KAPU YA 13

“Mono ke Zolaka Tata”

1, 2. Ntumwa Yoane kutubaka inki na yina metala nkokila ya nsuka yina bantumwa kulutisaka ti Yezu?

BAKALA mosi ya mununu kedindisa dinsala na yandi na kati ya tinta, mabanza na yandi kele ya kufuluka na mambu mingi ya melutaka. Zina na yandi Yoane, mpi yandi kele ntumwa ya nsuka ya Yezu Kristu yina kele na luzingu. Ntangu yai yandi kele ti bamvula kiteso ya 100, mabanza na yandi kenata yandi na bamvula 70 ya melutaka na nkokila mosi ya mfunu mingi​—nkokila ya nsuka yina yandi mpi bantumwa yankaka kulutisaka ti Yezu na ntwala ya lufwa ya Yezu. Mpeve santu ya Nzambi kesadisa Yoane na kuyibuka mpi na kusonika mambu na mutindu mosi ya sikisiki mpenza.

² Na mpimpa yina, Yezu kutubaka pwelele nde bo tafwa yandi ntama mingi ve. Yoane mpamba muntu kemonisa kikuma yina Yezu kutubaka nde yandi tandima lufwa yina ya mbi: “Bantu ya nsi-ntoto yai fweti zaba nde mono ke zolaka Tata; yo yina, mono ke salaka konso mambu yina ya yandi ke songaka mono na kusala. Beno telama, beto katuka awa.”​—Yoane 14:31.

 3. Inki mutindu Yezu kumonisaka nde yandi vandaka kuzola Tata na yandi?

³ “Mono ke zolaka Tata.” Sambu na Yezu, dyambu yai kuvandaka na mfunu mingi kuluta mambu yonso. Yo ketendula ve nde yandi vandaka kuvutukila bangogo yina mbala na mbala. Ya kyeleka, Yoane 14:31 kele kisika mosi kaka na Biblia yina beto kemona Yezu kemonisa zola na yandi sambu na Tata na yandi na pwelele yonso. Ata mpidina, Yezu kuzingaka na kuwakana ti bangogo yai. Zola na yandi sambu na Yehowa vandaka kumonana konso kilumbu. Kikesa, bulemfu, mpi kukanga​-ntima ya Yezu vandaka kumonisa zola na yandi sambu na Nzambi. Zola yai vandaka ti bupusi na kisalu na yandi ya mvimba.

4, 5. Biblia kesyamisaka zola ya nki mutindu, mpi nki beto lenda tuba na yina metala zola ya Yezu sambu na Yehowa?

⁴ Bubu yai, bantu yankaka lenda yindula nde zola kele kidimbu ya kukonda ngolo. Bo lenda yindula bapoemi ya zola to bankunga ya zola, ziku nkutu zola ya zulu​-zulu yina kevandaka na kati ya bakala ti nkento. Biblia ketubilaka zola yina kevandaka na kati ya bakala ti nkento, kansi yo kesalaka yo na mutindu ya luzitu kuluta mpila yina bantu mingi kesalaka yo bubu yai. (Bingana 5:15-21) Kansi, Ndinga ya Nzambi ketubilaka mingi zola ya mutindu yankaka. Zola yai kele ve kaka mawi ya ngolo to ya ntangu fyoti; to dilongi mosi ya madidi​-madidi ya mesimbama na mayele. Yo ketadilaka ntima mpi mabanza. Zola ya mutindu yina kekatukaka mpenza na ntima, yo ketwadisamaka na minsiku ya kuzanguka mpi yo kemonanaka na bisalu ya ketunga. Yo kele ve zola ya zulu​-zulu. Ndinga ya Nzambi ketuba nde, zola “ke manaka ve.”​—1 Korinto 13:8.

