“Beno Sala Bonso Bampika Sambu na Yehowa”

 1. Monisa luswaswanu yina kele na kati ya kimpika yina bantu ke yindulaka ti yina Baroma 12:11 ke tubila.

KIMPIKA ya Bakristu me swaswana kibeni ti yina bantu mingi ke yindulaka. Sambu na bo, mpika kele muntu yina bo ke yala na nku yonso, ke niokula, mpi ke sadila mambu ti kukonda lunungu. Kansi Ndinga ya kupemama ya Nzambi ke tubila kimpika yina ke lombaka kusadila na luzolo yonso Mfumu mosi ya zola. Nkutu, ntangu ntumwa Polo longisilaka Bakristu ya mvu-nkama ya ntete na ‘kusala bonso bampika sambu na Yehowa,’ yandi vandaka kusiamisa bo na kusadila Nzambi kisalu ya santu sambu bo ke zolaka yandi. (Bar. 12:11) Kimpika ya mutindu yai ke tendula nki? Inki mutindu beto lenda buya kukuma bampika ya Satana mpi ya nsi-ntoto na yandi? Mpi inki mambote beto ta baka kana beto ke sadila Yehowa na kwikama yonso bonso bampika?

 2. (a) Inki lendaka kupusa Mu-ebreo yina kele mpika na kubuya kubaka kimpwanza? (b) Mpika yina vandaka kundima bo tobula dikutu na yandi, vandaka kumonisa inki?

² Nsiku yina Nzambi pesaka bantu ya Izraele ke sadisa beto na kubakisa mutindu ya kimpika yina Yehowa ke zola nde beto vanda. Yo vandaka kumonisa nde, mpika ya Mu-ebreo fwete baka kimpwanza na nima ya kusadila mfumu na yandi bamvula nsambwadi. (Kub. 21:2) Kansi, Yehowa salaka ngidika mosi ya mbote kibeni sambu na mpika yina ke zolaka mingi mfumu na yandi mpi me pona na kubikala na kisalu na yandi. Mfumu ya mpika yina fwete nata yandi na kielo to na dikunzi ya kielo mpi kutobula dikutu na yandi ti kima ya kutobudila. (Kub. 21:5, 6) Kutobula dikutu ya mpika vandaka ti ntendula. Na ndinga ya Kiebreo, bulemfu kele na kuwakana ti kuwa mpi kuwidikila. Yo yina, ntangu mpika me ndima nde mfumu kutobula yandi dikutu, yandi kele ya kuyilama na kulanda kusadila yandi na bulemfu yonso. Yo ke sadisa beto na kubakisa ntendula ya kudipesa na beto na Yehowa, disongidila kundima kulemfukila yandi sambu beto ke zolaka yandi.

 3. Inki ke pusaka beto na kudipesa na Nzambi?

³ Na ntwala ya kubaka mbotika ya Bukristu, beto ke bakaka ntete lukanu ya kusadila Yehowa, to ya kuvanda bampika na yandi. Ntangu beto ke kudipesaka na Yehowa, beto ke silaka yandi na kulemfukila yandi mpi kusala lukanu na yandi. Ata muntu mosi ve ke pusaka beto na ngolo na kusala yo. Nkutu, ata baleke yina ke bakaka mbotika, bo ke salaka yo kaka na nima ya kudipesa na Yehowa, kansi ve sambu na kusepedisa bibuti na bo. Kima yina ke pusaka beto na kudipesa na Yehowa kele zola yina beto ke vandaka ti yo sambu na Mfumu na beto ya zulu. Ntumwa Yoane sonikaka nde: “Yai kele ntendula ya zola ya Nzambi, nde beto zitisa bansiku na yandi.”​—1 Yoa. 5:3.

