‘Mpika ya Kwikama’ Menunga Kumekama!

“Ntangu me lunga ya Nzambi ta yantika kusambisa bantu; bantu ya ntete ya yandi ta sambisa kele bantu na yandi.”​—1 PIERE 4:17.

 1. Inki Yezu kumonaka ntangu yandi kwisaka kutala “mpika”?

NA Pantekoti ya mvu 33 ya T.B., Yezu kuponaka “mpika” mosi ya fwete pesa “bantu ya kisalu ya nzo” na yandi madya na ntangu ya mbote. Nzambi kutulaka Yezu Ntotila na mvu 1914, ebuna ntangu fyoti na nima, lere ya kwisa kutala “mpika” yango kulungaka. Yandi monaka nde bamambre mingi ya kimvuka ya “mpika” kuvandaka ya “kwikama mpi ya mayele.” Yo yina, yandi pesaka yandi kiyeka ya kutala “bima na yandi yonso.” (Matayo 24:45-47) Kansi, mpika ya mbi mpi kumonikaka. Mpika yango kuvandaka ve ya kwikama, yandi vandaka mpi ve mayele.

‘Mpika Yina Kele ya Mbi’

2, 3. “Mpika yina kele muntu ya mbi” kukatukaka na wapi, mpi yandi sukaka nki mutindu?

² Na nima ya kutubila “mpika ya kwikama mpi ya mayele,” Yezu kutubilaka mbala mosi mpika ya mbi. Yandi tubaka nde: “Kana mpika yina kele muntu ya mbi, yandi ta tuba na ntima na yandi nde: ‘Mfumu na mono me sukinina na kwisa kuvutuka’, ebuna yandi ta yantika kubula bampika yina ya nkaka, yandi ta yantika kudia ti kunwa kisika mosi ti bantu yina ke laukaka malafu. Ebuna mfumu na yandi ta kwisa kukuma na kilumbu yina ya mpika yango ke vingila yandi ve, na ntangu ya yandi zaba ve. Mfumu ta pesa yandi ndola ya ngolo mpenza, yandi ta tula yandi na ndonga ya bantu ya luvunu. Kuna yandi ta dilaka, yandi ta kangisaka meno na yandi ngolo.” (Matayo 24:48-51) Bangogo “mpika yina kele muntu ya mbi” kebenda dikebi na beto na bangogo yina ya Yezu kutubaka ntete sambu na yina metala mpika ya kwikama mpi ya mayele. Ya kyeleka, ‘mpika ya mbi’ kukatukaka na kimvuka ya mpika ya kwikama.a Inki mutindu?

³ Na ntwala ya mvu 1914, bamambre mingi ya kimvuka ya mpika ya kwikama kuvandaka ti bivuvu ya ngolo ya kukutana ti Bakala ya makwela na zulu na mvula yina, kansi bivuvu na bo kulungaka ve. Dyambu yai ti mambu yankaka kusalaka nde bamingi kulemba mpi kuwa makasi. Bankaka na kati na bo kumaka “kubula” bantu yina kuvandaka ntete bampangi na bo na kutuba mpi na kinduku ya bo salaka ti “bantu yina ke laukaka malafu,” disongidila, mabundu ya Kikristu.​—Yezaya 28:1-3; 32:6.

 4. Inki Yezu kusalaka ‘mpika ya mbi’ ti bayina yonso kumonisaka mpeve ya mutindu mosi?

⁴ Nsukansuka, bantu yai ya kuvandaka ntete Bakristu kuzabanaka nde bo vandaka ‘mpika ya mbi,’ mpi Yezu kupesaka bo “ndola ya ngolo mpenza.” Inki mutindu? Yandi buyaka bo, mpi bo vidisaka kivuvu na bo ya kuzinga na zulu. Kansi, yandi fwaka bo ve na mbala mosi. Yo lombaka nde bo dila ntete na nsungi mosi buna mpi bo kangisa meno na bo ngolo ‘na mpimpa, na nganda’ ya dibundu ya Bukristu. (Matayo 8:12) Banda na ntangu yango yina, ndambu ya bapakulami yankaka memonisaka mpeve ya mbi ya mutindu mosi, bo mekumaka ‘mpika ya mbi.’ Bantu yankaka yina kuvandaka na kibuka ya “mameme ya nkaka” kulandaka mbandu na bo ya kukonda kwikama. (Yoane 10:16) Bambeni ya Kristu yonso ya mutindu yai kezingaka na mpimpa ya kimpeve ya mutindu mosi yina kele na “nganda.”

