“Beno Zolana Ngolo”

“Beno zolana ngolo bonso bana ya tata mosi ti mama mosi.”​—ROMA 12:10.

1, 2. Inki kinduku misionere mosi ya ntangu na beto mpi ntumwa Polo kuvandaka na yo ti bampangi na bo?

NA BAMVULA 43 ya yandi salaka na Ndambu ya Esti na kisalu na yandi ya kimisionere, Don kuzabanaka sambu na zola ya ngolo ya yandi vandaka kumonisa na bantu yina yandi vandaka kusadisa. Ntangu yandi kumaka kunwana ti maladi yina nsukansuka kufwaka yandi, bampangi mingi ya yandi longukaka ti bo Biblia kusalaka nzyetolo ya bakilometre mingi sambu na kwenda kutala yandi na mbeto na yandi mpi kusonga yandi na ndinga ya Corée nde, “Kamsahamnida, kamsahamnida!” disongidila nde “Mersi, mersi!” Zola ya ngolo yina Don kumonisaka bo kusimbaka mpenza bantima na bo.

² Bambandu ya mutindu yai bonso ya Don kele mingi. Na mvu-nkama ya ntete, ntumwa Polo kumonisaka zola ya ngolo na bantu yina yandi vandaka kusadisa. Polo vandaka ti mpeve ya kudipesa. Ata yandi vandaka na lukwikilu ya ngolo, yandi vandaka mpi na ntima ya mbote mpi yandi vandaka kutudila bantu yankaka dikebi “bonso mama yina ke kebaka bana na yandi.” Yandi sonikilaka dibundu ya Tesalonika nde: “Beto zolaka beno mingi, yo yina beto kabilaka beno Nsangu ya Mbote ya Nzambi kaka ve, kansi beto vandaka me yilama mpi na kukabila beno moyo na beto mosi, sambu kuzola yina ya beto zolaka beno yo vandaka kuzola mosi ya nene!” (1 Tesalonika 2:7, 8) Na nima, ntangu Polo kutubilaka bampangi na yandi ya Efezo nde bo tamona yandi dyaka ve, “bo yonso vandaka kudila, bo vandaka kubwila Paulo na nkingu sambu na kupesa yandi beze.” (Bisalu 20:25, 37) Yo kele pwelele nde, kinduku ya Polo ti bampangi na yandi Bakristu kukumaka ve kaka ngolo sambu bo vandaka ti lukwikilu mosi. Bo vandaka kuzolana ngolo mpenza.

Zola ya Ngolo mpi Zola

 3. Inki mutindu bangogo yina Biblia kesadila sambu na kutubila zola ya ngolo mpi zola kewakana?

³ Na kati ya Masonuku, zola ya ngolo, kikalulu ya kuditula na kisika ya bankaka, mpi mawa kewakanaka mpenza ti kikalulu ya kuluta mbote ya Bukristu, disongidila zola. (1 Tesalonika 2:8; 2 Piere 1:7) Mutindu diama ya kitoko kevandaka, bikalulu yai yonso ya santu kesalaka na bumosi sambu na kubuta bambuma ya kitoko. Yo kesalaka mpi nde Bakristu kuvanda na bangwisana ya ngolo na kati na bo kaka ve, kansi mpi ti Tata na bo ya zulu. Yo yina, ntumwa Polo kulongisilaka bampangi na yandi Bakristu nde: “Beno fweti zola bantu na kuzola ya kieleka. . . . [Na yina metala zola ya kimpangi, beno zolana ngolo beno na beno, NW].”​—Roma 12:9, 10.

