‘Bo Sumbaka Beno na Ntalu Mingi’

“Nzambi sumbaka beno na ntalu mingi. Yo yina, beno . . . kupesa lukumu na Nzambi.”​—1 KORINTO 6:20.

1, 2. (a) Na kutadila Nsiku ya Moize, inki mutindu bo vandaka kubaka bantu ya Izraele yina kuvandaka bampika? (b) Inki kimpwanza ya kupona mpika yina vandaka kuzola mfumu na yandi vandaka na yo?

DIKSIONERE mosi (Holman Illustrated Bible Dictionary) ketuba nde: “Kimpika vandaka kusalama na bisika mingi mpi bantu yonso vandaka kundima yo na inza ya ntama.” Yo keyika nde: “Mumbongo ya Ezipte, Gresi, mpi ya Roma kusimbamaka na kisalu ya kuteka bampika. Na mvu-nkama ya ntete ya Bukristu, muntu mosi na kati ya bantu tatu na Italie, mpi muntu mosi na kati ya bantu tanu na bansi yankaka kuvandaka mpika.”

² Ata kimpika kuvandaka mpi na Izraele ya ntama, Nsiku ya Moize vandaka kulomba na kutanina Bayuda yina kuvandaka bampika. Mu mbandu, Nsiku vandaka kulomba nde Muyuda lenda vanda ve na kimpika bamvula kuluta sambanu. Na mvula ya nsambwadi, yo lombaka nde yandi ‘katuka na kimpika kukonda kufuta mfumu na yandi ata kima mosi.’ Kansi, bansiku ya vandaka kumonisa mutindu ya kubaka bampika vandaka ti bukatikati mpi mawa na mpila nde Nsiku ya Moize kutubaka mutindu yai: “Kana mpika yina kutuba nde: ‘Mono ke zolaka mfumu na mono, mono ke zolaka mpi nkento na mono ti bana na mono, mono ke zola katuka na kimpika ve’, mpidina mfumu na yandi fweti kwenda na yandi na kielo ya nzo ti kutobula yandi dikutu na meso na mono Nzambi. Ntangu yai yandi ta vandaka kaka mpika na yandi tii lufwa na yandi.”​—Kubasika 21:2-6; Levi 25:2, 43; Kulonga 15:12-18.

 3. (a) Bakristu ya mvu-nkama ya ntete kundimaka kimpika ya nki mutindu? (b) Inki kepusaka beto na kusadila Nzambi?

³ Ngidika ya kudipesa na luzolo yonso na kimpika vandaka kusonga na kiteso mosi ya fyoti mutindu kimpika ya Bakristu ya kyeleka zolaka kuvanda. Mu mbandu, bansoniki yai ya Biblia: Polo, Yakobo, Piere, mpi Yude kudibingaka bampika ya Nzambi mpi ya Kristu. (Tito 1:1; Yakobo 1:1; 2 Piere 1:1; Yude 1) Polo kuyibusaka Bakristu ya Tesalonika nde bo “buyaka banzambi ya biteki sambu na kusamba Nzambi, sambu na kusadila yandi Nzambi ya moyo ti ya kieleka.” (1 Tesalonika 1:9) Inki kupusaka Bakristu yina na kundima na luzolo yonso na kukuma bampika ya Nzambi? Inki vandaka kupusa muntu ya Izraele yina kuvandaka mpika na kubuya kimpwanza na yandi? Keti yo vandaka ve zola ya yandi vandaka na yo na mfumu na yandi? Kimpika ya Bukristu kesimbamaka na zola ya beto kevandaka na yo na Nzambi. Ntangu beto mezaba mpi mezola Nzambi ya kyeleka mpi ya moyo, yo kepusaka beto na kusadila yandi “ti ntima na [beto] ya mvimba mpi moyo na [beto] ya mvimba.” (Kulonga 10:12, 13, NW) Kansi, kukuma bampika ya Nzambi mpi ya Kristu kelombaka inki? Inki mutindu dyambu yai kesimba luzingu na beto ya konso kilumbu?