⁵ Ata muntu mosi ve mezolaka Yehowa mingi kuluta Yezu. Ata muntu mosi ve kulutaka Yezu na kuzinga na kuwakana ti bangogo yina yandi mosi kutubaka nde yo kele nsiku ya nene kuluta bansiku yonso ya Nzambi: “Nge fweti zola Mfumu Nzambi na nge, na ntima na nge yonso, na luzolo na nge yonso, na mabanza na nge yonso ti na ngolo na nge yonso.” (Marko 12:30) Inki mutindu Yezu kuyedisaka zola ya mutindu yai? Inki mutindu yandi taninaka zola na yandi ya ngolo sambu na Nzambi ntangu yandi vandaka na ntoto? Mpi nki mutindu beto lenda landa mbandu na yandi?

Bangwisana ya Zola ya Kuluta Ntama mpi ya Kuluta Ngolo

6, 7. Inki mutindu beto mezaba nde Bingana 8:22-31 ketubila Mwana ya Nzambi, kansi yo ketubila ve kaka mayele?

⁶ Keti nge mesalaka dezia kisalu ti nduku mosi mpi na nima beno zole kukumaka banduku ya mbote mpi ya ngolo? Dyambu yai lenda sadisa nge na kubakisa zola yina kuvandaka na kati ya Yehowa mpi Mwana na yandi mosi kaka ya kubutuka. Beto metubila dezia mbala mingi Bingana 8:30, kansi bika beto tadila yo ntangu yai na nsadisa ya baverse yina kele na ntwala mpi na nima na yo. Banda na verse 22 tii na 31, beto kekuta ntendula ya kupemama ya mayele yina bo memonisa bonso muntu. Inki mutindu beto mezaba nde bangogo yai ketadila Mwana ya Nzambi?

⁷ Na verse 22, mayele ketuba nde: “Na bima yonso ya Mfumu Nzambi salaka, yandi salaka ntete mono; mono kele kisalu ya ntete ya yandi salaka.” Yo fwete vanda nde verse yai ketubila ve kaka mayele, sambu Nzambi ‘kusalaka’ ve kikalulu yai. Yo vandaka ve ti luyantiku sambu Yehowa kevandaka ntangu yonso na luzingu mpi yandi kevandaka ntangu yonso mayele. (Nkunga 90:2) Kansi, Mwana ya Nzambi vandaka “mbuta ya bantu yonso ti ya bima yonso ya Nzambi salaka.” Nzambi kusalaka, to kugangaka yandi; yandi vandaka kisalu ya ntete na kati ya bisalu yonso yina Yehowa kusalaka. (Kolosai 1:15) Mwana vandaka na luzingu na ntwala nde Nzambi kuganga ntoto ti zulu, mutindu mukanda ya Bingana kemonisa yo. Mpi sambu yandi kele Ndinga to Kinati​-Ndinga ya Nzambi, yandi kemonisaka mayele ya Yehowa na mutindu ya kukuka.​—Yoane 1:1.

 8. Inki kisalu Mwana vandaka kusala na ntwala ya kukwisa na ntoto, mpi beto lenda yindula inki ntangu beto ketala lugangu ti kyese?

⁸ Inki kisalu Mwana vandaka kusala na nsungi ya bantangu mingi yina yandi lutisaka na zulu na ntwala ya kukwisa na ntoto? Verse 30 kezabisa beto nde yandi vandaka penepene na Nzambi bonso “kapita ya kisalu.” Yo ketendula inki? Kolosai 1:16 ketendula nde: “Sambu bima yonso yina kele na zulu ti yina kele awa na nsi-ntoto . . . Nzambi salaka yina yonso na lusadisu ya Kristo ti sambu na Kristo.” Yo yina, Yehowa, Ngangi, kusadilaka Mwana na yandi, Kapita ya Kisalu, sambu na kuganga bima yonso yankaka​—banda na bigangwa ya kimpeve yina kele na zulu tii na luyalanganu ya nene, ntoto ti banti mpi bambisi ya mitindu na mitindu, mpi nsukansuka kima ya kuluta kitoko na kati ya bima yina yandi salaka na ntoto: muntu. Na mambu yankaka, beto lenda fwanisa kuwakana yai ya kele na kati ya Tata ti Mwana ti kuwakana yina kevandaka na kati ya arshitekte ti muntu ya ketunga; mpi muntu yango ketungaka na kuwakana ti bangindu ya mayele ya arshitekte. Ntangu kima mosi ya lugangu keyitukisaka beto, beto kekumisaka Arshitekte ya Nene. (Nkunga 19:2) Kansi, beto lenda yibuka mpi kuwakana ya mezingaka mingi mpi ya kyese yina kele na kati ya Ngangi ti ‘kapita na yandi ya kisalu.’

