaka ve; yandi kele mpi kaka Nzambi mosi mpamba,” kepesaka bo nitu yina lenda fwa ve mpi yina lenda pola ve. (1 Timoteo 1:17; 1 Korinto 15:50-54; 2 Timoteo 1:10) Yai matabisi ya nene mpenza sambu bo monisaka zola ya kukonda nsuka na Nzambi mpi bo tulaka lukwikilu ya ngolo na ndinga ya baprofete na yandi!

15. Banani mekumaka fondasio ya “ntoto ya mpa,” mpi banani kesalaka kumosi ti bo?

¹⁵ Ntangu fyoti na nima ya lufutumuku ya bapakulami yina kufwaka sambu na kukwenda na “paladisu ya Nzambi” na zulu, ndambu ya bantu ya Izraele ya kimpeve yina kubikalaka na ntoto kubasikaka na “Babilone ya Nene,” ya kele kimvuka ya mabundu ya luvunu ya inza ya mvimba. (Kusonga 14:8; Galatia 6:16) Bo mekumaka fondasio ya “ntoto ya mpa.” (Kusonga 21:1) “Insi” mosi kubutukaka na ntangu yina, mpi yo mekumaka paladisu ya kimpeve yina keyela mbote na ntoto ya mvimba bubu yai. (Yezaya 66:8) Bibuka ya bantu yina kele bonso mameme ya kevukana na Izraele ya kimpeve ke na kuzinga na kati na yo ntangu yai, “na kitini yai ya nsuka ya bilumbu.”​—Yezaya 2:2-4, NW; Zakaria 8:23; Yoane 10:16; Kusonga 7:9.

Ndinga ya Baprofete ya Nzambi kuzabisaka dezia luzingu ya bantu ya bilumbu kekwisa

16. Inki bivuvu bantu ya kwikama yina kesadisa bapakulami kele na yo?

¹⁶ Inki kele bivuvu ya bantu ya kwikama yina kesadisa bapakulami? Bo mpi kele na lukwikilu na ndinga ya baprofete ya Nzambi, mpi kivuvu na bo kele ya kukota na Paladisu ya ntoto. (Luka 23:39-43) Kuna bo tanwa masa yina takatuka na “nzadi yina ke na masa ya moyo” ya kepesaka luzingu mpi bo tabeluka na nsadisa ya ‘matiti ya banti’ yina kele na lweka na yo. (Kusonga 22:1, 2) Kana nge kele ti kivuvu ya kitoko ya mutindu yai, bika nde nge landa na kusonga zola ya mudindu na Yehowa mpi lukwikilu na ndinga na yandi ya baprofete. Bika nde nge mpi kuvanda na kati ya bantu yina tavanda na kyese ya kuluta ya luzingu ya kukonda nsuka na Paladisu na ntoto.

17. Inki balusakumunu tasalama na luzingu na kati ya Paladisu ya ntoto?

¹⁷ Bantu ya kukonda kukuka kekukaka ve na kutendula mutindu luzingu tavanda na Paladisu ya ntoto yina ke na ntwala, kansi ndinga ya baprofete ya Nzambi kesadisa beto na kubakisa balusakumunu yina Nzambi mebumbila bantu ya bulemfu. Ntangu Kimfumu ya Nzambi tayantika kuyala kukonda ata mbeni mosi mpi ntangu luzolo na yandi talungana na ntoto bonso na zulu, ata muntu mosi ve ya mbi, ata nkutu bambisi, ‘tasala kima mosi ya mpasi to ya mbi.’ (Yezaya 11:9; Matayo 6:9, 10) Bantu ya kudikulumusa tazingaka na ntoto, mpi “bo ta zinga mbote na ngemba mpenza.” (Nkunga 37:11) Bantu ya kezinga na nzala tavanda dyaka ve, sambu ‘ntoto tafuluka na ble [nkeni] mingi, bangumba tafuluka na bima ya bilanga.’ (Nkunga 72:16) Bantu tabasisa dyaka ve mansanga ya mawa. Maladi tavanda dyaka ve, nkutu lufwa mpi tavanda dyaka ve. (Yezaya 33:24; Kusonga 21:4) Yindula ntete​—minganga kele dyaka ve, bankisi kele dyaka ve, ata balupitalu to bisika bo kesansaka bantu yina kebelaka maladi ya ntu kele dyaka ve, ata mafwa mpi ve. Yai mambu ya kitoko mpenza ya beto kekinga!

