Yezu Kristu, Misionere ya Kuluta Nene

“Mono katukaka kuna na yandi; yandi muntu tindaka mono.”​—YOA. 7:29.

1, 2. Misionere kele nani, mpi nani beto lenda binga nde Misionere ya kuluta nene?

NA NKI nge keyindulaka ntangu nge kewaka ngogo “misionere”? Bantu yankaka keyindulaka bamisionere ya Kikristu yina mbala mingi kekudikotisaka na mambu ya politiki mpi na mambu ya mumbongo ya bansi yina bo kekwendaka. Kansi, nge muntu ya kele Mbangi ya Yehowa, mbala yankaka nge keyindulaka na bamisionere yina Nto-Kimvuka ketindaka na kusamuna nsangu ya mbote na bansi ya mutindu na mutindu na ntoto ya mvimba. (Mat. 24:14) Bamisionere yai kesadilaka ntangu ti ngolo na bo na luzolo yonso sambu na kisalu ya mfunu ya kusadisa bantu na kukwenda penepene na Yehowa Nzambi mpi na kusala bangwisana ya mbote ti yandi.​—Yak. 4:8.

² Bangogo “misionere” mpi “bamisionere” kele ve na kati ya Biblia. Kansi, ngogo ya Kigreki ya bo mebalula nde “baevanzeliste,” to baevanzelizatere, na Efezo 4:11 bo lenda balula yo mpi nde “bamisionere.” Yehowa kele Evanzelizatere ya kuluta nene, kansi beto lenda binga yandi ve nde Misionere ya kuluta nene sambu ata muntu mosi ve lenda tinda yandi. Yezu Kristu kutubaka mutindu yai sambu na Tata na yandi ya zulu: “Mono katukaka kuna na yandi; yandi muntu tindaka mono.” (Yoa. 7:29) Sambu na kumonisa zola ya nene na bantu ya nsi-ntoto, Yehowa kutindaka Mwana na yandi mosi kaka ya kubutukaka. (Yoa. 3:16) Beto lenda binga Yezu nde Misionere ya kuluta nene mpi ya kuluta mbote sambu mosi na kati ya bikuma yina Nzambi kutindaka yandi na ntoto kuvandaka ya “kutuba kitemwe na mambu yina kele ya kieleka.” (Yoa. 18:37) Yandi nungaka mpenza na kuzabisa nsangu ya mbote ya Kimfumu, mpi tii bubu yai beto kelanda na kubaka mambote ya kisalu na yandi. Mu mbandu, beto lenda sadila bametode na yandi ya kulongila na kisalu na beto ya kusamuna, yo vanda beto kele bamisionere to ve.

 3. Inki bangyufula beto tatadila?

³ Mutindu Yezu kuvandaka nsamuni ya Kimfumu kebasisa bangyufula bonso yai: Inki mambu yandi kutanaka na yo na ntoto? Sambu na nki malongi na yandi kuvandaka mbote? Inki kusalaka nde yandi nunga na kisalu na yandi ya kusamuna?

Mpeve ya Kudipesa na Kisika ya Mpa

4-6. Tanga mwa bansoba yina Yezu kusalaka ntangu Nzambi kutindaka yandi na ntoto.

⁴ Yo lenda lomba nde bamisionere ya bubu yai mpi Bakristu yankaka yina kekwendaka na bisika yina bo ke na mfunu mingi ya bansamuni ya Kimfumu kundima luzingu yina bo meyikanaka na yo ve. Kansi, beto lenda yindula ve ata fyoti luswaswanu yina kuvandaka na kati ya luzingu ya Yezu na ntoto mpi yina yandi vandaka na yo na zulu, kisika yandi zingaka ti Tata na yandi mpi ti bawanzyo yina kesadilaka Yehowa na bikuma ya mbote. (Yobi 38:7) Luswaswanu kuvandaka ya nene mpenza na kuzinga ti bantu ya masumu na nsi-ntoto ya mbi! (Mar. 7:20-23) Nkutu yo lombaka nde Yezu kukanga ntima na kikalulu ya kutesana yina balongoki na yandi kuvandaka na yo. (Luka 20:46; 22:24) Ya kyeleka, yandi nungaka mpenza mambu yonso yina yandi kutanaka na yo na ntoto.

