Tula Makutu na Ndinga ya Baprofete ya Nzambi — Watchtower MIKANDA YA KE NA INTERNET

Tula Makutu na Ndinga ya Baprofete ya Nzambi

“Yo yina, beto ke luta kutula ntima na nsangu yina ya baprofete vandaka kuzabisa. Kana beno ke tula makutu na yo.”—2 PIERE 1:19.

1, 2. Inki mbandu ya mesia mosi ya luvunu beto lenda ta?

NA NSUNGI ya bamvu-nkama mingi, bamesia ya luvunu memekaka na kuzabisa na ntwala mambu yina tasalama na bilumbu kekwisa. Na mvu-nkama ya tanu ya T.B., muntu mosi yina vandaka na zina ya Moize kundimisaka Bayuda yina vandaka na kisanga ya Kreta nde yandi vandaka mesia ya bo vandaka kukinga mpi nde yandi muntu takatula bo na mpasi. Na kilumbu yina ya yandi tulaka sambu na kukatula bo na kimpika, bo landaka yandi na ngumba ya nda ya Nzadi ya Mediterane. Yandi zabisaka bo nde bo fwete kudilosa na nzadi kukonda boma, ebuna yo takabwana na ndambu zole na meso na bo. Bantu mingi yina kudilosaka na masa yina kudindaka, ebuna bo monaka ve ata nzila mesia yango kukwendilaka.

² Na mvu-nkama ya 12, “mesia” mosi kubasikaka na Yemeni. Mfumu ya bamizuluma (calif) lombaka yandi na kusonga kidimbu ya kimesia na yandi. “Mesia” yai tubilaka calif yina nde yandi songa bantu bo zenga yandi ntu. Yandi zabisaka bo nde lufutumuku na yandi yina tasalama kaka na ntangu yina, tavanda kidimbu yango. Ebuna, calif kundimaka dyambu yina, kansi yina vandaka nsuka ya luzingu ya “mesia” yina.

3. Nani kele Mesia ya kyeleka, mpi kisalu na yandi ya kusamuna kumonisaka nki?

³ Bamesia ya luvunu ti bambikudulu na bo menungaka ve ata fyoti, kansi kana beto tula makutu na ndinga ya baprofete ya Nzambi bo takusa beto ve. Mesia ya kyeleka, Yezu Kristu, kulungisaka bambikudulu mingi ya Biblia. Mu mbandu, na kisika yandi ketubila mbikudulu ya Yezaya, nsoniki ya Evanzile Matayo, sonikaka nde: “‘Nge Zabuloni, nge Neftali, bantoto na ndambu ya masa ya nene, na simu ya nzadi ya Yordani. Nge Galilea, ntoto ya bantu yina kele Bayuda ve! Bantu yina ke zingaka na mpimpa, bo ta mona mwini ya ngolo! Mwini yina ta monika na bantu yina ke zingaka na nsi ya mpimpa ti ya lufwa!’ Katuka ntangu yina, Yesu yantikaka kulonga nde: ‘Beno balula ntima sambu Kimfumu ya Nzambi me kuma penepene!’” (Matayo 4:15-17; Yezaya 9:1, 2) Yezu vandaka “mwini ya ngolo” yango, mpi kisalu na yandi monisaka nde yandi vandaka mpenza Profete yina Moize vandaka kutubila. Bantu yina kebuya na kuwila Yezu tafwa.—Kulonga 18:18, 19; Bisalu 3:22, 23.

4. Inki mutindu Yezu kulungisaka Yezaya 53:12?

⁴ Yezu lungisaka mpi mbikudulu yina kele na Yezaya 53:12 yina ketuba nde: “Yandi pesaka moyo na yandi na lufwa, bo tangaka yandi na kati ya bantu yina ke salaka mambu ya mbi, yandi nataka kilo ya masumu ya bantu mingi, yandi sambaka Nzambi sambu na bo.” Yezu zabaka nde ntama mingi ve yandi tapesa luzingu na yandi bonso nkudulu, yo yina yandi kumisaka lukwikilu ya balongoki na yandi ngolo. (Marko 10:45) Yandi monisaka yo mbotembote na nsadisa ya lukituku.

