Bikala ya Kwikama na Nsungi ya “Mpasi ya Nene”

1-2. (a) Inki mambu makanda ta tuba ntama mingi ve? (b) Inki bangiufula beto ta tadila?

YINDULA nde makanda me tuba mambu yina bo me vingilaka banda ntama nde “ngemba mpi lutaninu.” Bo lenda bula ntulu nde ngemba me kota na ntoto. Makanda ta pusa beto na kuyindula nde bo ta kuka kuyala mambu yonso. Kansi bo ta kuka ve kuyala mambu yina ta salama. Sambu na nki? Biblia tubaka na ntwala nde: “Lufwa ta kwisila bo na kintulumukina . . . mpi bo ta tina ve ata fioti.”—1 Bate. 5:3.

² Beto fwete baka bamvutu na bangiufula yai ya mfunu: Inki ta salama na nsungi ya “mpasi ya nene”? Yehowa ta lomba beto na kusala nki na nsungi yina? Inki mutindu beto lenda kudibongisa ntangu yai sambu na kubikala ya kwikama na nsungi ya mpasi ya nene?—Mat. 24:21.

 3. Na kutadila Kusonga 17:5, 15-18, nki mutindu Nzambi ta fwa “Babilone ya Nene”?

³ Tanga Kusonga 17:5, 15-18. “Babilone ya Nene” ta fwa kibeni! Mutindu beto me tubila yo, makanda ta kuka ve kuyala mambu yina ta salama. Sambu na nki? Sambu “Nzambi [ta] tula na bantima na bo ngindu ya kulungisa dibanza na yandi.” Inki dibanza? Dibanza ya kufwa mabundu yonso ya luvunu ti mabundu ya Kikristu.b Nzambi ta tula dibanza na yandi na bantima ya “bibongo kumi” ya “mbisi mosi ya mfinda ya mbwaki ya ngolo.” Bibongo kumi ke monisa baluyalu yonso yina ke pesaka maboko na “mbisi ya mfinda” disongidila Nations-Unies. (Kus. 17:3, 11-13; 18:8) Ntangu baluyalu ta balukila mabundu ya luvunu, yo ta vanda luyantiku ya mpasi ya nene. Yo ta vanda mambu ya mpasi kibeni yina ta bwila bantu yonso.

 4. (a) Inki bikuma yina ta pusa makanda na kunwanisa dibundu ya luvunu? (b) Ziku bantu yina vandaka na bimvuka yango ta sala nki?

⁴ Beto me zaba ve bikuma yina ta pusa makanda na kunwanisa Babilone ya Nene. Ziku bo lenda tuba nde mabundu ya luvunu ke salaka nde ngemba kuvanda ve na ntoto mpi mbala na mbala bo ke kudikotisaka na mambu ya politiki. Bo lenda tuba mpi nde mabundu ya luvunu me kumaka ti mbongo mpi bimvwama mingi. (Kus. 18:3, 7) Ntangu bo ta nwanisa mabundu ya luvunu, yo ke monana nde bo ta fwa ve bantu yonso ya mabundu yina ya luvunu. Kansi, yo ke monana nde makanda ta fwa bimvuka ya mabundu ya luvunu. Ntangu bo ta fwa bimvuka ya mabundu yina ya luvunu, bantu yina vandaka na bimvuka yango ta bakisa nde bamfumu na bo vandaka kukusa bo mpi ziku bo ta sosa kubasika na bimvuka yango.

 5. Yehowa me silaka nki sambu na mpasi ya nene mpi sambu na nki?

⁵ Biblia ke tubilaka ve bantangu ikwa lufwa ya Babilone ya Nene ta baka, kansi beto me zaba nde yo ta baka ve ntangu mingi. (Kus. 18:10, 21) Yehowa me silaka nde yandi ta ‘kumisa nkufi bilumbu’ ya mpasi ya nene sambu na “bantu yina yandi me solaka” mpi sambu dibundu ya kieleka kuguluka. (Mar. 13:19, 20) Yehowa ta lomba beto na kusala nki banda na nsungi ya mpasi ya nene tii na bitumba ya Armagedoni?

 6. Sambu na nki yo me fwana kaka ve na kukabwana ti dibundu ya luvunu?

⁶ Mutindu beto tubilaka yo na disolo ya me luta, Yehowa ke lomba bansadi na yandi na kukabwana ti Babilone ya Nene. Kansi, yo ke lombaka kusala mambu mingi. Lukanu na beto fwete vanda ya kunwanina dibundu ya kieleka disongidila lusambu ya bunkete ya Yehowa. Beto lenda sala yo na mitindu zole.