‘Sala Mambu Yonso Sambu na Kupesa Nzambi Lukumu’

 4. Inki mutindu beto kekumaka bampika ya Nzambi mpi ya Kristu?

⁴ Mpika kele “muntu yina kele bonso kima ya muntu mosi to ya bantu mingi yina mezabana na nsiku mpi mpika yango fwete lemfukila mfumu na yandi na mambu yonso.” Beto kekumaka bantu ya mezabanaka na nsiku nde beto kele bantu ya Yehowa ntangu beto kepesaka luzingu na beto na yandi mpi kebakaka mbotika. Ntumwa Polo ketendula nde: “Beno mosi beno kele bantu ya beno mosi ve, kansi beno kele bantu ya Nzambi. Nzambi sumbaka beno na ntalu mingi.” (1 Korinto 6:19, 20) Ya kyeleka, ntalu yango kele kimenga ya nkudulu ya Yezu Kristu, sambu na nsadisa na yo, Nzambi kendimaka beto na kuvanda bansadi na yandi, yo vanda Bakristu ya kupakulama, to beto bampangi na bo ya kele ti kivuvu ya kuzinga na ntoto. (Efezo 1:7; 2:13; Kusonga 5:9) Yo yina, banda na ntangu ya beto kebakaka mbotika, ‘beto kekumaka bantu ya Yehowa.’ (Roma 14:8, NW) Sambu Nzambi kusumbaka beto na menga ya valere mingi ya Yezu Kristu, beto kekumaka mpi bampika na yandi mpi beto fwete zitisa bansiku na yandi.​—1 Piere 1:18, 19.

 5. Beto bantu ya kele bampika ya Yehowa, inki mukumba ya ntetentete beto kele na yo, mpi nki mutindu beto lenda lungisa yo?

⁵ Bampika fwete lemfukila mfumu na bo. Kimpika na beto kele ya luzolo yonso mpi yo kekatukaka na zola ya beto kele na yo na Mfumu na beto. Mukanda ya 1 Yoane 5:3 ketuba nde: “Kana beto ke zolaka Nzambi, yo ke songa nde beto ke landaka bansiku na yandi. Ebuna bansiku na yandi kele mpasi ve beto na kulanda yo.” Yo yina, na meso na beto, bulemfu na beto kele kidimbu ya kemonisaka zola mpi luzitu na beto. Yo kemonanaka na mambu yonso ya beto kesalaka. Polo kutubaka nde: “Yo vanda beno kedya, kenwa, to kesala konso nki kima yina, beno sala yonso sambu na lukumu ya Nzambi.” (1 Korinto 10:31, NW) Na luzingu na beto ya konso kilumbu, ata na mambu ya fyoti, beto fwete monisaka nde beto kele “bampika ya Yehowa.”​—Roma 12:11, NW.

 6. Inki mutindu kuvanda bampika ya Nzambi kevandaka na bupusi na badesizio ya beto kebakaka na luzingu? Pesa mbandu ya kemonisa yo.

⁶ Mu mbandu, na ntangu beto kebakaka badesizio, beto fwete tadila mpi luzolo ya Mfumu na beto ya zulu, Yehowa. (Malashi 1:6) Badesizio ya mpasi lenda tula bulemfu na beto na Nzambi na kumekama. Yo yina, na kisika ya kulanda bangindu ya ntima na beto ya “me fulukaka na luvunu” mpi na “maladi,” keti beto talanda bandongisila na yandi? (Yeremia 17:9) Melisa kele Mukristu mosi ya mekwelaka ve. Ntangu fyoti na nima ya kubaka mbotika, mwana-bakala mosi yantikaka na kuzola yandi. Mwana-bakala yango vandaka kumonana ngunza mosi ya kitoko, mpi yandi vandaka kulonguka dezia Biblia ti Bambangi ya Yehowa. Kansi, nkuluntu mosi kulongisilaka Melisa nde yo kele mayele na kulanda nsiku ya Yehowa ya kukwela “kaka na mfumu.” (1 Korinto 7:39, NW; 2 Korinto 6:14) Melisa kendima nde: “Yo vandilaka munu ve pete na kulanda ndongisila yina. Kansi mu bakaka lukanu nde sambu mu mekudipesaka na kusala luzolo ya Nzambi, mu fwete lemfuka na bantuma na yandi ya pwelele.” Ntangu yandi vandaka kuyindula na mambu yina kusalamaka, yandi tubaka nde: “Mu ke na kyese mingi mpenza mutindu mu landaka ndongisila yina. Ntama mingi ve, bakala yango kuyambulaka na kulonguka. Kana mu landaka kinduku yina, kana mu mekwelaka muntu yina kele ve Mukristu.”

7, 8. (a) Sambu na nki beto fwete kudiyangisa ve mingi na kusosa kusepedisa bantu? (b) Pesa mbandu ya kemonisa mutindu beto lenda katula boma ya bantu.