 4. Inki beto fwete sala sambu na kukuma “bampika ya lunungu”?

⁴ Beto ke tonda Yehowa mingi na mutindu yandi me pesaka beto nzila na kuvanda bampika na yandi! Lukwikilu na beto na kimenga ya nkudulu ya Kristu ke sadisaka beto na kukatuka na vangu ya disumu. Ata beto kele bantu ya kukonda kukuka, beto me ndimaka kulemfukila kiyeka ya Yehowa mpi ya Yezu. Polo tendulaka yo pwelele na mosi ya mikanda na yandi ya kupemama: “Beno kuditadila bonso bantu ya kufwa na luzingu ya disumu, kansi bonso bantu ya moyo sambu na Nzambi na nzila ya Kristu Yezu.” Na nima yandi pesaka lukebisu yai: “Keti beno me zaba ve nde kana beno ke landa na kudipesa na muntu bonso bampika ya bulemfu, beno kele bampika ya muntu yina beno ke lemfukila? Beno kele bampika ya disumu yina ke nataka na lufwa to bampika ya bulemfu yina ke nataka na lunungu. Kansi matondo na Nzambi sambu beno vandaka ntete bampika ya disumu, kansi beno me kumaka kulemfuka na ntima ya mvimba na mbandu ya malongi yina bo me pesaka beno. Ee, sambu bo me katulaka beno na kimpika ya disumu, beno me kumaka bampika ya lunungu.” (Bar. 6:11, 16-18) Simba nde ntumwa Polo tubilaka “kulemfuka na ntima ya mvimba.” Yo yina, ntangu beto ke kudipesaka na Yehowa beto ke kumaka “bampika ya lunungu.”

 5. Inki mvita beto yonso ke nwanaka, mpi sambu na nki?

⁵ Kansi, kele ti bampasi yina ke kangaka beto nzila na kuzinga na kuwakana ti kudipesa na beto. Beto ke nwana bamvita zole. Ya ntete, yo kele mvita yina Polo mpi nwanaka. Yandi sonikaka nde: “Na ntima na mono, mono ke monaka kiese kibeni na nsiku ya Nzambi, kansi mono ke mona na nitu na mono nsiku ya nkaka yina ke nwana ti nsiku ya mabanza na mono mpi yo ke nata mono na kimpika ya nsiku ya disumu yina kele na nitu na mono.” (Bar. 7:22, 23) Beto mpi kele bantu ya kukonda kukuka. Yo yina, beto fwete landa kunwanisa bampusa na beto ya kinsuni. Ntumwa Piere siamisaka beto nde: “Beno vanda bonso bantu ya kele na kimpwanza, beno sadila ve kimpwanza na beno bonso mufiniku sambu na kusala mambu ya mbi, kansi beno sadila yo bonso bampika ya Nzambi.”—1 Pie. 2:16.

6, 7. Inki mutindu Satana ke salaka na mpila nde nsi-ntoto yai kumonana kitoko?

⁶ Ya zole, beto fwete nwanisa nsi-ntoto yai ya ke twadisama na bademo. Satana, mfumu ya nsi-ntoto yai, ke sadila batolo-tolo na yandi sambu na kubebisa kwikama na beto na Yehowa mpi na Yezu. Yandi ke zola nde beto kuma bampika na yandi na mutindu yandi ke pukumunaka beto na kulanda nsi-ntoto na yandi ya mbi. (Tanga Baefezo 6:11, 12.) Satana ke salaka yo na mutindu yandi ke salaka yonso sambu nde nsi-ntoto yai kumonana kitoko mpi kubenda beto. Ntumwa Yoane pesaka lukebisu yai: “Kana muntu ke zola nsi-ntoto, zola ya Tata kele na yandi ve; sambu bima yonso yina kele na nsi-ntoto​—nzala ya nitu mpi nzala ya meso mpi kusonga na lulendo yonso bima ya kuzingila—ke katukaka ve na Tata, kansi yo ke katukaka na nsi-ntoto.”​—1 Yoa. 2:15, 16.

⁷ Na nsi-ntoto ya mvimba, bantu ke kuma kaka na mpusa ya kuvanda ti bima mingi ya kinsuni. Satana ke pusa bantu na kukwikila nde mbongo mingi ke pesaka kiese. Bazandu mpi magazini ya nene-nene me fuluka na nsi-ntoto. Bapiblisite ke siamisa bantu na kusumba bima mingi mpi kusepela na luzingu. Ba kompani ya bavwayaze ke songisa bisika ya kitoko ya kusala nzietelo, kisika beto ta vanda kumosi ti bantu yina kele ti mabanza ya nsi-ntoto. Ya kieleka, bantu mingi ke tuba nde beto fwete “tomisa” luzingu​—kansi mbala mingi na kutadila minsiku ya nsi-ntoto.