 4. Bangogo ‘zola ya ngolo’ ketendula inki?

⁴ Ngogo ya Kigreki ya Polo kusadilaka sambu na ‘zola ya ngolo’ kele ti bitini zole. Kitini ya ntete ketendula kinduku mpi kitini ya zole ketendula zola. Mutindu ntendudi mosi ya Biblia ketendula yo, yo kezola kutuba nde Bakristu “fwete zabana na nsadisa ya kwikama yina kemonanaka na kati ya dibuta mosi yina bantu kezolanaka, kezingaka na bumosi, mpi kesadisanaka.” Keti nge kewaka mutindu yina sambu na bampangi na nge Bakristu ya babakala mpi ya bankento? Nkadilu mosi ya kyese, disongidila mawi ya kinduku, fwete monanaka ntangu yonso na dibundu ya Bukristu. (Galatia 6:10) Yo yina, mukanda The New Testament in Modern English, yina J. B. Phillips kusonikaka kebalula Roma 12:10 mutindu yai: “Bika beto vanda na zola ya kyeleka mpi ya ngolo beto na beto mutindu bampangi kezolanaka.” Dyaka, La Bible de Jérusalem kebalula verse yango mutindu yai: “Beno zolana beno na beno mutindu bampangi fwete zolana.” Ya kyeleka, Bakristu kezolanaka ve kaka sambu yo kele mbote na kusala yo to sambu bo fwete sala yo. Kansi, beto fwete ‘zolaka bampangi na beto Bakristu na ntima ya kieleka. Beto fweti zolana ngolo mpenza na ntima.’ ​—1 Piere 1:22.

‘Nzambi Melongaka Beto na Kuzolana Beto na Beto’

5, 6. (a) Inki mutindu Yehowa kesadilaka balukutakanu ya bansi mingi sambu na kulonga zola ya Bukristu na bantu na yandi? (b) Inki mutindu kinduku na kati ya bampangi kekumaka ngolo na nsungi ya mwa ntangu ya bo kevukanaka?

⁵ Ata ‘zola ya bantu mingi’ na inza yai ke na kumana, Yehowa kelongaka bansadi na yandi ya bilumbu yai na ‘kuzolana bo na bo.’ (Matayo 24:12; 1 Tesalonika 4:9) Balukutakanu ya bansi mingi yina Bambangi ya Yehowa kesalaka kele baokazio ya kuluta mbote ya dilongi yai. Bambangi yina kezingaka na kisika balukutakanu yai kesalamaka kekutanaka ti bampangi yina kekatukaka na bansi ya ntama, mpi mingi mendimaka na kuyamba na banzo na bo bampangi na bo ya bansi yankaka yina kekwisaka sambu na balukutakanu yina. Na lukutakanu mosi ya mekatuka kusalama ntama mingi ve, bampangi yankaka kukatukaka na bansi yina bantu kevandaka ve ti kikalulu ya kumonisa pwelele mawi ya ntima na bo. Mukristu mosi yina vandaka kusala na departema ya kuyamba banzenza ketuba nde: “Ntangu bampangi yai kukumaka, bo vandaka boma-boma mpi madidi-madidi. Kansi bilumbu sambanu mpamba na nima, na ntangu ya kukabwana, bo ti bampangi yina kuyambaka bo yantikaka kuyambana mpi kudila. Bampangi kusongaka bo zola ya Bukristu na mutindu mosi ya bo tavila ve ata fyoti.” Kumonisa bampangi na beto kikalulu ya kuyamba kukonda kutala kisika ya bo mekatuka lenda buta mbuma ya mbote kibeni na banzenza mpi na bantu yina meyamba bo.​—Roma 12:13.

⁶ Ata baeksperiansi ya mutindu yai ya kemonanaka na balukutakanu ya nene kepesaka kyese mingi, yo kesadisaka mingi dyaka Bakristu na kuyedisa kinduku ya ngolo ntangu bo kesadilaka Yehowa kumosi na nsungi ya mwa ntangu yina bo kevukanaka. Kana beto kezaba bampangi na beto mbote, beto lenda sepela mpenza na bikalulu na bo ya zola, mu mbandu bukyeleka na bo, bantu ya beto lenda tudila ntima, kwikama, ntima ya mbote, kikalulu na bo ya kukaba, luzitu, mawa, mpi kukonda bwimi. (Nkunga 15:3-5; Bingana 19:22) Marko, yina kusalaka bonso misionere na Afrika ya Esti, kutubaka nde: “Kusala kumosi ti bampangi na beto kesadisaka beto na kusala ti bo kinduku ya ngolo yina lenda zengana ve.”

