Bangiufula ya Batangi

▪ Yo kele pwelele nde Yezu kumaka Nganga-Nzambi ya Nene ntangu yandi bakaka mbotika na mvu 29 ya ntangu na beto. Inki mutindu beto me zaba yo? Ntangu Yezu bakaka mbotika yandi monisaka nde yandi me ndima kutambika luzingu na yandi na mesa ya kimenga ya kifwani yina vandaka kumonisa “luzolo” ya Nzambi. (Bag. 1:4; Baeb. 10:5-10) Sambu mesa-kimenga vandaka mfunu mingi na tempelo, ziku tempelo ya kimpeve yantikaka ntangu Yezu bakaka mbotika. Tempelo ya nene ya kimpeve ya Yehowa ke monisa mambu yonso yina ke salaka nde beto sambila yandi na mutindu ya mbote na nsadisa ya kimenga ya Yezu.—Mat. 3:16, 17; Baeb. 5:4-6.

Tempelo ya nene ya kimpeve vandaka ti mfunu ya Nganga-Nzambi ya Nene. Yo yina, Yehowa tulaka Yezu mafuta “ti mpeve santu mpi pesaka yandi ngolo” sambu na kuvanda Nganga-Nzambi ya Nene. (Bis. 10:37, 38; Mar. 1:9-11) Inki mutindu beto me zaba nde Yehowa kumisaka Yezu Nganga-Nzambi ya Nene na ntwala ya lufwa mpi ya lufutumuku na yandi? Mbandu ya Aroni mpi ya banganga-nzambi ya nene yina yingaka yandi ta sadisa beto na kupesa mvutu na ngiufula yai.

Nsiku yina Yehowa pesaka Moize vandaka kutuba nde kaka nganga-nzambi mpamba muntu vandaka ti nswa ya kukota na Kisika ya Kuluta Santu na nzo-tenta mpi na nima na Kisika ya Kuluta Santu ya tempelo. Rido mosi vandaka kukabula Kisika ya Kuluta Santu mpi Kisika ya Santu. Nganga-nzambi ya nene vandaka kuluta na rido yina kaka Kilumbu ya Ndolula. (Baeb. 9:1-3, 6, 7) Aroni mpi bantu ya nkaka kumaka banganga-nzambi ya nene na ntwala ya ‘kuluta na rido’ ya nzo-tenta. Yo yina, yo lombaka mpi nde Yezu kukuma ntete Nganga-Nzambi ya Nene ya tempelo ya nene ya kimpeve na ntwala ya kufwa mpi na nima yandi “luta na rido, disongidila, nitu na yandi,” sambu na kutombuka na zulu. (Baeb. 10:20) Yo yina, ntumwa Polo tubaka nde Yezu kwisaka “bonso nganga-nzambi ya nene” mpi na nima yandi “lutaka na tenta ya kuluta nene mpi ya kuluta kukuka yina me salamaka ve na maboko,” mpi yo kele na “zulu kibeni.”—Baeb. 9:11, 24.

Bo ndimaka kuwakana ya mpa mpi bo yantikisaka yo na ntangu mosi. Sambu na nki beto ke tuba mutindu yina? Sambu ntangu Yezu katukaka na zulu mpi kwisaka awa na ntoto sambu na kupesa luzingu na yandi ya kukuka sambu na beto, yandi salaka diambu ya ntete na kati ya mambu tatu yina yo lombaka nde bo sala sambu na kundima kuwakana ya mpa. Mambu yina yantikisaka mpi kuwakana ya mpa. Inki kele mambu yango?

Ya ntete, Yezu monanaka na ntwala ya Yehowa; ya zole, yandi pesaka mbalu ya kimenga na yandi na Yehowa mpi ya tatu, Yehowa ndimaka mbalu ya menga ya Yezu yina tiamukaka. Kuwakana ya mpa yantikaka kusala na nima ntangu mambu yai salamaka.

Biblia ke tuba ve na siki-siki yonso ntangu yina Yehowa ndimaka mbalu ya kimenga ya Yezu. Yo yina, beto lenda tuba ve na siki-siki yonso ntangu yina bo ndimaka kuwakana ya mpa mpi ntangu yina yo yantikaka. Ata mpidina, beto ke zaba nde Yezu tombukaka na zulu bilumbu kumi na ntwala ya Pantekoti. (Bis. 1:3) Na nsungi mosi buna, na nsungi yina ya ntangu fioti, yandi nataka mbalu ya kimenga na yandi na Yehowa mpi Yehowa ndimaka yo. (Baeb. 9:12) Beto me zaba yo sambu na mambu yina salamaka na kilumbu ya Pantekoti. (Bis. 2:1-4, 32, 33) Bo ndimaka kuwakana ya mpa mpi yo yantikaka kusala.

Na bunkufi, bo ndimaka kuwakana ya mpa mpi yo yantikaka kusala na nima ntangu Yehowa ndimaka mbalu ya menga ya Yezu yina tiamukaka. Kuwakana ya mpa yantikaka ti Yezu, Nganga-Nzambi ya Nene yina kele Muwakanisi na yo.—Baeb. 7:25; 8:1-3, 6; 9:13-15.