8, 9. Inki kigonsa beto kele ti yo, mpi sambu na nki?

⁸ Na mvu-nkama ya ntete, Piere kebisaka Bakristu sambu na bampangi ya dibundu yina kumaka ti mabanza ya nsi-ntoto; yandi tubaka nde: “Bo ke monaka kiese na kudipesa na luzingu ya biese, ata na mwini. Bo kele matono mpi bifu yina ke yangalalaka na malongi na bo ya luvunu ntangu bo ke salaka nkinsi kumosi ti beno. Bo ke tubaka mambu ya lulendo mpi ya kukonda mfunu. Mpi ntangu bo ke siamisaka banzala ya nitu mpi mambu ya poto-poto, bo ke pukumunaka bayina me katuka kutina bantu yina ke salaka mambu ya mbi. Na ntangu bo ke sila bo kimpwanza, bo mosi kele bampika ya mambu ya mbi. Sambu kana muntu mosi me bedisa muntu ya nkaka, muntu yina yandi me bedisa me kuma mpika na yandi.”—2 Pie. 2:13, 18, 19.

⁹ Kulungisa “nzala ya meso” ke pesaka ve muntu kimpwanza. Kansi, yo ke kumisaka yandi mpika ya Satana Diabulu, mfumu ya nsi-ntoto yai, ya ke monanaka ve. (1 Yoa. 5:19) Kukuma mpika ya bima ya kinsuni kele kigonsa kibeni. Kana yo salama, yo ke vandaka mpasi na kukatuka na kimpika yina.

10, 11. Bubu yai, Satana ke sosaka kukanga banani ntete-ntete, mpi inki mutindu malongi yina ke pesama na banzo-nkanda ya nsi-ntoto lenda vanda kigonsa sambu na bo?

¹⁰ Kaka mutindu Satana salaka na Edeni, bubu yai yandi ke sosaka bantu yina kele ti eksiperiansi fioti. Baleke kele bantu ya ntete-ntete yina yandi ke sosa kukanga. Satana ke sepelaka ve kana leke to muntu yonso ya nkaka, me ndima kukuma mpika ya Yehowa. Mbeni ya Nzambi ke zolaka nde bantu yonso yina me pesaka luzingu na bo na Yehowa kubebisa kwikama mpi kudipesa na bo na yandi.

¹¹ Bika beto vutukila mbandu ya mpika yina me ndima nde bo tobula yandi dikutu. Ntembe kele ve nde, na luyantiku yandi ta wa mpasi, kansi na nima yo ta mana mpi yo ta bika kidimbu ya kimakulu yina ta monisa nde yandi me ndima kubikala na kimpika. Yo lenda vanda mpasi sambu na leke Mukristu mosi na kusala bansola yina me swaswana ti ya banduku na yandi. Mu mbandu, Satana ke pusa bantu na kuyindula nde kuvanda ti kisalu ya mbote na nsi-ntoto na yandi ke pesaka kiese, kansi Bakristu fwete zaba nde kulungisa bampusa ya kimpeve kele diambu ya kuluta mfunu. Yezu longaka nde: “Kiese na bantu yina kele na nzala ya mambu ya kimpeve.” (Mat. 5:3) Bakristu ke kudipesaka sambu na kusala luzolo ya Nzambi kansi ya Satana ve. Kiese na bo kele na nsiku ya Yehowa, mpi bo ke yindululaka yo mpimpa ti mwini. (Tanga Nkunga 1:1-3.) Kansi, malongi mingi yina ke pesamaka bubu yai na banzo-nkanda ya nda ke bikilaka bansadi ya Yehowa ntangu fioti sambu na kuyindulula mpi kulungisa bampusa na bo ya kimpeve.