 7. Inki beto fwete sala sambu na kubaka mambote ya zola ya Bukristu na kati ya dibundu?

⁷ Sambu na kusala mpi kutanina kinduku ya mutindu yina na kati ya dibundu, bampangi fwete vanda na bumosi. Kana beto kekwenda na balukutakanu ya Bukristu mbala na mbala, beto takumisa ngolo kinduku ya beto kele na yo ti bampangi na beto ya babakala ti ya bankento. Kana beto kevukana na balukutakanu mpi kesolula ti bampangi na ntwala mpi na nsuka ya balukutakanu yango, mpi kana beto kepesa bakomantere na ntangu yo kesalama, beto tapesana kikesa mpi tapusa bampangi na “zola mpi na bisalu ya mbote.” (Baebreo 10:24, 25, NW) Nkuluntu mosi na États-Unis ketuba nde: “Mono keyibuka na kyese yonso nde ntangu mono vandaka mwana-fyoti, dibuta na beto kuvandaka ntangu yonso na kati ya bantu ya nsuka na kukatuka na Nzo ya Kimfumu. Bantangu yankaka, beto vandaka kusukinina sambu na kusolula masolo ya kyese mpi ya mfunu ti bampangi na beto.”

Keti Yo Kelomba nde Nge “Kudikangula”?

 8. (a) Inki Polo zolaka kutuba ntangu yandi longisilaka bampangi ya Korinto na “kudikangula”? (b) Inki beto lenda sala sambu na kuyedisa zola na kati ya dibundu?

⁸ Sambu na kumonisa mpenza zola ya mutindu yai, yo lenda lomba nde beto “kudikangula” na bantima na beto. Ntumwa Polo kusonikaka na dibundu ya Korinto nde: “Beto me [kangudila beno, NW] ntima na beto. Beto me bumbila beno ve mambu yina kele na ntima na beto.” Yo yina, Polo kulongisilaka bo na “kudikangula.” (2 Korinto 6:11-13, NW) Keti nge mpi lenda “kudikangula” na mutindu nge kemonisaka zola na bantu yankaka? Nge fwete kinga ve nde bankaka kuyantika na kudikangula na nge. Na mukanda ya yandi sonikilaka Bakristu ya Roma, Polo kuwakanisaka mfunu ya kuvanda na zola ya ngolo ti ndongisila yai: “Beno [vanda bantu ya ntete, NW] na kusonga luzitu.” (Roma 12:10) Sambu na yina metala kusonga luzitu na bankaka, nge lenda baka lukanu ya kuyantika na kupesa bo mbote na balukutakanu. Nge lenda lomba bo mpi na kubasika ti nge na kisalu ya kusamuna to na kubongisa balukutakanu kumosi. Kusala mutindu yai kesadisaka beto na kuyedisa zola ya ngolo.

 9. Inki mambu bampangi mingi mesalaka sambu na kukuma banduku ya ngolo ti bampangi Bakristu? (Tubila mpi bambandu ya mesalamaka na dibundu na beno.)

⁹ Mabuta mpi konso muntu na kati ya dibundu lenda “kudikangula” kana bo ketalana, mbala yankaka kudya mpi kusala mambu yankaka ya mbote kumosi. (Luka 10:42; 14:12-14) Hakop kebongisaka bapikiniki mbala na mbala sambu na bimvuka ya fyoti ya bampangi. Yandi ketuba nde: “Mono kebingaka baleke, bambuta, mpi bibuti yina kesansaka bana bo mosi. Konso muntu kevutukaka na nzo na yandi ti kyese mpi mabanza ya mbote, mpi bo kewaka mpenza nde kinduku na bo kekumaka ngolo.” Beto Bakristu, beto fwete sala ngolo sambu na kusuka ve kaka na kuvanda bampangi Bakristu mpamba, kansi mpi na kuvanda banduku ya kyeleka. ​—3 Yoane 14.