9, 10. (a) Inki kukumisaka ngolo bangwisana yina kele na kati ya Yehowa mpi Mwana na yandi? (b) Inki lenda kumisa ngolo bangwisana na nge ti Tata na nge ya zulu?

⁹ Ntangu bantu zole ya kukonda kukuka kesalaka kumosi, bantangu yankaka bo kewakanaka ve mbote. Yo kele ve mutindu yina sambu na Yehowa mpi Mwana na yandi! Mwana kusalaka ti Tata na nsungi ya bamvula mingi kibeni mpi yandi vandaka ntangu yonso na “kiese na meso na yandi.” (Bingana 8:30) Ya kyeleka, yandi vandaka kusepela kuvanda kumosi ti Tata na yandi, ebuna Tata mpi vandaka kusepela na kuvanda kumosi ti Mwana. Sambu Mwana vandaka kulonguka na kulanda bikalulu ya Tata, yandi vandaka kufwanana mingi ti Tata na yandi. Yo yina, yo keyitukisa beto ve na kumona nde bangwisana ya Tata ti Mwana kukumaka ngolo mpenza! Beto lenda binga yo mpenza bangwisana ya zola ya kuluta ntama mpi ya kuluta ngolo yina kele na luyalanganu ya mvimba.

¹⁰ Kansi, yo lenda tendula inki sambu na beto? Nge lenda yindula nde nge lenda kuka ve kusala bangwisana ya mutindu yai na Yehowa. Yo kele kyeleka nde ata muntu mosi ve na kati na beto kele na pozisio ya kuzanguka yina Mwana kele na yo. Ata mpidina, beto kele na dibaku mosi ya mbote. Yibuka nde, Yezu kupusanaka penepene ya Tata na yandi sambu yandi vandaka kusala kumosi ti yandi. Na zola yonso, Yehowa kepesa beto dibaku ya kuvanda ‘banduku na yandi ya kisalu.’ (1 Korinto 3:9, NW) Ntangu beto kelanda mbandu ya Yezu na kisalu ya kusamuna, beto fwete yibuka ntangu yonso nde beto kele banduku ya kisalu ya Nzambi. Ebuna, bangwisana ya zola yina kevukisa beto ti Yehowa takuma ngolo mingi. Yai kele lukumu ya kuluta nene!

Mutindu Yezu Kutaninaka Zola na Yandi ya Ngolo Sambu na Yehowa

11-13. (a) Sambu na nki yo kele mbote na kutadila zola bonso kima mosi ya kele na luzingu, mpi na kileke na yandi Yezu kusalaka nki sambu zola na yandi sambu na Yehowa kuvanda kaka ngolo? (b) Inki mutindu Mwana ya Nzambi kumonisaka mpusa ya kulonguka na Yehowa, na ntwala ya kukwisa na ntoto mpi ntangu yandi vandaka mbuta na ntoto?