⁷ Beto bantu ya kele bampika ya Nzambi, beto fwete sosa ve kukuma bampika ya bantu. (1 Korinto 7:23) Ya kyeleka, ata muntu mosi ve na kati na beto kezolaka nde bantu kuyina yandi, kansi beto fwete vila ve nde Bakristu kevandaka ti bansiku ya kuswaswana ti yina kele na inza. Polo kuyulaka nde: “Keti mono ke sosa nde bantu kumona kiese sambu na mono?” Yandi sukisaka mutindu yai: “Kana mono sosaka nde bantu kumona kiese sambu na mono, mono zolaka kusadila Kristo ve.” (Galatia 1:10) Beto lenda ndima ve ata fyoti na kupesa nzila nde bupusi ya banduku kutwadisa beto mpi kusosa kusepedisa bantu. Ebuna, inki beto lenda sala kana beto mekutana ti bupusi ya kulanda bangindu ya bantu yankaka?

⁸ Beto tadila mbandu ya Elena, leke mosi ya Mukristu ya Espagne. Yandi vandaka ti banduku mingi ya nzo-nkanda yina vandaka kupesa menga sambu na kusadisa bantu yankaka. Bo vandaka kuzaba nde Elena kuvandaka Mbangi ya Yehowa mpi nde yandi lendaka kundima ve na kupesa menga to kundima nde bo vutula yandi menga. Ntangu yandi zwaka dibaku ya kutendula pozisio na yandi na ntwala ya nzo-nkanda ya mvimba, yandi ndimaka na luzolo yonso na kusala yo. Elena ketendula nde: “Na kuta masonga, mu vandaka kuwa boma na kusala devware yango. Kansi mu kudibongisaka mbote, mpi yo butaka bambuma ya kuyituka. Bana ya nzo-nkanda na munu kumaka kuzitisa munu mpi longi na beto kusongaka munu nde yandi sepelaka mingi na kisalu ya mu salaka. Kuluta dyaka, mu vandaka na kyese mingi sambu mu nwaninaka zina ya Yehowa mpi sambu mu kukaka na kutendula pwelele bikuma ya pozisio na munu ya mekatukaka na Masonuku.” (Kuyantika 9:3, 4; Bisalu 15:28, 29) Ya kyeleka, beto bantu ya kele bampika ya Nzambi mpi ya Kristu, beto kele ya kuswaswana. Kansi, bantu lenda yantika na kuzitisa beto kana beto kekudibongisa mbote sambu na kunwanina malongi na beto ti luzitu yonso.​—1 Piere 3:15.

 9. Inki dilongi beto mebaka na mambu yina wanzyo yina kumonanaka na ntwala ya ntumwa Yoane kusalaka?

⁹ Kuyibuka mbala na mbala nde beto kele bampika ya Nzambi lenda sadisa beto mpi na kuvanda bantu ya kudikulumusa. Kilumbu mosi, ntumwa Yoane kuyitukaka mingi na kumona mbonameso ya lukumu ya Yeruzalemi ya zulu na mpila nde yandi fukamaka na makulu ya wanzyo yina vandaka mutubi ya Nzambi sambu na kusambila yandi. Wanzyo kutubilaka yandi nde: “Ve, kusamba mono ve! Kansi samba Nzambi! Sambu beto yonso, ti nge, ti bampangi na nge yina kele baprofete, ti bantu yina yonso ke landaka mambu kele na mukanda yai, beto yonso ke sadilaka Mfumu mosi.” (Kusonga 22:8, 9) Wanzyo yina kubikaka mbandu mosi ya mbote mpenza sambu na bampika yonso ya Nzambi! Bakristu yankaka lenda vanda ti mikumba ya nene na kati ya dibundu. Kansi, Yezu kutubaka nde: “Kana muntu mosi na kati na beno zola vanda mbuta, yandi fweti sadila bantu ya nkaka. Ebuna kana muntu mosi na kati na beno zola vanda mfumu, yandi fweti vanda mpika ya bantu ya nkaka.” (Matayo 20:26, 27) Sambu beto yonso kele balongoki ya Yezu, beto yonso kele mpi bampika.

“Beto Me Sala Kaka Mambu Yina ya Mfumu na Beto Songaka Beto na Kusala”

10. Pesa bambandu ya kele na Masonuku sambu na kumonisa nde yo kevandaka ve ntangu yonso pete na bansadi ya kwikama ya Nzambi na kusala luzolo na yandi.