18. (a) Inki mambu bo ndimisaka Daniele nde yo tasalama? (b) Inki “matabisi” Daniele tabaka?

¹⁸ Ata maziamu ya bo kezikaka bantu tavanda dyaka na kima ve sambu bamvumbi yonso tafutumuka. Muntu yai ya mbote, Yobo vandaka mpi ti kivuvu ya mutindu yai. (Yobi 14:14, 15) Profete Daniele mpi vandaka ti kivuvu ya mutindu mosi sambu wanzio ya Yehowa kundimisaka ntima na yandi na bangogo ya kikesa yai: “Nge Daniele, kwenda kaka na ntwala tii kuna na nsuka. Nge ta fwa kansi na kilumbu ya nsuka nge ta telama na kubaka matabisi na nge.” (Daniele 12:13) Daniele kusadilaka Nzambi na kwikama yonso tii na nsuka ya luzingu na yandi. Ntangu yai, Daniele ke na kupema na lufwa, kansi yandi “ta telama” na “ntangu yandi [Nzambi] ta tedimisa bantu ya mbote na lufwa” na Luyalu ya Mvu Funda ya Kristu. (Luka 14:14) Inki “matabisi” Daniele tabaka? Ntangu yo talungana na Paladisu, mbikudulu ya Ezekiele kemonisa nde bantu ya Yehowa yonso tavanda konso muntu na kisika na yandi, ata ntoto bo takabisa yo na mpila mosi ya mbote mpi na ndonga. (Ezekiele 47:13–48:35) Yo kezola kutuba nde Daniele tavanda na kisika na Paladisu, kansi matabisi na yandi kezola kutendula mambu mingi kuluta kitini ya ntoto. Yo ketendula mpi kisika ya yandi tavanda na yo na lukanu ya Yehowa.

19. Yo kelomba kusala nki sambu na kuzinga na Paladisu ya ntoto?

¹⁹ Inki beto lenda tuba sambu na nge ti matabisi yina nge tabaka? Kana nge kele na lukwikilu na Ndinga ya Nzambi, Biblia, ntembe kele ve nde nge mpi tavanda na kuzinga na Paladisu ya ntoto. Nge lenda yindula nkutu bonso nde nge kele dezia na kati ya Paladisu yango, nge keyangalala ti balusakumunu mingi, nge keyidika ntoto, mpi nge keyamba na kyese yonso bafwa yina kefutumuka. Na kutuba ya mbote, Paladisu kele kisika mpenza ya bantu fwete zinga. Nzambi salaka bantu ya ntete sambu bo zinga na kisika ya mutindu yai. (Kuyantika 2:7-9) Ebuna yandi kezola nde bantu ya bulemfu kuzinga kimakulu na Paladisu. Keti nge tazinga na kuwakana ti mambu yina Masonuku ketuba na mpila nde nge vanda na kati ya bamiliyare ya bantu yina tazinga nsukansuka na Paladisu ya ntoto? Nge lenda vanda pana kana nge kele na zola ya kyeleka na Tata na beto ya zulu, Yehowa, mpi kana nge kele na lukwikilu ya ngolo na ndinga ya baprofete ya Nzambi.

[Banoti na nsi ya lutiti]

Inki Mutindu Nge Tavutula?

• Inki kuvandaka mbikudulu ya ntete, mpi nani kele Nkuna yina bo silaka?

• Inki mwa bambikudulu yina kutubilaka Mesia kulunganaka na Yezu?

• Inki mutindu Daniele 2:44, 45 talungana?

• Ndinga ya baprofete ya Nzambi kemonisa nde bantu ya bulemfu tavanda na luzingu ya nki mutindu na bilumbu kekwisa?

[Kifwanisu ya kele na lutiti 16]

Keti nge kele ti kivuvu ya kuzinga na Paladisu ya ntoto?