Yezu Me Kumisa Mampa Mingi mpi Me Pesa Lukebisu Sambu na Levire

Bimvuka ya bantu me kwisa kisika Yezu kele na Dekapolisi, na esti ya Nzadi-Mungwa ya Galilea. Bo me kwisa sambu na kuwa malongi na yandi mpi sambu yandi belula bo mpi bo me nata bitunga ya nene ya kubumbila madia.

Kansi na nima, Yezu me zabisa balongoki na yandi nde: “Mono ke wila kimvuka ya bantu yai mawa sambu bo me vanda ti mono bilumbu tatu mpi bo kele ve ti kima ya kudia. Kana mono vutula bo na banzo na bo nzala, bo ta lemba na nzila, mpi bankaka na kati na bo me katuka ntama.” Balongoki me yula yandi nde: “Na kisika yai ya kele ntama ti babwala, na wapi muntu ta zwa mampa ya kufwana sambu bantu yai kudia mpi kufuluka?”—Marko 8:2-4.

Yezu me yula bo nde: “Beno kele ti mampa ikwa?” Balongoki me tuba nde: “Nsambwadi, mpi mwa bambisi ya masa ya fioti.” (Matayo 15:34) Ebuna Yezu me zabisa balongoki na yandi nde bo songa bantu na kuvanda na ntoto. Yandi me baka mampa ti bambisi yina, yandi me samba Nzambi mpi me pesa yo na balongoki na yandi sambu bo kabudila yo bantu. Diambu ya kuyituka kele nde, bantu yonso me dia mpi me fuluka. Bo vandaka babakala 4 000 kukonda kutanga bankento ti bana. Ata mpidina, bo me lokuta bitunga ya nene nsambwadi ya kubumbila madia ya kufuluka ti bitini yina me bikala.

Ntangu Yezu me songa bimvuka ya bantu na kukwenda, yandi ti balongoki na yandi me baka maswa mpi bo me sabuka na Magadani na westi ya dibungu ya Nzadi-Mungwa ya Galilea. Kuna, Bafarize ti bantu ya nkaka ya ka-dibundu ya Basaduse ke sosa kumeka Yezu, bo me lomba yandi na kusonga bo kidimbu mosi ya me katuka na zulu.

Ntangu Yezu me bakisa bangindu na bo, yandi me songa bo nde: “Ntangu nkokila ke bwaka, beno ke tubaka nde, ‘Kilumbu ta vanda mbote, sambu zulu kele mbwaki bonso tiya,’ mpi na suka, beno ke tubaka nde, ‘Bubu, kilumbu ta vanda madidi mpi mvula ta noka, sambu zulu kele mbwaki bonso tiya kansi ndombe.’ Beno me zaba kutendula mutindu zulu ke monikaka, kansi beno ke kuka ve kutendula bidimbu ya bantangu.” (Matayo 16:2, 3) Na nima, Yezu me zabisa Bafarize ti Basaduse nde yandi ta pesa bo ve kidimbu ya nkaka katula kaka kidimbu ya Yonasi.

Yezu ti balongoki na yandi me kota na maswa mpi bo me kwenda na Betsaida, na nordi-esti ya dibungu ya nzadi-mungwa. Na nzila, balongoki me bakisa nde bo me vila kunata mampa ya kufwana; bo me nata kaka dimpa mosi. Ntangu Yezu me yibuka mambu yina yandi me katuka kutubila Bafarize ti Basaduse yina kele bantu ya Erode, yandi me kebisa balongoki na yandi nde: “Beno kangula meso; beno keba na levire ya Bafarize mpi na levire ya Erode.” Kansi balongoki me yindula nde yandi ke tubila levire sambu bo me vila kunata mampa. Yezu me mona nde bo me bakisa ve, yo yina yandi me yula bo nde: “Sambu na nki beno ke tula ntembe sambu beno kele ve ti mampa?”—Marko 8:15-17.

Yezu me katuka kupesa mafunda ya bantu mampa. Yo yina, yo lombaka nde balongoki kuzaba nde yandi ke kudiyangisa ve sambu na mampa. Yandi me yula bo nde: “Keti beno ke yibuka ve ntangu mono zengaka mampa tanu sambu na babakala 5000, bitunga ikwa ya kufuluka na bitini beno lokutaka?” Bo me tuba nde: “Kumi na zole.” Yezu me yula bo diaka nde: “Ntangu mono zengaka mampa nsambwadi sambu na babakala 4000, bitunga ya nene ikwa ya kufuluka ti bitini beno lokutaka?” Bo me tuba nde: “Nsambwadi.”—Marko 8:18-20.

Yezu me yula bo nde: “Inki mutindu beno ke bakisa ve nde mono vandaka kutubila beno ve sambu na mampa?” Yandi me tuba nde: “Beno keba na levire ya Bafarize ti ya Basaduse.”—Matayo 16:11.

Nsuka-nsuka, balongoki me bakisa nki yandi ke tubila. Bo ke sadilaka levire sambu na kuvimbisa pate ya mampa. Yezu ke tubila levire bonso kidimbu ya ke monisa kubeba. Yandi ke kebisa balongoki na yandi sambu na “malongi ya Bafarize ti ya Basaduse,” sambu yo ke bebisaka.—Matayo 16:12.