¹¹ Na mitindu mingi, yo kele mbote na kutadila zola ya kele na ntima na beto bonso kima mosi ya kele na luzingu. Bonso kintuntu ya kitoko ya bo ketulaka na kati ya nzo, beto fwete disa mpi kukeba zola kana beto kezola nde yo yela mpi yo toma. Kana bo kekeba mpi kedisa yo ve, yo talemba mpi tafwa. Yezu kumonaka ve mpamba zola na yandi sambu na Yehowa. Na nsungi ya luzingu na yandi awa na ntoto, yandi salaka yonso sambu zola yina kuvanda kaka ngolo mpi yo landa na kutoma. Bika beto tala mutindu yandi salaka yo.

¹² Yindula dyaka dyambu yina kusalamaka na kileke ya Yezu ntangu yandi tubaka ti kikesa yonso na tempelo na Yeruzalemi. Yibuka bangogo yai ya yandi zabisaka bibuti na yandi yina vandaka kudiyangisa: “Sambu na nki beno vandaka kusosa mono? Beno zabaka ve nde mono fweti vanda na Nzo ya Tata na mono?” (Luka 2:49) Ntangu yandi vandaka leke, yo kemonana nde Yezu vandaka kuyibuka ve ata fyoti mambu yonso yina yandi zabaka ntangu yandi vandaka na zulu. Kansi, zola na yandi sambu na Yehowa, Tata na yandi, vandaka ngolo. Yandi zabaka nde zola ya mutindu yina fwete monana na lusambu. Yo yina, ata kisika mosi ve na nsi​-ntoto vandaka kusepedisa yandi mingi kuluta nzo ya Tata na yandi yina vandaka kisika ya nene ya lusambu ya bunkete. Yandi vandaka na mpusa ya ngolo ya kuvanda kuna mpi yandi vandaka kuzola ve kukatuka kuna. Dyaka, yandi vandaka kaka ve muntu ya ketala mpamba. Yandi vandaka na mpusa ya ngolo ya kulonguka mambu ya metala Yehowa mpi ya kutuba mambu yina yandi zabaka. Mawi ya mutindu yina kuyantikaka ve ntangu yandi vandaka na bamvula 12 mpi yo sukaka ve kaka na bamvula yina.

¹³ Na luzingu na yandi na ntwala ya kukuma muntu, Mwana vandaka kulonguka na Tata na yandi na kyese yonso. Mbikudulu mosi ya kele na Yezaya 50:4-6 kemonisa nde Yehowa kupesaka Mwana na yandi formasio ya sikisiki na yina metala mukumba na yandi ya Mesia. Ata formasio ya mutindu yina vandaka kulomba kulonguka bampasi yankaka yina yandi takutana na yo bonso Muntu yina Yehowa metulaka mafuta, Mwana kulongukaka ti mpusa ya ngolo. Ebuna, na nima ya kukwisa na ntoto mpi ya kukuma mbuta, Yezu kuvandaka kaka ti mpusa ya ngolo ya kukwenda na nzo ya Tata na yandi mpi ya kuvukana na lusambu mpi na malongi yina Yehowa vandaka kuzola nde bo longa kuna. Yo yina, Biblia kendimisa beto nde Yezu vandaka kukwenda ntangu yonso na tempelo mpi na sinagoga. (Luka 4:16; 19:47) Kana beto kezola nde zola na beto sambu na Yehowa kuvanda kaka ngolo mpi kutoma, beto fwete kwenda ntangu yonso na balukutakanu ya Bukristu, kisika yina beto kesambilaka Yehowa mpi kekumisaka mingi nzayilu mpi ntonda na beto sambu na yandi.

14, 15. (a) Sambu na nki Yezu vandaka kusosa kuvanda yandi mosi? (b) Inki mutindu bisambu ya Yezu na Tata na yandi kumonisaka bangwisana na bo mpi luzitu?

