Zulu Kele Nki Mutindu?

BANTU yankaka keyindulaka nde mpila kele ve ata fyoti ya kuzaba mambu ya metala zulu sambu ata muntu mosi ve mekatukaka kuna sambu na kuzabisa beto yo. Ziku bo kevilaka nde Yezu kutubaka nde: “Mono katukaka na zulu.” (Yoane 6:38) Yandi tubaka mpi na bantwadisi yankaka ya mabundu nde: “Beno me katukaka awa na nsi-ntoto, kansi mono me katukaka na zulu.” (Yoane 8:23) Inki mambu Yezu kutubaka na yina metala zulu?

Yezu kumonisaka nde zulu kele kisika yina Yehowa kezingaka. Yandi bingaka Nzambi nde “Tata na mono [yina kele] na zulu.” (Matayo 12:50) Kansi Yezu kusadilaka ngogo “zulu” na mitindu mingi. Mu mbandu, yandi bingaka mpwasa yina kele na zulu ya ntoto kisika mupepe ketambulaka nde “zulu” ntangu yandi tubaka nde: “Beno tala bandeke [ya zulu, NW].” (Matayo 6:26) Kansi, Yehowa kezingaka ntama mpenza ti mupepe. Biblia ketuba nde: “Mfumu Nzambi ke zingaka na zulu ya matuti, kuna na kati ya zulu.”​—Yezaya 40:22.

Keti ‘Tata yina kele na zulu’ kezingaka na kati ya bambwetete? Masonuku ya Santu kebingaka mpi luyalanganu nde “zulu.” Mu mbandu, muyimbi-bankunga mosi kusonikaka nde: “Kana mono tala zulu yai ya nge salaka, kana mono tala ngonda ti bambwetete yai ya nge me tulaka na kisika na yo, mono ke kudiyula nde: Muntu kele nani nge na kuyindulaka yandi?”​—Nkunga 8:4, 5.

Ve, Yehowa Nzambi lenda zinga ve na kati ya luyalanganu yina yandi gangaka, kaka mutindu sharpentie lenda zinga ve na kati ya armware yina yandi mesala. Yo yina, ntangu Ntotila Salomo kupesaka tempelo ya Yeruzalemi na Yehowa, yandi tubaka nde: “Keti nge Nzambi lenda mpenza kuzinga awa na nsi-ntoto? Ata zulu mpi yo kele nene ve na kubumba nge! Ebuna nzo yai ya mono me tungila nge, nki mpila yo lenda kuka?” (1 Bantotila 8:27) Kana Yehowa kezingaka ve na zulu ya kemonanaka, zulu yina yandi kezingaka kele inki?

Ata bantu melongukaka zulu ya kemonanaka ti bateleskope ya kuluta ngolo, mpi bankaka mesalaka nzyetelo na mpwasa yina kele ntama mpenza ti ntoto, mambu yina Biblia ketubaka kele kaka kyeleka: “Ata muntu mosi ve me monaka Nzambi.” (Yoane 1:18) Yezu kupesaka kikuma ntangu yandi tubaka nde: “Nzambi kele Mpeve.”​—Yoane 4:24.

Mpeve kele mutindu ya luzingu yina meluta ya bantu. Mpeve mesalamaka ve ti bima ya kinsuni, bonso nitu ti menga, yina biwilu ya bantu lenda mona mpi kusimba. Yo yina, ntangu Yezu kutubaka nde yandi vandaka kuzinga ti Tata na yandi na “zulu,” yandi zolaka kutuba nde mutindu ya luzingu yina yandi vandaka na yo meluta mitindu yonso ya luzingu ya kinsuni na lukumu. (Yoane 17:5; Filipi 3:20, 21) Zulu yai ya kimpeve kisika Yezu vandaka kuzinga ti Tata na yandi kele kisika yina Biblia kebingaka nde “zulu.” Yo kele inki mutindu? Inki kesalamaka kuna?

