Malongi na Yina Me Tala Kikalulu ya Kuyamba Banzenza mpi Kisambu

Bwala Betania kele na zulu ya Ngumba ya Banti ya Olive mpi yo kele na esti; muntu lenda sala bakilometre kiteso ya 3 katuka na Yeruzalemi tii na Betania. (Yoane 11:18) Yezu me kwenda kuna mpi yandi me kota na nzo ya Marta ti Maria; bankento yai zole kele bampangi. Bo ti mpangi na bo ya bakala Lazare kele banduku ya Yezu, bo me yamba yandi mbote kibeni.

Yo kele lukumu kibeni na kuyamba Mesia bonso munzenza. Marta ke zola kuyamba Yezu mbote, yo yina yandi ke kudibongisa sambu na kulamba madia ya kitoko. Ntangu Marta ke lamba, mpangi na yandi Maria me vanda na makulu ya Yezu mpi ke widikila yandi. Ebuna, Marta me songa Yezu nde: “Mfumu, keti yo ke sala nge ata kima ve mutindu mpangi na mono me bikisa mono mono mosi na kusala bisalu yai? Songa yandi na kukwisa kusadisa mono.”—Luka 10:40.

Na kisika ya kunganina Maria, Yezu me longisila Marta sambu yandi ke kudiyangisa mingi sambu na bima ya kinsuni; Yezu me songa yandi nde: “Marta, Marta, nge ke kudiyangisa mpi ke mona mpasi sambu na mambu mingi. Kansi, bima fioti kele mfunu, to mosi mpamba. Maria me sola kima ya mbote, mpi bo ta botula yandi yo ve.” (Luka 10:41, 42) Ya kieleka, Yezu ke zola kutuba nde yo kele ve mfunu na kulutisa ntangu mingi sambu na kulamba madia mingi. Ata madia fioti me fwana.

Bangindu ya Marta kele ya mbote. Yandi ke zola kumonisa kikalulu ya kuyamba banzenza. Kansi, sambu yandi ke kudiyangisa mingi sambu na madia, yandi ke konda malongi ya mfunu yina Mwana ya Nzambi ke longa. Yezu me monisa nde Maria me sala nsola ya mbote yina ta natila yandi mambote ya kukonda nsuka mpi yo kele dilongi yina beto yonso fwete vila ve.

Na dibaku ya nkaka, Yezu me longa dilongi ya nkaka ya mfunu. Longoki mosi me songa Yezu nde: “Mfumu, longa beto mutindu ya kusamba, mutindu Yoane mpi longaka balongoki na yandi.” (Luka 11:1) Yezu salaka yo kiteso ya mvula mosi ti ndambu me luta na Disolo na yandi na Zulu ya Ngumba. (Matayo 6:9-13) Mbala ya nkaka, longoki yai vandaka ve kilumbu yina, yo yina Yezu me vutukila bangindu ya mfunu. Na nima, Yezu me pesa mbandu mosi sambu na kumonisa nde kulanda kusamba kele mfunu mingi.

“Yindula nde muntu mosi na kati na beno kele ti nduku mosi mpi yandi me kwenda na nduku yina na midi ya mpimpa mpi me tubila yandi nde, ‘Nduku na mono, defisa mono mampa tatu sambu nduku na mono mosi me katuka na nzietelo, yandi me kwisa mpi mono kele ve ti kima ya kupesa yandi.’ Kansi muntu yina kuvutula na kati ya nzo nde: ‘Kuyangisa mono ve. Kielo kele ya kukanga, mpi bana na mono ya fioti me lala ti mono na mbeto. Mono lenda telama ve sambu na kupesa nge kima.’ Mono ke tubila beno nde, ata yandi ta telama ve sambu na kupesa yandi konso kima yina sambu yandi kele nduku na yandi, ntembe kele ve nde sambu na kudindamana na yandi ya ngolo, yandi ta telama mpi ta pesa yandi konso kima yina yandi kele na yo mfunu.”—Luka 11:5-8.

Yezu ke tuba ve nde Yehowa kele bonso nduku yai, disongidila yandi ke vandaka ve ti luzolo ya kupesa mvutu na mambu ya beto ke lombaka yandi. Kansi, Yezu ke monisa nde kana nduku yina ya kele ve ti luzolo ya kusadisa nduku na yandi me sadisa yandi sambu nduku na yandi me landa kulomba yandi lusadisu, ntembe kele ve nde tata na beto ya zulu yina ke zolaka beto mingi ta pesa mvutu na mambu yina bansadi na yandi ya kwikama ke lombaka na masonga yonso. Yezu me tuba diaka nde: “Mono ke tubila beno nde, beno landa na kulomba, ebuna bo ta pesa beno; beno landa na kusosa, ebuna beno ta mona; beno landa na kubula na kielo, ebuna bo ta kangudila beno. Sambu konso muntu yina ke lombaka ke bakaka, mpi konso muntu yina ke sosaka ke monaka, mpi konso muntu yina ke bulaka na kielo, bo ta kangudila yandi.”—Luka 11:9, 10.

Na nima, Yezu me fwanisa Yehowa ti batata sambu na kumonisa dibanza yai ya yandi ke zola kutubila: “Inki tata na kati na beno, kana mwana na yandi kulomba mbisi ya masa, ta pesa yandi nioka na kisika ya mbisi ya masa? To kana yandi lomba mpi diaki, ta pesa yandi nkutu? Yo yina, kana beno, ata beno kele bantu ya mbi, beno me zaba kupesa bana na beno makabu ya mbote, beno fwete zaba kibeni nde Tata yina kele na zulu ta pesa mpeve santu na bantu yina ke lombaka yandi yo!” (Luka 11:11-13) Yo ke pesa beto kivuvu nde tata na beto kele ti luzolo ya kuwa bisambu na beto mpi ya kulungisa bampusa na beto.