¹⁰ Kusala luzolo ya Nzambi kevandaka ve ntangu yonso pete sambu na bantu ya kukonda kukuka. Profete Moize kuvandaka na badute na kulemfuka ntangu Yehowa kulombaka yandi na kukwenda kukatula bantu ya Izraele na kimpika na Ezipte. (Kubasika 3:10, 11; 4:1, 10) Ntangu Yonasi kubakaka mukumba ya kukwenda kusamuna nsangu ya ndola na bantu ya Ninive, yandi ‘kangaka bima, mpi yandi simbaka nzila na kwenda na bwala Tarsisi sambu na kutina Mfumu Nzambi.’ (Yonasi 1:2, 3) Baruki yina kuvandaka sekretere ya Yeremia, kubokutaka sambu yandi lembaka nitu. (Yeremia 45:2, 3) Inki beto fwete sala kana bampusa na beto to mambu ya beto kezolaka kewakana ve ti kusala luzolo ya Nzambi? Kingana mosi ya Yezu kutaka kepesa mvutu.

11, 12. (a) Tubila na bunkufi kingana ya Yezu yina kele na Luka 17:​7-10. (b) Inki dilongi beto mebaka na kingana ya Yezu?

¹¹ Yezu kutubilaka mpika mosi yina kukwendaka kutala mameme ya mfumu na yandi kilumbu ya mvimba. Ntangu mpika yina kukumaka na nzo, ata yandi lembaka sambu yandi salaka kisalu ya ngolo bangunga kiteso ya 12, mfumu na yandi kubingaka yandi ve na kuvanda na mesa sambu na kudya madya ya ntomo kumosi ti yandi. Kansi, mfumu na yandi kusongaka yandi nde: “Yidikila mono madia, Iwata bilele ya nkaka sambu na kusadila mono ntangu ya mono ke dia ti ya mono ke nwa. Na nima, nge mpi ta zaba kudia ti kunwa.” Mpika yina lendaka kulungisa bampusa na yandi kaka na nima ya kusadila mfumu na yandi. Yezu kusukisaka kingana na yandi mutindu yai: “Yo kele mutindu mosi mpi na beno. Kana beno me sala mambu yina yonso ya Nzambi me songaka beno na kusala, beno tuba kaka nde: ‘Beto kele ka beto bampika. Beto me sala kaka mambu yina ya mfumu na beto songaka beto na kusala.’”​—Luka 17:7-10.

¹² Yezu kupesaka ve kingana yai sambu na kumonisa nde Yehowa kebakaka ve na valere kisalu ya beto kesadilaka yandi. Biblia ketuba pwelele nde: “Nzambi kele ve ya kukonda lunungu sambu yandi kuvila kisalu na beno ti zola ya beno monisaka sambu na zina na yandi.” (Baebreo 6:10, NW) Kansi, dilongi ya beto kebaka na kingana ya Yezu kele nde, mpika lenda sosa ve kyese na yandi mosi to kutula dikebi na mambote na yandi mosi. Ntangu beto kudipesaka na Nzambi mpi kuponaka na kuvanda bampika na yandi, beto ndimaka na kutula luzolo na yandi na ntwala ya luzolo na beto mosi. Beto fwete tula luzolo ya Nzambi na ntwala ya luzolo na beto mosi.

13, 14. (a) Na nki mambu yo lenda lomba nde beto sala ngolo sambu na kununga bangindu na beto mosi? (b) Sambu na nki beto fwete bika nde luzolo ya Nzambi kununga?

¹³ Kulonguka mbala na mbala Ndinga ya Nzambi mpi mikanda ya “mpika ya kwikama mpi ya mayele,” lenda lomba nde beto sala bikesa mingi. (Matayo 24:45, NW) Yo lenda vanda mpidina mingimingi kana beto kemonaka ntangu yonso mpasi na kutanga to kana mukanda mosi ketubila “mambu ya mudindu ya Nzambi.” (1 Korinto 2:10, NW) Keti beto fwete kubongisa ve ntangu sambu na kulonguka na beto mosi? Yo lenda lomba nde beto kudipesa disipline mpi kufonga sambu na kulutisa ntangu na kulonguka. Kansi, kana beto kesala ve mutindu yina, inki mutindu beto lenda wa ntomo ya ‘madya ya ngolo yina bambuta kaka melunga na kudya’?​—Baebreo 5:14.

