“Beno Kwenda mpi Beno Kumisa Bantu ya Makanda Yonso Balongoki”

1, 2. Mambu yina Yezu tubaka na Matayo 24:14 ke pusa beto na kuyula nki bangiufula?

YEZU tubaka nde na bilumbu ya nsuka, bo ta samuna nsangu ya mbote ya Kimfumu na bantu yonso. (Matayo 24:14) Na ntoto ya mvimba, bantu me zabaka beto, Bambangi ya Yehowa, sambu na kisalu na beto ya kusamuna. Bantu mingi ke zolaka nsangu ya beto ke longaka, kansi bankaka ke zolaka yo ve. Ata na kati ya bantu yina ke zolaka yo ve, bankaka ke zitisaka beto sambu na kisalu na beto. Beto ke tubaka nde, beto mpamba bantu ke salaka kisalu yina Yezu tubaka. Inki ke pusaka beto na kutuba mpidina? Inki lenda sadisa beto na kubakisa nde kisalu ya kusamuna ya beto ke salaka kele yina Yezu tubaka?

² Mabundu mingi ke tubaka nde bo ke longaka nsangu yina Yezu longaka. Kansi bo ke salaka yo kaka na banzo-nzambi, na televizio, na Internet, to bo ke telaka bantu kaka mutindu bo zabaka Yezu. Bankaka ke yindulaka nde kusadisa bantu ya mpasi, kusansa to kulonga bantu ya ofele kele mpi mutindu ya nkaka ya kusamuna. Keti bisalu yai kele kibeni kisalu ya kusamuna yina Yezu tubilaka?

 3. Inki mambu iya Matayo 28:19, 20 ke tubila, yina balongoki ya Yezu fwete sala?

³ Keti Yezu tubaka nde balongoki na yandi fwete vingila nde bantu kwisa kusosa bo? Ve! Ntangu Yezu futumukaka, yandi zabisaka balongoki na yandi nde: “Beno kwenda mpi beno kumisa bantu ya makanda yonso balongoki, beno botika bo . . . , beno longa bo na kuzitisa mambu yonso ya mono songaka beno.” (Matayo 28:19, 20) Yo ke tendula nde balongoki ya Yezu fwete sala mambu iya. Beto fwete kumisa bantu balongoki, kubotika bo, mpi kulonga bo. Kansi ntete beto fwete kwenda kusosa bo. Muntu mosi ya mayele yina ke longukaka Biblia tubaka nde: “Bakristu yonso fwete ‘kwenda,’ ata yo ta lomba kusabuka babala-bala to banzadi.”—Matayo 10:7; Luka 10:3.

 4. Kukuma “balobi-bantu” ke tendula nki?

⁴ Yezu zolaka nde balongoki na yandi kusala nki? Keti yandi zolaka nde konso muntu kusamuna na mutindu na yandi, to bo fwete kudibongisa mbote mpi kusala na kimvuka? Sambu muntu mosi mpamba ta kuka ve kusamuna na “makanda yonso,” yo lombaka nde balongoki kudibongisa mbote mpi kusala na kimvuka. Yo yina Yezu zabisaka bo na kukuma “balobi-bantu.” (Tanga Matayo 4:18-22.) Yezu vandaka kutubila ve mulobi-mbisi yina kele yandi mosi, me tula pambu na ndobo, mpi ke vingila kukanga mbisi. Kansi Yezu vandaka kutubila kuloba ti bukondi. Yo ke vandaka mpasi, ke lombaka nde bantu kuvanda mingi, mpi kudibongisa mbote.—Luka 5:1-11.

 5. Inki bangiufula iya beto fwete pesa mvutu mpi sambu na nki?

⁵ Sambu na kuzaba bantu yina ke longaka nsangu ya mbote bubu yai, beto fwete pesa mvutu na bangiufula yai:

• Inki nsangu balongoki ya Yezu fwete longa?

• Inki fwete pusa bo na kulonga yo?

• Inki bametode bo fwete sadila?

• Bo fwete longa na wapi, mpi yo fwete baka bantangu ikwa?

Bamvutu na bangiufula yai ta sadisa beto na kuzaba bantu yina ke sala kisalu yai ya ke gulusaka bantu. Yo ta pesa beto mpi ngolo ya kulanda kusamuna.—1 Timoteo 4:16.