10. Inki beto lenda sala kana mavwanga mebasika na kati ya bampangi na beto ya babakala ti ya bankento?

¹⁰ Kansi, bantangu yankaka, kukonda kukuka lenda sala nde yo vanda mpasi na kuyedisa kinduku mpi zola ya ngolo. Inki beto lenda sala? Ntetentete, beto lenda samba sambu na kuvanda ti bangwisana ya mbote ti bampangi na beto. Luzolo ya Nzambi kele nde bansadi na yandi kuzinga na kinduku ya mbote na kati na bo, mpi yandi tapesa mvutu na bisambu ya masonga ya mutindu yai. (1 Yoane 4:20, 21; 5:14, 15) Beto fwete sala mambu yina kewakana ti bisambu na beto. Ric, nsadi-ntambudi mosi na Afrika ya Esti, keyibuka mpangi mosi ya bakala yina kuvandaka ti ntima ya nku mpenza. Ntima na yandi ya nku kusalaka nde bampangi vandaka kuzola ve na kusala kinduku ti yandi. Ric ketendula nde: “Na kisika ya kutina mpangi yina, mono bakaka lukanu ya kusosa kuzaba yandi mbote-mbote. Mu bakisaka nde tata ya mpangi yina kupesaka yandi disipline mosi ya ngolo kibeni. Ntangu mu bakisaka nde mpangi yina kunwanaka ngolo sambu na kukatula kimuntu yina yandi yelaka na yo, mpi bansoba yina yandi salaka, mu kumaka kuzola yandi. Beto kumaka banduku ya ngolo.”​—1 Piere 4:8.

Kangula Ntima na Nge!

11. (a) Inki beto fwete sala sambu na kuyedisa zola ya ngolo na kati ya dibundu? (b) Sambu na nki yo lenda vanda kigonsa na kukonda kuzola kumonisa mawi na beto na bantu yankaka?

¹¹ Bubu yai, bantu mingi kezingaka kukonda kuyedisa kinduku ya ngolo ti bantu yankaka. Yo kele mawa mingi! Yo fwete vanda ve mutindu yina ata fyoti na dibundu ya Bukristu. Zola ya kyeleka ya kimpangi ketendula ve kaka kusolula mpi kumonisa bikalulu ya luzitu. Yo ketendula mpi ve kulutisa ndilu na mutindu ya kumonisa mawi ya kyese. Kansi, mutindu Polo kusalaka yo na bampangi ya Korinto, beto fwete vanda na luzolo ya kukangula ntima na beto mpi kumonisa bampangi na beto Bakristu nde beto kekudibanzaka mpenza sambu na mambote na bo. Ata muntu mosi ve kebutukaka ti kikalulu ya kusepela na kuzinga na kimvuka ti bantu yankaka to ti kikesa ya kutubaka mingi, kudivandila nge mosi lenda vanda kigonsa. Biblia kepesa lukebisu yai: “Muntu yina kekudivandila tasosa mambote na yandi mosi ya bwimi; yandi takabwana ti mayele yonso ya bantu kesadilaka.”​—Bingana 18:1, NW.

12. Sambu na nki kusolula ya mbote kele mfunu sambu na kusala kinduku ya ngolo na kati ya dibundu?

¹² Kusolula ya masonga kele mfunu mingi sambu na kusala kinduku ya kyeleka. (Yoane 15:15) Beto yonso kevandaka na mfunu ya banduku yina beto lenda zabisa mabanza mpi mawi yina beto mebumbaka na ntima na beto. Dyaka, kana beto kezabana mbote, yo tavandila beto ve mpasi na kulungisa bampusa ya bantu yankaka. Kana beto kekudibanza sambu na bampusa na beto mpi ya bantu yankaka mutindu yai, beto tayedisa zola ya ngolo na kati ya dibundu, mpi beto tamona kyeleka ya bangogo yai ya Yezu kutubaka: “Kiese ya kuluta mingi ke vandaka na kupesa, kansi na kubaka kiese ke vandaka fioti.”​—Bisalu 20:35; Filipi 2:1-4.

