Beto sadisa bantu na kukwisa penepene na Yehowa

“Ata muntu mosi ve lenda kwenda na Tata na nzila ya nkaka kana yandi kwisa na mono nzila ve.”​—⁠YOANE 14:⁠6.

 1. Na nima ya lufutumuku na yandi, nki ntuma Yezu pesaka balongoki na yandi, mpi nki mesalamaka banda Bambangi ya Yehowa kelemfukaka na ntuma yai?

YEZU KRISTU tindaka balongoki na yandi na “kukumisa bantu yonso balonguki na [yandi]: Beno botika bo na zina ya Tata ti ya Mwana ti ya Mpeve-Santu.” (Matayo 28:19) Na bamvula kumi yai meluta, Bambangi ya Yehowa mesadisaka mpenza bantu kiteso ya bamiliyo tatu na kukwisa na Nzambi, ebuna bo pesaka bo mpi mbotika yina kesonga kidimbu ya kudipesa na bo na kusala luzolo na yandi. Beto kele na kyese mingi mpenza na kusadisa bo na kukwisa penepene na Nzambi!​—⁠Yakobo 4:⁠8.

 2. Ata bantu mingi ya mpa kebaka mbotika, nki dyaka kesalama?

² Kansi, na bansi yankaka ya balongoki mingi ya mpa bakaka mbotika, kuyela ya kusalamaka kuna kefwana ve ti ntalu ya bansamuni. Ya kyeleka, beto fwete katula bantu yina kufwaka, sambu ntalu ya bantu ya kufwaka kele kiteso ya mosi na kati ya nkama. Kansi, na bamvula ya meluta, bantu mwa mingi mebwa sambu na bikuma mingi. Sambu na nki? Na disolo yai ti yina talanda, beto tatubila mutindu bantu kekwisa penepene na Yehowa mpi bikuma ya kesala nde bankaka kubwa.

Lukanu ya kisalu na beto ya kusamuna

 3. (a) Inki mutindu kisalu yina Yezu pesaka na balongoki na yandi kele ya kufwanana ti ya wanzio yina bo ketubila na Kusonga 14:6? (b) Inki kele mutindu ya memonanaka ya mbote sambu na kubenda dikebi ya bantu na nsangu ya Kimfumu, kansi nki kima kele kaka mpasi?

³ Na “ntangu ya nsuka” yai, balongoki ya Yezu kele ti kisalu ya kumwanga “nzayilu ya kyeleka” yina metala ‘nsangu ya mbote ya kimfumu.’ (Daniele 12:​4, NW; Matayo 24:14) Kisalu na bo kele ya kufwanana ti ya wanzio yina “vandaka na Nsangu ya Mbote ya mvula na mvula sambu na kuzabisa na bantu ya nsi-ntoto, na bantu ya makanda yonso ti ya bandinga yonso ti ya bansi yonso.” (Kusonga 14:⁠6) Na inza yai ya mekudikotisaka mingi na mambu na yo, mbala mingi, yo kemonanaka nde mutindu ya mbote ya kubenda dikebi ya bantu na Kimfumu ya Nzambi mpi kusadisa bo na kukwisa penepene na Yehowa kele kuzabisa bo kivuvu ya luzingu ya kukonda nsuka na paladisu na ntoto. Ata mpidina, kana bantu yina kevukana ti bantu ya Nzambi kesala yo kaka sambu na kukota na Paladisu, pana yo ketendula nde bo mekangama ve ngolo na nzila ya fyoti ya kenata na luzingu.​—⁠Matayo 7:​13, 14.

 4. Kana beto tala mambu yina Yezu tubaka ti mambu yina wanzio ya ketambula na katikati ya zulu kesala, nki kele lukanu ya kisalu na beto ya kusamuna?

