DILONGI 15
Yezu Kele Nani?
Yezu kele na kati ya bantu yina me zabanaka mingi kibeni. Bantu mingi ke zabaka zina ya Yezu. Ata mpidina bo ke zabaka ve mambu mingi sambu na yandi. Diaka, bantu mingi ke tubaka mambu ya mutindu na mutindu sambu na Yezu. Biblia ke tubaka nde Yezu kele nani?
1. Yezu kele nani?
Yezu kele wanzio mosi ya ngolo mingi ya ke zingaka na zulu. Yehowa salaka yandi na ntwala ya kusala bima yonso ya nkaka. Yo yina, Biblia ke bingaka yandi “mwana ya ntete ya lugangu yonso.” (Bakolosai 1:15) Diaka, Yezu mpamba muntu Yehowa yandi mosi salaka. Yo yina Biblia ke bingaka yandi “Mwana na yandi mosi kaka ya kubutuka.” (Yoane 3:16) Yezu vandaka kusala ti Tata na yandi Yehowa mpi yandi vandaka kusadisa yandi na kusala bima yonso ya nkaka. (Tanga Bingana 8:30.) Tii bubu yai, Yezu ke vandaka kaka ti kinduku ya ngolo ti Yehowa. Yandi ke kudipesaka kaka na kisalu na yandi ya kinati-ndinga ya Nzambi, disongidila “Ndinga” yina ke pesaka bansangu mpi bansiku ya Yehowa.—Yoane 1:14.
2. Sambu na nki Yezu kwisaka na ntoto?
Bamvula kiteso ya 2 000 me luta, Yehowa sadilaka mpeve santu na yandi na mutindu mosi ya kuyituka. Yandi bakaka luzingu ya Yezu na zulu mpi tulaka yo na divumu ya Maria, leke mosi ya nkento, yina vandaka mwense. Yo yina, Yezu butukaka muntu awa na ntoto. (Tanga Luka 1:34, 35.) Yezu kwisaka awa na ntoto sambu yandi kuma Mesia to Kristu yina Nzambi silaka mpi sambu yandi gulusa bantu.a Mambu yonso yina Biblia tubaka sambu na Mesia, lunganaka na Yezu. Yo sadisaka bantu na kuzaba nde Yezu kele “Kristu, Mwana ya Nzambi ya moyo.”—Matayo 16:16.
3. Bubu yai Yezu kele na wapi?
Ntangu Yezu fwaka, yandi futumukaka wanzio mpi vutukaka na zulu. Kuna, “Nzambi tombulaka yandi na kisika mosi ya kunanguka.” (Bafilipi 2:9) Bubu yai, Yezu me kumaka mfumu ya nene, disongidila muntu ya zole na nima ya Yehowa.
LONGUKA MAMBU MINGI
Beto tala diaka kana Yezu kele mpenza nani mpi sambu na nki yo kele mfunu mingi na kulonguka mambu ya luzingu na yandi.
4. Yezu kele ve Nzambi Nkwa-Ngolo Yonso
Biblia ke tubaka nde ata Yezu kele wanzio mosi ya ngolo na zulu, yandi ke lemfukilaka Yehowa, Nzambi mpi Tata na yandi. Sambu na nki beto ke tuba mpidina? Beno tala VIDEO sambu na kumona mutindu Biblia ke monisaka nde Yezu kele ve kiteso mosi ti Nzambi Nkwa-Ngolo Yonso.
Baverse yai ya ke landa ke sadisa beto na kubakisa nde Yehowa kele ve kiteso mosi ti Yezu. Beno tanga konso verse mpi na nima beno pesa mvutu na bangiufula ya ke landa.
Beno tanga Luka 1:30-32.
Inki mutindu mambu yina wanzio tubaka monisaka nde Yezu kele ve kiteso mosi ti Yehowa Nzambi, “Muntu ya Kuluta Zulu”?
Beno tanga Matayo 3:16, 17.