Kisika Mosi ya Kisalu ya Kyese

Biblia ketubaka nde zulu kele kisika mosi yina kisalu kesalamaka mingi. Yo ketubilaka bankama ya bamilio ya bigangwa ya kwikama ya kimpeve yina kezingaka kuna. (Daniele 7:9, 10) Konso kigangwa yai ya mpeve kele ti kimuntu na yo ya kuswaswana. Inki mutindu beto mezaba yo? Na lugangu yonso ya kemonanaka, kele ve ti bima zole ya kezingaka yina mefwanana mpenza na sikisiki yonso, yo yina beto lenda ndima nde bima kele mpi ya kuswaswana na zulu. Dyambu ya kebenda dikebi kele nde, bigangwa yai yonso ya zulu kesalaka kumosi na bumosi, ebuna yo kemonisaka mpenza luswaswanu ti mambu ya kesalamaka na ntoto bubu yai, kisika bantu kesalaka mpenza ve na bumosi.

Tala mutindu Biblia ketubila bisalu ya kesalamaka na zulu. “Beno bawanzio, beno bayina kele ngolo mingi, bayina ke landaka bansiku ya Mfumu Nzambi ti ke waka mambu ya yandi ke tubaka, beno kumisa yandi! Beno basoda ya Mfumu Nzambi kuna na zulu, beno bayina ke salaka mambu ya yandi ke tubaka, beno kumisa yandi!” (Nkunga 103:20, 21) Ee, bisalu mingi ke na kusalama na zulu. Beto lenda ndima nde yo kele kisalu mosi ya kepesaka kyese.

Bawanzyo kesalaka kisalu ya kyese banda ntama mpenza na ntwala nkutu nde Nzambi kuganga ntoto. Na kutadila Masonuku, ntangu Yehowa kugangaka ntoto, bana ya Nzambi “vandaka kutula milolo sambu na kiese” mpi “kuyimba.” (Yobi 38:4, 7) Mwana ya zulu mosi ya Nzambi kuvandaka nkutu ti dibaku ya kusala kumosi ti Nzambi sambu na kuganga bima yonso yankaka. (Kolosai 1:15-17) Ntendula yai ya kitoko ya kisalu ya kyese yina kesalamaka na zulu lenda basisa bangyufula na mabanza na nge na yina metala zulu mpi bantu.

Keti Nzambi Kugangaka Bantu ti Lukanu ya Kukwenda na Zulu?

Sambu bawanzyo vandaka kusadila Nzambi na zulu na ntwala nde yandi sala ntoto, yo kemonana pwelele nde Nzambi kugangaka ve bakala ti nkento ya ntete sambu na kuzinga na zulu. Kansi, Nzambi kutubaka na bankwelani yina ya ntete nde: “Beno buta bana mingi, mpidina bana na beno ta zingaka na bisika yonso na nsi-ntoto.” (Kuyantika 1:28; Bisalu 17:26) Adami kuvandaka kigangwa ya ntete yina kuvandaka ti mutindu ya mpa ya luzingu na ntoto, ti makuki ya kuzaba Nzambi mpi kusadila yandi na kwikama yonso. Yo lombaka nde yandi vanda tata ya bantu yina nzo na bo zolaka kuvanda ntoto. “Zulu kele ya Mfumu Nzambi yandi mosi, kansi ntoto yandi pesaka yo na bantu.”​—Nkunga 115:16.

Na kutuba ya mbote, bantu kezolaka ve kufwa; bo kebutukaka ve ti ngindu ya kufwa. Nzambi kutubilaka lufwa na Adami kaka bonso ndola sambu na kukonda bulemfu. Kana Adami kulemfukaka, yandi zolaka kufwa ve ata fyoti.​—Kuyantika 2:17; Roma 5:12.

Yo yina, mpila ya kuyituka kele ve kana Nzambi kutubilaka ve Adami ata kima mosi na yina metala kukwenda na zulu. Yo yina, ntoto zolaka kuvanda ve kisika yina bo zolaka kumeka bantu sambu na kumona kana bo melunga na kukwenda na zulu. Nzambi kusalaka muntu sambu na kuzinga kimakulu na ntoto, mpi lukanu yina ya Nzambi talungana. Biblia kesila nde “bantu ya mbote ta zinga na ngemba na ntoto yina ya Mfumu Nzambi tubaka na kupesa bo; yo ta vanda ya bo tii kuna.” (Nkunga 37:29) Yo kele pwelele nde na kisina, Nzambi kugangaka ve bantu ti lukanu ya kukwenda na zulu. Ebuna, sambu na nki Yezu kusilaka bantumwa na yandi luzingu ya zulu? Keti Yezu zolaka kutuba nde bantu yonso ya mbote takwenda na zulu?