⁵ Yezu yantikaka ve kutuba ndinga ya bantu na mbala mosi, kansi yandi longukaka yo na bumwana. Yo vandaka nsoba mosi ya nene mpenza kana beto fwanisa yo ti mukumba na yandi ya kutwadisa bawanzyo na zulu! Ntangu yandi vandaka na ntoto, yo fwete vanda nde Yezu kutubaka ata ndinga mosi na kati ya “bandinga yina ya bantu ke tubaka.” Yo vandaka ya kuswaswana mpenza ti ‘bandinga ya bawanzio.’ (1 Kor. 13:1) Ata mpidina, sambu na yina metala kusadila bangogo yina kebendaka dikebi ya bantu, ata muntu mosi ve metubaka bonso Yezu.​—Luka 4:22.

⁶ Beto tadila mambu yankaka yina kusobaka mingi mpenza na luzingu ya Mwana ya Nzambi ntangu yandi kwisaka na ntoto. Ata yandi bakaka ve disumu ya Adami, Yezu kumaka muntu mpenza bonso bantu yina zolaka kukuma “bampangi” na yandi, to balongoki ya kupakulama. (Tanga Baebreo 2:17, 18.) Na mpimpa ya nsuka yina yandi lutisaka na ntoto, Yezu kubuyaka na kulomba Tata na yandi ya zulu na kutindila yandi “ndonga kumi na zole ya bawanzio.” Kansi, yindula bawanzyo yonso yina yandi vandaka kutwadisa bonso Mishele, Mfumu ya bawanzyo! (Mat. 26:53; Yude 9) Ya kyeleka, Yezu kusalaka bidimbu ya nkumbwa, kansi mambu ya yandi salaka ntangu yandi vandaka na ntoto kuvandaka fyoti kana beto fwanisa yo ti mambu yina yandi lendaka kusala na zulu.

 7. Inki mutindu Bayuda vandaka kutadila Bansiku?

⁷ Na ntwala ya kukwisa na ntoto ntangu yandi vandaka “Ndinga,” yo lenda vanda nde Yezu kuvandaka Kinati-Ndinga ya Nzambi yina kutwadisaka bantu ya Izraele na ntoto ya zelo na zelo. (Yoa. 1:1; Kub. 23:20-23) ‘Nzambi tindaka bawanzio na kwisa kupesa bo Bansiku, kansi bo landaka yo ve.’ (Bis. 7:53; Baeb. 2:2, 3) Bamfumu ya mabundu ya Bayuda mpi kubakisaka ve mfunu ya Bansiku. Mu mbandu, beto tadila nsiku ya Kilumbu ya Kupema. (Tanga Marko 3:4-6.) Balongi ya bansiku ti Bafarize vandaka ‘kulanda ve Bansiku ya kuluta mfunu: bo vandaka kuzola kusala bantu mambu ya mbote ve, bo vandaka kuwila bantu ya nkaka mawa ve, bo vandaka bantu ya kieleka ve.’ (Mat. 23:23) Kansi, Yezu kulembaka ve nitu mpi kuyambulaka ve na kuzabisa kyeleka.

 8. Sambu na nki Yezu lenda sadisa beto?

⁸ Yezu kuvandaka ti luzolo ya mbote. Zola sambu na bantu vandaka kupusa yandi na kusala mambu, mpi yandi vandaka ti mpusa ya kusadisa bo mpenza. Yandi vidisaka ve ata fyoti mpusa ya ngolo ya kuzabisa nsangu. Mpi sambu yandi bikalaka ya kwikama na Yehowa ntangu yandi vandaka na ntoto, Yezu kumaka muntu yina “ke gulusaka mvula na mvula bantu yonso yina ke lemfukaka na yandi.” Dyaka, “Yesu yandi mosi monaka mpasi, Nzambi mpi mekaka yandi; yo yina yandi lenda sadisa mpi bantu yina ya Nzambi ke mekaka.”​—Baeb. 2:18; 5:8, 9.

Yandi Longamaka Mbote na Kuvanda Longi

9, 10. Formasio ya nki mutindu Yezu kubakaka na ntwala nde Nzambi kutinda yandi na ntoto?