 7. (a) Inki mutindu beto fwete kangama kaka na bansiku ya lunungu ya Yehowa? (b) Inki mutindu Baebreo 10:24, 25 ke monisa mfunu ya kukwenda na balukutakanu, mingi-mingi na ntangu yai?

⁷ Ya ntete, beto fwete kangama kaka na bansiku ya lunungu ya Yehowa. Beto fwete buya bikalulu ya mbi ya nsi-ntoto mpi bansiku na yo. Mu mbandu, beto fwete ndima ve kikalulu ya kuvukisa nitu ya mitindu yonso, makwela ya babakala ti babakala to bankento ti bankento mpi mutindu ya nkaka ya mbi ya kuvukisa nitu. (Mat. 19:4, 5; Bar. 1:26, 27) Ya zole, beto fwete landa kuvukana ti bampangi. Beto ke vukanaka na Banzo ya Kimfumu, na banzo ya bampangi to na kinsweki. Yo vanda beto ke kutana ti mambu ya nki mutindu, beto ta yambula ve kikalulu na beto ya kukwenda na balukutakanu. Ya kieleka, beto fwete vukanaka “diaka mingi kuluta sambu [beto] ke mona kilumbu ke finama.”—Tanga Baebreo 10:24, 25.

 8. Ziku, nki mutindu nsangu na beto ta soba na bilumbu ke kwisa?

⁸ Na nsungi ya mpasi ya nene, ziku nsangu na beto ta soba. Bubu yai, beto ke longa nsangu ya mbote ya Kimfumu mpi ke sala ngolo na kukumisa bantu balongoki. Kansi na ntangu yina, beto ta longa na pwelele nsangu ya mpasi yina kele bonso mvula ya ngolo ya matadi. (Kus. 16:21) Beto ta zabisa nsangu ya lufwa ya nsi-ntoto ya Satana. Na ntangu yina, beto ta zaba kibeni nsangu yina beto ta longa mpi mutindu ya kulonga yo. Keti beto ta sadila kaka bametode yina beto ke sadilaka banda ntama na kisalu ya kusamuna? Keti beto ta sadila bametode ya nkaka? Beto ke vingila kumona mutindu mambu ta salama. Yo vanda buna to ve, yo ke monana nde beto ta longa na kikesa yonso nsangu ya lusambisu ya Yehowa.—Ezek. 2:3-5.

 9. Inki mutindu makanda ta tadila nsangu na beto kansi nki beto fwete ndima?

⁹ Ntembe kele ve nde nsangu na beto ta sala nde makanda kubuyisa beto na kusamuna kimakulu. Mutindu beto ke tudilaka Yehowa ntima na kusadisa beto na kisalu ya kusamuna, beto ta tudila yandi ntima sambu yandi sadisa beto. Beto fwete ndima nde Nzambi ta pesa beto ngolo mingi sambu na kusala luzolo na yandi.—Mika 3:8.

10. Mutindu Yezu tubaka na Luka 21:25-28, bantu mingi ta sala nki na mambu yina ta salama na mpasi ya nene?

¹⁰ Tanga Luka 21:25-28. Na mpasi ya nene, bantu ta wa mpasi mingi ntangu bo ta mona bima yina bo vandaka kutudila ntima ke beba mpi ke fwa. Bo ta wa “mpasi” ti boma ya ngolo sambu yo ta vanda nsungi ya kuluta mudidi ya luzingu ya bantu. (Sef. 1:14, 15) Na ntangu yina, yo ke monana kibeni nde luzingu ta vanda mpasi kuluta ata sambu na bansadi ya Yehowa. Sambu beto ke kotaka ve na mambu ya nsi-ntoto, ziku beto ta kutana ti bampasi, mu mbandu kukonda bima ya kuzingila.

11. (a) Sambu na nki bantu ta tula dikebi na bo yonso kaka na bambangi ya Yehowa? (b) Sambu na nki beto fwete wa ve boma ya mpasi ya nene?