12. Inki nsola baleke mingi fwete sala bubu yai?

¹² Bamfumu ya nsi-ntoto lenda niokula Bakristu yina kele bampika. Na mukanda ya ntete yina yandi sonikilaka Bakorinto, Polo yulaka nde: “Keti nge vandaka mpika ntangu bo bingaka nge?” Na nima, yandi longisilaka bo nde: “Kubika ve nde yo yangisa nge; kansi kana nge lenda kuma na kimpwanza, sadila dibaku yina.” (1 Bak. 7:21) Kana mfumu kele muntu ya nku, yo ta vanda mbote nde mpika kubaka kimpwanza. Bubu yai, na bansi mingi, nsiku ke lombaka mwana yonso na kukota nzo-nkanda tii na nsungi ya bamvula mosi buna. Na nima ya kumanisa banzo-nkanda yina, yandi mosi lenda pona na kukota banzo-nkanda yankaka to ve. Yo lenda vanda mpasi sambu na Mukristu na kuzwa kimpwanza ya kusadila Yehowa na kisalu ya ntangu yonso, kana yandi landa kusala banzo-nkanda kaka sambu na kuvanda ti kisalu ya mbote na nsi-ntoto yai.​—Tanga 1 Bakorinto 7:23.

13. Inki banzo-nkanda kele mbote mingi sambu na bansadi ya Yehowa?

¹³ Polo pesaka lukebisu yai na Bakristu ya Kolose: “Beno zikisa nde ata muntu mosi ve kukumisa beno bampika na nzila ya filozofi mpi ya bangindu ya luvunu mpi ya mpamba-mpamba na kuwakana ti kinkulu ya bantu, na kuwakana ti mambu ya ntete-ntete ya nsi-ntoto kansi ve na kuwakana ti Kristu.” (Bakol. 2:8) Bubu yai, bantu mingi ya mayele ke siamisa mabanza ya nsi-ntoto ya “filozofi mpi ya bangindu ya luvunu mpi ya mpamba-mpamba na kuwakana ti kinkulu ya bantu.” Banzo-nkanda ya nda, yina mbala mingi ke longaka balongoki malongi ya mutindu yina, ke pesaka bo mpenza ve mayele yina ta sadisa bo, mpi bo ke vandaka ve ya kuyilama sambu na kununga bampasi ya luzingu. Kansi, bansadi ya Yehowa ke ponaka banzo-nkanda yina ke sadisaka bo na kuzwa mayele yina ta sadisa bo na kuvanda ti luzingu ya kukonda mindondo na mpila nde bo lenda sadila Nzambi. Bo ke landaka ndongisila yai ya Polo Pesaka na Timoteo: “Ya kieleka, kukangama na Nzambi kele na nluta mingi, kana beto ke sepela na yina beto kele na yo. Yo yina, kana beto kele ti madia, mpi bilele, beto ta sepela ti bima yai.” (1 Tim. 6:6, 8) Na kisika ya kubaka ba titre ya nene mpi mikanda to badiplome mingi, Bakristu ya kieleka ke sosaka kubaka “mikanda yina ke kumisa” bo, na mutindu bo ke kudipesaka na kisalu ya kusamuna.​—Tanga 2 Bakorinto 3:1-3.

14. Na kutadila Bafilipi 3:8, inki mutindu Polo tadilaka dibaku ya kusala bonso mpika ya Nzambi mpi ya Kristu?

¹⁴ Beto tadila mbandu ya ntumwa Polo. Yandi longamaka na Gamaliele, yina vandaka longi ya Nsiku ya Bayuda. Malongi yina Polo bakaka lenda fwanana bubu yai ti malongi yina ke pesamaka na iniversite. Kansi, inki mutindu Polo tadilaka malongi yai ntangu yandi fwanisaka yo ti dibaku na yandi ya kusala bonso mpika ya Nzambi mpi ya Kristu? Yandi sonikaka nde: “Mono me yambulaka bima yonso na luzolo yonso sambu na mbalu mingi kibeni ya nzayilu ya Mfumu na mono Kristu Yezu.” Na nima yandi yikaka nde: “Sambu na yandi, mono me ndimaka kuvidisa bima yonso mpi ke tadilaka yo bonso kita ya mvindu, sambu mono zwa Kristu.” (Bafi. 3:8) Mutindu na yandi ya kutadila mambu lenda sadisa baleke Bakristu mpi bibuti na bo yina ke zitisaka Nzambi, na kusala bansola ya mayele na yina me tala nzo-nkanda. (Tala bifwanisu.)