Lukituku ketungaka lukwikilu

5. Inki mutindu nge tatendula lukituku na bangogo na nge mosi?

⁵ Mambu yina kulutaka na lukituku vandaka mbikudulu. Yezu tubaka nde: “Sambu Mwana-muntu ta kwisa ti bawanzio na yandi na lukumu ya Tata na yandi, . . . Mono ke tubila beno mambu ya kieleka: Bantu ya nkaka kele awa, bo ta fwa ve tii kuna ya bo ta mona Mwana-muntu me kwisa na Kimfumu na yandi.” (Matayo 16:27, 28) Keti kele ti bantumwa yankaka ya kumonaka Yezu kekwisa na Kimfumu na yandi? Matayo 17:1-7 ketuba nde: “Na nima ya bilumbu sambanu, Yesu bakaka Piere, Yakobo ti Yoane leki ya Yakobo. Yandi kwendaka ti bo na zulu ya ngumba ya nda; kuna bo vandaka kaka bo mosi mpamba. Ebuna nitu na yandi balukaka mutindu ya nkaka na meso na bo.” Yai dyambu ya kuyitukisa kibeni! “Ilungi na yandi yantikaka kupela bonso ntangu; bilele na yandi kumaka mpembe bonso mwini. Ntangu yai balonguki yina tatu monaka Moize ti Elia ke solula ti Yesu.” Dyaka, “dituti mosi yina vandaka ke pela kwisaka kufika bo,” ebuna bo waka ndinga ya Nzambi yandi mosi ketuba nde: ‘Yai kele Mwana na mono ya mono ke zolaka mingi; mono ke na kiese mingi sambu na yandi. Beno wila yandi.’ Ntangu balonguki waka ndinga yina, bo monaka boma mingi, bo bwaka ilungi na ntoto. Yesu kwisaka penepene na bo, yandi simbaka bo, ebuna yandi tubaka nde: ‘Beno telama; beno vanda na boma ve!’”

6. (a) Sambu na nki Yezu kubingaka lukituku nde mbona-meso? (b) Lukituku vandaka kumonisa nki?

⁶ Yo fwete vanda nde dikambu yai ya kuyitukisa kusalamaka na zulu ya Ngumba Ermoni, kisika Yezu ti bantumwa yina tatu kulutisaka mpimpa ya mvimba. Ntembe kele ve nde lukituku kusalamaka na mpimpa, mpi yo kumisaka yo dyaka nsemo mingi. Kikuma ya Yezu kubingilaka yo mbona-meso vandaka sambu Moize ti Elia, yina vandaka mefwaka ntama, kuvandaka ve na kisika yango. Kristu mpamba muntu kuvandaka pana. (Matayo 17:8, 9) Kubaluka ya kuyitukisa ya mutindu yina, sadisaka Piere, Yakobo ti Yoane na kumona fyoti nkembo ya Yezu na kiyeka ya Kimfumu. Moize ti Elia vandaka kifwani ya bapakulami yina tayala ti Yezu na Kimfumu. Mbona-meso yina pesaka dyaka ngolo na kimbangi na yandi ya metala Kimfumu mpi kiyeka na yandi ya kekwisa.

7. Inki mutindu beto kebakisa nde Piere vandaka kuyibuka dyaka lukituku mbote?

⁷ Lukituku kumisaka ngolo lukwikilu ya bantumwa tatu yina zolaka kubaka kiyeka ya nene ya kutwadisa dibundu ya Bukristu. Luse ya Kristu yina vandaka kungenga mpenza, bilele na yandi yina kumaka mpembe, mpi ndinga ya Nzambi yandi mosi yina tubaka nde Yezu vandaka Mwana na Yandi ya yandi vandaka kuzola mingi mpi nde bo fwete wila yandi; mambu yai yonso kulungisaka lukanu na yo mbotembote. Kansi, yo lombaka nde bantumwa kuta ntete ve mambu ya mbona-meso yina bo monaka ata na muntu mosi tii kuna ntangu Yezu zolaka kufutumuka. Na nima ya bamvula 32, mbona-meso yango vandaka kaka ngolo na mabanza ya Piere. Yo yina, ntangu yandi tubilaka ti kupesa ntendula na yo, yandi sonikaka nde: “Bansangu yina ya mpamba-mpamba ya bantu ke yindulaka na ntu, beto landaka yo ve ntangu beto zabisaka beno nde Mfumu na beto Yesu Kristo ta kwisa ti ngolo; kansi beto monaka kimfumu na yandi na meso na beto mosi. Beto vandaka ti yandi na zulu ya ngumba ya santu, ntangu Tata Nzambi pesaka yandi luzitu ti lukumu. Na ntangu yo yina, na lukumu na yandi yonso, Nzambi tindilaka yandi ndinga nde: ‘Yai kele Mwana na mono ya mono ke zolaka; mono ke na kiese mingi sambu na yandi.’ Beto waka beto mosi ndinga yina katukaka na zulu.”—2 Piere 1:16-18.