 6. Inki ke ndimisa nge nde Bambangi ya Yehowa ke longaka nsangu ya Yezu?

⁶ Tanga Luka 4:43. Yezu longaka “nsangu ya mbote ya Kimfumu.” Yandi zolaka mpi nde balongoki na yandi kusala bonso yandi. Banani ke longaka bantu yonso nsangu yina ya mbote? Kaka Bambangi ya Yehowa! Ata bantu ya nkaka yina ke zolaka beto ve ke ndimaka diambu yai. Mambu mumpe mosi, yina zingaka na bansi mingi, zabisaka Mbangi ya Yehowa mosi ke monisa yo. Na konso insi yina yandi vandaka kukwenda, yandi vandaka kuyula Bambangi ya Yehowa nki nsangu bo ke longaka. Mumpe yango ke tuba nde, “Bo yonso vandaka bazoba mpi bo vandaka kupesa kaka mvutu mosi nde: ‘Nsangu ya mbote ya Kimfumu.’” Kutuba ya mumpe yai ke monisa kibeni nde beto kele ve bazoba kansi beto kele Bakristu ya kieleka mpi beto kele na bumosi. (1 Bakorinto 1:10) Zulunalu, Nzozulu ya Nkengi Kesamunaka Kimfumu ya Yehowa, ke tubilaka ntete-ntete Kimfumu ya Nzambi. Beto ke basisaka konso nimero na yo na bakopi kiteso ya 59 000 000 mpi na bandinga 254. Yo kele mukanda ya ntete yina bo ke kabulaka mingi na ntoto ya mvimba!

 7. Inki mutindu beto me zaba nde bamfumu ya mabundu ya Kikristu ke samunaka ve nsangu ya Yezu?

⁷ Bamfumu ya mabundu ya Kikristu ke longaka ve bantu Kimfumu ya Nzambi. Mingi na kati na bo ke tubaka nde yo kele mawi mosi yina kele na ntima ya muntu. (Luka 17:21) Bo ke longaka ve bantu nde Kimfumu ya Nzambi kele luyalu mosi ya zulu, mpi Yezu kele Ntotila na yo. Kansi, bo ke tangaka zina ya Yezu mingi na bankinsi na bo ya Noël mpi ya Paki. Bo ke longaka ve nde Kimfumu ta manisa bampasi yonso mpi ta katula mambu yonso ya mbi na ntoto. (Kusonga 19:11-21) Yo ke songa nde bamfumu ya mabundu me zaba ve mambu yina Yezu, Ntotila ya Kimfumu ya Nzambi, ta sala. Sambu bo me zaba mpi ve nsangu ya Yezu, bo ke bakisaka ve sambu na nki bo fwete samuna.

 8. Inki mabanza ya mbi ke pusaka bantu na kusamuna?

⁸ Balongoki ya Yezu fwete samuna ve sambu na kuzwa mbongo to kutunga banzo ya nene-nene. Yezu tubaka nde: “Beno me baka ya ofele, beno pesa mpi ya ofele.” (Matayo 10:8) Yo yina, bantu fwete kumisa ve kisalu ya kusamuna mumbongo. (2 Bakorinto 2:17, noti na nsi ya lutiti) Balongoki ya Yezu fwete lomba ve nde bo futa bo sambu bo ke samuna. (Tanga Bisalu 20:33-35.) Ata ntuma ya Yezu kele pwelele, mabundu mingi me vilaka nzila. Bo ke lomba-lombaka mbongo sambu na kuyidika banzo-nzambi, kufuta bantwadisi na bo mpi bantu ya nkaka. Yo yina bantwadisi mingi ya mabundu me kumaka bamvwama.—Kusonga 17:4, 5.

 9. Inki mutindu Bambangi ya Yehowa ke monisaka nde bo ke salaka kisalu ya kusamuna ti bikuma ya mbote?

⁹ Keti Bambangi ya Yehowa ke lombaka mbongo na Banzo ya Kimfumu to na balukutakanu ya nene? Ve! Bo ke salaka kisalu na bo na nsadisa ya makabu yina bantu ke pesaka na luzolo na bo mosi. (2 Bakorinto 9:7) Na mvula ya me luta, Bambangi ya Yehowa lutisaka bangunga kuluta bamiliare zole na kisalu ya kusamuna nsangu ya mbote, mpi bo longaka Biblia na bantu kuluta bamilio uvwa konso ngonda. Bo ke futaka bo ve sambu na kisalu yina bo ke salaka kansi bo ke sadilaka na kiese mbongo na bo mosi sambu na kusala kisalu yai. Muntu mosi ya mayele tubaka mambu yai sambu na kisalu ya Bambangi ya Yehowa: “Lukanu na bo ke vandaka ya kusamuna mpi kulonga.” Yandi tubaka mpi nde, Bambangi ya Yehowa ke vandaka ve ti bamfumu yina bo ke futaka mbongo. Kansi kana beto ke samunaka ve sambu na kuzwa mbongo, nki ke pusaka beto kibeni na kusamuna? Beto ke salaka kisalu yai na luzolo yonso sambu beto ke zolaka Yehowa mpi bantu. Beto ke lungisaka mambu yina Nzambi tubaka na Nkunga 110:3. (Tanga.)