¹¹ Na nima ya lufwa ya mabundu ya luvunu, bantu ya mabundu yango ta wa makasi ntangu bo ta mona Bambangi ya Yehowa ke landa kusambila Yehowa. Beto lenda yindula mavwanga yina bo ta basisa, ata na nzila ya Internet. Makanda mpi mfumu na bo Satana, ta menga beto sambu dibundu na beto mpamba ta bikala. Bo ta mona nde bo me lungisa ve lukanu na bo ya kufwa mabundu yonso. Yo yina, dikebi na bo yonso ta vanda kaka na beto. Na mutindu yina makanda ta kuma Gogi ya Magogi.c Bo ta vukana sambu na kunwanisa bansadi ya Yehowa. (Ezek. 38:2, 14-16) Beto lenda kudiyangisa kana beto yindula mambu yina ta salama sambu beto ke zaba ve pwelele mutindu yo ta salama. Ata mpidina beto fwete wa ve boma ya mpasi ya nene, beto fwete ndima nde Yehowa ta pesa bantuma yina ta gulusa beto. (Nk. 34:19) Mpidina, beto ta “telama ya kusungama mpi [beto ta] tedimisa ba-ntu na [beto]” sambu beto ta bakisa nde “luguluku na [beto] me finama.”d

12. Inki mutindu “mpika ya kwikama mpi ya mayele” ke sadisaka beto na kubikala ya kwikama na mambu yina ta salama na bilumbu ke kwisa?

¹² “Mpika ya kwikama mpi ya mayele” ke sadisaka beto na kubikala ya kwikama na mpasi ya nene. (Mat. 24:45) Yandi ke salaka yo na mitindu mingi, mu mbandu: lukutakanu ya distrike ya 2016 tii 2018 yina kwisaka na ntangu ya me fwana. Lukutakanu yai siamisaka beto na kuyedisa bikalulu yina kele mfunu na ntangu yai ya kilumbu ya Yehowa me kuma pene-pene. Beto tadila na bunkufi bikalulu yango.

13. Inki mutindu beto lenda kumisa ngolo kwikama na beto na Yehowa mpi sambu na nki?

¹³ Kwikama: Ntu-diambu ya lukutakanu ya distrike ya 2016 vandaka “Bikala ya Kwikama na Yehowa!” Lukutakanu yai longaka beto nde kana kinduku na beto ti Yehowa kele ngolo, beto ta bikala ya kwikama na yandi. Yo yibusaka beto nde beto lenda kwenda pene-pene ya Yehowa kana beto ke samba yandi na masonga yonso mpi ke longuka Ndinga na yandi konso kilumbu. Mpidina yo ta sadisa beto na kununga bampasi. Sambu nsi-ntoto ya Satana me kuma na nsuka, kwikama na beto na Nzambi mpi na Kimfumu ta mekama diaka ngolo kuluta. Ziku bantu ta landa kaka kuvweza beto. (2 Pie. 3:3, 4) Yo lenda salama mingi-mingi kana beto kota ve na mambu ya politiki. Beto fwete kumisa ngolo kwikama na beto bubu yai sambu beto bikala ya kwikama na mpasi ya nene.

14. (a) Inki nsoba ta salama sambu na bampangi yina ke twadisaka beto? (b) Sambu na nki yo ta lomba nde beto monisa kwikama na ntangu yina?

¹⁴ Na mpasi ya nene, nsoba mosi ta salama sambu na bampangi yina ke twadisaka beto. Na ntangu mosi buna, Bakristu yonso yina bo me tulaka mafuta ya kele ntete na ntoto ta kwenda na zulu sambu na kunwana bitumba ya Armagedoni. (Mat. 24:31; Kus. 2:26, 27) Yo ke tendula nde Nto-Kimvuka ta vanda diaka ve ti beto awa na ntoto. Ata mpidina, bo ta yidika kimvuka ya nene. Bampangi ya me fwana na kati ya mameme ya nkaka ta twadisa bisalu. Yo ta lomba nde beto monisa kwikama mutindu beto ta lemfukila bampangi yai mpi kulanda lutwadisu yina Nzambi ta pesa na nzila na bo. Beto ta guluka kaka kana beto ke landa lutwadisu na bo!

15. Inki mutindu beto lenda kumisa ngolo kikalulu na beto ya kukanga ntima mpi sambu na nki?

¹⁵ Kukanga-Ntima: Ntu-diambu ya lukutakanu ya distrike ya 2017 vandaka “Kuyambula Ve!” Lukutakanu yina sadisaka beto na kukumisa ngolo kikalulu na beto ya kukanga ntima na bampasi. Beto longukaka nde kana beto ke kangaka ntima, yo kele sambu beto ke tulaka ntima na Yehowa kansi ve sambu mambu ke tambula mbote. (Bar. 12:12) Beto fwete vila ve ata fioti lusilu yai ya Yezu: “Muntu yina ke kanga ntima tii na nsuka ta guluka.” (Mat. 24:13, noti na nsi ya lutiti) Lusilu yai ke tendula nde beto fwete bikala ya kwikama na konso mpasi yina beto ke kutana ti yo. Kana beto ke kanga ntima na konso mpasi, beto ta kuma ngolo na ntwala nde mpasi ya nene kuyantika.