⁹ Bubu yai, na ntwala ya kutinda bamisionere, Nto-Kimvuka kebakaka bangidika sambu na kupesa bo formasio. Keti Yezu Kristu kubakaka formasio? Ee, kansi yandi kotaka ve banzo-nkanda ya barabi na ntwala nde Nzambi kupakula yandi bonso Mesia. Yandi longamaka mpi ve na bamfumu ya nene ya mabundu. (Yoa. 7:15; fwanisa ti Bisalu 22:3.) Ebuna, sambu na nki Yezu kufwanaka mpenza na kulonga?

¹⁰ Katula mambu yina Yezu kulongukaka na mama na yandi Maria, mpi na Yozefi, tata na yandi ya lundi, formasio ya kuluta mfunu yina yandi bakaka sambu na kisalu ya kusamuna kukatukaka na Yehowa yina kufwanaka sambu na kulonga yandi. Sambu na formasio yina, Yezu kutubaka nde: “Mono ke tubaka ve na kiyeka na mono mosi, kansi Tata yina tindaka mono, yandi songaka mono mambu yina ya mono fweti tuba ti mambu yina ya mono fweti longa.” (Yoa. 12:49) Simba nde Nzambi kupesaka Mwana na yandi bantuma ya sikisiki sambu na mambu yina yandi fwete longa. Na ntwala ya kukwisa na ntoto, ntembe kele ve nde Yezu kulutisaka ntangu mingi na kuwidikila bantuma ya Tata na yandi. Keti kele na formasio yankaka ya kuluta mbote yina yandi lendaka kubaka?

11. Tii na nki kiteso Yezu vandaka kumonisa nkadilu ya Tata na yandi na bantu?

¹¹ Banda ntangu Yezu kugangamaka, yandi vandaka ti bangwisana ya ngolo mpenza ti Tata na yandi. Na ntwala ya kukwisa na ntoto, Yezu kumonaka bangwisana yina Yehowa kevandaka na yo ti bantu, mpi yandi bakisaka mutindu Nzambi ketadilaka bo. Mwana ya Nzambi kumonisaka zola ya mutindu mosi sambu na bantu na kiteso mosi ya nene na mpila nde, sambu yandi kele mayele ya bo metubila bonso muntu, yandi lendaka kutuba nde: “Mono vandaka kiese sambu na ntoto ti bantu.”​—Bing. 8:22, 31.

12, 13. (a) Inki malongi Yezu kubakaka na mutindu yandi vandaka kumona Tata na yandi kesadila bantu ya Izraele mambu? (b) Inki mutindu Yezu kusadilaka malongi ya yandi bakaka?

¹² Kumona mutindu Tata na yandi vandaka kumanisa mambu ya mpasi kuvandaka mpi na kati ya formasio yina Mwana kubakaka. Mu mbandu, beto tadila mutindu Yehowa kusadilaka bantu ya Izraele ya ntu-ngolo mambu. Nehemia 9:28 ketuba nde: “Ntangu bo zwaka ngemba bo salaka diaka masumu, ebuna nge bikaka diaka bambeni na bo kuyala bo. Kansi ntangu bo ndimaka mbi na bo, bo yulaka nge na kugulusa bo; kuna na zulu ya nge kele nge waka bo, ebuna konso ntangu nge vandaka kugulusa bo na mawa na nge ya nene.” Sambu Yezu kusalaka ti Yehowa mpi kumonaka mutindu yandi vandaka kusala mambu, Yezu mpi kuyedisaka mawa ya mutindu mosi sambu na bantu ya teritware na yandi.​—Yoa. 5:19.

¹³ Yezu kusadilaka malongi ya yandi bakaka na mutindu yandi vandaka kuwila balongoki na yandi mawa. Na mpimpa ya nsuka na ntwala ya lufwa na yandi, bantumwa yonso ya yandi zolaka mingi ‘kubikisaka yandi, mpi bo tinaka.’ (Mat. 26:56; Yoa. 13:1) Ntumwa Piere nkutu kubuyaka Kristu mbala tatu! Ata mpidina, Yezu kusalaka na mpila nde bantumwa kuvutukila yandi. Yandi songaka Piere nde: “Mono me samba Nzambi sambu na nge, na mpila nde lukwikilu na nge kumana ve. Ebuna nde ntangu nge ta kwisa kuvutuka na mono, nge pesa bampangi na nge kikesa.” (Luka 22:32) Izraele ya kimpeve metungama na zulu ya fondasio yina “bantumwa ti baprofete salaka,” mpi matadi ya fondasio ya kibaka ya Yeruzalemi ya Mpa kele ti bazina ya bantumwa 12 ya kwikama ya Mwana-Dimeme, Yezu Kristu. Banda ntangu yina, Bakristu ya kupakulama ti banduku na bo ya mekudipesaka, “mameme ya nkaka,” kebuta bambuma mingi na kisalu na bo ya kusamuna Kimfumu na nsi ya diboko ya ngolo ya Nzambi mpi na nsi ya lutwadisu ya Mwana na yandi ya yandi kezolaka.​—Ef. 2:20; Yoa. 10:16; Kus. 21:14.