10. Inki bametode Yezu ti balongoki na yandi sadilaka sambu na kusamuna?

¹⁰ Inki bametode Yezu ti balongoki na yandi sadilaka sambu na kusamuna? Bo vandaka kukwenda na bisika yonso yina bo lenda kuta bantu. Mu mbandu, na babala-bala mpi na bazandu. Bo vandaka mpi kukwenda kusosa bantu na banzo na bo. (Matayo 10:11; Luka 8:1; Bisalu 5:42; 20:20) Kusamuna nzo na nzo vandaka metode mosi ya mbote ya kusolula ti bantu ya mitindu yonso.

11, 12. Fwanisa bikesa yina mabundu ya Kikristu ke salaka sambu na kulonga nsangu ya mbote ti yina Bambangi ya Yehowa ke salaka.

¹¹ Keti bantu ya mabundu ya Kikristu ke landaka mbandu ya Yezu ya kusamuna nsangu ya mbote? Bamfumu ya mabundu ke longaka kaka bantu ya mabundu na bo. Bo ke kumisaka ve bantu ya nkaka balongoki, kansi bo ke sosaka kaka kutanina bantu yina ke kwisaka dezia na nzo-nzambi. Na nsungi mosi, bo zabisaka bantu ya mabundu na bo na kusamuna. Mu mbandu, Pape Jean Paul II sonikaka mukanda mosi na 2001 nde, bakristu ya katolika fwete longa Evanzile mpi fwete vanda kikesa bonso ntumwa Polo, yina tubaka nde: “Mawa na mono kana mono zabisa ve nsangu ya mbote.” Na nima, pape tubaka nde bakristu yonso ya katolika fwete longa nsangu ya mbote kansi ve kaka ndambu ya bantu yina bo longaka mutindu ya kusamuna. Ata mpidina, bantu fioti mpamba salaka yo.

¹² Ebuna Bambangi ya Yehowa? Kaka bo bantu ke longaka nde Yezu me kumaka Ntotila ya ke yala, banda 1914. Bo ke lemfukilaka Yezu mpi ke tulaka kisalu ya kusamuna na kisika ya ntete. (Marko 13:10) Mukanda mosi (Pillars of Faith—American Congregations and Their Partners) tubaka nde Bambangi ya Yehowa ke bakaka kisalu ya kusamuna na mbalu mingi. Yo tubaka mpi nde ntangu bo ke kutanaka ti bantu yina kele na nzala, bayina kele mawa-mawa mpi bayina ke bela, bo ke sadisaka bo. Kansi bo ke vilaka ve nde lukanu na bo ya ntete-ntete kele ya kulonga bantu nde nsi-ntoto yai me kuma na nsuka mpi Nzambi ta gulusa bantu. Bambangi ya Yehowa ke landa kulonga nsangu yai mpi bo ke sadilaka bametode yina Yezu ti balongoki na yandi sadilaka.

13. Beto fwete longa nsangu ya mbote na wapi?

¹³ Yezu tubaka nde balongoki na yandi ta samuna mpi ta longa nsangu ya mbote na “ntoto ya mvimba.” Yandi songaka bo mpi na kukumisa bantu ya “makanda yonso” balongoki. (Matayo 24:14; 28:19, 20) Yo ke tendula nde beto fwete samuna nsangu ya mbote na ntoto ya mvimba.

14, 15. Inki ke monisa nde Bambangi ya Yehowa ke lungisaka mbikudulu ya Yezu ya kusamuna na ntoto ya mvimba? (Tala bifwanisu ya luyantiku ya disolo.)