⁴ Yezu tubaka nde: “Kana bo zaba nge Nzambi mosi ya kieleka, ti Yesu Kristo yina ya nge tindaka, yo ke songa nde bo ke na [luzingu] ya mvula na mvula.” (Yoane 17:⁠3) Wanzio yina ketambula na katikati ya zulu kesamuna “Nsangu ya Mbote ya mvula na mvula” mpi yandi ketubila bantu yina kezinga na ntoto nde: “Beno wa Nzambi boma, beno pesa yandi lukumu! Sambu ntangu yina ya yandi ta sambisa bantu yo me lunga. Beno samba Nzambi yina salaka zulu, ntoto, nzadi-mungwa ti banto ya masa!” (Kusonga 14:⁠7) Yo yina, yo kele pwelele nde lukanu ya ntete ya kisalu na beto ya kusamuna kele kusadisa bantu sambu bo kwisa penepene na Yehowa na nzila ya Yezu Kristu.

Mukumba na beto na kisalu ya Yehowa

 5. Inki mambu ya Polo ti Yezu tubaka kemonisa nde kisalu ya beto kesala kele ya Yehowa, kansi ya beto ve?

⁵ Ntangu yandi sonikilaka bampangi na yandi Bakristu bapakulami, ntumwa Polo tubilaka “kisalu ya kubenda bantu ya nkaka na kukuma banduku [ya Nzambi]” mpi yandi ketuba nde Nzambi kekumisa bantu banduku na yandi na nsadisa ya nkudulu ya kimenga ya Yezu Kristu. Polo ketuba nde yo kele “bonso nde Nzambi yandi mosi ke tinda beto na kulongisila beno” mpi nde “na zina ya Kristo beto ke bondila beno, bambeni ya Nzambi, beno pesa Nzambi nzila nde yandi katula kimbeni [yina] kele na kati na beno ti yandi, yandi kumisa beno banduku na yandi.” Ngindu yai kepesa kikesa kibeni! Ata beto vanda bapakulami ‘yina ketuba na zina ya Kristo’ to beto vanda bantu ya bo metinda ya kele ti kivuvu ya kuzinga na ntoto, beto fwete vila ve ata fyoti nde yai kele kisalu ya Yehowa, kansi ya beto ve. (2 Korinto 5:​18-20) Ya kyeleka, Nzambi muntu kebendaka bantu mpi kelongaka bayina kekwisa na Kristu. Yezu tubaka nde: “Ata muntu mosi ve lenda kwisa na mono kana Tata yina tindaka mono me benda yandi ve; ebuna mono, mono ta pesa yandi diaka moyo na kilumbu ya nsuka. Baprofete sonikaka mambu yai nde: ‘Nzambi ta longa bantu yonso.’ Konso muntu yina ke wa Tata ti kundima malongi na yandi, yandi ta kwisa na mono.”​—⁠Yoane 6:​44, 45.

 6. Inki mutindu Yehowa ke na kunikisa ntete makanda, mpi kaka na ntangu yina mosi, banani ke na kubaka lutaninu na “nzo” ya lusambu na yandi?

⁶ Na bilumbu yai ya nsuka, nki mutindu Yehowa kebenda bantu mpi kukangudila bo ‘nzila nde bo mpi kukwikila’? (Bisalu 14:27; 2 Timoteo 3:⁠1) Mutindu ya kuluta mbote ya yandi kesala yo kele ya kutinda Bambangi na yandi na kusamuna nsangu na yandi ya luguluku mpi ya kusambisa mambu ya mbi ya kesalama bubu. (Yezaya 43:12; 61:​1, 2) Nsangu yai ya beto kesamuna na inza ya mvimba kele lukebisu yina beto kepesa na makanda sambu na kuzabisa bo nde kubika fyoti Nzambi kekwisa kusambisa inza. Kaka na ntangu yina, bantu yina kele “bimvwama” na meso ya Nzambi ke na kubasika na mambu ya nsi yai mpi kezwa lutaninu na “nzo” ya lusambu na yandi ya kyeleka. Mpidina, Yehowa kelungisa bangogo yai ya profete Agai kusonikaka: “Mono ke nikisa bantu yonso ya nsi-ntoto, ebuna bo ta kwisa kunata bimvwama na bo awa, yo ta pesa nzo [yai] lukumu.”​—⁠Agai 2:​6, 7; Kusonga 7:​9, 15.