 5. Inki mpika ya kwikama mpi ya mayele kusalaka, kansi nki ‘mpika ya mbi’ kusalaka?

⁵ Ata mpidina, mpika ya kwikama mpi ya mayele kukutanaka ti mimekamu bonso yina ya ‘mpika ya mbi’ kukutanaka na yo. Kansi, na kisika ya kuwa makasi, bo ndimaka kuvutuka dyaka na nzila ya mbote. (2 Korinto 13:11) Zola na bo sambu na Yehowa ti bampangi na bo kukumaka dyaka ngolo. Yo yina, bo mekumaka kusimba “mambu ya kieleka mutindu dikunzi ke simbaka nzo” na ‘bilumbu ya nsuka’ ya nsungi yai ya mavwanga.​—1 Timoteo 3:15; 2 Timoteo 3:1.

Bana-Bankento ya Mayele mpi ya Bazoba

 6. (a) Inki kingana Yezu kupesaka sambu na kumonisa mayele ya kimvuka ya mpika na yandi ya kwikama? (b) Inki nsangu Bakristu ya kupakulama kusamunaka na ntwala ya mvu 1914?

⁶ Na nima ya kutubila “mpika yina kele muntu ya mbi,” Yezu kutaka bingana zole sambu na kumonisa kikuma ya kusalaka nde Bakristu ya kupakulama kumonisa nde bo kele ya kwikama mpi ya mayele kansi bankaka ve.b Ntangu yandi taka kingana ya kemonisa mayele, yandi tubaka nde: “Na kilumbu yina Kimfumu ya Nzambi ta fwanana na bana-bankento yina kumi bakaka bamwinda na bo, bo basisaka sambu na kwenda kukutana na bakala yina ke kwela. Na kati ya bana-bankento yango, bana-bankento tanu vandaka bazoba, kansi tanu ya nkaka vandaka bantu ya mayele. Bana-bankento yina tanu ya kukonda mayele bakaka bamwinda na bo, kansi bo bakaka ve ndambu ya mafuta ya nkaka sambu na bamwinda yina. Kansi bana-bankento yina ya mayele bakaka milangi ya mafuta sambu na bamwinda na bo.” (Matayo 25:1-4) Bana-bankento yina kumi keyibusa beto Bakristu ya kupakulama yina kuzingaka na ntwala ya mvu 1914. Bo bakisaka nde kubikaka fyoti bakala ya makwela, Yezu Kristu, kumonana. Yo yina, bo “basikaka sambu na kwenda kukutana” ti yandi, na kusamunaka na kikesa yonso nde “ntangu ya kupesamaka na makanda” tasuka na mvu 1914.​—Luka 21:24, NW.

 7. Inki ntangu mpi sambu na nki Bakristu ya kupakulama ‘kulalaka ka bo,’ na mutindu mosi ya kimpeve?

⁷ Bo longaka kyeleka. Ntangu ya kupesamaka na makanda kusukaka mpenza na mvu 1914, mpi Kimfumu ya Nzambi yina Kristu Yezu ketwadisa yantikaka kuyala. Kansi, yo salamaka na mutindu mosi ya kukonda kumonana na zulu. Na ntoto, bantu yantikaka kumona “mpasi” yina Biblia kutubilaka na ntwala. (Kusonga 12:10, 12) Nsungi mosi ya kumekama kuyantikaka. Sambu bo vandaka kubakisa ve mambu pwelele, Bakristu ya kupakulama kuyindulaka nde “bakala yina ke kwela sukininaka mingi na kwisa.” Sambu bo waka kiseku mpi inza kumaka kumenga bo, bo yonso kulembaka nitu mpi nsukansuka, bo yambulaka kubongisa kisalu ya kusamuna na meso ya bantu yonso. Bonso bana-bankento yina bo ketubila na kingana, na mutindu mosi ya kimpeve, ‘mpongi kusimbaka bana-bankento yina mpi bo lalaka ka bo,’ kaka mutindu Bakristu ya munoko mpamba ya konda kwikama kusalaka na nima ya lufwa ya bantumwa ya Yezu.​—Matayo 25:5; Kusonga 11:7, 8; 12:17.

