Landa Mbandu ya Yezu mpi Vanda na Ngemba

1-2. Sambu na nki Yezu kumaka kisaka-saka?

NA KILUMBU ya nsuka ya luzingu ya Yezu na ntoto, yandi kumaka kisaka-saka. Yandi zabaka nde ntama mingi ve bantu ya mbi ta fwa yandi. Ata mpidina, yandi kudiyangisaka ve sambu na yo. Yandi vandaka kuzola Tata na yandi mingi mpi zolaka kusepedisa yandi. Yezu zabaka nde kana yandi bikala ya kwikama na bampasi yina vandaka kukinga yandi, yandi ta kumisa zina ya Yehowa. Diaka, Yezu zolaka bantu mpi zabaka nde beto ta baka luzingu ya mvula na mvula kana yandi bikala ya kwikama tii na lufwa.

² Ata Yezu vandaka na mpasi ya ngolo, yandi vandaka na ngemba. Yandi songaka bantumwa na yandi nde: “Mono ke pesa beno ngemba na mono.” (Yoa. 14:27) Sambu yandi vandaka nduku ya ngolo ya Yehowa, yandi vandaka ti “ngemba ya Nzambi,” disongidila ngemba ya mabanza. Yo taninaka mabanza mpi ntima ya Yezu.—Bafil. 4:6, 7.

 3. Inki beto ta tubila na disolo yai?

³ Ata muntu mosi ve ta kutanaka ti bampasi yina Yezu kutanaka ti yo kansi bantu yonso yina ke landa yandi ta kutana ti bampasi. (Mat. 16:24, 25; Yoa. 15:20) Bonso Yezu, beto lenda kuma mpi kisaka-saka bantangu ya nkaka. Inki beto lenda sala sambu basusi kulutila beto ve mpi kukatula beto ve ngemba ya mabanza? Beto tadila mambu tatu yina Yezu salaka na kisalu ya kusamuna mpi mutindu beto lenda landa mbandu na yandi ntangu beto ke kutana ti bampasi.

 4. Na kutadila 1 Batesalonika 5:17 pesa bambandu ya ke monisa nde Yezu sambaka mingi na kilumbu ya nsuka ya luzingu na yandi.

⁴ Tanga 1 Batesalonika 5:17. Yezu sambaka mingi na kilumbu ya nsuka ya luzingu na yandi. Ntangu yandi yantikaka Lusungiminu ya lufwa na yandi, yandi sambaka na ntwala ya kulutisa dimpa ti vinu. (1 Bak. 11:23-25) Na ntwala ya kukatuka na kisika yina bo salaka nkinsi ya Paki, yandi sambaka ti balongoki na yandi. (Yoa. 17:1-26) Ntangu bo kumaka na Ngumba ya Banti ya Olive na mpimpa yina, yandi sambaka mbala mingi. (Mat. 26:36-39, 42, 44) Bangogo ya nsuka yina Yezu tubaka na ntwala ya kufwa vandaka kisambu. (Luka 23:46) Yandi sambaka Yehowa sambu na mambu yonso ya mfunu yina zolaka kusalama kilumbu yina.

 5. Sambu na nki bantumwa kondaka kikesa?

⁵ Yezu kangaka ntima na bampasi sambu yandi tudilaka Tata na yandi ntima na nzila ya kisambu. Kansi na mpimpa yina bantumwa kwaminaka ve na kisambu. Yo yina, bo kondaka kikesa ntangu bo kutanaka ti mbangika. (Mat. 26:40, 41, 43, 45, 56) Ntangu beto ke kutana ti bampasi, beto ta bikala ya kwikama kaka kana beto ke landa mbandu ya Yezu mpi ke “samba ntangu yonso.” Beto fwete samba sambu na nki mambu?