¹⁴ Yezu kutaninaka mpi zola na yandi ya ngolo sambu na Yehowa na kusambaka mbala na mbala. Ata yandi vandaka kuzola bantu mingi mpi kulutisa ntangu ti bo, yo kebenda dikebi na kumona nde yandi vandaka kuzola mpi kuvanda yandi mosi. Mu mbandu, Luka 5:16 ketuba nde: “Yesu vandaka kubikisa bo, yandi vandaka kwenda kusamba Nzambi yandi mosi na bisika yina ya bantu vandaka ve.” Mutindu mosi, Matayo 14:23 ketuba nde: “Ntangu bo me vutuka na babwala imene, Yesu kwendaka yandi mosi na ndambu ya bangumba sambu na kusamba Nzambi. Ntangu mpimpa me bwa, Yesu vandaka kaka kuna yandi mosi mpamba.” Kana Yezu vandaka kusosa kuvanda yandi mosi na mabaku yai mpi na mabaku yankaka, yo kele sambu yandi zolaka kuvanda yandi mosi ti Yehowa, sambu na kusamba Tata na yandi na dikebi yonso, kansi ve sambu yandi vandaka muntu yina kekudivandilaka to yina kezolaka ve kuvanda ti bantu yankaka.

¹⁵ Ntangu yandi vandaka kusamba, bantangu yankaka Yezu vandaka kusadila bangogo “Aba, Tata.” (Marko 14:36, NW) Na bilumbu ya Yezu, “Aba” kuvandaka ngogo mosi ya zola ya bantu ya dibuta vandaka kusadila sambu na kubinga “tata.” Yo vandaka mbala mingi na kati ya bangogo ya ntete yina mwana vandaka kulonguka. Ata mpidina, yo vandaka ngogo mosi ya luzitu. Ata ngogo yina kemonisa bangwisana yina Mwana vandaka na yo ntangu yandi vandaka kusolula ti Tata na yandi ya zola, yo kemonisa mpi luzitu ya ngolo yina yandi vandaka na yo na kiyeka ya Tata na yandi Yehowa. Beto kemona bangwisana mpi luzitu yina na bisambu na yandi yonso ya bo mesonikaka. Mu mbandu, na Yoane kapu ya 17, ntumwa Yoane ketubila kisambu ya nda ya mekatuka na ntima yina Yezu kusalaka na mpimpa na yandi ya nsuka. Yo kele mbote mpenza nde beto longuka mpi kulanda kisambu yina​—na kuvutukilaka ve bangogo yina Yezu kusadilaka kansi na kusosaka mitindu ya kusolula na masonga yonso ti Tata na beto ya zulu mbala na mbala. Kusala mutindu yina tasala nde zola na beto sambu na Tata kubikala ya moyo mpi ngolo.

16, 17. (a) Inki mutindu Yezu kumonisaka zola na yandi sambu na Tata na yandi na bangogo? (b) Inki mutindu Yezu kumonisaka kikalulu ya kukaba ya Tata na yandi?

¹⁶ Mutindu beto tubilaka yo dezia, Yezu vandaka ve kuvutukila mbala na mbala bangogo “mono ke zolaka Tata.” Kansi, mbala mingi yandi monisaka zola na yandi sambu na Tata na bangogo na yandi. Inki mutindu? Yezu yandi mosi kutubaka nde: “Tata, . . . Mfumu ya ntoto ti ya zulu, [Mono kekumisa nge na meso ya bantu yonso, NW].” (Matayo 11:25) Ntangu beto longukaka Kitini ya 2 ya mukanda yai, beto monaka nde Yezu vandaka kuzola kukumisa Tata na yandi na kusadisaka bantu na kuzaba yandi. Mu mbandu, yandi fwanisaka Yehowa ti tata mosi yina vandaka na mpusa ya ngolo ya kulolula mwana na yandi ya ntu-ngolo na mpila nde yandi vandaka kuvingila nde mwana yina kubalulaka ntima kuvutuka, ebuna ntangu Tata monaka mwana yango na ntama, yandi bakaka ntinu sambu na kwenda kukutana ti yandi mpi kuyamba yandi. (Luka 15:20) Ya kyeleka verse yai ya Yezu kemonisa zola mpi mawa ya Yehowa, kesimbaka mpenza ntima ya bantu yonso yina ketangaka yo.