8. (a) Mambu yina Nzambi kutubaka sambu na Mwana na yandi kubendaka dikebi na nki? (b) Dituti yina kumonanaka na lukituku kusongaka nki?

⁸ Mambu yina Nzambi tubaka vandaka na mfunu mingi kibeni, nde: “Yai kele Mwana na mono ya mono ke zolaka; mono ke na kiese mingi sambu na yandi, beno wila yandi.” Nsangu yai kebenda dikebi mingi na Yezu, muntu ya Nzambi mepesaka kiyeka ya Ntotila, muntu ya lugangu yonso fwete lemfukila. Dituti yina kwisaka kufika bo kesonga nde kulungana ya mbona-meso yai tamonana ve na meso. Bantu yina kebakisa “kidimbu” ya kuvanda ya Yezu na kiyeka ya Kimfumu yina kemonana ve na meso, kele bo mpamba bantu tabakisa nde mbona-meso yina kelungana. (Matayo 24:3) Kana beto tala mbote, kukebisa yina Yezu kebisaka bo nde bo tuba ntete ve mambu ya bo monaka na mbona-meso yango ata na muntu mosi tii kuna yandi tatelama na bafwa, kemonisa nde nkembo ti lukumu na yandi zolaka kusalama na nima ya lufutumuku na yandi.

9. Sambu na nki lukituku fwete kumisa lukwikilu na beto ngolo?

⁹ Na nima ya kutubila lukituku yango, Piere tubaka nde: “Yo yina, beto ke luta kutula ntima na nsangu yina ya baprofete vandaka kuzabisa. Kana beno ke tula makutu na yo, beno me sala mbote, sambu nsangu yina kele bonso mwinda yina ke pelaka na kisika ya kele mpimpa, tii kuna ntangu ta tana ti mbwetete ya suka-suka ta basika na ntima na beno. Mambu ya ntete ya beno fweti zaba, yo yai: Ata muntu mosi ve lenda tendula na ngolo na yandi mosi mambu yina ya baprofete tubaka na Mukanda ya Nzambi. Sambu ata profete mosi ve me tubaka ntete na luzolo ya kimuntu, kansi bo vandaka kutuba na zina ya Nzambi sambu [mpeve-santu] vandaka kusonga bo mambu yonso ya bo vandaka kutuba.” (2 Piere 1:19-21) Lukituku kemonisa mpenza nde beto fwete tula ntima na ndinga ya baprofete ya Nzambi. Beto fwete tula makutu na ndinga yango, kansi beto tula yo ve na “mambu ya mpamba-mpamba” yina Nzambi kezolaka ve to kebuyaka. Lukituku fwete pesa ngolo na lukwikilu na beto na ndinga ya baprofete sambu kumona yina bo monaka lukumu ya Yezu mpi kiyeka ya Kimfumu na yandi mekumaka dyambu ya kyeleka. Ee, beto kele na mambu mingi ya kendimisa beto kukonda ntembe nde bubu yai Kristu kele Ntotila ya ngolo na zulu.

Mutindu mbwetete ya suka-suka kebasikaka

10. Nani to nki kele “mbwetete ya suka-suka” yina Piere kutubilaka, mpi sambu na nki nge mevutula mpidina?

¹⁰ Piere sonikaka nde: “Kana beno ke tula makutu na yo, beno me sala mbote, sambu nsangu yina kele bonso mwinda yina ke pelaka na kisika kele mpimpa, tii kuna ntangu ta tana ti mbwetete ya suka-suka ta basika na ntima na beno.” Nani to nki kele “mbwetete ya suka-suka”? Ngogo “mbwetete ya suka-suka” kemonana mbala mosi mpamba na kati ya Biblia, mpi ntendula na yo mefwanana ti “mbwetete ya suka.” Kusonga 22:16 kebinga Yezu Kristu “mbwetete yina ke pelaka ngolo na suka-suka.” Na bansungi yankaka ya mvula, bambwetete ya mutindu yai kevandaka bambwetete ya nsuka na kubasika na ndambu ya Esti. Yo kebasikaka na ntwala nde ntangu kubasika, ebuna yo kesongaka nde ntongo kezo tana sambu na kubanda kilumbu ya mpa. Piere kusadilaka ngogo “mbwetete ya suka-suka” sambu na kutubila Yezu na nima ya kubaka kiyeka ya Kimfumu na Yandi. Na ntangu yina, yandi basikaka na luyalanganu yonso ti na ntoto na beto mpi! Bonso Mbwetete ya suka-suka mpi Mesia, yandi kesongaka luyantiku ya kilumbu ya mpa, to ntangu sambu na bantu yonso ya bulemfu.

