Yezu Me Kuma na Yeruzalemi Sambu na Nkinsi ya Banzo-Ntenta

Banda Yezu me baka mbotika, bantu mingi me zaba yandi mbote-mbote. Bayuda mingi me mona bimangu yina yandi me sala, mpi nsangu ya bisalu na yandi me panzana na Yudea ya mvimba. Ntangu yai, na Nkinsi ya Banzo-Ntenta (to, Nkinsi ya Bisasa) na Yeruzalemi, bantu mingi ke sosa yandi.

Bantu ke tuba mambu ya kuswaswana sambu na yandi. Bantu ya nkaka ke tuba nde: “Yandi kele muntu ya mbote.” Kansi bankaka nde: “Kele ve. Yandi ke kusa kimvuka ya bantu.” (Yoane 7:12) Bantu ke tuba mambu yai mingi na nsi-nsi na bilumbu ya ntete ya nkinsi. Kansi, ata muntu mosi ve kele ti kikesa ya kutuba na ndinga ya ngolo mpi na meso ya bantu yonso sambu na Yezu sambu bo ke wa boma ya mambu yina bamfumu ya Bayuda ta sala.

Mwa bilumbu me luta banda nkinsi me yantika mpi ntangu nkinsi me kuma na kati-kati, Yezu me kota na tempelo. Bantu mingi ke yituka sambu yandi kele ti mayele ya kulonga. Yandi me kotaka ve banzo-nkanda ya barabi, yo yina Bayuda ke kudiyula nde: “Inki mutindu muntu yai me zaba Masonuku, ata yandi me longukaka ve na banzo-nkanda?”—Yoane 7:15.

Yezu me tuba nde: “Mambu ya mono ke longa kele ve ya mono, kansi yo kele ya muntu yina tindaka mono. Kana muntu ke zola kusala luzolo na yandi, yandi ta zaba kana malongi ke katuka na Nzambi to kana mono ke tuba na mabanza na mono mosi.” (Yoane 7:16, 17) Malongi ya Yezu ke wakana ti Nsiku ya Nzambi, yo yina yo kele pwelele nde yandi ke sosa ve nkembo na yandi mosi kansi nkembo ya Nzambi.

Na nima, Yezu me tuba nde: “Moize pesaka beno Nsiku, mpidina ve? Kansi ata muntu mosi ve na kati na beno ke lemfukilaka Nsiku yina. Sambu na nki beno ke sosa kufwa mono?” Bantu ya nkaka na kati ya kimvuka yina me zaba ve mambu yina Bayuda ke zola kusala, ziku bo kele banzenza yina me katuka na babwala ya nkaka. Bo ke ndima ve nde kele ti muntu mosi yina ke zola kufwa longi ya mutindu yai. Yo yina bo me tuba nde kana Yezu me tuba mutindu yina, kele ti kima mosi ke kwendila ve ti yandi. Bo me songa yandi nde: “Nge kele ti demo. Nani ke sosa kufwa nge?”—Yoane 7:19, 20.

Mvula mosi ti ndambu me luta, bamfumu ya Bayuda zolaka kufwa Yezu ntangu yandi belulaka bakala mosi na kilumbu ya Kisabatu. Ntangu yai, Yezu me tubila dibanza mosi sambu yandi pusa bo na kubasisa bangindu na bo ya mbi. Yandi me yibusa bo diambu mosi yina Nsiku ke tubila nde, kana mwana-bakala me butuka bo fwete yotisa yandi na kilumbu ya nana ata yo kele kilumbu ya Kisabatu. Na nima, yandi me yula bo nde: “Kana bo ke yotisaka bakala mosi na kisabatu sambu na kufwa ve Nsiku ya Moize, keti beno ke wila mono makasi mingi sambu mono me belula muntu na kisabatu? Beno bika kusambisa na kutadila mambu yina ke monana na meso, kansi beno sambisa ti lusambisu ya lunungu.”—Yoane 7:23, 24.

Bantu ya ke zingaka na Yeruzalemi mpi ya ke zaba diambu yango, me tuba nde: “Keti yandi yai ve muntu ya bo [bamfumu] ke sosa kufwa? Kansi, tala! yandi ke tuba na meso ya bantu, mpi bo ke tubila yandi ata kima ve. Keti ya kieleka, bamfumu me zaba ve nde muntu yai kele Kristu?” Kansi, sambu na nki bantu ke ndima ve nde Yezu kele Kristu? Bo ke tuba nde: “Beto me zaba kisika muntu yai me katuka; ntangu Kristu ta kwisa, ata muntu mosi ve ta zaba kisika yandi me katuka.”—Yoane 7:25-27.

Kaka na tempelo, Yezu me songa bo nde: “Beno me zaba mono mpi beno me zaba kisika mono me katuka. Mono kwisaka ve na luzolo na mono mosi, kansi Muntu yina tindaka mono kele muntu ya kieleka, mpi beno me zaba yandi ve. Mono me zaba yandi, sambu mono kele mumonisi ya me katuka na yandi, mpi yandi Muntu tindaka mono.” (Yoane 7:28, 29) Ntangu bo me wa mvutu ya pwelele yina Yezu me pesa, bo me yantika kusosa kukanga yandi sambu bo tula yandi na boloko to sambu bo fwa yandi. Kansi, bo me kuka ve sambu ntangu yina Yezu fwete fwa me lunga ntete ve.

Ata mpidina, bantu mingi me kwikila na Yezu. Yandi tambulaka na zulu ya masa, yandi lembikaka mipepe, yandi salaka kimangu ti mampa fioti mpi bambisi ya masa ebuna yandi pesaka yo mafunda ya bantu, yandi belulaka bambefo, yandi salaka nde bikata kutambula, yandi kangulaka meso ya bifwa-meso, yandi belulaka bantu ya maladi ya lepre mpi nkutu yandi futumunaka bafwa. Ya kieleka, bo kele ti bikuma ya mbote ya kuyula nde: “Ntangu Kristu ta kwisa, keti yandi ta sala ve bidimbu mingi kuluta yina muntu yai me sala?”—Yoane 7:31.

Ntangu Bafarize me wa kimvuka ya bantu ke tuba mambu yai, bo ti bamfumu ya banganga-nzambi me tinda bapolisi sambu na kukanga Yezu.