Pesa Maboko na Kimfumu ya Nzambi Bubu Yai

Kiteso mosi, kubika fioti beto yonso ta mona “mupepe ya ngolo” yina ke fwaka bantu mpi ke bebisaka bima. Yezu bingaka mupepe yango “mpasi ya nene.” (Matayo 24:21) Beto lenda kwenda ve kisika mosi buna sambu na kutina mpasi yai ya nene. Kansi beto lenda sala diambu mosi sambu na kuditanina. Inki kele diambu yango?

Na Disolo ya Yezu Kristu na Zulu ya Ngumba, yandi pesaka ndongisila yai: “Yo yina, beno landa kusosa ntete Kimfumu [ya Nzambi] ti lunungu na yandi.” (Matayo 6:33) Inki mutindu beto lenda sala yo?

Sosa ntete Kimfumu ya Nzambi. Yo ke tendula nde Kimfumu ya Nzambi fwete vanda kima mosi ya kuluta mfunu sambu na beto kuluta mambu ya nkaka. (Matayo 6:25, 32, 33) Sambu na nki? Sambu bantu ke kuka ve kumanisa bampasi yina bo ke kutana ti yo. Kansi kaka Kimfumu ya Nzambi ta manisa yo.

Sosa lunungu na yandi. Beto fwete sala yonso sambu na kuzitisa bansiku mpi minsiku ya lunungu ya Nzambi na luzingu na beto. Sambu na nki? Sambu kana beto me baka lukanu ya kupona beto mosi mambu ya mbote to ya mbi, yo ta natila beto bampasi. (Bingana 16:25) Kansi, kana beto ke zitisa bansiku ya Nzambi na luzingu na beto, beto ta pesa yandi kiese mpi beto ta vanda ti luzingu ya mbote.—Yezaya 48:17, 18.

Landa na kusosa ntete Kimfumu ya Nzambi ti lunungu na yandi. Yezu tubaka nde bantu ya nkaka ta tula ve dikebi na mambu yai mpi bo ta kuma kuyindula nde kuvanda ti mbongo mingi ta natila bo lutaninu. Bantu ya nkaka diaka lenda bika nde basusi ya luzingu kulembisa bo nitu mpi yo lenda sala nde bo vanda diaka ve ti ntangu ya kusosa Kimfumu ya Nzambi.—Matayo 6:19-21, 25-32.

Kansi, Yezu tubaka nde bantu yonso yina ke pesaka maboko na Kimfumu ya Nzambi ta zwa bima yina bo ta vanda ti yo mfunu bubu yai mpi bo ta baka balusakumunu ya kukonda nsuka na bilumbu ke kwisa.—Matayo 6:33.

Ata balongoki ya Yezu na mvu-nkama ya ntete sosaka ntete Kimfumu ya Nzambi ti lunungu na yandi, bo landaka kukutana ti bampasi na luzingu na bo. Kansi bo vandaka na lutaninu. Inki mutindu?

Bo vandaka kuzitisa bansiku ya lunungu ya Nzambi mpi yo vandaka kutanina bo na bampasi yina bantu ya vandaka ve kulemfukila Nzambi vandaka kukutana ti yo. Sambu bo vandaka kukwikila kibeni nde Kimfumu ya Nzambi ta kwisa, yo sadisaka bo na kukanga ntima na bampasi ya ngolo kibeni. Mpi Nzambi pesaka bo “ngolo yina me luta ngolo ya bantu” sambu bo kanga ntima na bampasi.—2 Bakorinto 4:7-9.

Na mvu-nkama ya ntete, Bakristu lemfukilaka nsiku ya Yezu ya kusosa ntete Kimfumu ya Nzambi. Bo longaka nsangu ya mbote ya Kimfumu na bisika yina bo vandaka kuzinga. (Bakolosai 1:23) Keti kele ti bantu yina ke sala yo bubu yai?

Ee! Bambangi ya Yehowa me zaba nde ntama mingi ve Kimfumu ya Nzambi ta fwa nsi-ntoto yai. Yo yina, bo ke salaka yonso yina bo lenda sala sambu na kuzitisa mambu yai ya Yezu tubaka: “Bo ta samuna nsangu yai ya mbote ya Kimfumu na ntoto ya mvimba sambu na kuta kimbangi na makanda yonso, ebuna nsuka ta kwisa.”—Matayo 24:14.

Inki nge ta sala na yina me tala nsangu yango ya mbote? Beto ke lomba nge na kulanda mbandu ya bantu ya Masedonia ya mvu-nkama ya ntete yina vandaka kuzinga na mbanza Berea. Ntangu bo waka nsangu ya mbote ya Kimfumu na ntumwa Polo, bo ndimaka yo “ti nzala ya ngolo.” Na nima bo ‘fimpaka Masonuku mbote-mbote’ sambu na kuzikisa mambu yina bo waka mpi bo sadilaka mambu yina bo longukaka.—Bisalu 17:11, 12.

Nge lenda sala mpi mutindu mosi. Kana nge ke sosa ntete Kimfumu ya Nzambi ti lunungu na yandi, nge ta vanda na lutaninu bubu yai mpi nge ta vanda na ngemba mpi na lutaninu ya kukonda nsuka na bilumbu ke kwisa.