11. (a) Sambu na nki 2 Piere 1:19 kezola kutuba ve nde “mbwetete ya suka-suka” kebasikaka na ntima kibeni ya bantu? (b) Inki mutindu nge tatendula 2 Piere 1:19?

¹¹ Bambalula mingi ya Biblia ketendulaka nde dibanza yina ntumwa Piere kusonikaka na 2 Piere 1:19, ketubilaka ntima ya muntu. Ntima ya mbuta kevandaka na kilo kubanda bagrame 250 tii na 300. Inki mutindu Yezu Kristu, ya kele bubu yai kigangwa ya kimpeve ya lukumu yina kefwaka ve, kebasika na binama yai ya fyoti ya bantu? (1 Timoteo 6:16) Ya kyeleka, bo ketubila ntima na beto ya kifwani, sambu kele yo kima kesadisaka beto na kutula makutu na ndinga ya baprofete ya Nzambi. Kansi, tala ntangu yai na dikebi yonso 2 Piere 1:19, ebuna nge tamona nde na Traduction du monde nouveau, ba virgile kele na ntwala mpi na nima ya bangogo “tii kuna ntangu ta tana ti mbwetete ya suka-suka ta basika,” mpidina yo kekabisaka bangogo yango mbote ti bangogo “na ntima na beno.” Beto lenda tanga verse yai mutindu yai: ‘Beto kele na ndinga ya baprofete ya mekuma kieleka mpenza; mpi nge kesala mbote na kutula dikebi na nge na yo bonso mwinda yina kepela na kisika ya mpimpa, disonga, na ntima na beno, tii kuna ntongo ketana mpi mbwetete ya suka-suka kebasika.’

12. Ntima ya bantu kevandaka nki mutindu, kansi nki kima kele kyeleka sambu na Bakristu ya kyeleka?

¹² Ntima ya kifwani ya bantu ya kebutukaka na masumu kevandaka nki mutindu? Yo kesonga nde ntima na bo kevandaka na mpimpa ya kimpeve! Kansi, kana beto kele Bakristu ya kyeleka, yo kele bonso nde beto kele ti mwinda yina kepela na ntima na beto, yina zolaka kuvanda na mpimpa. Mutindu bangogo ya Piere kumonisaka yo, beto tasala yo kana beto ketula makutu na ndinga ya baprofete ya Nzambi yina kepela ya kemonisa nde Bakristu ya mayele zolaka kuvanda meso ya kukangula mpi ti nsemo yina tanata bo na luyantiku ya kilumbu ya mpa. Bo zolaka kubakisa nde Mbwetete ya suka-suka mebasikaka, na ntima ya kinsuni ya bantu ve, kansi na ntwala ya lugangu yonso.

13. (a) Sambu na nki beto lenda ndima nde Mbwetete ya Suka-Suka mebasikaka? (b) Sambu na nki Bakristu fwete kanga ntima kana bo kemona bampasi yina Yezu kutubilaka na ntwala?

¹³ Mbwetete ya suka-suka mebasikaka! Beto lenda ndima dyambu yai kana beto tula makutu na mbikudulu ya Yezu yina ketubila kuvanda na yandi ti beto. Bubu yai, beto kemona kulungana na yo na mambu bonso bamvita na kiteso ya mesalamaka ntete ve, nzala, kunikana ya ntoto, mpi kulonga nsangu ya mbote na inza ya mvimba. (Matayo 24:3-14) Ata bampasi yina Yezu tubilaka kebwila mpi beto Bakristu, beto kele na mpila ya kukanga ntima ti ngemba mpi kyese ya ntima. Sambu na nki? Sambu beto ketulaka makutu na ndinga ya baprofete ya Nzambi mpi beto kele na lukwikilu na mambu yina yandi kesila sambu na bilumbu kekwisa. Beto zaba nde beto kele na kyelo ya ntangu ya kuluta mbote sambu beto mekuma mpenza penepene na “ntangu ya nsuka”! (Daniele 12:4) Inza kele na mpasi ya ngolo ya kukonda kivuvu yina bo tubilaka na ntwala na Yezaya 60:2 nde: “Mpimpa ke fika ntoto ya mvimba, bantu yonso kele na kati ya lubungi.” Inki mutindu muntu lenda sengumuna nzila na yandi na kati ya mpimpa ya mutindu yai? Muntu yonso fwete tula makutu na ndinga ya baprofete ya Nzambi na kudikulumusa yonso ntangu yai, na ntwala nde yo kuma nsukinina. Bantu yonso ya ntima ya masonga fwete kwenda na Yehowa Nzambi, Nto ya luzingu mpi ya nsemo. (Nkunga 36:9; Bisalu 17:28) Yo kele kaka kusala mpidyai, kima tasadisa konso muntu na kuzwa nsemo ti kivuvu ya kyeleka ya kuvanda na luzingu ya mbote na bilumbu kekwisa yina Nzambi mesilaka na kupesa na bantu ya bulemfu.—Kusonga 21:1-5.