 6. Inki mutindu lukwikilu ta sadisa beto na kuvanda na ngemba?

⁶ Beto lenda samba sambu Yehowa kupesa “beto lukwikilu mingi.” (Luka 17:5; Yoa. 14:1) Beto kele ti mfunu ya lukwikilu sambu Satana ta meka bantu yonso yina ke landaka Yezu. (Luka 22:31) Inki mutindu lukwikilu ta sadisa beto na kuvanda na ngemba ata beto ke kutana ti bampasi ya mutindu na mutindu? Kana beto me sala ngolo na kukanga ntima na bampasi, lukwikilu ta sadisa beto na kuyambula mambu yonso na maboko ya Yehowa. Sambu beto ke tulaka ntima nde Yehowa ta yidika mambu kuluta beto, yo ke sadisaka beto na kuvanda na ngemba.—1 Pie. 5:6, 7.

 7. Mbandu ya Robert ke longa beto nki?

⁷ Kisambu ke sadisaka beto na kuvanda na ngemba ya mabanza ata beto ke kutana ti bampasi. Beto tadila mbandu ya mpangi Robert yina kele ti bamvula kuluta 80. Yandi ke tuba nde: “Ndongisila yina kele na Bafilipi 4:6, 7 me sadisaka mono na kukanga ntima na bampasi. Mono vandaka na mpasi ya mbongo mpi na ntangu mosi buna, mono vandaka diaka ve nkuluntu.” Inki me sadisaka Robert na kutanina ngemba ya mabanza? Yandi ke tuba diaka nde: “Ntangu mono kumaka kisaka-saka, mono sambaka. Mono bakisaka nde ntangu mono kumaka kusamba ngolo mpi mbala na mbala, mono kumaka na ngemba.”

 8. Na kutadila Yoane 8:29, nki kikuma ya nkaka sadisaka Yezu na kuvanda ti ngemba ya mabanza?

⁸ Tanga Yoane 8:29. Ata bantu bangikaka Yezu, yandi taninaka ngemba ya mabanza sambu yandi zabaka nde yandi ke sepedisa Tata na yandi. Yandi vandaka bulemfu ata yo vandaka mpasi. Yandi zolaka Tata na yandi mpi sadilaka yandi na ntima ya mvimba. Na ntwala ya kukwisa na ntoto, Yezu vandaka “kapita ya kisalu” ya Nzambi. (Bing. 8:30) Ntangu yandi vandaka na ntoto, yandi longaka bantu ya nkaka mambu ya Tata na yandi na kikesa yonso. (Mat. 6:9; Yoa. 5:17) Kisalu yai pesaka Yezu kiese mingi kibeni.—Yoa. 4:34-36.

 9. Inki mutindu kudipesa na kisalu ya kusamuna lenda sadisa beto na kutanina ngemba ya mabanza?

⁹ Beto lenda landa mbandu ya Yezu kana beto ke lemfukila Yehowa mpi kele “ntangu yonso ti mambu mingi ya kusala na kisalu ya Mfumu.” (1 Bak. 15:58) Kana beto ke “kudipesa ya mvimba” na kisalu ya kusamuna, beto ta kudiyangisa mingi ve na bampasi yina beto ke kutana ti yo. (Bis. 18:5) Mbala mingi, bantu yina beto ke solulaka ti bo na kisalu ya kusamuna ke kutanaka mpi ti bampasi bonso beto. Kansi ntangu bo ke kumaka kuzola Yehowa mpi ke sadilaka bandongisila na yandi, bo ke kumaka ti luzingu ya mbote mpi ya kiese. Ntangu mambu yai ke salamaka, beto ke ndimaka kibeni nde Yehowa ta tudila beto dikebi. Kivuvu yai ke sadisaka beto na kutanina ngemba ya mabanza. Mpangi-nkento yina vandaka kudimona mpamba mpi kudiyangisa na mabanza luzingu na yandi ya mvimba ndimaka kieleka yai. Yandi ke tuba nde: “Ntangu mono ke samunaka mingi, mono ke kudiyangisaka mingi ve na mabanza mpi mono ke vandaka na kiese. Na kisalu ya kusamuna, mono ke kudiwaka pene-pene ya Yehowa.”

