“Yezu Kele “Lufutumuku mpi Luzingu”

Yezu me katuka na Perea mpi yandi me kuma na Betania; bwala yai kele na kiteso ya bakilometre tatu katuka na esti ya Yeruzalemi. Maria ti Marta kele bampangi ya Lazare yina me katuka kufwa mpi tii ntangu yai bo ke dila yandi. Bantu mingi me kwisa sambu na kupesa bo kikesa.

Ebuna, muntu mosi me songa Marta nde Yezu ke kwisa; Marta me baka ntinu sambu na kukwenda kukutana ti yandi. Marta me zabisa Yezu mambu yina ziku yandi ti mpangi na yandi Maria vandaka kuyindula bilumbu iya me luta, yandi me tuba nde: “Mfumu, kana nge vandaka awa, mpangi na mono zolaka kufwa ve.” Kansi, yo ke tendula ve nde Marta me konda kivuvu. Yandi me songa Yezu nde: “Mono me zaba nde . . . mambu yonso yina nge ta lomba na Nzambi, Nzambi ta pesa nge yo.” (Yoane 11:21, 22) Marta ke bakisa nde Yezu lenda futumuna mpangi na yandi Lazare.

Yezu me songa Marta nde: “Mpangi na nge ta futumuka.” Yandi me bakisa nde Yezu ke tubila lufutumuku yina ta salama awa na ntoto na bilumbu ke kwisa; Abrahami mpi bantu ya nkaka vandaka ti kivuvu yina. Sambu na kumonisa nde yandi ke ndima nde diambu yango ta salama kibeni, Marta me tuba nde: “Mono me zaba nde yandi ta futumuka na lufutumuku na kilumbu ya nsuka.”—Yoane 11:23, 24.

Kansi, keti Yezu lenda sala kima mosi ntangu yai sambu na kupesa bo kikesa? Yandi me yibusa Marta nde Nzambi me pesaka yandi kiyeka na zulu ya lufwa; yandi me tuba nde: “Mono kele lufutumuku mpi luzingu. Muntu yina ke kwikila na mono, ata yandi me fwa, yandi ta vutuka na luzingu; mpi konso muntu yina kele na luzingu mpi ke kwikila na mono ta fwa ve ata fioti.”—Yoane 11:25, 26.

Yezu ke zola kutuba ve nde balongoki na yandi yina kele na luzingu ntangu yai ta fwa ve ata fioti. Nkutu, yandi mosi mpi fwete fwa kaka mutindu yandi zabisaka bantumwa na yandi. (Matayo 16:21; 17:22, 23) Yezu me monisa nde kana muntu ke monisa lukwikilu na yandi, muntu yango lenda baka luzingu ya mvula na mvula. Bantu mingi ta baka luzingu yai ya mvula na mvula ntangu bo ta futumuka. Kansi, bansadi ya kwikama yina ta vanda na luzingu na nsuka ya ngidika yai ya bima ta fwa ve ata fioti. Konso muntu yina ke monisa lukwikilu na Yezu lenda tula ntima nde yandi ta mona ve lufwa ya kimakulu.

Yezu me katuka kutuba nde: “Mono kele lufutumuku mpi luzingu.” Keti yandi lenda futumuna Lazare, yina me katuka kufwa bilumbu mingi me luta? Yezu me yula Marta nde: “Keti nge ke kwikila diambu yai?” Marta me tuba nde: “Ee, Mfumu, mono me kwikilaka nde nge kele Kristu, Mwana ya Nzambi, Muntu yina ke kwisa na nsi-ntoto.” Marta me kwikila nde Yezu lenda sala kima mosi kilumbu yina, yo yina yandi me kwenda ntinu na nzo mpi me songa mpangi na yandi Maria na kingenga nde: “Longi kele awa mpi yandi ke binga nge.” (Yoane 11:25-28) Ntangu Maria me wa mpidina, yandi me basika na nzo mpi mbala mosi bantu ya nkaka me landa yandi sambu bo me yindula nde yandi ke kwenda na maziamu ya Lazare.

Kansi Maria me kwenda na Yezu, yandi ke dila mpi me bwa na makulu ya Yezu. Yandi me vutukila mambu yina mpangi na yandi Marta tubaka nde: “Mfumu, kana nge vandaka awa, mpangi na mono zolaka kufwa ve.” Ntangu Yezu me mona mutindu Maria mpi bimvuka ya bantu ke dila, yandi me wa mpasi mingi mpi me kudiyangisa na mabanza, nkutu yandi me basisa mansanga. Yo me simba ntima ya bantu yina ke tala. Kansi, bankaka me yula nde: ‘Kana Yezu belulaka muntu yina butukaka kifwa-meso, keti yandi lendaka ve kusala nde muntu yai kufwa ve?’—Yoane 11:32, 37.