‘Nsemo kwisaka na inza’

14. Inki beto fwete sala sambu na kumona kulungana ya bambikudulu ya kitoko yina kele na Biblia?

¹⁴ Masonuku kemonisa pwelele nde Yezu Kristu keyala ntangu yai bonso Ntotila. Mutindu yandi bakaka kiyeka na mvu 1914, ntembe kele ve nde bambikudulu yonso yina mebikala talungana mpi. Sambu beto kumona kulungana na yo, beto fwete monisa nde beto kele bantu ya kudikulumusa yina kekwikilaka na Yezu Kristu, bantu ya kebikisa kusala masumu ti mambu ya mbi ya bantu kesalaka sambu na kukonda ya nzayilu. Ya kyeleka, bantu yina kezolaka mpimpa tabaka ve luzingu ya mvula na mvula. Yezu tubaka nde: “Mambu ke bendaka ndola yo yai: Mwini me kwisaka awa na nsi-ntoto, kansi bantu ke lutaka kuzola mpimpa; bo ke zolaka mwini ve, sambu bo ke salaka mambu ya mbi. Konso muntu yina ke salaka mambu ya mbi, yandi ke buyaka mwini; yandi ke kwisaka penepene na mwini ve, mbaimbai mambu na yandi ya mbi ta monana. Kansi muntu yina ke salaka mambu ya kieleka, yandi ke kwisaka penepene na mwini, sambu bo mona nde yandi ke lemfukilaka Nzambi na mambu yina ya yandi ke salaka.”—Yoane 3:19-21.

15. Inki tabwa kana beto mona mpamba luguluku yina Nzambi mepesaka beto na nsadisa ya Mwana na yandi?

¹⁵ Nsemo ya kimpeve kukwisaka na inza na nsadisa ya Yezu, mpi kuwila yandi kele mfunu mingi. Polo sonikaka nde: “Na ntangu ya ntama baprofete vandaka kutubila bankaka na beto mambu yina ya Nzambi vandaka kuzabisa bo na kutuba; bo vandaka kutubila bo yo mbala mingi na banzila ya mutindu na mutindu. Kansi na bilumbu yai ya nsuka, Mwana na yandi muntu me kwisa kutubila beto mambu yina.” (Baebreo 1:1, 2) Inki tabwa kana beto mona mpamba luguluku yina Nzambi mepesaka na nsadisa ya Mwana na yandi? Polo landaka na kutuba nde: “Bansiku ya bawanzio longaka bankaka na beto yo vandaka ya kieleka; konso muntu yina landaka yo ve, yandi bakaka ndola yina lungaka na yandi. Ebuna, nki mutindu beto ya nkaka lenda tina ndola yina, kana beto ke bakaka kuguluka ya nene ya mutindu yina bonso nde yo kele kima ya mpamba? Ntete Mfumu Yesu yandi mosi zabisaka nsangu ya kuguluka yina, ebuna bantu yina waka yandi, bo songaka beto nde kuguluka yina kele ya kieleka. Na ntangu yo yina, Nzambi salaka mambu ya kuyituka ya mutindu na mutindu sambu na kusonga nde yandi me ndima mambu ya bo vandaka kutuba. Na luzolo na yandi, yandi kabilaka bantu makabu ya mutindu na mutindu ya Mpeve na yandi ya santu.” (Baebreo 2:2-4) Ya kyeleka, Yezu kele na kisika ya ntete na kisalu ya kusamuna ndinga ya baprofete.—Kusonga 19:10.