¹⁷ Mbala mingi Yezu kukumisaka Tata na yandi sambu na kikalulu na yandi ya kukaba. Yandi sadilaka mbandu ya bibuti ya kukonda kukuka sambu na kumonisa mutindu beto lenda ndima mpenza nde Tata na beto tapesa beto mpeve santu yonso yina beto kele na yo mfunu. (Luka 11:13) Yezu kutubilaka mpi kivuvu yina Tata kepesa bantu na luzolo yonso. Yezu kutubilaka mingi kivuvu yina yandi vandaka na yo ya kuvutuka na kisika na yandi na zulu na lweka ya Tata na yandi. (Yoane 14:28; 17:5) Yandi zabisaka balongoki na yandi kivuvu yina Yehowa mesilaka na kupesa “kibuka ya fyoti” ya Kristu​—kivuvu ya kuyala na zulu na lweka ya Ntotila ya Mesia. (Luka 12:32; Yoane 14:2) Mpi yandi lembikaka muntu ya mbi mosi yina vandaka kulakana na kupesaka yandi kivuvu ya kuzinga na Paladisu. (Luka 23:43) Kutubila kikalulu ya kukaba ya Tata na yandi na mitindu yai kusadisaka mpenza Yezu na kutanina zola na yandi ya ngolo sambu na Yehowa. Balongoki mingi ya Kristu kemonaka nde kima kesadisaka bo mpenza na kukumisa ngolo zola to lukwikilu na bo sambu na Yehowa kele kutuba mambu ya metala yandi mpi kivuvu yina yandi kepesa na bantu yina kezolaka yandi.

Keti Nge Talanda Zola ya Yezu Sambu na Yehowa?

18. Inki kele mutindu mosi ya kuluta mfunu yina beto fwete landa mbandu ya Yezu, mpi sambu na nki?

¹⁸ Na mambu yonso yina beto fwete landa Yezu, dyambu ya kuluta mfunu kele yai: Beto fwete zola Yehowa na ntima, na luzolo, na mabanza, mpi na ngolo na beto yonso. (Luka 10:27) Beto lenda tesa ve zola yina kaka na ngolo ya mawi yina beto kele na yo sambu na yandi kansi mpi na bisalu na beto. Yezu vandaka kusuka ve kaka na kuvanda ti mawi ya zola sambu na Tata na yandi to na kutuba nde, “Mono ke zolaka Tata.” Yandi tubaka nde: “Bantu ya nsi-ntoto yai fweti zaba nde mono ke zolaka Tata; yo yina, mono ke salaka konso mambu yina ya yandi ke songaka mono na kusala.” (Yoane 14:31) Satana kutubaka nde ata muntu mosi ve lenda sadila Yehowa ti zola ya kukonda bwimi. (Yobi 2:4, 5) Sambu na kupesa mvutu ya kuluta mbote na luvunu ya mbi ya Satana, Yezu kusalaka mambu na kikesa yonso mpi kusongaka bantu ya nsi-ntoto kiteso yina yandi vandaka kuzola Tata na yandi. Nkutu yandi lemfukaka tii na lufwa. Keti nge talanda mbandu ya Yezu? Keti nge tasonga bantu ya nsi-ntoto nde nge kezolaka mpenza Yehowa Nzambi?

19, 20. (a) Sambu na nki bikuma ya mfunu beto fwete kwendaka mbala na mbala na balukutakanu ya Bukristu? (b) Inki mutindu beto lenda tadila kulonguka na beto mosi, kuyindulula mpi kisambu?

