Yezu Me Sadila Nti ya Bafige Sambu na Kupesa Dilongi ya Me Tala Lukwikilu

Yezu me katuka na Yeruzalemi na Kintete na nima ya midi mpi me vutuka na Betania na esti ya Ngumba ya Banti ya Olive. Ziku, yandi me lala na nzo ya banduku na yandi Lazare, Maria ti Marta.

Ntangu yai, beto me kuma na suka ya Nisani 11. Yezu ti balongoki na yandi ke kwenda diaka na Yeruzalemi mpi yandi ta kwenda na tempelo sambu na mbala ya nsuka. Yai kele kilumbu ya nsuka yina yandi ke longa na meso ya bantu na ntwala nde yandi sala nkinsi ya Paki mpi yandi yantikisa Lusungiminu ya lufwa na yandi, ebuna na nima bo ta monisa yandi mpasi mpi ta fwa yandi.

Ntangu bo me katuka na Betania mpi ke luta na Ngumba ya Banti ya Olive sambu na kukwenda na Yeruzalemi, Piere me mona nti yina Yezu singaka na suka ya kilumbu yina me luta. Yandi me yituka mpi me tuba nde: “Rabi, tala nti ya bafige yina nge singaka me yuma.”—Marko 11:21.

Kansi, sambu na nki Yezu yumisaka nti yina? Yandi me monisa kikuma yandi salaka yo ntangu yandi me tuba nde: “Ya kieleka mono ke tubila beno nde, kana beno kele ti lukwikilu mpi beno ke tula ntembe ve, beno ta sala ve kaka mambu yina mono me sala na nti ya bafige, kansi kana beno tuba mpi na ngumba yai nde, ‘Nanguka mpi kudilosa na nzadi-mungwa,’ yo ta salama. Mpi mambu yonso ya beno ta lomba na kisambu, kana beno kele ti lukwikilu, beno ta baka yo.” (Matayo 21:21, 22) Yo yina, yandi me vutukila dilongi yina yandi longaka na ntwala nde, kana muntu kele ti lukwikilu yandi lenda katula ngumba.—Matayo 17:20.

Yo yina, mutindu Yezu me yumisa nti yina, yandi me pesa dilongi ya mfunu nde beto fwete kwikila na Nzambi. Yandi me tuba nde: “Bima yonso ya beno ke lomba na kisambu, beno vanda na lukwikilu nde beno me baka yo, mpi beno ta baka yo.” (Marko 11:24) Yo kele dilongi ya mfunu kibeni sambu na balongoki yonso ya Yezu. Yo kele mfunu mingi-mingi sambu na bantumwa, sambu ntama mingi ve bo ta kutana ti bampasi yina ta meka lukwikilu na bo. Kele mpi ti kuwakana na kati ya nti ya bafige yina yumaka mpi lukwikilu.

Bonso nti yina ya bafige, dikanda ya Izraele ke monana bonso nde yo kele ti lukwikilu. Bantu ya dikanda yai salaka kuwakana ti Nzambi, mpi yo lenda monana bonso nde bo vandaka kuzitisa Nsiku na yandi. Kansi, dikanda ya mvimba monisaka nde bo kondaka lukwikilu mpi bo vandaka ve kubuta bambuma ya mbote. Nkutu, bo buyaka mwana ya Nzambi. Yo yina, mutindu Yezu yumisaka nti yina ya bafige, yandi monisaka mambu yina ta kumina dikanda yai ya kukonda lukwikilu mpi ya ke butaka ve bambuma.

Ntangu fioti na nima, Yezu ti balongoki na yandi me kuma na Yeruzalemi. Kaka mutindu yo vandaka kikalulu na yandi, yandi me kwenda na tempelo mpi me yantika kulonga. Ziku, bamfumu ya banganga-nzambi mpi bambuta-bantu me yibuka mambu yina Yezu salaka kilumbu ya me luta na bantu yina vandaka kushanze mbongo; bo me tudila yandi ntembe nde: “Na nki kiyeka nge ke sala mambu yai? To nani pesaka nge kiyeka ya kusala mambu yai?”—Marko 11:28.

Yezu me tuba nde: “Mono ta yula beno ngiufula mosi. Beno pesa mono mvutu, ebuna mono mpi ta songa beno na nki kiyeka mono ke sala mambu yai. Mbotika ya Yoane katukaka na zulu to na bantu? Beno pesa mono mvutu.” Ntangu yai, yandi muntu me tudila bambeni na yandi ntembe. Bamfumu ya banganga-nzambi mpi bambuta-bantu me vukana sambu na kuzaba mvutu ya kupesa yandi, bo me tuba nde: “Kana beto tuba nde, ‘Na zulu,’ yandi ta tuba nde, ‘Ebuna sambu na nki beno kwikilaka yandi ve?’ Kansi, keti beto fwete tuba nde, ‘Na bantu’?” Bo ke yindula mutindu yai sambu bo ke wa bantu boma, “sambu kimvuka ya bantu yonso vandaka kundima nde Yoane vandaka kibeni mbikudi.”—Marko 11:29-32.

Bambeni ya Yezu me kuka ve kupesa mvutu ya me fwana na ngiufula na yandi. Yo yina, bo me tuba nde: “Beto me zaba ve.” Ebuna Yezu me songa bo nde: “Mono mpi, mono ke songa beno ve na nki kiyeka mono ke sala mambu yai.”—Marko 11:33.