¹⁴ Inki beto lenda tuba ntangu beto kevutukaka na nzo ya kulemba na nima ya kusala ngolo kilumbu ya mvimba? Yo lenda lomba nde beto sala kikesa sambu na kukwenda na balukutakanu ya Bukristu. To yo lenda vanda nde beto kezolaka ve kukwenda kulonga banzenza. Polo kundimaka yandi mosi nde kevandaka na bantangu yankaka ya beto kezabisaka nsangu ya mbote ‘na luzolo na beto mosi ve.’ (1 Korinto 9:17) Kansi, beto kesalaka yo sambu Yehowa, Mfumu na beto ya zulu ya beto kezolaka, kesongaka beto nde beto fwete sala yo. Keti beto kewaka ve kyese mpi kikesa na nima ya kusala ngolo sambu na kulonguka, ya kukwenda na balukutakanu, mpi ya kusala kisalu ya kusamuna?​—Nkunga 1:1, 2; 122:1; 145:10-13.

‘Kutala Ve na Nima’

15. Inki mutindu Yezu kubikaka mbandu ya mbote sambu na yina metala kulemfuka na Nzambi?

¹⁵ Yezu Kristu kumonisaka bulemfu na yandi na Tata na yandi ya zulu na kiteso mosi ya kuluta. Yandi songaka balongoki na yandi nde: “Mono katukaka na zulu sambu na kwisa kusala luzolo na mono mosi ve, kansi sambu na kwisa kusala luzolo ya muntu yina tindaka mono.” (Yoane 6:38) Ntangu yandi nyokwamaka na mabanza na kilanga ya Getesemane, yandi sambaka nde: “Tata na mono, kana nge zola, katula mono na mpasi yai. Kansi kulanda luzolo na mono ve, kansi luzolo na nge.”​—Matayo 26:39.

16, 17. (a) Inki mutindu beto fwete tadila bima yina beto mebikisaka na nima? (b) Monisa mutindu Polo kutubaka masonga ntangu yandi tubilaka bivuvu na yandi ya kununga na inza nde yo vandaka bonso “mvindu”?

¹⁶ Yezu kezolaka nde beto vanda ntangu yonso ya kwikama na desizio ya beto bakaka ya kuvanda bampika ya Nzambi. Yandi tubaka nde: “Muntu yina me baka nsengo, ke zola kubundula ntoto, kana yandi tala na nima, yandi me fwana ve na kusala na Kimfumu ya Nzambi.” (Luka 9:62) Kuyindula ntangu yonso bima ya mebikalaka na nima kele mpenza ve kima ya mbote ya kusala na ntangu beto kesadila Nzambi. Kansi, beto fwete sepela na bima ya beto mebakaka na mpila beto meponaka na kuvanda bampika ya Nzambi. Polo kusonikilaka Bakristu ya Filipi nde: “Kaka mambu yina mpamba ve ya mono ke monaka mfunu ve, kansi mambu yonso mpi; mono ke monaka yo mfunu ve sambu na mambu yai ya kuluta mfunu mpenza: kuzaba Mfumu na beto Yesu Kristo. Mono me bikisaka mambu yonso sambu na yandi. Mono ke monaka mambu yina yonso bonso mvindu sambu na kuvanda na Kristo.”​—Filipi 3:8.

¹⁷ Yindula mambu yonso yina Polo kumonaka bonso mvindu mpi ya yandi yambulaka sambu na kubaka mambote ya kimpeve bonso mpika ya Nzambi. Yandi yambulaka ve kaka byese ya inza, kansi mpi dibaku ya kukuma mfumu ya Bayuda. Kana Polo kulandaka na kusambila na dibundu ya Bayuda, yandi zolaka kubaka kisika yina mefwanana ti yina Simeoni, mwana ya Gamaliele yina kuvandaka longi ya Polo kuvandaka na yo. (Bisalu 22:3; Galatia 1:14) Simeoni kukumaka mfumu ya Bafarize mpi yandi vandaka na kisika mosi ya nene mpenza, ata yandi vandaka ti mwa badute, na ntangu Bayuda kukolamaka na bantu ya Roma na mvu 66-70 ya T.B. Yandi fwaka na mavwanga yina, ziku na maboko ya Bayuda yina vandaka kukangama ngolo na bangindu na bo to na basoda ya Roma.