 8. Inki mambu vandaka kusalama ntangu ndinga ya ngolo kubasikaka nde: “Bakala yina ke kwela, yandi yai!” mpi ntangu kulungaka nde Bakristu ya kupakulama kusala inki?

⁸ Na nima, na mvu 1919 kima mosi kusalamaka na kintulumukina. Beto ketanga nde: “Ntangu midi ya mpimpa lungaka, bo waka ndinga ya ngolo nde: ‘Tala bakala yina ke kwela, yandi yai! Beno kwenda kuyamba yandi!’ Bana-bankento yina kumi telamaka na mpongi, bo yantikaka kuyidika bamwinda na bo.” (Matayo 25:6, 7) Kaka na ntangu mambu vandaka kumonana nde ata dyambu mosi tasalama dyaka ve, bo waka ndinga ya ngolo ketubila bo nde beno sala kisalu! Na mvu 1918, Yezu, ‘muntu yina ta kwisa kuzabisa kuwakana,’ kukwisaka mpenza na tempelo ya kimpeve ya Yehowa sambu na kutala mpi kuyobisa dibundu ya Nzambi. (Malashi 3:1) Ntangu yai, yo lombaka nde Bakristu ya kupakulama kubasika na nganda sambu na kwenda kukutana ti yandi na kibansala ya ntoto ya tempelo yango. Lere ya bo fwete “pela bonso ntangu” kulungaka.​—Yezaya 60:1; Filipi 2:14, 15.

9, 10. Na mvu 1919, sambu na nki Bakristu mingi kuvandaka “mayele” kansi bankaka “bazoba”?

⁹ Kansi kinga! Na kingana yina, bana-bankento yankaka kukutanaka ti dyambu mosi ya mpasi. Yezu kulandaka na kutuba nde: “Ebuna bana-bankento yina ya kukonda mayele tubilaka bayina ya mayele nde: ‘Beno pesa beto ndambu ya mafuta na beno, sambu bamwinda na beto ke zola kufwa.’” (Matayo 25:8) Kana mafuta kukondaka, bamwinda lendaka kupela ve. Mafuta ya bamwinda keyibusa beto kyeleka ya Ndinga ya Nzambi ti mpeve na yandi, yina kepesaka bansambidi ya kyeleka ngolo ya kunata nsemo. (Nkunga 119:130; Daniele 5:14) Na ntwala ya mvu 1919, Bakristu ya kupakulama ya mayele kusosaka mpenza kubakisa mambu yina Nzambi vandaka kuzola nde bo sala, ata bo vandaka ya kulemba na nsungi mosi ya nkufi. Yo yina, ntangu ndinga ya ngolo kubasikaka nde bo pesa nsemo, bo vandaka ya kuyilama na kusala yo.​—2 Timoteo 4:2; Baebreo 10:24, 25.

¹⁰ Kansi, bapakulami yankaka, kuvandaka ve ya kuyilama na kusala bibansa to kikesa mingi, ata bo vandaka mpenza na mpusa ya kuvanda kisika mosi ti Bakala ya makwela. Ebuna, ntangu lere ya kudipesa na kisalu ya kusamuna nsangu ya mbote kulungaka, bo vandaka ve ya kuyilama na kusala yo. (Matayo 24:14) Nkutu bo sosaka kulembisa bampangi na bo yina kuvandaka kikesa, ntangu bo lombaka bo ndambu ya mafuta. Na kingana ya Yezu, inki mvutu bana-bankento ya mayele kupesaka? Bo tubaka nde: “Ve, yo ta lunga ve sambu na beto ti beno. Beno kwenda kusumba yo beno mosi na magazini.” (Matayo 25:9) Mutindu mosi, na mvu 1919, Bakristu ya kupakulama ya kwikama kubuyaka na kusala ata kima mosi yina lendaka kukulumusa ngolo na bo ya kunata nsemo. Yo yina, bo nungaka mumekamu!