 7. Inki mutindu Yehowa kekangula ntima ya bantu mpi nki mutindu yandi kebenda bantu na kukwisa na yandi mosi ti na Mwana na yandi?

⁷ Yehowa kekangula ntima ya bantu yai ya kewaka yandi boma, “bimvwama ya makanda yonso,” na mpila nde bo “wa mambu ya ketuba” Bambangi na yandi. (Agai 2:​7, Jewish Publication Society; Bisalu 16:14) Mutindu yandi salaka na mvu-nkama ya ntete, bantangu yankaka, Yehowa kesadilaka bawanzio sambu bo twadisa Bambangi na yandi na bantu ya masonga ya kedidila yandi sambu yandi sadisa bo. (Bisalu 8:​26-31) Ntangu bantu kelonguka mambu ya Nzambi mebongisaka sambu na bo na nzila ya Mwana na yandi, Yezu Kristu, zola ya Yehowa kebendaka bo. (1 Yoane 4:​9, 10) Ya kyeleka, Nzambi kebenda bantu na kukwisa na yandi mpi na Mwana na yandi sambu Yandi kele na “ntima ya mbote” to sambu na ‘zola ya kwikama’ yina yandi kele na yo.​—⁠Yeremia 31:​3, NW, tala noti na nsi ya lutiti.

Nani Yehowa kebendaka?

 8. Yehowa kebendaka bantu ya nki mutindu?

⁸ Yehowa kebendaka bantu yina kesosaka na kukwisa na Yandi ti na Mwana na yandi. (Bisalu 17:27 ) Bantu yai kele bantu “yina ke mona mpasi ti kudila sambu na mambu yonso ya nsoni yina ke luta” na Kikristu mpi, na inza ya mvimba. (Ezekiele 9:4 ) Bo “ke zabaka na ntima na bo nde bo kele bansukami mpenza [na kimpeve].” (Matayo 5:⁠3) Ee, bo kele bantu ya “kudikulumusa” yina tazinga na paladisu ya ntoto mvula na mvula.​—⁠Sofonia 2:⁠3.

 9. Inki mutindu Yehowa lenda mona kana bantu ‘mekudibongisa mpenza sambu na luzingu ya mvula na mvula,’ mpi nki mutindu yandi kebendaka bo?

⁹ Yehowa lenda zaba mambu yina kele na ntima ya muntu. Ntotila Davidi zabisaka mwana na yandi Salomo nde: “Mfumu Nzambi ke talaka ntima ya bantu, yandi ke zabaka mpi bangindu ya bantu. Kana nge sosa yandi, yandi ta ndima nge.” (1 Bansangu 28:⁠9) Kana beto landa mambu yina kele na ntima ti na mabanza ya muntu, to kikalulu ya yandi kelutaka kuvanda na yo, Yehowa lenda mona kana yandi tandima mambu yina Nzambi meyidikaka sambu na kulolula masumu mpi sambu na kivuvu ya luzingu ya kukonda nsuka na inza ya mpa ya lunungu ya Nzambi. (2 Piere 3:13) Na nsadisa ya Ndinga na yandi yina Bambangi na yandi kesamuna mpi kelonga, Yehowa kebenda ‘bantu yonso yina ya mekudibongisa mpenza sambu na moyo ya mvula na mvula’ na kukwisa na yandi mosi mpi na Mwana na yandi, mpi bantu yango ‘ke na kukumaka bakristo.’​—⁠Bisalu 13:⁠48.

10. Inki kemonisa nde mutindu Yehowa kebendaka bantu ndambu kansi bankaka ve kemonisa ve nde yandi meyidikaka dezia bantu ya yandi fwete gulusa?