18. Pesa mbandu mosi ya kemonisa mutindu mambu ya kimpeve ya beto kesalaka kenataka balusakumunu.

¹⁸ Bambangi ya Yehowa mingi melandaka mbandu ya Polo. Nkento mosi na zina ya Jean ketuba nde: “Mwa bamvula fyoti na nima ya kumanisa nzo-nkanda, mu zwaka kisalu mosi ya sekretere na biro ya zuzi mosi ya mezabana mingi na Londres. Mu vandaka kuzola kisalu na munu, mpi mu vandaka kubaka mbongo mingi. Kansi, mu vandaka kuzaba mbote na ntima na munu nde mu lenda sala mingi na kisalu ya Yehowa. Nsukansuka, mu pesaka mukanda sambu na kuzabisa nde mu mekatuka na kisalu mpi mu yantikaka kisalu ya mupasudi-nzila. Mu kepesa mersi mingi mutindu mu bakaka desizio yina kiteso ya bamvula 20 meluta! Kisalu na mono ya ntangu yonso metomisaka luzingu na mono kuluta mambote yonso yina kisalu ya sekretere zolaka kunatila mono. Ata kima mosi ve kepesaka kyese mingi kuluta kumona mutindu Ndinga ya Yehowa lenda soba luzingu ya muntu. Yo kele mbote mpenza na kusala kisalu yina. Mambote yina Yehowa kepesaka beto meluta mambu yina beto kepesaka yandi.”

19. Inki fwete vanda lukanu na beto, mpi sambu na inki?

¹⁹ Luzingu na beto lenda soba mutindu ntangu keluta. Kansi, kudipesa na beto na Nzambi kesobaka ve. Beto kele kaka bampika ya Yehowa, mpi yandi kepesaka beto kimpwanza ya kubaka desizio na mutindu beto lenda sadila ntangu, ngolo, mayele, mpi bima na beto yankaka na mutindu mosi ya kuluta mbote. Yo yina, badesizio ya beto kebakaka na mambu yai kemonisaka zola ya beto kele na yo na Nzambi. Yo kemonisaka mpi tii na nki kiteso beto kendimaka na kusala bibansa. (Matayo 6:33) Ata luzingu na beto kele nki mutindu, keti beto fwete vanda ve na lukanu ya kupesa Yehowa bima na beto ya kuluta mfunu? Polo kusonikaka nde: “kana muntu ke zola kupesa makabu na kiteso na yandi, Nzambi ta ndima yo, kansi Nzambi ta lomba ve makabu yina ya muntu ke na yo ve.”​—2 Korinto 8:12.

‘Beno Kezwa Mbuma na Beno’

20, 21. (a) Inki bambuma bampika ya Nzambi kebutaka? (b) Inki mutindu Yehowa kesakumunaka bantu yina kesadilaka yandi na kiteso ya ngolo na bo kelombila?

²⁰ Kuvanda bampika ya Nzambi kenatilaka beto mpasi ve. Kansi, yo kesadisaka beto na kutina kimpika ya mbi yina kekatulaka kyese na beto. Polo kusonikaka nde: “Ntangu yai Nzambi me katulaka beno na masumu, ebuna beno me kuma bampika na yandi; [mbuma ya beno kezwa kele busantu, NW] ebuna nsuka ya mambu yai kele moyo ya mvula na mvula.” (Roma 6:22) Kisalu ya beto kesadilaka Nzambi kebutaka mbuma ya busantu na mpila nde beto kekumaka na bikalulu ya santu mpi ya bunkete. Kuluta dyaka, yo tanata beto na luzingu ya mvula na mvula.

²¹ Yehowa kekabilaka bampika na yandi. Kana beto kesala kisalu na yandi na kiteso ya ngolo na beto kelombila, yandi takangudila beto “bakyelo ya zulu” mpi tanokisila beto “lusakumunu tii kuna nzala tavanda dyaka ve.” (Malashi 3:10, NW) Yo tavanda kyese mingi mpenza na kulanda na kusadila Yehowa bonso bampika sambu na kimakulu!

Keti Nge Keyibuka?

• Sambu na nki beto kekumaka bampika ya Nzambi?

• Inki mutindu beto kemonisaka bulemfu na beto na luzolo ya Nzambi?

• Sambu na nki beto fwete kudibongisa sambu na kutula luzolo ya Nzambi

na ntwala ya luzolo na beto mosi?

• Sambu na nki beto fwete ‘tala ve na nima’?

[Kifwanisu ya kele na lutiti 14]

Ngidika ya kudipesa na luzolo yonso na kimpika vandaka kusonga na kiteso mosi ya fyoti kimpika ya Bakristu

[Kifwanisu ya kele na lutiti 15]

Beto kekumaka bampika ya Nzambi ntangu beto kebakaka mbotika

[Bifwanisu ya kele na lutiti 15]

Bakristu ketulaka luzolo ya Nzambi na kisika ya ntete