16. Sambu na nki beto fwete tula lukwikilu na bambikudulu yonso ya Yehowa Nzambi?

¹⁶ Mutindu beto memona yo, Piere tubaka nde: “Ata muntu mosi ve lenda tendula na ngolo na yandi mosi mambu yina ya baprofete tubaka na Mukanda ya Nzambi.” Bantu lenda pesa ve bambikudulu ya kyeleka na ngolo na bo mosi ata fyoti, kansi beto lenda tula ntima na bambikudulu yonso ya Nzambi. Yo kekatukaka na Yehowa Nzambi yandi mosi. Yandi muntu kupusaka bantu na yandi na nsadisa ya mpeve santu sambu bo bakisa mutindu bambikudulu yina kele na Biblia ke na kulungana. Ya kyeleka, beto kepesa matondo mingi na Yehowa sambu beto kemona kulungana ya bambikudulu mingi ya mutindu yina banda na mvu 1914. Yo yina, beto kendima mpenza nde bambikudulu yonso ya mebikala, yina ketadila nsuka ya ngidika ya bima ya mbi yonso talungana. Yo kele mfunu nde beto landa kutula makutu na mambu yina Nzambi metubaka na ntwala ntangu beto kebika mwinda na beto kepela. (Matayo 5:16) Beto kepesa mersi mingi na kumona nde Yehowa kepesa beto ‘nsemo yina kengenga na kati ya mpimpa ya ngolo’ yina mefika ntoto bubu yai!—Yezaya 58:10.

17. Sambu na nki beto kele na mfunu ya nsemo ya kimpeve yina kekatuka na Nzambi?

¹⁷ Nsemo kesadisaka beto na kumona. Yo kesadisaka mpi bimenina yina kepesaka beto madya ya mutindu na mutindu na kuyela mbote. Beto lenda zinga ve kana nsemo kele ve. Inki beto lenda tuba sambu na nsemo ya kimpeve? Yo kesongaka beto mutindu ya kutambula mpi yo kesongaka beto luzingu ya bilumbu yina kekwisa mpila Ndinga ya Nzambi, Biblia ketubaka. (Nkunga 119:105) Yehowa Nzambi ‘ketindaka mwinda na yandi ti kyeleka na yandi’ na zola yonso. (Nkunga 43:3) Na ntembe ve, beto fwete monisa ntonda mingi sambu na mambu yai yonso. Yo yina, bika beto sala ngolo sambu na kubaka nsemo ya “mayele ya kuzaba lukumu ya Nzambi” na mpila nde yo pesa nsemo na ntima na beto ya kifwani.—2 Korinto 4:6; Efezo 1:18.

18. Mbwetete ya Suka-Suka ya Yehowa kele ya kuyilama sambu na kusala nki ntangu yai?

¹⁸ Beto kele na kyese mingi mpenza na kuzaba nde na mvu 1914, Yezu Kristu, Mbwetete ya Suka-Suka, kubasikaka na ntwala ya luyalanganu yonso mpi yandi yantikaka kulungisa mbona-meso ya lukituku! Mbwetete ya Suka-Suka ya Yehowa kele na kiyeka ntangu yai, yandi kele ya kuyilama sambu na kulungisa lukanu ya Nzambi na kulungana ya nsuka ya lukituku, disongidila, “bitumba ya kilumbu ya nene ya Nzambi [Nkwa-Ngolo Yonso, NW].” (Kusonga 16:14, 16) Na nima ya kufwa inza yai ya ntama, Yehowa talungisa lusilu na yandi ya kutula “zulu ya mpa ti ntoto ya mpa” na kati na yo beto lenda kembila yandi kimakulu bonso Mfumu ya luyalanganu mpi Nzambi ya bambikudulu ya kyeleka. (2 Piere 3:13) Na ntwala nde kilumbu yina ya nene kukwisa, bika beto landa na kutambula na nsemo ya Nzambi na kutulaka makutu na ndinga ya baprofete ya Nzambi.

Inki Mutindu Nge Tavutula?

• Inki mutindu nge tatendula lukituku ya Yezu?

• Inki mutindu lukituku ketungaka lukwikilu?

• Nani to nki kele Mbwetete ya Suka-Suka ya Yehowa, mpi nki ntangu yo basikaka?

• Sambu na nki beto fwete tula makutu na ndinga ya baprofete ya Nzambi?

[Kifwanisu ya kele na lutiti 21]

Keti nge lenda pesa ntendula ya lukituku?

[Kifwanisu ya kele na lutiti 23]

Mbwetete ya Suka-Suka mebasikaka. Keti nge zaba nki mutindu mpi nki ntangu?