11. Inki kukuminaka bana-bankento ya bazoba?

¹¹ Yezu kusukisaka nde: “Ntangu yai bana-bankento ya kukonda mayele kwendaka kusumba mafuta, ebuna ntangu bo vandaka me kwenda, bakala yina ke kwela kwisaka kuyinga. Bana-bankento yina tanu vandaka me yilama bo kotaka nzila mosi ti yandi na nzo yina vandaka fete ya makwela, ebuna bantu kangaka kielo ya nzo. Na nima, bana-bankento yina ya nkaka kwisaka kukuma. Bo tubaka nde: ‘Mfumu, Mfumu, kangula beto kielo!’ Kansi bakala yina ke kwela nde: ‘Mono ke tubila beno mambu ya kieleka: Mono zaba beno ve.’” (Matayo 25:10-12) Ya kyeleka, bankaka kuvandaka ve ya kuyilama ntangu Bakala ya makwela kukumaka. Yo yina, bo nungaka ve mumekamu mpi bo vidisaka dibaku ya kukota na feti ya makwela yina kusalamaka na zulu. Yo vandaka mawa kibeni!

Kingana ya Batalanta

12. (a) Inki kingana Yezu kutaka sambu na kumonisa mayele? (b) Muntu yina ‘kwendaka na insi yankaka’ kele nani?

¹² Na nima ya kuta kingana yina kumonisaka mayele, Yezu kutaka kingana yankaka yina kumonisaka kwikama. Yandi tubaka nde: ‘Kimfumu ya Nzambi me fwanana na muntu mosi yina kanaka na kubikisa nzo na yandi sambu na kukwenda na insi yankaka; yandi bingaka bampika na yandi, yandi bikilaka bo bima na yandi. Yandi pesaka ndambu ya mbongo na konso muntu na kati na bo mutindu vandaka mayele na bo: na muntu ya ntete yandi pesaka batalanta tanu; na muntu ya zole, batalanta zole, na muntu ya tatu, talanta mosi. Ebuna yandi simbaka nzila, yandi kwenda.’ (Matayo 25:14, 15) Muntu yina bo ketubila na kingana yai kele yandi mosi Yezu, yina kukwendaka na “insi yankaka” ntangu yandi mataka na zulu na mvu 33 ya T.B. Kansi na ntwala ya kumata, Yezu bikaka “bima na yandi” na maboko ya balongoki na yandi ya kwikama. Inki mutindu?

13. Inki mutindu Yezu kuyidikaka kilanga mosi ya nene ya kisalu mpi kupesaka “bampika” na yandi nswa ya kusala kisalu ya komersa?

¹³ Ntangu yandi salaka kisalu na yandi awa na ntoto, Yezu yantikaka kuyidika kilanga mosi ya nene ya kisalu ntangu yandi vandaka kulonga nsangu ya Kimfumu na ntoto ya Izraele. (Matayo 9:35-38) Na ntwala ya kukwenda na “insi yankaka,” yandi pesaka mukumba ya kilanga yina na balongoki na yandi ya kwikama, mpi yandi tubilaka bo nde: “Yo yina, beno kwenda kukumisa bantu yonso balonguki na mono: Beno botika bo na zina ya Tata ti ya Mwana ti ya Mpeve-Santu, beno longa bo mpi na kulanda mambu yonso ya mono vandaka kusonga beno na kusala.” (Matayo 28:18-20) Na bangogo yai, Yezu kupesaka “bampika” na yandi nswa ya kusala kisalu ya komersa tii kuna yandi tavutuka, “konso muntu na kati na bo mutindu vandaka mayele na bo.”

14. Sambu na nki yo vandaka ve nde bo yonso fwete sala kisalu ya komersa kiteso mosi?

¹⁴ Bangogo yina kemonisa nde Bakristu yonso ya mvu-nkama ya ntete kuvandaka ve ti mabaku ya mutindu mosi. Bankaka, bonso Polo ti Timote, kuvandaka ti ntangu ya kudipesa mingi mpenza na kisalu ya kusamuna ti ya kulonga. Yo lenda vanda nde luzingu ya bankaka vandaka kupesa bo ve ntangu ya kudipesa mingi na kisalu. Mu mbandu, Bakristu mingi kuvandaka bampika, bankaka kuvandaka bambefo, minunu, to bo vandaka ti mikumba mingi ya dibuta. Ya kyeleka, balongoki yonso kubakaka ve mikumba ya dibundu ya kiteso mosi. Bankento ya kupakulama ti babakala yankaka ya kupakulama vandaka kulonga ve na dibundu. (1 Korinto 14:34; 1 Timoteo 3:1; Yakobo 3:1) Kansi, ata luzingu ya konso muntu kuvandaka nki mutindu, balongoki ya Kristu yonso ya kupakulama, babakala ti bankento, kubakaka mukumba ya kusala kisalu ya komersa, disongidila, kusadila mbote mabaku mpi luzingu na bo na kisalu ya Bukristu. Bampangi na bo Bakristu ya bubu yai kesala mutindu mosi.