¹⁰ Keti mutindu Yehowa kebendaka bantu ndambu kansi bankaka ve, kemonisa nde yandi meyidikaka dezia na ntwala bantu ya yandi fwete gulusa? Ata fyoti ve! Sambu na kubenda bantu, Yehowa kelandaka mutindu mpusa ya konso muntu kele. Yandi kezitisaka luzolo na bo. Yehowa ketula na ntwala ya bantu yonso ya ntoto bubu yai kimpwanza ya kupona ya mutindu mosi bonso yina yandi tulaka na ntwala ya bantu ya Izraele bamvu kuluta 3000 meluta, ntangu Moize kutubaka nde: “Mono ke pesa beno mambu yai na kusola: luzingu to lufwa, mambote to bampasi. Mono ke binga zulu ti ntoto na kuvanda batemwe na mono. Beno sola luzingu sambu beno zinga, beno ti bana na beno. Beno zola Mfumu Nzambi, Nzambi na beno, beno lemfuka na yandi, beno ndima [kangama] yandi mpi na ntima na beno yonso, mpidina beno ti bana na beno ta vandaka na luzingu ya nda.”​—⁠Kulonga 30:​15-20.

11. Inki mutindu bantu ya Izraele zolaka kumonisa nde bo mepona luzingu?

¹¹ Zaba nde yo lombaka nde bantu ya Izraele kusola luzingu mpi kumonisa yo ‘na kuzola Yehowa, na kulemfuka na yandi, na kukanga yandi na ntima na bo yonso.’ Ntangu Nzambi tubaka mambu yina, bantu ya Izraele vandaka bo mekota ntete ve na Ntoto ya Lusilu. Bo vandaka kupema na Nseke ya Moabi, sambu na kuyilama na kuzenga Nzadi ya Yordani mpi kukota na Kanana. Yo vandaka pwelele nde yo lombaka nde bo tula bangindu na bo yonso na nsi yina kele “ya mbote mpenza ti ya nene” yina ‘mefuluka na mabele ti bwiki’ ya bo zolaka kubaka ntama mingi ve. Sambu na kubaka mambu ya bo vandaka kukinga yo lombaka nde bo zola Yehowa, bo lemfuka na yandi, mpi bo kangama na yandi. (Kubasika 3:⁠8) Moize kumonisaka mambu yai pwelele ntangu yandi tubaka nde: “Kana beno landa bansiku ya Mfumu Nzambi, Nzambi na beno, ya mono me pesa beno bubu yai, kana beno zola yandi, beno lemfuka na yandi ti kulanda bansiku na yandi yonso, ebuna beno ta zinga, beno ta kuma mpi dikanda ya bantu mingi. Mfumu Nzambi ta sala beno mambote na ntoto yina ya beno ke kwenda kutunga.” (Beto bantu metengimisa bisono.)​—⁠Kulonga 30:⁠16.

12. Mbandu ya bantu ya Izraele fwete longa beto nki na yina metala kisalu na beto ya kusamuna ti ya kulonga?

¹² Keti mambu yai kelonga beto kima na yina metala kisalu na beto ya kusamuna ti ya kulonga bantu na ntangu yai ya nsuka? Beto kezo tubila Paladisu yina tavanda na ntoto mpi kutubila yo na kisalu na beto. Kansi beto to bantu ya beto kekumisa balongoki tamona ve kulungana ya lusilu yina kana beto to bo kesadila Nzambi sambu na bikuma ya bwimi ya beto mosi. Bonso bantu ya Izraele, beto ti bantu yina beto kelonga, beto fwete longuka na ‘kuzola Yehowa, kulemfuka na yandi, ti kukangama na yandi.’ Kana beto kevila ve mambu yai na ntangu beto kesala kisalu na beto, ya kyeleka, beto tasala kumosi ti Nzambi na kubenda bantu na yandi.

Bantu ya kesala kumosi ti Nzambi

13, 14. (a) Kana beto landa mambu yina kele na 1 Korinto 3:​5-9, nki mutindu beto kekumaka bantu yina kesala kumosi ti Nzambi? (b) Nani muntu fwete baka lukumu sambu na kuyela yonso ya ntalu ya bansamuni, mpi sambu na nki?

