DILONGI 54
Nani Kele “Mpika ya Kwikama mpi ya Mayele” mpi Nki Kisalu Yandi Ke Salaka?
Yezu kele Mfumu ya dibundu ya Bukristu. (Baefezo 5:23) Bubu yai, yandi kele na zulu mpi yandi ke sadilaka “mpika ya kwikama mpi ya mayele” sambu na kutwadisa balongoki na yandi awa na ntoto. (Tanga Matayo 24:45.) Yezu muntu me tulaka “mpika” yai mpi yandi me pesaka yandi nswa ya kubaka balukanu ya nkaka. Ata mpidina, mpika yai ke landaka kulemfukila Kristu mpi ke salaka sambu na mambote ya bampangi ya Kristu. Nani kele mpika yango? Inki yandi ke salaka sambu na kulungisa bampusa na beto?
1. Nani kele “mpika ya kwikama mpi ya mayele”?
Yehowa ke sadilaka ntangu yonso bakala to kimvuka ya babakala sambu na kutwadisa bansadi na yandi. (Malaki 2:7; Baebreo 1:1) Na nima ya lufwa ya Yezu, bantumwa ti bankuluntu na Yeruzalemi bantu vandaka kutwadisa mambu. (Bisalu 15:2) Mutindu mosi mpi bubu yai, kimvuka mosi ya fioti ya bankuluntu, disongidila Nto-Kimvuka ya Bambangi ya Yehowa ke pesaka beto madia ya kimpeve mpi ke twadisaka kisalu ya kulonga nsangu ya mbote. Kimvuka yai ya fioti ya bankuluntu kele “mpika ya kwikama mpi ya mayele yina [Yezu] me tulaka.” (Matayo 24:45a) Bampangi yonso ya Nto-Kimvuka, ke vandaka Bakristu yina bo me tulaka mafuta na mpeve. Bo ke vingilaka ti nzala ya ngolo ntangu yina bo ta yala ti Kristu na Kimfumu ya zulu kana luzingu na bo me suka awa na ntoto.
2. Inki madia ya kimpeve mpika ya kwikama ke pesaka?
Yezu tubaka nde mpika ya kwikama ta ‘pesaka bampangi na yandi Bakristu madia na bo na ntangu ya me fwana.’ (Matayo 24:45b) Madia ya beto ke diaka ke sadisaka beto na kuvanda ngolo na nitu mpi ti sante ya mbote. Mutindu mosi mpi madia ya kimpeve, disongidila malongi ya Ndinga ya Nzambi, ke pesaka beto ngolo yina beto ke vandaka ti yo mfunu sambu na kulanda kukangama kaka na Yehowa mpi kusala kisalu yina Yezu me pesaka beto. (1 Timoteo 4:6) Beto ke bakaka madia yai ya kimpeve na balukutakanu ya dibundu, ya nene, ya distrike, na mikanda yina ke tendulaka Biblia mpi na bavideo. Yo ke sadisaka beto na kuzaba mbote luzolo ya Nzambi mpi na kukumisa ngolo kinduku na beto ti yandi.
LONGUKA MAMBU MINGI
Beto tala sambu na nki beto ke vandaka na mfunu ya “mpika ya kwikama mpi ya mayele,” disongidila Nto-Kimvuka.
Nto-Kimvuka ke songaka Bambangi ya Yehowa ya ntoto ya mvimba mambu ya bo fwete sala, ke pesaka bo madia ya kimpeve mpi lusadisu ya bo kele na yo mfunu
3. Bansadi ya Yehowa fwete sala mambu na ndonga
Bampangi ya Nto-Kimvuka ke salaka mambu yonso yina Yezu ke lombaka bo na kusala sambu na kutwadisa kisalu ya Bambangi ya Yehowa. Yezu ke twadisaka bo kaka mutindu yandi vandaka kutwadisa Bakristu ya ntete. Beno tala VIDEO.
Beno tanga 1 Bakorinto 14:33, 40 mpi na nima beno pesa mvutu na ngiufula yai:
Inki mutindu baverse yai ke monisa nde Yehowa ke zolaka nde bansadi na yandi kusala mambu na ndonga?
4. Mpika ya kwikama ke twadisaka kisalu ya kulonga nsangu ya mbote
Kisalu ya kulonga nsangu ya mbote vandaka kisalu ya kuluta mfunu sambu na Bakristu ya ntete. Beno tanga Bisalu 8:14, 25 mpi na nima beno pesa mvutu na bangiufula yai:
Banani vandaka kutwadisa kisalu ya kulonga nsangu ya mbote na bilumbu ya Bakristu ya ntete?