13. Inki beto lenda sala sambu na kumonisa nde beto kele na zola ya kyeleka sambu na bampangi na beto?

¹³ Sambu zola na beto kunatila beto mambote mingi, beto fwete monisaka yo. (Bingana 27:5) Kana zola na beto kele ya kyeleka, ilungi na beto kemonisaka yo pwelele, mpi yo lenda pusa ntima ya bankaka mpi na kuzola beto. Kingana mosi ya Biblia ketuba nde: “Kungenga ya meso kesepedisaka ntima.” (Bingana 15:30, NW) Kusala mambu ya mbote mpi kekumisaka zola ngolo. Ata yo kele masonga nde ata muntu mosi ve lenda sumba zola ya kyeleka, dikabu ya bo kepesaka na ntima ya mvimba lenda vanda na valere mingi. Kutindila muntu karte mosi, mukanda, mpi “ngogo ya muntu metuba na ntangu ya mbote” lenda monisa zola ya ngolo. (Bingana 25:11, NW; 27:9) Kana beto menunga na kusala kinduku ti bankaka, beto fwete tanina yo konso ntangu na kumonisaka zola ya kukonda bwimi. Beto fwete sadisaka banduku na beto, mingimingi na bantangu ya mpasi. Biblia ketuba nde: “Nduku ya kyeleka kezolaka konso ntangu, mpi yandi kele mpangi yina butukaka sambu na ntangu ya mpasi.” ​—Bingana 17:17, NW.

14. Inki beto lenda sala kana yo kemonana bonso nde muntu mosi kezola ve kusala kinduku ti beto?

¹⁴ Ya kyeleka, beto lenda sala ve kinduku ya ngolo ti bantu yonso na kati ya dibundu. Yo kele mpi kyeleka nde beto tasala kinduku ya ngolo ti bankaka kukonda mpasi, kansi ti bantu yonso ve. Yo yina, kana nge kemona bonso nde muntu mosi kezola ve kusala kinduku ti nge mutindu nge kezola, kuyindula ve na mbala mosi nde yandi kele ti dikambu ti nge to nde yandi kele ti dikambu ya kepesa yandi mpasi. Kusosa ve na kusala kinduku na kingolongolo ti muntu yango. Kana nge kezinga ti yandi kaka bonso nduku na kiteso yina muntu yango mepesa nge nzila, yo ketendula nde nge mebika kyelo ya kukanguka sambu na kusala ti yandi kinduku ya ngolo na bilumbu kekwisa.

“Mono Mendima Nge”

15. Inki kima kusikisa, to kukonda kusikisa, kesalaka na bankaka?

¹⁵ Yo fwete vanda nde na mbotika na yandi, Yezu kusepelaka mingi kibeni ntangu yandi waka bangogo yina kukatukaka na zulu nde: “Mono mendima nge.” (Marko 1:11, NW) Yo fwete vanda mpi nde bangogo ya kundima yai ya Nzambi kusongaka Yezu kundimisaka yandi nde Tata na yandi vandaka kuzola yandi. (Yoane 5:20) Kansi yo kele mawa na kumona nde, bantu mingi kewaka ve bangogo ya kusikisa ya mutindu yai na munoko ya bantu ya bo kezitisaka mpi kezolaka. Ann ketuba nde: “Baleke mingi bonso mono kele ve ti bampangi na kati ya kyeleka. Na banzo, beto kewaka kaka bangogo ya kutonga. Yo kepesaka beto mawa mingi.” Kansi, ntangu bo kekotaka na dibundu ya Bukristu, bo kewaka kyese yina kevandaka na kati ya dibuta ya kimpeve ya batata ti bamama mpi bampangi ya babakala ti ya bankento yina kesadisanaka mpi kekuditulaka dikebi.​—Marko 10:29, 30; Galatia 6:10.