¹³ Polo fwanisaka kusala kumosi ti Nzambi ntangu yandi tubilaka kisalu ya kusala kilanga. Yandi sonikaka nde: “Ebuna nani Apolo? Nani Paulo? Si beto kele kaka bantu yina ke sadilaka Nzambi, bantu yina longaka beno na kutula ntima na Nzambi! Konso muntu na kati na beto ke salaka kisalu yina ya Mfumu Nzambi pesaka yandi na kusala. Mono muntu kunaka mbuma, Apolo muntu losilaka yo masa, kansi Nzambi muntu yedisaka kimenina. Yo yina, muntu yina ke kunaka mbuma ti muntu yina ke losilaka yo masa bo zole kele mfunu ve. Nzambi mpamba muntu kele mfunu, sambu yandi muntu ke yedisaka kimenina. Muntu yina ke kunaka mbuma ti muntu yina ke losilaka yo masa bo zole kele kiteso mosi. Nzambi ta futa konso muntu bonso kele kiteso ya kisalu yina ya yandi me salaka. Beto ke [salaka kumosi ti] Nzambi na kimvuka, ebuna beno kele kilanga ya Nzambi.”​—⁠1 Korinto 3:​5-9.

¹⁴ Mutindu beto kesala kumosi ti Nzambi, beto fwete kuna “nsangu ya kimfumu” ti kwikama yonso na ntima ya bantu, ebuna kulosa masa na konso mpusa yina muntu memonisa mpi kuyilama mbote sambu na kuvutukila dyaka bantu mpi kutwadisa kulonguka ya Biblia. Kana ntoto, disongidila ntima, kele mbote, Yehowa tasala kisalu na yandi na mpila nde nkeni ya kyeleka ya Biblia kuyela mpi yo kuma nti ya nene ya kebuta bambuma mingi. (Matayo 13:​19, 23) Yandi mosi muntu tabenda muntu yango na kukwisa na yandi mosi mpi na Mwana na yandi. Ebuna na nsuka, kuyela yonso ya kemonikaka na ntalu ya bansamuni, Yehowa muntu kesalaka na ntima ya bantu, yandi muntu kesalaka nde nkeni ya kyeleka kuyela mpi kubenda bantu ya mutindu yina na kukwisa na yandi mosi ti na Mwana na yandi.

Kisalu ya kutunga yina tavanda kaka

15. Inki mbandu Polo pesaka sambu na kumonisa mutindu beto lenda sadisa bantu yankaka na kuyedisa lukwikilu na bo?

¹⁵ Ata beto kemona kyese sambu na kuyela ya kemonana na kisalu, beto kezola kumona na masonga yonso nde bantu kefula na kulanda kuzola Yehowa, kulemfuka na yandi, mpi kukangama na yandi. Yo kepesaka beto mawa na kumona bantu yankaka kekuma madidi mpi bo kebwa. Inki beto lenda sala sambu mambu ya mutindu yai kukuma ve? Na kingana yankaka ya yandi pesaka, Polo kemonisa mutindu beto lenda sadisa bantu yankaka na kuyedisa lukwikilu na bo. Yandi kesonika nde: “Ya kieleka, dezia fondasio kele: Nzambi me tulaka Yesu Kristo bonso fondasio mosi mpi yo mosi mpamba. Ebuna bo lenda tula fondasio ya nkaka ve. Na kutunga na zulu ya fondasio yina, bantu ya nkaka ta sadila wolo, arza to matadi ya ntalu. Bankaka ta sadila banti to matiti to nianga. Kansi kisalu ya konso muntu ta monika ntangu Kilumbu ya Kristo ta songa yo. Sambu Kilumbu yina ta kwisa ti tiya. Tiya yina ta meka kisalu ya konso muntu sambu na kusonga mutindu kisalu yina kele.”​—⁠1 Korinto 3:​11-13.

16. (a) Inki mutindu lukanu ya bambandu zole yina Polo pesaka meswaswana? (b) Inki mutindu kisalu na beto ya kutunga lenda monana kisalu mosi ya mpamba mpi ya lenda telama ve na tiya?