10. Mbandu ya Brenda ke longa nge nki?

¹⁰ Beto tadila mpi mbandu ya mpangi Brenda. Yandi ti mwana na yandi ya nkento vandaka kubela maladi ya ngolo. Yandi vandaka kutambula diaka ve mpi kumaka kutambula na velo ya bikata. Yandi ke samunaka nzo na nzo kana yandi me wa mbote kansi mingi-mingi yandi ke sonikilaka bantu sambu na kuta kimbangi. Yandi ke tuba nde: “Ntangu mono bakisaka nde mono ta beluka diaka ve na nsi-ntoto yai, mono kudipesaka mingi na kisalu ya kusamuna. Kusamuna ke sadisaka mono na kuvila bampasi na mono. Yo ke pusaka mono na kusadisa bantu ya teritware na beto yina mono ke solulaka ti bo. Konso ntangu yo ke yibusaka mono kivuvu yina mono kele na yo na bilumbu ke kwisa.”

11-13. (a) Inki mutindu bantumwa mpi bantu ya nkaka kudimonisaka banduku ya kieleka ya Yezu? (b) Inki bupusi banduku ya Yezu vandaka ti yo na luzingu na yandi?

¹¹ Ntangu Yezu kutanaka ti bampasi na kisalu ya kusamuna, bantumwa na yandi ya kwikama kudimonisaka banduku ya mbote kibeni. Bo sadilaka mambu yina kele na bingana ya ke tuba nde: “Kele ti nduku yina ke kangamaka ngolo kuluta mpangi.” (Bing. 18:24) Banduku ya mutindu yai vandaka mfunu mingi sambu na Yezu. Ntangu Yezu vandaka kulonga, ata mpangi na yandi mosi ve kwikilaka na yandi. (Yoa. 7:3-5) Na ntangu mosi buna, bampangi na yandi yindulaka nde yandi me kuma kilawu. (Mar. 3:21) Kansi, na mpimpa yina yitaka lufwa ya Yezu, yandi songaka bantumwa ya kwikama nde: “Beno kele bantu yina me kangama ti mono na bampasi na mono.”—Luka 22:28.

¹² Bantangu ya nkaka bantumwa salaka mambu yina pesaka Yezu mpasi kansi yandi tulaka ve dikebi na bifu na bo, yandi bakisaka nde bo vandaka kukwikila na yandi. (Mat. 26:40; Mar. 10:13, 14; Yoa. 6:66-69) Na mpimpa ya nsuka yina Yezu lutisaka ti bo na ntwala nde bo fwa yandi, yandi songaka bantumwa nde: “Mono ke binga beno banduku, sambu mono me zabisaka beno mambu yonso ya mono waka na Tata na mono.” (Yoa. 15:15) Ntembe kele ve nde banduku ya Yezu pesaka yandi kikesa mingi. Lusadisu yina bo pesaka Yezu na kisalu ya kusamuna, pesaka yandi kiese mingi.—Luka 10:17, 21.

¹³ Katula bantumwa, Yezu vandaka ti banduku ya nkaka ya babakala mpi ya bankento yina sadisaka yandi na kisalu ya kusamuna mpi na bisalu ya nkaka. Bankaka bingisaka yandi na banzo na bo sambu na kudia. (Luka 10:38-42; Yoa. 12:1, 2) Bankaka diaka salaka nzietelo ti yandi mpi kabilaka yandi bima na bo. (Luka 8:3) Yezu vandaka ti banduku ya mbote sambu yandi mpi vandaka nduku ya mbote. Yandi sadilaka bo mambu ya mbote mpi vandaka kuvingila ve nde bo sala mambu kuluta yina bo lendaka kusala. Yezu vandaka ya kukuka kansi yandi sepelaka na lusadisu yina banduku na yandi ya kukonda kukuka pesaka yandi. Ntembe kele ve nde bo sadisaka yandi na kutanina ngemba ya mabanza.

14-15. Inki mutindu beto lenda zwa banduku ya mbote mpi nki mutindu bo lenda sadisa beto?