¹⁴ Bambangi ya Yehowa mpamba bantu ke lungisaka mbikudulu ya Yezu, ya kusamuna nsangu ya mbote na ntoto ya mvimba. Inki ke ndimisa beto? Na États-Unis, bamfumu ya mabundu kele kiteso ya 600 000, kansi Bambangi ya Yehowa kiteso ya 1 200 000 bantu ke samunaka nsangu ya mbote na insi yina ya mvimba. Na ntoto ya mvimba, mimpe ya Katolika kele kiteso ya 400 000, kansi Bambangi ya Yehowa kele kuluta bamilio 8 mpi bo ke samunaka nsangu ya mbote na bansi 240. Ya kieleka, Bambangi ya Yehowa mpamba bantu ke samunaka nsangu ya mbote na ntoto ya mvimba; yo ke pesaka Yehowa lukumu mpi nkembo!—Nkunga 34:1; 51:15.

¹⁵ Lukanu na beto, Bambangi ya Yehowa, kele ya kusamuna nsangu ya mbote na bantu mingi kibeni na ntwala nde nsuka kukwisa. Sambu na kusamuna mbote, beto ke balulaka mpi ke basisaka bamilio ya mikanda, bazulunalu, batrakiti, mpi tumikanda ya kubingisa bantu na balukutakanu ya nene mpi na Lusungiminu, na bandinga kuluta 700. Beto ke kabulaka yo ya ofele. Kaka na mvula ya me luta, beto basisaka mikanda kuluta bamiliare 4. Beto me basisaka mpi Biblia—Mbalula ya Nsi-Ntoto ya Mpa kuluta bamilio 200, na bandinga kuluta 130. Site Internet na beto kele ti malongi na bandinga kuluta 750. Bambangi ya Yehowa mpamba bantu ke sala kisalu yai ya nene.

16. Inki ke ndimisa beto nde Bambangi ya Yehowa kele ti mpeve santu?

¹⁶ Beto ta sala kisalu ya kusamuna bantangu ikwa? Yezu tubaka nde bo ta samuna nsangu ya mbote tii ntangu nsuka ta kwisa. Beto Bambangi ya Yehowa, beto ke landa kusamuna na bilumbu yai ya nsuka sambu beto kele ti mpeve santu ya Yehowa. (Bisalu 1:8; 1 Piere 4:14) Bantu ya mabundu ya nkaka lenda tuba nde, “Beto kele ti mpeve santu.” Kansi, keti bo ke salaka kisalu yina Bambangi ya Yehowa ke salaka na bilumbu yai ya nsuka? Mabundu ya nkaka me mekaka kusamuna bonso beto, kansi bo me kukaka ve. Bankaka ke zolaka kusamuna, kansi bo ke salaka yo kaka bantangu fioti. Bankaka diaka ke mekaka mpi kusamuna nzo na nzo, kansi bo ke longaka ve nsangu ya mbote ya Kimfumu. Yo yina bo ke kukaka ve kusala kisalu yina Yezu salaka.

17, 18. (a) Sambu na nki beto lenda tuba nde Bambangi ya Yehowa mpamba bantu ke longaka nsangu ya mbote ya Kimfumu bubu yai? (b) Inki ke sadisaka beto na kulanda kulonga?

¹⁷ Banani ke longaka nsangu ya mbote ya Kimfumu bubu yai? Kaka Bambangi ya Yehowa! Inki ke ndimisa yo? Beto ke longaka nsangu ya Yezu, disongidila, nsangu ya mbote ya Kimfumu. Ntangu beto ke kwendaka kusosa bantu na kisalu ya kusamuna, beto ke sadilaka bametode ya mbote. Beto ke samunaka ti bikuma ya mbote, disongidila, zola sambu na Yehowa mpi bantu. Kulonga bantu ya makanda mpi ya bandinga yonso ke sadisaka beto na kusamuna na bisika mingi kibeni. Beto ta landa kulonga nsangu ya mbote ya Kimfumu tii na nsuka!

¹⁸ Kisalu ya nene ya kusamuna nsangu ya mbote, yina bansadi ya Yehowa ke sala na bilumbu yai ya nsuka, ke yitukisa kibeni. Kansi nki ke sadisaka beto na kusala kisalu yai? Ntumwa Polo tubaka nde: “Nzambi muntu ke pesaka beno kikesa sambu na mambu yina ke pesaka yandi kiese, mpi yandi ke pesaka beno nzala ti ngolo ya kusala mambu.” (Bafilipi 2:13) Beto ke lomba Yehowa na kulanda kupesa beto ngolo ya kufwana sambu na kulemba ve kusamuna nsangu ya mbote!—2 Timoteo 4:5.