15, 16. Inki malongi beto ke bakaka na organizasio ya Yehowa, mpi inki ke vandaka lukanu na yo?

¹⁵ Inki mambu ke monanaka na ba iniversite mpi na banzo-nkanda ya nda ya nsi-ntoto yai? Mbala mingi, bantu ke basisaka mavwanga mpi ke kolamaka na bamfumu ya leta. (Baef. 2:2) Kansi, organizasio ya Yehowa ke longaka beto malongi ya kuluta mbote na kati ya dibundu ya Bukristu, yina kele kisika ya ngemba. Beto yonso lenda baka mambote na Nzo-Nkanda ya Kisalu ya Teokrasi, yina ke salamaka konso mposo. Kele mpi ti malongi yina bo me yidikaka sambu na bampangi-babakala ya me kwelaka ve, bayina kele bapasudi-nzila (Nzo-Nkanda ya Biblia Sambu na Bampangi-Babakala Yina Me Kwelaka Ve) mpi sambu na bapasudi-nzila yina me kwelaka (Nzo-Nkanda ya Biblia Sambu na Bakristu ya Me Kwelaka). Banzo-nkanda yina ke sadisaka beto na kulemfukila Yehowa, Mfumu na beto ya zulu.

¹⁶ Beto lenda mona malongi ya nkaka ya mbalu na Index des publications Watch Tower to na CD-ROM Watchtower Library. Lukanu ya ntete ya malongi yina kele ya kusambila Yehowa. Yo ke longaka beto mutindu beto lenda sadisa bankaka na kuwakana diaka ti Nzambi. (2 Bak. 5:20) Na nima, yo ta sadisa bo mpi na kulonga bankaka.​—2 Tim. 2:2.

17. Kupona banzo-nkanda ya kuluta mbote ke nataka inki balusakumunu?

¹⁷ Na kingana ya Yezu ya batalanta, Mfumu sikisaka bampika zole ya kwikama mpi zabisaka bo na kusepela ti yandi na mutindu yandi pesaka bo mikumba ya nkaka. (Tanga Matayo 25:21, 23.) Kupona banzo-nkanda ya kuluta mbote bubu yai ke pesaka kiese mpi lusakumunu. Beto tadila mbandu ya Michael. Yandi vandaka mayele mingi na nzo-nkanda yo yina balongi bingisaka yandi na lukutakanu mosi sambu na kutubila lukanu ya kukota na iniversite. Kansi, bo yitukaka ngolo ntangu Michael songaka bo nde yandi ponaka kusala nzo-nkanda ya nkufi yina ta sadisa yandi na kulungisa bampusa na yandi mpi kusala bonso mupasudi-nzila ya ntangu yonso. Keti yandi ke monaka nde yandi vidisaka kima mosi buna? Yandi ke tuba nde: “Formasio yina mono me bakaka na kisalu ya mupasudi-nzila mpi ntangu yai mutindu mono kele nkuluntu na dibundu, me sadisaka mono mingi. Mono me bakaka balusakumunu mingi kuluta mbongo yonso yina mono lendaka kubaka. Mono ke sepelaka mingi mutindu mono ponaka ve kulanda banzo-nkanda ya nda.”

18. Sambu na nki nge me pona banzo-nkanda ya kuluta mbote?

¹⁸ Nzo-nkanda ya kuluta mbote ke longaka beto luzolo ya Nzambi mpi ke sadisaka beto na kusala bonso bampika sambu na Yehowa. Yo ke pesaka beto kivuvu ya kukatuka “na kimpika ya disumu mpi ya lufwa” mpi nsuka-nsuka kubaka “kimpwanza ya nkembo ya bana ya Nzambi.” (Bar. 8:21) Kuluta yonso, beto ke longukaka mutindu ya kuluta mbote ya kumonisa nde beto ke zolaka kibeni Yehowa, Mfumu na beto ya zulu.​—Kub. 21:5.