Mutindu Yezu Kulongaka

14, 15. Inki vandaka kuswaswanisa malongi ya Yezu ti yina ya balongi ya nsiku mpi Bafarize?

¹⁴ Inki mutindu Yezu kusadilaka malongi ya yandi bakaka sambu na kulonga balongoki na yandi? Kana beto fwanisa malongi ya Yezu ti ya bamfumu ya mabundu ya Bayuda, beto kemona pwelele nde mutindu ya kulonga ya Yezu kulutaka ya bo. Balongi ya nsiku ti Bafarize ‘kufwaka mambu yina ya Nzambi ke tubaka sambu na kulanda bansiku na bo mosi.’ Kansi, mambu yina Yezu vandaka kutuba vandaka kukatuka ve na yandi mosi, yandi vandaka kukangama kaka na ndinga to nsangu ya Nzambi. (Mat. 15:6; Yoa. 14:10) Beto mpi fwete sala mutindu mosi.

¹⁵ Kele ti kima yankaka yina kusalaka nde Yezu kuswaswana mpenza ti bamfumu ya mabundu. Sambu na yina metala balongi ya nsiku ti Bafarize, yandi tubaka nde: “Beno fweti lemfuka na bo ti kulanda mambu yonso ya bo ke tubilaka beno. Kansi beno landa bikalulu na bo ve, sambu bo ke salaka ve mambu yina ya bo ke longaka bantu ya nkaka na kusala.” (Mat. 23:3) Yezu vandaka kusadila mambu ya yandi vandaka kulonga. Bika beto tadila mbandu mosi yina kemonisa nde dyambu yai kele ya kyeleka.

16. Sambu na nki nge lenda tuba nde Yezu kuzingaka na kuwakana ti bangogo yina kele na Matayo 6:19-21?

¹⁶ Yezu kulongisilaka balongoki na yandi na ‘kubumba kimvwama na zulu.’ (Tanga Matayo 6:19-21.) Keti Yezu yandi mosi vandaka kuzinga na kuwakana ti ndongisila yina? Ee, sambu yandi lendaka kutuba na masonga yonso nde: “Bamikengi ke na mabulu na bo sambu na kulala, bandeke ke na babuyamba na bo, kansi Mwana-muntu ke na kisika ve ya yandi lenda kwenda kulala.” (Luka 9:58) Yandi zingaka luzingu mosi ya pete. Yandi vandaka kudipesa ntetentete na kuzabisa nsangu ya mbote ya Kimfumu, mpi yandi monisaka nki yo ketendula kukonda susi ya kekatukaka na kubumba kimvwama na ntoto. Yezu kumonisaka nde yo kele mfunu mingi mpenza na kubumba kimvwama na zulu kisika “baniama lenda dia yo ve, yo lenda bwa matadi ve, bamiyibi lenda kota mpi ve na kwenda kuyiba.” Keti nge kelanda ndongisila ya Yezu ya kubumba kimvwama na zulu?

Bikalulu Yina Kupusaka Bantu na Kuzola Yezu

17. Inki bikalulu kusalaka nde Yezu kuvanda evanzelizatere ya kuluta nene?

¹⁷ Inki bikalulu kusalaka nde Yezu kuvanda evanzelizatere ya kuluta nene? Mosi na kati na yo kuvandaka nkadilu na yandi na ntwala ya bantu yina yandi vandaka kusadisa. Na kati ya bikalulu ya mbote ya Yehowa yina Yezu kumonisaka, beto lenda tanga kudikulumusa, zola, mpi mawa. Simba nde bikalulu yai kupusaka bantu mingi na kuzola Yezu.