¹⁹ Na kimpeve, beto kele ti mpusa ya ngolo ya kumonisa zola ya mutindu yina. Yo yina, Yehowa mebakaka bangidika sambu beto sambila yandi na mutindu yina kedisaka mpi kekumisaka ngolo zola na beto sambu na Tata. Ntangu nge kekwendaka na balukutakanu ya Bukristu, meka na kuyibuka nde nge kele pana sambu na kusambila Nzambi na nge. Mambu yankaka ya lusambu yango kele: kuvukana na kisambu ya masonga, kuvukana na kuyimba bankunga sambu na kukumisa Nzambi, kuwidikila na dikebi yonso, mpi kupesa bamvutu kana mpila kele. Balukutakanu ya mutindu yai kepesaka nge mpi dibaku ya kupesa kikesa na bampangi​-Bakristu. (Baebreo 10:24, 25) Kusambila Yehowa mbala na mbala na balukutakanu ya Bukristu tasadisa nge na kukumisa ngolo mpenza zola na nge sambu na Nzambi.

²⁰ Beto lenda tuba mutindu mosi sambu na yina metala kulonguka na nge mosi, kuyindulula, mpi kisambu. Tadila mambu yai bonso mitindu ya kuvanda nge mosi ti Yehowa. Ntangu nge kelonguka Ndinga ya kusonama ya Nzambi mpi keyindulula yo, Yehowa kesadisaka nge na kubakisa mabanza na yandi. Ntangu nge kesambaka, nge kekangudilaka yandi ntima na nge. Yibuka nde kisambu kelombaka mambu mingi kuluta kulomba Nzambi bima. Kisambu kele mpi dibaku ya kupesa Yehowa matondo sambu na balusakumunu yina nge mebakaka mpi sambu na kukumisa yandi sambu na bisalu na yandi ya kuyituka. (Nkunga 146:1) Dyaka, kukumisa Yehowa na kyese yonso na meso ya bantu yonso kele mutindu ya kuluta mbote ya kupesa yandi matondo mpi ya kumonisa nde nge kezolaka yandi.

21. Sambu na nki yo kele mfunu na kuzola Yehowa, mpi beto tatadila nki na bakapu yina kelanda?

²¹ Zola sambu na Nzambi kele nsapi ya kyese na nge ya mvula na mvula. Yo kele mambu yina Adami ti Eva kuvandaka na yo mfunu sambu na kununga​—mpi kima yina bo kukaka ve na kuyedisa. Yo kele kima ya kuluta mfunu yina nge kele na yo mfunu sambu na kununga konso mumekamu ya lukwikilu, sambu na kubuya konso mpukumuna, mpi sambu na kukanga-ntima na konso mpasi. Kulanda Kristu ketendula ntetentete kuzola Nzambi. Ya kyeleka, zola sambu na Nzambi kele na kuwakana ti zola ya nkweno. (1 Yoane 4:20) Na bakapu yina kelanda, beto tatadila mutindu Yezu kumonisaka zola na yandi sambu na bantu. Na kapu ya kelanda, beto tatadila sambu na nki bantu mingi vandaka kumona nde bo lenda solula ti Yezu kukonda mpasi.

Inki Mutindu Nge Lenda Landa Yezu?

● Ntangu beto kesamba, inki mutindu beto lenda monisa nde beto ketulaka ntima na Yehowa, mutindu Yezu kusalaka?​—Yoane 11:41, 42; Baebreo 11:6.

● Inki mutindu beto lenda monisa zola ya masonga sambu na Yehowa na mutindu beto kesadilaka zina na yandi?​—Yoane 17:6-8.

● Sambu na nki zola sambu na Yehowa kelombaka nde beto landa mbandu ya Yezu na yina metala kubikala ya kukabwana na nsi-ntoto?​—Yoane 17:14-16; Yakobo 4:8.

● Inki mutindu beto lenda sadila ndongisila ya Yezu na yina metala kuvanda ti zola ya ngolo sambu na Yehowa?​—Kusonga 2:1-5.

[Kifwanisu ya kele na lutiti 135]

“Yesu kwendaka yandi mosi na ndambu ya bangumba sambu na kusamba Nzambi”