DILONGI 34
Inki Mutindu Beto Ke Monisaka nde Beto Ke Zolaka Yehowa?
Keti nge me kuma kuzola Yehowa mingi kuluta ntangu nge yantikaka kulonguka Biblia? Keti nge ta zola kulanda kukumisa ngolo kinduku na nge ti yandi? Kana mpidina, kuvila ve nde kana Yehowa me mona nde nge me kuma kuzola yandi mingi, yandi mpi ta kuma kuzola nge mingi mpi kutudila nge mpenza dikebi. Inki nge fwete sala sambu na kumonisa nde nge ke zolaka Yehowa?
1. Inki mutindu beto ke monisaka nde beto ke zolaka Yehowa?
Beto ke monisaka nde beto ke zolaka Yehowa ntangu beto ke lemfukilaka yandi. (Tanga 1 Yoane 5:3.) Yehowa ke pusaka beto ve na ngolo na kulemfukila yandi. Kansi, yandi ke bikaka nde konso muntu kupona kana yandi ta lemfukila yandi to ve. Sambu na nki? Sambu yandi ke zolaka nde beto ‘lemfuka na ntima ya mvimba.’ (Baroma 6:17) Yo ke tendula nde, yandi ke zolaka nde nge lemfukila yandi sambu nge ke zolaka yandi kansi ve sambu bo ke pusa nge na ngolo na kusala yo. Kitini 3 mpi 4 ya mukanda yai ta tubila mambu ya nge fwete sala sambu na kumonisa nde nge ke zolaka Yehowa, disongidila kusala mambu yina ke pesaka yandi kiese mpi kubuya mambu yina ke pesaka yandi mpasi.
2. Sambu na nki yo lenda kuma mpasi na kusala mambu yina Yehowa ke zolaka?
Biblia ke tuba nde: “Muntu ya [mbote] ke kutanaka ti bampasi mingi.” (Nkunga 34:19) Beto yonso ke salaka bikesa ya kuyambula bifu na beto. Bantangu ya nkaka, beto ke kondaka mbongo, ke kutanaka ti mambu ya mbi mpi bampasi ya nkaka. Na bantangu ya mpasi, yo ke kumaka mpasi na kusala mambu yina Yehowa ke lombaka beto sambu beto lenda kuma kufwa bansiku ya Yehowa kukonda mpasi. Kansi kana nge ke sala na ntima ya mvimba mambu yonso yina Yehowa ke lombaka nge na kusala, nge ta monisa nde nge ke zolaka yandi mingi kuluta bima yonso ya nkaka mpi nde nge ke zola kukangama kaka na yandi. Mpidina, yandi ta landa kuvanda ti nge mpi ta yambula nge ve ata fioti.—Tanga Nkunga 4:3.
LONGUKA MAMBU MINGI
Beto tala sambu na nki yo kele mfunu nde nge lemfukila Yehowa mpi mambu yina lenda sadisa nge na kulanda kukangama na yandi.
3. Satana ke fundaka nge mpi
Mutindu mukanda ya Yobi ke monisa yo, Satana fundaka Yobi mpi bantu yonso ya ke sambilaka Yehowa. Beno tanga Yobi 1:1, 6–2:10 mpi na nima beno pesa mvutu na bangiufula yai:
Satana tubaka nde sambu na nki Yobi vandaka kulemfukila Yehowa?—Tala Yobi 1:9-11.
Inki mambu Satana ke tubaka sambu na nge mpi bantu yonso ya nkaka?—Tala Yobi 2:4.
Beno tanga Yobi 27:5b mpi na nima beno pesa mvutu na ngiufula yai:
Inki mutindu Yobi monisaka nde yandi vandaka mpenza kuzola Yehowa?
Yobi monisaka nde yandi vandaka kuzola Yehowa mutindu yandi kangamaka kaka na yandi
Beto ke monisaka nde beto ke zolaka Yehowa kana beto ke kangama kaka na yandi
4. Pesa ntima ya Yehowa kiese
Beno tanga Bingana 27:11 mpi na nima beno pesa mvutu na bangiufula yai:
Inki mutindu Yehowa ke waka kana nge ke sala mambu na mayele mpi nge ke lemfukila yandi? Sambu na nki?
5. Kangama kaka na Yehowa
Zola na beto sambu na Yehowa ke pusaka beto na kusonga bantu ya nkaka mambu na yandi. Beto ke salaka yo ata ntangu yo ke vandaka mpasi na kusala yo sambu beto ke lemfukilaka yandi. Beno tala VIDEO mpi na nima beno pesa mvutu na bangiufula ya ke landa.
Keti yo me vandilaka nge dezia mpasi na kusonga bantu ya nkaka mambu ya Yehowa?
Mutindu video me monisa yo, nki sadisaka mpangi Grayson na kukatula boma?
Kana beto ke zola mambu yina Yehowa ke zolaka mpi ke menga mambu yina yandi ke mengaka, beto ta landa kukangama kaka na yandi kukonda mpasi. Beno tanga Nkunga 97:10 mpi na nima beno pesa mvutu na bangiufula yai:
Na kutadila mambu ya nge me longuka, tanga mwa mambu yina Yehowa ke zolaka mpi yina yandi ke mengaka.
Inki lenda sadisa nge na kuzola mambu ya mbote mpi kubuya mambu ya mbi?
6. Kulemfukila Yehowa ke natilaka beto mambote
Kulemfukila Yehowa ke natilaka beto ntangu yonso mambote. Beno tanga Yezaya 48:17, 18 mpi na nima beno pesa mvutu na bangiufula yai:
Nge ke ndima mpenza nde mambu yonso yina Yehowa ke lombaka beto na kusala kele sambu na mambote na beto? Sambu na nki?
Inki mambote kulonguka Biblia mpi kuzaba Yehowa Nzambi ya kieleka me natilaka nge dezia?
BANTU YA NKAKA KE TUBAKA NDE: “Mambu ya mono ke salaka, ke salaka ve Nzambi ata kima.”
Inki verse nge lenda tangila bo sambu na kumonisa nde mambu ya beto ke salaka lenda pesa Yehowa kiese to mpasi?
NA BUNKUFI
Sambu na kumonisa nde nge ke zolaka Yehowa, nge fwete lemfukila yandi mpi kukangama kaka na yandi ata nge ke kutana ti bampasi.
Inki Nge Me Simba?
Mbandu ya Yobi ke longa nge nki?
Inki mutindu nge lenda monisa nde nge ke zolaka Yehowa?
Inki nge fwete sala sambu na kulanda kukangama kaka na Yehowa?
TALA MPI
Tala mutindu beto lenda monisa nde beto ke kangama kaka na Yehowa mpi na dibundu.
“Na Muntu ya Kwikama, Nge Ke Salaka Mambu na Kwikama” (16:49)
Tala mambu ya nkaka yina Satana ke fundaka bantu.
“Yobi Ke Landa Kukangama na Nzambi” (Disolo ya kele na kamukanda Inki Kele Nsangu ya Biblia?)
Tala mutindu bana lenda monisa mpi nde bo ke zolaka Yehowa.
Inki mambu lenda sadisa baleke na kulanda kukangama na Yehowa ata banduku na bo ke pusa bo na kusala mambu ya mbi?