¹⁴ Banduku ya mbote ta sadisa beto na kubikala ya kwikama na Yehowa. Mutindu ya kuluta mbote ya kuzwa banduku ya mbote kele kuvanda nduku ya mbote. (Mat. 7:12) Mu mbandu, Biblia ke siamisa beto na kudipesa sambu na kusadisa bantu ya nkaka, mingi-mingi bayina “me konda bima.” (Baef. 4:28) Keti nge ke yindula mpangi mosi na dibundu na beno yina nge lenda sadisa? Keti nge lenda sumbila mpangi yina ke bela to me kuma mununu bima na zandu? Keti nge lenda pesa dibuta mosi yina kele ve ti mbongo madia? Kana nge me zaba kusadila site Internet jw.org^® mpi application JW Library^®, keti nge lenda sadisa bampangi ya nkaka na dibundu sambu bo mpi kuzaba kusadila yo? Kana beto ke sadisa bantu ya nkaka, beto ta vanda na kiese mingi.—Bis. 20:35.

¹⁵ Banduku ta sadisa beto na ntangu ya mpasi mpi na kutanina ngemba ya mabanza. Mutindu Elihu widikilaka Yobi ntangu yandi vandaka kutubila bampasi na yandi, banduku na beto ke vandaka ntima-nda na kuwidikila beto ntangu beto ke tuba mambu yina ke yangisa beto. (Yobi 32:4) Beto fwete vingila ve nde banduku na beto kubakila beto balukanu, kansi beto ta vanda mayele kana beto ke sadila bandongisila na bo ya me katuka na Biblia. (Bing. 15:22) Mutindu ntotila Davidi ndimaka lusadisu ya banduku na yandi, beto fwete ndima lusadisu yina banduku ke pesa beto ntangu beto kele na mfunu na yo. (2 Sam. 17:27-29) Ya kieleka, banduku ya mutindu yai kele dikabu ya me katuka na Yehowa.—Yak. 1:17.

16. Na kuwakana ti Bafilipi 4:6, 7, nki kele mutindu mosi mpamba yina beto lenda zwa ngemba? Tendula.

¹⁶ Tanga Bafilipi 4:6, 7. Sambu na nki Yehowa ke songa beto nde beto lenda zwa ngemba yina yandi ke pesaka “na nzila ya Kristu Yezu”? Sambu beto lenda zwa ngemba ya kimakulu na mabanza mpi na mawi kaka kana beto ke bakisa mpi ke monisa lukwikilu na mukumba ya Yezu. Mu mbandu, na nzila ya kimenga ya Yezu, Nzambi ke lolulaka masumu na beto yonso. (1 Yoa. 2:12) Dibanza yai ke lembikaka beto kibeni! Yezu kele Ntotila ya Kimfumu ya Nzambi mpi yandi ta manisa bampasi yonso yina Satana ti nsi-ntoto na yandi me natilaka beto. (Yez. 65:17; 1 Yoa. 3:8; Kus. 21:3, 4) Yo ke pesa beto kivuvu ya kitoko mpenza! Ata Yezu me pesaka beto kisalu ya mpasi, yandi kele ti beto mpi yandi ta sadisaka beto tii na bilumbu ya nsuka ya nsi-ntoto yai. (Mat. 28:19, 20) Yo ke pesa beto kikesa mpenza! Ndembikilu, kivuvu mpi kikesa kele mfunu mingi sambu na kuvanda na ngemba.

17. (a) Inki mutindu Mukristu lenda tanina ngemba ya mabanza? (b) Mutindu Yoane 16:33 ke sila beto, nki beto ta sala?

¹⁷ Keti nge lenda tanina ngemba ya mabanza ntangu nge ke kutana ti bampasi ya ngolo? Nge lenda tanina yo kana nge ke sala mambu yina Yezu salaka. Ya ntete, samba mpi kwamina na kisambu. Ya zole, lemfukila Yehowa mpi samuna na kikesa yonso ata yo kele mpasi. Ya tatu, sosa lusadisu na banduku ntangu nge ke kutana ti bampasi. Ebuna ngemba ya Nzambi ta tanina mabanza mpi ntima na nge. Bonso Yezu nge ta nunga konso mpasi yina.—Tanga Yoane 16:33.