16. Na wapi kikesa ya kieleka ke katukaka mpi nki mutindu beto lenda monisa kikesa mingi bubu yai?

¹⁶ Kikesa: Lukutakanu ya distrike ya 2018 vandaka ti ntu-diambu ‘Vanda Kikesa’! Lukutakanu yai yibusaka beto nde kikesa ke katukaka ve na makuki na beto mosi. Beto ke kumaka ti kikesa ya kieleka kana beto ke tudila Yehowa ntima. Inki mutindu beto lenda kuma diaka kutudila Yehowa ntima mingi? Kana beto ke tanga Ndinga ya Yehowa konso kilumbu mpi ke yindula mutindu yandi gulusaka bantu na yandi na ntangu ya ntama. (Nk. 68:20; 2 Pie. 2:9) Ntangu makanda ta nwanisa beto na mpasi ya nene, yo ta lomba nde beto monisa kikesa mpi kutudila diaka Yehowa ntima mingi kuluta. (Nk. 112:7, 8; Baeb. 13:6) Kana beto ke tudila Yehowa ntima bubu yai, beto ta monisa kikesa ntangu Gogi ta nwanisa beto.e

17. Sambu na nki beto fwete wa ve boma ya Armagedoni? (Tala kifwanisu ya lutiti ya zulu.)

¹⁷ Mutindu disolo ya me luta monisaka yo, bantu mingi me zinga kaka na bilumbu ya nsuka. Beto mpi ke zola kuguluka na mpasi ya nene. Bitumba ya Armagedoni ta fwa nsi-ntoto yai ya Satana. Ata mpidina, beto fwete wa ve boma. Sambu na nki? Sambu yo ta vanda bitumba ya Nzambi. (Bing. 1:33; Ezek. 38:18-20; Zek. 14:3) Ntangu Yehowa ta pesa Yezu Kristu nswa, yandi ta twadisa basoda na bitumba. Yandi ta vanda ti Bakristu yina bo me tulaka mafuta ya ta futumuka mpi bamilio ya bawanzio. Bo ta nwanisa Satana, bademo mpi basoda ya nsi-ntoto yai.—Dan. 12:1; Kus. 6:2; 17:14.

18. (a) Inki lusilu Yehowa ke pesaka beto? (b) Inki mutindu Kusonga 7:9, 13-17 ke sadisa beto na kutula ntima na bilumbu ke kwisa?

¹⁸ Yehowa me silaka beto nde: “Ata kinwaninu mosi ve ya bo ta sadila sambu na kunwanisa nge ta nunga.” (Yez. 54:17) “Kimvuka mosi ya nene” ya bansadi ya kwikama ya Yehowa ta guluka na “mpasi ya nene.” Na nima, bo ta landa kusadila yandi kisalu ya santu. (Tanga Kusonga 7:9, 13-17.) Biblia ke pesa beto kibeni bikuma yina ke pusa beto na kutula ntima nde beto ta guluka na bilumbu ke kwisa! Beto me zaba nde “Yehowa ke taninaka bantu ya kwikama.” (Nk. 31:23) Bantu yonso yina ke zolaka mpi ke sambilaka Yehowa ta vanda na kiese ntangu bo ta mona mutindu yandi ta santisa zina na yandi ya santu.—Ezek. 38:23.

19. Inki kivuvu ke vingila beto na bilumbu ke kwisa?

¹⁹ Yindula bangogo yina Biblia zolaka kusadila na 2 Timoteo 3:2-5 kana yo vandaka kutubila bantu yina kele na nsi-ntoto ya mpa. (Tala lupangu “Bikalulu Yina Bantu Ta Monisaka na Nsi-Ntoto ya Mpa.”) Mpangi George Gangas,f yina vandaka na Nto-Kimvuka tubaka mutindu yai: “Ntangu bantu yonso ta sambila Yehowa nsi-ntoto ta kuma kisika mosi ya kitoko. Ntama mingi ve nge ta vanda ti dibaku ya kuzinga na nsi-ntoto ya mpa. Nge ta zinga kimakulu mutindu Yehowa ke zingaka.” Yo kele kivuvu mosi ya kitoko kibeni!