Ntangu ya Kutala Kisalu Meyantika!

15, 16. (a) Kisalu ya kusala bakonti kuyantikaka na nki mvula? (b) Bakristu ya kwikama kubakaka inki mikumba ya mpa ya kusala kisalu ya “komersa”?

¹⁵ Kingana yango kelanda na kutuba nde: “Ntangu mingi lutaka, na nima mfumu yina kwisaka kuvutuka, ebuna yandi yantikaka kutanga mbongo na yandi ti bo.” (Matayo 25:19) Ya kyeleka, ntangu mingi mpenza na nima ya mvu 33 ya T.B., na mvu 1914, Kristu Yezu yantikaka kuyala. Bamvula tatu ti ndambu na nima, na mvu 1918, yandi kwisaka na tempelo ya kimpeve ya Nzambi sambu na kulungisa bangogo yai ya Piere kutubaka: “Ntangu me lunga ya Nzambi ta yantika kusambisa bantu; bantu ya ntete ya yandi ta sambisa kele bantu na yandi.” (1 Piere 4:17; Malashi 3:1) Ntangu ya kusala bakonti kulungaka.

¹⁶ Inki bampika to bampangi ya kupakulama ya Yezu, kusalaka ti “batalanta” yina ya Ntotila kupesaka bo? Banda na mvu 33 ya T.B. mata, yika mpi bamvula yina kunataka tii na mvu 1914, bamingi vandaka kudipesa mpenza na kusala kisalu ya “komersa” ya Yezu kupesaka bo. (Matayo 25:16) Ata na ntangu bitumba ya ntete ya inza vandaka kusalama, bo monisaka mpenza luzolo ya kusadila Mfumu. Ntangu yai yo fwanaka mpenza nde balongoki ya kwikama kubaka mabaku ya mpa ya kusala kisalu ya “komersa.” Ngidika ya bima ya ntangu yai mekuma na nsuka. Nsangu ya mbote fwete longama na inza ya mvimba. Kisalu ya ‘kukatula bambuma ya ntoto’ fwete salama. (Kusonga 14:6, 7, 14-16) Yo lombaka nde bantu ya nsuka ya kimvuka ya ble kuzabana mpi kisalu ya kuvukisa “kibuka ya nene” kusalama.​—Kusonga 7:9; Matayo 13:24-30.

17. Inki mutindu Bakristu ya kupakulama yina kele ya kwikama ‘kekota na kyese ya mfumu na bo’?

¹⁷ Ntangu ya kukatula bambuma kele ntangu mosi ya kyese. (Nkunga 126:6) Yo yina, yo fwanaka mpenza nde Yezu kutuba mutindu yai ntangu yandi pesaka bampangi na yandi ya kupakulama mukumba yankaka: “Mono pesaka nge mbongo fioti, ebuna nge me bika kusadila yo mbote. Yo yina, mono ta pesa nge mbongo mingi. Kwisa, [kukota na kyese ya mfumu na nge, NW]!’” (Matayo 25:21, 23) Dyaka, kyese ya Mfumu ya mpa yina Nzambi metula Ntotila ya Kimfumu na Yandi kele ya mingi kibeni. (Nkunga 45:1, 2, 6, 7) Kimvuka ya mpika ya kwikama kele na kyese ya mutindu mosi na ntangu bo kesala bonso mimonisi ya Ntotila mpi kekudipesa na kuyedisa mambote na yandi awa na ntoto. (2 Korinto 5:20) Kyese na bo kemonana na bangogo ya mbikudulu yai kele na Yezaya 61:10: “Beto ke mona kiese na kiese sambu na Mfumu Nzambi, ntima na beto ke sepela na Nzambi na beto! Yandi me lwatisa beto kuguluka bonso lele.”

