Yezu Me Disa Mafunda ya Bantu Mampa mpi Bambisi Fioti ya Masa

Bantumwa 12 me katuka kusamuna na Galilea ya mvimba, mpi bo ke zabisa Yezu ‘mambu yonso yina bo me sala mpi me longa.’ Ntembe kele ve nde bo me lemba. Bo kele nkutu ve ti ntangu ya kudia sambu bantu mingi ke kwisa mpi ke kwenda. Yo yina, Yezu me zabisa bo nde: “Beno kwisa, beno mosi, na kisika ya kingenga mpi beno pema fioti.”—Marko 6:30, 31.

Yezu ti bantumwa na yandi me mata na maswa ziku pene-pene ya Kapernaumi, mpi bo me kwenda kisika mosi ya ntama, na esti ya nzadi ya Yordani, luta Betsaida. Kansi bantu mingi me mona ntangu bo ke kwenda, mpi bankaka me wa nde bo me kwenda. Bantu yai yonso me landa ntinu na lweka ya masa, bo kele dezia na dibungu ntangu maswa yina Yezu vandaka ti bantumwa na yandi me kuma.

Ntangu Yezu me basika na maswa, yandi me mona kimvuka ya bantu mpi me wila bo mawa sambu bo kele bonso mameme ya me konda ngungudi. Yo yina, yandi me yantika “kulonga bo mambu mingi” ya me tala Kimfumu. (Marko 6:34) Diaka, yandi me belula “bantu yina vandaka kubela.” (Luka 9:11) Mutindu ntangu me luta, balongoki me zabisa yandi nde: “Kisika yai kele ntama ti babwala mpi ntangu me luta mingi; songa bimvuka ya bantu na kukwenda, sambu bo kwenda na babwala mpi bo kudisumbila madia.”—Matayo 14:15.

Yezu me songa bo nde: “Bo fwete kwenda ve; beno mosi, beno pesa bo bima ya kudia.” (Matayo 14:16) Yezu me zaba mambu yina yandi ta sala kansi sambu na kuzaba ngindu ya Filipo, yandi me yula yandi nde: “Na wapi beto ta sumba mampa sambu bantu yai kudia?” Yandi me yula Filipo sambu bwala na yandi kele pene-pene ya Betsaida. Kansi, kusumba mampa me fwana ve sambu babakala kele kiteso ya 5 000. Mpi kana bo tanga bankento ti bana, bantu lenda kuma 10 000. Filipo me tuba nde: “Mampa ya badenari [denari mosi kele mbongo ya kisalu ya kilumbu ya mvimba] 200 me fwana ve sambu konso muntu kubaka ata kitini mosi.”—Yoane 6:5-7.

Ziku, sambu na kumonisa nde mpila ya kupesa bantu yonso madia kele ve, Andre me tuba nde: “Mwana-bakala mosi awa kele ti mampa tanu ya orze mpi bambisi ya masa zole ya fioti. Kansi, keti yo ta fwana sambu na bantu mingi mutindu yai?”—Yoane 6:9.

Beto kele na nsungi ya madidi, na ntwala ya Paki ya mvu 32 ya ntangu na beto mpi matiti ya mubisu kele mingi na balweka ya ngumba. Yezu me zabisa balongoki na yandi na kusonga bantu na kuvanda na matiti na bimvuka ya bantu 50 mpi ya bantu 100. Yandi me baka mampa yina tanu ti bambisi yina zole ya masa mpi yandi me pesa matondo na Nzambi. Na nima, yandi me zenga mampa mpi me kabula bambisi. Yezu me pesa yo na balongoki sambu bo kabudila yo bantu. Diambu ya kuyituka kele nde, bantu yonso me dia mpi me fuluka.

Na nima, Yezu me songa balongoki na yandi nde: “Beno vukisa bitini yina me bikala, sambu ata kima mosi ve kubeba.” (Yoane 6:12) Bo me vukisa yo mpi yo me sala bitunga 12 ya bima yina me bikala.