18. Sambu na nki beto lenda tuba nde Yezu kuvandaka muntu ya kudikulumusa?

¹⁸ Sambu yandi ndimaka mukumba ya kukwisa na ntoto, Yezu “ndimaka na kukuma mpika. Yandi kumaka bonso bantu ya nkaka, yandi kwisaka kumonika na kimuntu.” (Filp. 2:7) Yandi monisaka kikalulu ya kudikulumusa. Dyaka, Yezu vandaka kumona ve bantu mpamba. Yandi vandaka kutuba ve nde ‘Mu katukaka na zulu, ebuna beno fwete wila munu.’ Na kuswaswana ti bantu ya luvunu yina vandaka kudibinga nde bamesia, Yezu vandaka kubula ve ntulu sambu na mukumba na yandi ya Mesia ya kyeleka. Bantangu yankaka yandi vandaka kusonga bantu na kuzabisa ve bantu yankaka kana yandi vandaka nani to nki yandi salaka. (Mat. 12:15-21) Yezu kuzolaka nde bantu kubaka desizio ya kulanda yandi na kutadila mambu yina bo mosi zolaka kumona. Yo vandaka mpenza lusakumunu sambu na balongoki na yandi na kumona nde Mfumu na bo vandaka kutadila bo ve bonso bawanzyo ya kukuka yina yandi zingaka ti bo na zulu!

19, 20. Inki mutindu zola ti mawa kupusaka Yezu na kusadisa bantu?

¹⁹ Yezu Kristu kumonisaka mpi zola, yina kele kikalulu ya kuluta nene ya Tata na yandi ya zulu. (1 Yoa. 4:8) Zola vandaka kupusa Yezu na kulonga bantu. Mu mbandu, beto tadila mawi na yandi sambu na mfumu mosi ya leke. (Tanga Marko 10:17-22.) Yezu ‘kuzolaka’ yandi mpi kumonisaka mpusa ya kusadisa yandi, kansi mfumu yina ya leke kuyambulaka ve kimvwama na yandi sambu na kukuma longoki ya Kristu.

²⁰ Na kati ya bikalulu yina vandaka kupusa bantu na kuzola Yezu, beto lenda tanga mpi mawa. Bonso bantu yonso ya kukonda kukuka, bantu yina kundimaka malongi ya Yezu kuvandaka ti mambu mingi ya mpasi. Sambu yandi zabaka mambu yina, Yezu kulongaka bo sambu yandi vandaka kuwila bo mawa. Beto baka mbandu: Kilumbu mosi yandi ti bantumwa na yandi kuvandaka ti kisalu mingi na mpila nde bo zwaka nkutu ve ntangu ya kudya. Kansi, inki Yezu kusalaka ntangu yandi monaka kibuka mosi ya bantu? “Yandi wilaka bo mawa, sambu bo vandaka bonso mameme yina me konda ngungudi ya kutala bo. Ebuna yandi yantikaka kulonga bo mambu mingi.” (Mar. 6:34) Yezu kumonaka luzingu ya mpasi ya bantu ya teritware na yandi, yandi kudipesaka sambu na kulonga bo, mpi yandi sadilaka bo bidimbu ya nkumbwa. Bikalulu na yandi ya mbote kubendaka bantu yankaka, mpi bangogo na yandi kupusaka bo na kukuma balongoki na yandi.

21. Inki beto tatadila na disolo ya kelanda?

²¹ Mambu kele mingi dyaka yina beto lenda longuka na yina metala kisalu ya Yezu na ntoto, mutindu disolo ya kelanda tamonisa yo. Na nki mitindu yankaka beto lenda landa mbandu ya Yezu Kristu, Misionere ya kuluta nene?

Inki Mvutu Nge Tapesa?

• Inki formasio Yezu kubakaka na ntwala ya kukwisa na ntoto?

• Sambu na nki beto lenda tuba nde mutindu ya kulonga ya Yezu kulutaka yina ya balongi ya nsiku mpi Bafarize?

• Inki bikalulu vandaka kupusa bantu na kuzola Yezu?

[Kifwanisu ya kele na lutiti 18]

Inki mutindu Yezu kulongaka kibuka ya bantu?