18. Sambu na nki bantu yankaka kunungaka ve ntangu bo salaka bo bakonti, mpi nki kukuminaka bo?

¹⁸ Yo kele mawa mingi na kumona nde bantu yankaka kunungaka ve ntangu bo salaka bakonti. Beto ketanga nde: ‘Muntu yina bakaka talanta mosi kwisaka kutubila mfumu na yandi nde: “Mfumu, mono zaba nde nge kele muntu mosi ya mpasi: nge ke katulaka bambuma na bisika yina ya nge me kunaka ve, nge ke bakaka bambuma na bisika yina ya nge me mwangisaka yo ve. Mono waka boma; yo yina mono bikaka kubumba mbongo na nge na ntoto. Tala mbongo na nge yo yai.”’ (Matayo 25:24, 25) Mutindu mosi mpi, Bakristu yankaka ya kupakulama kusalaka ve “kisalu ya komersa.” Na ntwala ya mvu 1914, bo zabisaka ve bantu yankaka kivuvu na bo ti kyese yonso, mpi na 1919 bo monisaka ve luzolo ya kusala yo. Inki Yezu kusalaka bampika yai ya kukonda luzitu? Yandi botulaka bo mikumba yonso. Bo losaka ‘bo na nganda na mpimpa, kuna bo kwendaka kudila ti kukangisa meno na bo ngolo.’​—Matayo 25:28, 30.

Yandi Kelanda na Kutala Kisalu

19. Na nki mutindu Yezu landaka na kutala kisalu, mpi Bakristu yonso ya kupakulama kele ti lukanu ya kusala inki?

¹⁹ Na kutuba ya mbote, bamingi na kati ya bantu yina kukumaka bampika ya kupakulama ya Kristu na ntangu ya nsuka vandaka kesadila ntete ve Yehowa ntangu Yezu kwisaka kutala kisalu na mvu 1918. Keti Yezu kutalaka ve kisalu na bo ? Yandi talaka yo. Yezu kuyantikaka kutala kisalu kaka na mvu 1918 ti 1919, ntangu kimvuka ya mpika ya kwikama mpi ya mayele kunungaka mumekamu. Yezu kelandaka na kutala kisalu ya konso Mukristu ya kupakulama tii kuna Mukristu ya nsuka tabaka kidimbu na ilungi. (Kusonga 7:1-3) Sambu bo mebakisaka dyambu yai, bampangi ya kupakulama ya Kristu kele na lukanu ya kulanda na kusala kisalu ya “komersa” na kwikama yonso. Bo kele na lukanu ya kuvanda mayele, ya kulanda na kuvanda ti mafuta mingi na mpila nde nsemo na bo kulanda kaka na kusema. Bo mezaba nde ntangu konso muntu na kati na bo kefwa na kwikama yonso, Yezu tayamba yandi na zulu.​—Matayo 24:13; Yoane 14:2-4; 1 Korinto 15:50, 51.

20. (a) Mameme yankaka kele ti lukanu ya kusala nki bubu yai? (b) Inki dyambu Bakristu ya kupakulama kebakisaka?

²⁰ Kibuka ya nene ya mameme yankaka kelandaka mbandu ya bampangi na bo ya kupakulama. Bo kebakisaka nde kuzaba ya bo mezabaka balukanu ya Nzambi kele mukumba mosi ya nene. (Ezekiele 3:17-21) Yo yina, na lusadisu ya Ndinga ya Yehowa ti ya mpeve santu, bo mpi kelanda na kuvanda ntangu yonso ti mafuta mingi na nsadisa ya kulonguka mpi ya balukutakanu ya Bukristu. Bo kelanda mpi na kupedisa mwinda na bo, na kudipesaka na kisalu ya kusamuna ti ya kulonga mpi na kusalaka kisalu ya “komersa” kumosi ti bampangi na bo ya kupakulama. Kansi, Bakristu ya kupakulama kezabaka mbote nde Yezu kupesaka mukumba ya batalanta na maboko na bo. Bo kesalaka bakonti sambu na kumonisa mutindu ya bo kesadilaka bima ya Mfumu yina kele na ntoto. Ata bo kele fyoti, bo lenda pesa ve mukumba na bo na kibuka ya nene. Kubakisa dyambu yai kesalaka nde “mpika ya kwikama mpi ya meyele” kulanda na kubaka kisika ya ntete na yina metala kutwadisa kisalu ya komersa ya Ntotila, mpi bo kemonisaka ntonda na lusadisu yina bantu ya kibuka ya nene kepesaka bo. Kibuka ya nene kendimaka mukumba ya bampangi na bo ya kupakulama kele na yo mpi bo kekudiwaka nde bo kele ti dibaku mosi ya nene ya kusala na nsi ya lutwadisu na bo.