Inki Piere ti Yoane salaka ntangu bampangi na bo bantumwa tindaka bo na kulonga nsangu ya mbote?
Kisalu ya kulonga nsangu ya mbote kele kisalu ya kuluta mfunu yina Nto-Kimvuka ke twadisaka. Beno tala VIDEO.
Yezu monisaka mpenza nde kisalu ya kulonga nsangu ya mbote kele mfunu mingi. Beno tanga Marko 13:10 mpi na nima beno pesa mvutu na bangiufula yai:
Sambu na nki Nto-Kimvuka ke bakaka mpenza na valere kisalu ya kulonga nsangu ya mbote?
Sambu na nki beto ke vandaka na mfunu ya “mpika ya kwikama mpi ya mayele” sambu na kusala kisalu yai ya kulonga na ntoto ya mvimba?
5. Mpika ya kwikama ke songaka beto mambu ya beto fwete sala
Nto-Kimvuka ke songaka Bambangi ya Yehowa ya ntoto ya mvimba mambu ya bo fwete sala. Inki Nto-Kimvuka ke salaka na ntwala ya kusonga beto mambu ya beto fwete sala? Beto tala mambu yina nto-kimvuka ya bilumbu ya Bakristu ya ntete vandaka kusala. Beno tanga Bisalu 15:1, 2 mpi na nima beno pesa mvutu na bangiufula yai:
Inki mambu basisaka mavwanga na kati ya Bakristu ya nkaka ya ntete?
Sambu na kuyidika mavwanga yango, Polo, Barnabasi mpi Bakristu ya nkaka kwendaka kusosa lusadisu na banani?
Beno tanga Bisalu 15:12-18, 23-29 mpi na nima beno pesa mvutu na ngiufula yai:
Na ntwala ya kubaka lukanu, nki nto-kimvuka ya ntete salaka sambu na kuzaba luzolo ya Nzambi na mambu yina bo vandaka kutadila?—Tala verses 12, 15 mpi 28.
Beno tanga Bisalu 15:30, 31 mpi 16:4, 5. Na nima beno pesa mvutu na bangiufula yai:
Inki Bakristu ya ntete salaka ntangu nto-kimvuka songaka bo mambu yina yo lombaka nde bo sala?
Inki mutindu Yehowa sakumunaka bulemfu na bo?
Beno tanga 2 Timoteo 3:16 mpi Yakobo 1:5. Na nima beno pesa mvutu na ngiufula yai:
Bubu yai, na wapi bampangi ya Nto-Kimvuka ke sosaka lutwadisu kana bo ke zola kubaka balukanu?
BANTU YA NKAKA KE TUBAKA NDE: “Kana nge ke landa mambu ya Nto-Kimvuka, zaba nde nge ke landa kaka bangindu ya bantu.”
Nge ke ndima nde Yezu muntu ke twadisaka Nto-Kimvuka? Sambu na nki?
NA BUNKUFI
Nto-Kimvuka kele “mpika ya kwikama mpi ya mayele” yina Kristu me tulaka. Nto-Kimvuka ke songaka Bambangi ya Yehowa ya ntoto ya mvimba mambu ya bo fwete sala mpi ke pesaka bo madia ya kimpeve.
Inki Nge Me Simba?
Nani me tulaka “mpika ya kwikama mpi ya mayele”?
Inki Nto-Kimvuka ke salaka sambu na kulungisa bampusa na beto?
Nge ke ndima nde Nto-Kimvuka kele “mpika ya kwikama mpi ya mayele”?
TALA MPI
Tala mutindu Nto-Kimvuka ke vandaka ya kuyidika mbote-mbote sambu na kusala kisalu na yo.
“Nto-Kimvuka ya Bambangi ya Yehowa Kele Nki?” (Disolo ya kele na jw.org)
Tala mutindu Nto-Kimvuka ke salaka yonso sambu beto baka madia ya mbote ya kimpeve.
Beto Ke Basisaka Mikanda mpi Bavideo ya Ke Tubilaka Mambu ya Kieleka (17:18)
Inki mutindu bampangi ya Nto-Kimvuka ke tadilaka mukumba yina Yezu me pesaka bo?
Inki mutindu balukutakanu ya dibundu mpi ya distrike ke monisaka nde Yehowa muntu ke twadisaka Nto-Kimvuka?