Mawa na Ndonga ya Bantu Yina Me Buya Kubalula Ntima

Yezu kele ti luzitu ya mingi sambu na Yoane Mbotiki. Kansi, inki mutindu bantu ya nkaka ke tadila Yoane? Yezu me tuba nde: “Ndonga yai ya bantu . . . kele bonso bana ya fioti yina me vanda na bazandu mpi yina ke tuba na ndinga ya ngolo na banduku yina bo ke sakanaka ti bo, nde: ‘Beto budilaka beno musembu, kansi beno kinaka ve; beto yimbaka bankunga ya mawa, kansi beno kudibulaka ve na mawa.’”—Matayo 11:16, 17.

Yezu ke zola kutuba nki? Yandi me monisa ngindu na yandi pwelele ntangu yandi me tuba nde: “Yoane kwisaka, yandi ke dia ve mpi ke nwa ve, kansi bantu ke tuba nde, ‘Yandi kele ti demo.’ Mwana ya muntu kwisaka, yandi ke dia mpi ke nwa, kansi bantu ke tuba nde, ‘Tala! Muntu ya ke diaka mbiki mpi ya ke nwaka vinu mingi, nduku ya bakalaki ya mpaku mpi ya bansumuki.’” (Matayo 11:18, 19) Yoane vandaka ti luzingu ya kukonda mindondo sambu yandi vandaka Munazire, nkutu yandi vandaka ve kunwa vinu, kansi ndonga yai ya bantu tubaka nde yandi kele ti demo. (Kutanga 6:2, 3; Luka 1:15) Yezu zingaka bonso bantu yonso ya nkaka. Yandi vandaka kudia mpi kunwa na bukati-kati yonso, kansi bo tubaka nde yandi lutisaka ndilu. Yo kele mpasi na kusala mambu yina ta sepedisa bantu yonso.

Yezu me fwanisa ndonga yai ya bantu ti bana ya fioti yina kele na bazandu. Bana yango ke buya kukina ntangu bana ya nkaka ke bula musembu mpi bo ke buya kuwa mawa ntangu bana ya nkaka ke yimba bankunga ya mawa. Yezu me tuba nde: “Kansi, mayele ke monanaka ya lunungu na bisalu na yo.” (Matayo 11:16, 19) Ya kieleka “bisalu,” disongidila mambu yina Yoane mpi Yezu salaka, monisaka nde mambu yina bantu vandaka kufundila bo vandaka ya luvunu.

Na nima ya kufwanisa ndonga yai ya bantu ti bantu yina me buya kubalula ntima, Yezu me nganina bambanza yina yandi salaka bidimbu ya nkumbwa: Korazini, Betsaida, mpi Kapernaumi. Yezu me tuba nde kana yandi salaka bimangu ya mutindu yai na bambanza ya Fenisia: Tire mpi Sidoni, bantu ya bambanza yai zolaka kubalula ntima. Yandi me tanga mpi Kapernaumi, mbanza yina yandi longaka mingi. Ata kuna mpi bantu mingi balulaka ve ntima. Yezu ke tuba sambu na mbanza yina nde: “Na Kilumbu ya Kusambisa, yo ta vanda pete mingi sambu na insi ya Sodome kuluta sambu na nge.”—Matayo 11:24.

Na nima, Yezu me kumisa tata na yandi yina me bumbaka kieleka ya mfunu ya kimpeve na “bantu ya mayele ti ya ngangu,” kansi yina me monisaka yo na bantu ya kudikulumusa yina me fwanana ti bana ya fioti. (Matayo 11:25) Yandi me zabisa bantu ya mutindu yina nde: “Beno kwisa na mono, beno yonso ya ke mona mpasi mpi ya ke nata kilo ya mingi, ebuna mono ta pesa beno kikesa. Beno baka vangu na mono na mapeka na beno, mpi beno longuka na mono, sambu mono kele mawete mpi ya kudikulumusa na ntima, ebuna beno ta baka kikesa sambu na beno mosi. Sambu vangu na mono kele mpasi ve na kunata mpi kizitu na mono kele kilo ve.”—Matayo 11:28-30.

Inki mutindu Yezu me pesa bantu kikesa? Bamfumu ya mabundu me tulaka kizitu na bantu mutindu bo me kotisaka bo na kimpika ya bansiku ya dibundu, mu mbandu bo me kumisaka nsiku ya Kisabatu ngolo. Kansi, Yezu me pesa bo kikesa mutindu yandi me longa bo kieleka na yina me tala Nzambi mpi yina me katula bo na kimpika ya bansiku yina. Yandi me monisa mpi mutindu bantu yina bamfumu ya politiki ke monisa mpasi mpi bayina me lemba sambu na masumu lenda baka kikesa. Ya kieleka, Yezu me monisa bo mutindu Nzambi lenda lolula masumu na bo mpi mutindu bo lenda zinga na ngemba ti Nzambi.

Bantu yonso yina ke ndima kubaka vangu ya Yezu yina kele mpasi ve lenda kudipesa na Nzambi mpi kusadila tata na beto ya zulu mpi yina ke wilaka bantu mawa. Kusala mutindu yina kele kizitu ve sambu bansiku ya Nzambi kele kilo ve.—1 Yoane 5:3.