¹⁶ Na kingana ya Polo ya bilanga, yandi kemonisa nde kima kesadisaka nde kuyela kusalama kele kukuna ya mbote, kulosila masa mbala na mbala, mpi kubika Nzambi kusakumuna. Kingana yina yankaka ya ntumwa kemonisa pwelele mukumba ya ministre Mukristu kele na yo sambu na mutindu kisalu na yandi ya kutunga takuma. Keti yandi metunga na zulu ya fondasio ya kyeleka ti bima ya ntalu? Polo kekebisa beto nde: “Konso muntu fweti keba kana nki mutindu yandi ke tungaka.” (1 Korinto 3:10) Ntangu beto metedimisa mpusa ya muntu na nsangu ya kivuvu ya kuzinga mvula na mvula na Paladisu imene, keti na malongi na beto beto kepesaka kaka nzayilu ya luyantiku ya Masonuku mpi na nima kutubila mingi mambu yina muntu yango fwete sala sambu na kubaka luzingu ya kukonda nsuka? To keti malongi na beto ketubilaka kaka mambu yai: ‘Kana nge kezola kubaka luzingu ya kukonda nsuka na Paladisu, nge fwete longuka, nge fwete kwenda na balukutakanu, mpi kusala kisalu ya kusamuna nsangu’? Kana beto kesala buna, tuba nde beto ketunga ve lukwikilu ya muntu na fondasio ya ngolo, mpi kima ya beto ketunga lenda telama ve na tiya ya mimekamu to kuvanda ngolo bamvula mingi. Kumeka kubenda bantu na Yehowa kaka ti malongi ya kepesa bo kivuvu ya luzingu na Paladisu bonso nde bo kesumba yo na mwa bamvula ya bo melutisa na kusadila yandi, kele bonso beto ketunga na “banti, matiti to nianga.”

Kuyedisa zola na Nzambi ti na Kristu

17, 18. (a) Yo kelomba nki sambu lukwikilu ya muntu kuvanda ngolo? (b) Inki mutindu beto lenda sadisa muntu sambu Kristu kuvanda na kati ya ntima na yandi?

¹⁷ Lukwikilu na kubikala ngolo, yo fwete simbama na bangwisana yina muntu kele na yo yandi mosi ti Yehowa Nzambi na nsadisa ya Yezu Kristu. Beto bantu ya kukonda kukuka, beto lenda kuma ti bangwisana ya ngemba ya mutindu yina ti Nzambi kaka na nsadisa ya Mwana na yandi. (Roma 5:10 ) Kuvila ve nde Yezu tubaka nde: “Ata muntu mosi ve lenda kwenda na Tata na nzila ya nkaka kana yandi kwisa na mono nzila ve.” Sambu na kusadisa bantu yankaka na kutunga lukwikilu na bo, “Nzambi me tulaka Yesu Kristo bonso fondasio mosi mpi yo mosi mpamba. Ebuna bo lenda tula fondasio ya nkaka ve.” Mambu yai kesonga nki?​—⁠Yoane 14:6; 1 Korinto 3:⁠11.

¹⁸ Kutunga na zulu ya Kristu bonso fondasio kezo tuba kulonga na mpila nde longoki ya Biblia kuyedisa zola ya ngolo na Yezu, mpi yandi bakisa mpenza kiyeka yai ya Yezu kele na yo: Yandi muntu mesumbaka beto na masumu, yandi muntu kele Mfumu ya dibundu, Nganga-Nzambi ya Nene ya mefuluka na zola, mpi Ntotila ya ke na kuyala. (Daniele 7:​13, 14; Matayo 20:28; Kolosai 1:​18-20; Baebreo 4:​14-16) Disongidila, beto fwete kumisa Yezu muntu ya kyeleka sambu na bo, na mpila nde yandi kuvanda kibeni na ntima na bo. Kana beto kesamba sambu na bo, kisambu na beto fwete vanda bonso yina Polo salaka sambu na bantu ya Efezo. Yandi sonikaka nde: “Mono ke fukamaka na meso ya Tata, . . . Mono ke lombaka yandi nde Kristo kuvanda na ntima na beno sambu na lukwikilu na beno, mpi nde kuzola na beno kusimba beno na ntima mutindu misisa ke simbaka nti, to mutindu fondasio ke simbaka nzo.”​—⁠Efezo 3:​14-17.