16. Sambu na nki kikalulu ya kutonga bantu yankaka kele ve kikalulu mosi ya mbote?

¹⁶ Na bisika yankaka, bibuti, bambuta, mpi balongi kemonisaka mpenza ve na baleke nde bo kezolaka bo, sambu bo keyindulaka nde kumonisa bo zola mutindu yina lenda kumisa bo bamolo to lulendo. Bangindu ya mutindu yina lenda kota nkutu na mabuta ya Bakristu mpi na dibundu. Mu mbandu, sambu na kutubila disolo to kikesa yankaka ya leke mosi mesala, bambuta lenda tuba nde: “Yo vandaka mbote, kansi nge lenda tomisa dyaka!” To bantangu yankaka, bo lenda monisa nkutu makasi na bo na leke mosi. Na ntangu bo kesalaka mutindu yina, bambuta mingi keyindulaka nde bo kesyamisaka baleke na kukuma mpenza bonso bo. Kansi, na kisika ya kusyamisa baleke, mbala mingi kusala mutindu yai kelembisaka bo, sambu baleke lenda yantika kutina bambuta to kudiwa bonso nde bo takuka ve kusala dyambu yina bambuta kelomba bo.

17. Sambu na nki beto fwete sosaka mabaku ya kusikisa bantu yankaka?

¹⁷ Kansi, yo kele mbote ve na kusikisa muntu kaka na ntangu nge kezola kupesa yandi ndongisila. Kusikisa ya masonga keyedisaka zola ya ngolo na kati ya dibuta mpi na dibundu, mpi yo kesyamisaka baleke na kusosa bandongisila ya bampangi ya babakala mpi ya bankento ya kuyela. Yo yina, na kisika ya kubika nde bikalulu ya kisika ya beto kezingaka kusonga beto mutindu ya kuzinga ti bankaka, bika beto ‘lwata bikalulu ya mpa mutindu beto ke lwataka bilele na beto. Bikalulu yina mefwanana na Nzambi yina salaka yo, yo kemonikaka na luzingu yina kele ya mbote, ya santu ti ya kieleka.’ Sikisaka bantu yankaka mutindu Yehowa kesalaka yo.​—Efezo 4:24.

18. (a) Baleke, inki mutindu beno fwete tadila bandongisila yina bambuta kepesaka beno? (b) Sambu na nki bambuta keyindulaka mpi kesambaka na ntwala ya kupesa bandongisila?

¹⁸ Kansi baleke, beno yindula ve nde kana bambuta kesungika to kepesa beno bandongisila, yo kezola kutuba nde bo kezolaka beno ve. (Longi 7:9) Yo kele mutindu yina ve! Kima kepusaka bo na kusala yo kele susi mpi zola ya ngolo ya bo kele na yo sambu na beno. Kana mpidina ve, sambu na nki bo takudipesa mpasi ya kutubila beno mambu yango? Sambu bo mezaba kima yina mambu ya bo ketuba lenda sala, bambuta, mingimingi bankuluntu ya dibundu, kelutisaka mbala mingi ntangu mingi na kuyindula mpi kusamba na ntwala ya kupesa bandongisila, sambu susi na bo kevandaka kaka ya kusala mambu ya mbote.​—1 Piere 5:5.