21. Inki ndongisila ketadila Bakristu yonso tii bubu yai?

²¹ Yo yina, beto lenda tuba nde ata bingana yina zole ketendudila beto mambu ya kusalamaka na mvu 1919 to penepene na mvula yai, na kutuba ya mbote, mambu yango ketadila Bakristu yonso ya kyeleka yina kezinga na bilumbu ya nsuka. Mpidina, yo kemonana nde, ata ndongisila yina Yezu kupesaka na nsuka ya kingana ya bana-bankento kumi ketadila ntetentete Bakristu ya kupakulama yina kuzingaka na ntwala ya mvu 1919, na kutuba ya mbote, ndongisila yango ketadila mpi konso Mukristu. Yo yina, bika nde beto yonso kuvila ve bangogo yai ya Yezu kutubaka: “Beno kangula meso, sambu beno zaba ve kilumbu to ntangu ya Mwana-muntu ta kwisa.”​—Matayo 25:13.

[Banoti na nsi ya lutiti]

Keti Nge Lenda Tendula?

• Inki ntangu Yezu kwisaka kutala balongoki na yandi, mpi nki yandi kutaka?

• Sambu na nki Bakristu yankaka ya kupakulama kumonisaka mpeve yina ‘mpika ya mbi’ kuvandaka na yo?

• Inki mutindu beto lenda monisa nde beto kele mayele na kimpeve?

• Sambu na kumonisa nde beto kelanda mbandu ya bampangi ya kupakulama ya Yezu yina kele ya kwikama, na nki mutindu beto lenda landa na kusala kisalu ya “komersa”?

[Lupangu ya kele na lutiti 29]

INKI NTANGU YEZU KEKWISA?

‘Kukwisa’ ya Yezu yina Biblia ketubila na Matayo kapu 24 ti 25 kele na mutindu mosi ya kifwani. Yo tavanda mfunu ve nde yandi ‘kwisa’ kimuntukimuntu. Kansi, ‘kukwisa’ na yandi ketendula nde yandi tatula dikebi na yandi na bantu to na balongoki na yandi, mingimingi sambu na kusambisa bo. Yo yina, na mvu 1914, yandi ‘kwisaka’ sambu na kuyantika kuyala bonso Ntotila. (Matayo 16:28; 17:1; Bisalu 1:11) Na mvu 1918 yandi ‘kwisaka’ bonso kinati-nsangu ya kuwakana mpi yandi yantikaka kusambisa bantu yina vandaka kutuba nde bo kesadilaka Yehowa. (Malashi 3:1-3; 1 Piere 4:17) Na Armagedoni, yandi ‘takwisa’ sambu na kufwa bambeni ya Yehowa.​—Kusonga 19:11-16.

Kukwisa (to, kukuma) yina Biblia ketubila na bisika mingi na Matayo 24:29-44 mpi 25:31-46 tasalama ntangu “mpasi ya nene” takwisa. (Kusonga 7:14, NW) Dyaka, kukwisa yina Biblia ketubila na bisika mingi banda na Matayo 24:45 tii na 25:30 ketadila kusambisa ya yandi kesambisaka bantu yina ketubaka nde bo kele balongoki na yandi banda na mvu 1918 tii bubu yai. Yo lenda vanda mbote ve na kutuba, mu mbandu nde matabisi ya mpika ya kwikama, ndola ya bana-bankento ya bazoba ti ndola ya mpika ya molo yina kubumbaka talanta ya Mfumu, tasalama lere Yezu ‘takwisa’ na ntangu mpasi ya nene tavanda. Kana yo vanda mutindu yina, yo tatendula nde na ntangu yina, Yezu takuta bapakulami mingi ya konda kwikama mpi yandi tayingisa bantu yankaka na kisika na bo. Kansi, Kusonga 7:3 kemonisa nde na ntangu yina, bampika ya Kristu yonso ya kupakulama tavanda bo mebakaka dezia “kidimbu” na bo.

[Kifwanisu ya kele na lutiti 27]

‘Mpika ya mbi’ kubakaka ve balusakumunu na mvu 1919

[Kifwanisu ya kele na lutiti 28]

Mwana-nkento ya mayele vandaka ya kuyilama ntangu bakala ya makwela kukumaka

[Kifwanisu ya kele na lutiti 30]

Mpika yina ya kwikama kusalaka kisalu ya “komersa”

Mpika ya zoba kusalaka yo ve

[Bifwanisu ya kele na lutiti 31]

Bapakulami mpi kibuka ya nene kelandaka na kusemisa nsemo