Ntangu Yezu bakaka mbotika, ndinga yina katukaka na zulu tubaka nki?
Nge ke yindula nde ndinga yango vandaka ya nani?
Beno tanga Yoane 14:28.
Nge ke yindula nde nani ke vandaka mbuta mpi ti kiyeka mingi, tata to mwana?
Inki Yezu zolaka kutuba ntangu yandi bingaka Yehowa Tata na yandi?
Beno tanga Yoane 12:49.
Keti Yezu ke tubaka nde yandi ti Tata na yandi bo kele kiteso mosi? Ebuna nge, nki nge ke yindula?
5. Yezu monisaka nde yandi vandaka Mesia
Biblia tubilaka mambu mingi na ntwala yina sadisaka bantu na kuzaba Mesia, muntu yina Nzambi ponaka sambu na kugulusa bantu. Beno tala VIDEO sambu na kuzaba na bunkufi mwa mambu ya Biblia tubilaka yina Yezu lungisaka ntangu yandi kwisaka na ntoto.
Beno tanga mambu ya Biblia tubaka na baverse yai mpi na nima beno pesa mvutu na bangiufula ya ke landa:
Beno tanga Mika 5:2 sambu na kuzaba na wapi yo lombaka nde Mesia kubutuka.b
Keti ntangu Yezu butukaka mambu yai lunganaka?—Matayo 2:1.
Beno tanga Nkunga 34:20 mpi Zekaria 12:10 sambu na kuzaba mambu yina Biblia tubaka sambu na lufwa ya Mesia.
Keti mambu yai lunganaka?—Yoane 19:33-37.
Nge ke yindula nde Yezu muntu salaka nde mambu yai kulungana?
Mambu yai ke ndimisa nge nde Yezu kele nani?
6. Kulonguka mambu ya luzingu ya Yezu ke natilaka beto mambote
Biblia ke tubaka nde yo kele mfunu mingi na kulonguka mambu ya luzingu ya Yezu mpi mukumba yina Nzambi me pesaka yandi. Beno tanga Yoane 14:6 mpi 17:3. Na nima, beno pesa mvutu na ngiufula yai:
Sambu na nki yo kele mfunu na kulonguka na kuzaba Yezu?
Yezu me kangulaka nzila sambu beto kuma banduku ya Nzambi. Yandi longaka kieleka sambu na Yehowa mpi na nzila na yandi, beto ta baka luzingu ya mvula na mvula
BANTU YA NKAKA KE TUBAKA NDE: “Bambangi ya Yehowa ke ndiminaka ve Yezu.”
Inki mvutu nge ta pesa?
NA BUNKUFI
Yezu kele wanzio mosi ya ngolo. Yandi kele Mwana ya Nzambi mpi Mesia.
Inki Nge Me Simba?
Sambu na nki Biblia ke bingaka Yezu “mwana ya ntete ya lugangu yonso”?
Inki Yezu vandaka kusala na ntwala ya kukwisa na ntoto?
Inki ke ndimisa nge nde Yezu kele Mesia?
TALA MPI
Tala mambu mingi ya ke monisa nde Yezu kele Mesia.
Keti Biblia ke tubaka kibeni nde Nzambi butaka Yezu kaka mutindu bantu ke butaka bana?
“Sambu na Nki Biblia Ke Bingaka Yezu Mwana ya Nzambi?” (Disolo ya kele na jw.org)
Tala sambu na nki dilongi ya butatu busantu kele ve dilongi ya Biblia.
“Keti Yezu Kele Nzambi?” (Disolo ya kele na Nzozulu ya Nkengi)
Tala mutindu nkento mosi sobaka luzingu na yandi ntangu yandi longukaka mambu yina Biblia ke tubaka sambu na Yezu.
a Na dilongi 26 mpi 27, beto ta mona sambu na nki bantu kele na mfunu ya kuguluka mpi mutindu Yezu ke gulusaka beto.