19. Kana balongoki na beto ya Biblia kuyedisa zola ya Kristu na ntima na bo, nki yo tabuta, kansi nki beto fwete longa bo?

¹⁹ Kana beto tunga na mpila nde zola ya Kristu kuyela na ntima ya balongoki na beto ya Biblia, ntembe kele ve nde bo tayedisa mpi zola na Yehowa Nzambi. Zola ya Kristu, mawi na yandi, ti mawa na yandi kele bikalulu yina kemonisaka na kwikama yonso bikalulu ya Yehowa. (Matayo 11:​28-30; Marko 6:​30-34; Yoane 15:​13, 14; Kolosai 1:15; Baebreo 1:⁠3) Na yau, kana bantu kuzaba mpi kuzola Yezu, bo tazaba mpi bo tazola Yehowa.a (1 Yoane 4:​14, 16, 19) Beto fwete longa balongoki ya Biblia nde Yehowa muntu kutindaka Yezu na kusala mambu yonso yina yandi salaka sambu na bantu, mpi nde beto fwete pesa Yandi mersi, lukumu; mpi beto fwete sambila yandi bonso “Nzambi [yina] ke gulusaka beto.”​—⁠Nkunga 68:​19, 20; Yezaya 12:​2-5; Yoane 3:16; 5:⁠19.

20. (a) Inki mutindu beto lenda sadisa bantu yankaka na kukwisa penepene na Nzambi mpi na Mwana na yandi? (b) Inki beto tatubila na disolo yina talanda?

²⁰ Mutindu beto kesala kumosi ti Nzambi, bika beto sadisa bantu na kukwisa penepene na yandi mpi na Mwana na yandi. Beto sadisa bo na kuyedisa zola ti lukwikilu na ntima na bo. Kana beto sala mpidina, Yehowa takuma muntu ya kyeleka na ntima na bo. (Yoane 7:28) Na nsadisa ya Kristu, bo takuka kusala bangwisana ya ngolo ti Nzambi, mpi bo tazola yandi mpi bo takangama na yandi. Bo tazenga ve kiteso ya ntangu ya bo tasadila yandi, bo tatula lukwikilu na balusilu ya kitoko ya Yehowa yina talungana na ntangu yina yandi metulaka. (Mawa 3:​24-26; Baebreo 11:⁠6) Kansi, na ntangu ya beto kesadisa bantu yankaka na kuyedisa lukwikilu, kivuvu, mpi zola, beto fwete tunga mpi lukwikilu na beto mosi na mpila nde yo vanda bonso maswa ya ngolo yina lenda nunga na kunwana ti mupepe ya ngolo ya bambeni na beto. Beto tatubila mambu yai na disolo yina kelanda.

[Noti na nsi ya lutiti]

Beto vutukila

◻ Inki mutindu beto ketedimisaka mpusa ya bantu na nsangu ya Kimfumu, kansi nki kigonsa kele?

◻ Bantu ya nki mutindu Yehowa kebendaka na kukwisa na yandi ti na Mwana na yandi?

◻ Yo vandaka kulomba nde bantu ya Izraele kusala nki sambu na kukota na Ntoto ya Lusilu, mpi dyambu yai kelonga beto nki?

◻ Inki kele mukumba na beto na yina metala kusadisa bantu na kukwisa penepene na Nzambi ti na Mwana na yandi?

[Kifwanisu ya kele na lutiti 10]

Ata beto kezabisa bantu kivuvu ya luzingu ya mvula na mvula na Paladisu, lukanu na beto ya ntete kele ya kubenda bo na Yehowa

[Bifwanisu ya kele na lutiti 13]

Kuvutukila bantu tabuta mbuma ya mbote kana beto kekudibongisa mbote