“Yehowa Kele ya Kufuluka na Zola ya Ngolo”

19. Sambu na nki bayina memonaka mpasi sambu na zola ya bo monisaka na bantu yankaka lenda lomba lusadisu na Yehowa?

¹⁹ Bantu mingi yina mebikalaka ti malanda ya mbi na nima ya kumonisa zola ya ngolo na bantu yankaka mekumaka kuyindula nde kumonisa zola ya ngolo na bantu tanatila bo kaka mpasi. Yo kelombaka bo kikesa mpi lukwikilu ya ngolo sambu na kukangula dyaka ntima na bo na bantu yankaka. Kansi, bo fwete vila ve ata fyoti nde Yehowa “kele ntama ve na konso muntu awa na kati na beto.” Yandi kelomba beto na kukwenda penepene na yandi. (Bisalu 17:27; Yakobo 4:8) Yandi kebakisaka mpi boma ya beto kevandaka na yo nde bantu kumonisa beto mpasi, mpi yandi kesila nde yandi tavanda penepene na beto mpi tasadisa beto. Muyimbi-bankunga Davidi, kendimisa beto nde: “Yehowa kele penepene na bayina kele na ntima ya kupasuka; mpi yandi kegulusaka bayina kele na mabanza ya kupasuka.”​—Nkunga 34:18, NW.

20, 21. (a) Inki mutindu beto mezaba nde beto lenda sala kinduku ya ngolo ti Yehowa? (b) Inki yo kelombaka sambu na kuvanda na kinduku ya ngolo ti Yehowa?

²⁰ Kinduku ya ngolo ti Yehowa kele kinduku ya kuluta mfunu ya beto lenda sala. Kansi, keti kinduku ya mutindu yina lenda salama mpenza? Ee. Biblia kemonisa mutindu babakala mpi bankento ya lunungu kusalaka kinduku ya ngolo ti Tata na beto ya zulu. Biblia ketubilaka zola ya ngolo ya bo monisaka sambu na kundimisa beto nde beto mpi lenda kwenda penepene na Yehowa. ​—Nkunga 23, 34, 139; Yoane 16:27; Roma 15:4.

²¹ Muntu yonso lenda lungisa mambu yina Yehowa kelombaka sambu na kuvanda nduku na yandi. Davidi kuyulaka nde: “Mfumu Nzambi, nani lenda kota na nzo na nge? . . . Kele kaka muntu yina ke landaka luzolo ya Nzambi na mambu yonso, ke salaka mambu ya mbote ntangu yonso; yandi ke tubaka mambu ya kieleka.” (Nkunga 15:1, 2; 25:14) Kana beto kemona nde kusadila Nzambi kebutaka mbuma ya mbote mpi kepesaka beto lutwadisu mpi lutaninu na yandi, beto tabakisa nde “Yehowa kele ya kufuluka na zola ya ngolo.”​—Yakobo 5:11, NW.

22. Kinduku ya nki mutindu Yehowa kezolaka nde bansadi na yandi kuvanda na yo?

²² Beto kebakaka mpenza balusakumunu mingi mutindu Yehowa kezolaka kuvanda na kinduku ya ngolo ya mutindu yai ti bantu ya kukonda kukuka! Keti yo fwete pusa beto ve na kumonisa zola ya ngolo na bampangi na beto? Na lusadisu ya Yehowa, konso muntu na kati na beto lenda sala ngolo sambu na kumonisa zola na bantu yankaka mpi kusepela na zola ya ngolo yina bampangi na beto Bakristu kemonisaka. Konso muntu yina tazinga na ntoto na ntangu Kimfumu ya Nzambi tayala tamonisa mpi tamona zola yai mvula na mvula.

Keti Nge Lenda Tendula?

• Mpeve ya nki mutindu fwete vanda na dibundu ya Bukristu?

• Inki mutindu konso muntu na kati na beto lenda sala ngolo sambu na kumonisa zola ya ngolo na kati ya dibundu?

• Inki mutindu kusikisa ya masonga keyedisaka zola ya Bukristu?

• Inki mutindu zola ya ngolo ya Yehowa kesadisaka beto?

[Kifwanisu ya kele na lutiti 31]

Keti nge lenda “kudikangula” na mutindu nge kemonisaka zola?