Tanina Bumosi ya Dibundu

Ntangu beto ke vandaka ti bampangi na beto Bakristu, beto ke waka bonso ntotila Davidi yina tubaka nde: “Yo kele mbote kibeni mpi kiese mingi nde bampangi kuzinga kumosi na bumosi!” (Nkunga 133:1) Beto fwete sala bikesa sambu na kuzinga na bumosi mpi konso muntu na kati na beto fwete sala bikesa ya kutanina yo.

1. Inki ke yitukisaka nge mingi na bansadi ya Nzambi?

Kana nge me kwenda na lukutakanu ya dibundu na insi ya nkaka, nge lenda bakisa ve mambu ya bo ke longa na ndinga na bo. Ata mpidina na mambu mingi, nge ta kudiwa kaka bonso nde nge kele na dibundu na beno. Sambu na nki? Sambu na bisika yonso, beto ke sadilaka kaka mikanda ya mpila mosi sambu na kulonguka Biblia. Diaka, beto ke salaka ngolo sambu na kuzolana. Yo vanda beto ke zingaka na konso kisika yina, beto yonso ke ‘bingaka zina ya Yehowa, sambu na kusambila yandi na bumosi.’​—Sefania 3:9, noti na nsi ya lutiti.

2. Inki nge fwete sala sambu na kutanina bumosi na beto?

Biblia ke tuba nde: “Beno zolana ngolo na ntima ya mvimba.” (1 Piere 1:22) Inki mutindu nge lenda sadila ndongisila yai? Tula dikebi na bikalulu ya mbote ya bampangi kansi ve na bifu na bo. Kulutisa ve ntangu kaka ti bampangi ya kele bonso nge mpi yina ke zolaka kusala mambu ya nge ke zolaka kusala. Kansi sosa kuzabana mpi ti bampangi ya me swaswana ti nge. Beto fwete katula mpi bangindu yonso ya mbi yina beto lenda vanda ti yo sambu na bantu ya nkaka.​—Tanga 1 Piere 2:17.a

3. Inki nge fwete sala kana nge ke wakana ve ti mpangi mosi?

Beto ke zingaka na bumosi kansi beto kele mpi bantu ya masumu. Bantangu ya nkaka, beto ke tubaka to ke salaka mambu yina ke pesaka bampangi ya nkaka mpasi. Yo yina Ndinga ya Nzambi ke songa beto nde: “Beno landa . . . kulolulana.” Mpi yo ke yika nde: “Mutindu Yehowa lolulaka beno na ntima ya mvimba, beno fwete sala mpi mutindu mosi.” (Tanga Bakolosai 3:13.) Yehowa ke lolulaka beto ata beto ke salaka mbala mingi mambu yina ke pesaka yandi mpasi. Yo yina, yandi ke lombaka beto mpi na kulolula bampangi na beto. Kana nge me bakisa nde nge me sala to nge me tuba kima mosi ya me pesa mpangi mosi mpasi, sala yonso sambu nge yidika makambu ti yandi.​—Tanga Matayo 5:23, 24.b

LONGUKA MAMBU MINGI

4. Katula bangindu ya mbi sambu na bantu ya nkaka

Beto ke vandaka na mfunu ya kuzola bampangi na beto yonso. Kansi yo lenda vanda mpasi na kuzola mpangi mosi ya me swaswana ti beto. Inki lenda sadisa beto na kuzola yandi? Beno tanga Bisalu 10:34, 35 mpi na nima beno pesa mvutu na bangiufula yai:

• Yehowa ke ndimaka nde bantu ya mitindu yonso kukuma bansadi na yandi. Inki nge fwete sala sambu na kukuma kutadila bantu ya me swaswana ti nge bonso Yehowa?

• Inki bangindu ya mbi bantu mingi ke vandaka ti yo na kisika ya nge ke zingaka? Sambu na nki nge fwete buya yo?

Beno tanga 2 Bakorinto 6:11-13 mpi na nima beno pesa mvutu na ngiufula yai:

• Inki nge fwete sala sambu na kukuma kuzola mingi bampangi yonso yina me swaswana ti nge?

5. Lolula na ntima ya mvimba mpi tula ngemba

Yehowa ke lolulaka beto na ntima ya mvimba ata yandi ta sala ve ata fioti kima mosi yina ta lomba nde beto lolula yandi. Beno tanga Nkunga 86:5 mpi na nima beno pesa mvutu na bangiufula yai:

• Verse yai ke longa nge nki sambu na Yehowa?

• Keti nge ke sepela ti mutindu yandi ke lolulaka bantu? Sambu na nki?

• Inki mambu lenda bebisa ngemba na beto ti bantu ya nkaka?

Inki mutindu beto lenda landa mbandu ya Yehowa mpi kulanda kuzinga na ngemba ti bampangi? Beno tanga Bingana 19:11 mpi na nima beno pesa mvutu na ngiufula yai:

• Kana muntu mosi me sala to me tuba kima mosi ya me pesa nge makasi to mpasi, nki nge fwete sala sambu na kutula ngemba?

Bantangu ya nkaka, beto mpi ke salaka to ke tubaka mambu yina ke pesaka bantu ya nkaka mpasi to makasi. Inki beto fwete sala kana beto me pesa bantu ya nkaka mpasi? Beno tala VIDEO mpi na nima beno pesa mvutu na ngiufula ya ke landa.

VIDEO: Kutula Ngemba Ke Nataka Mambote (6:01)

• Mutindu video me monisa yo, nki mpangi-nkento yai salaka sambu na kutula ngemba?

6. Tula dikebi na bikalulu ya mbote ya bampangi

Ntangu beto ke zabaka mbote bampangi na beto, beto ke zabaka mpi bikalulu na bo ya mbote mpi bifu na bo ya mbi. Inki lenda sadisa beto na kutula dikebi na bikalulu na bo ya mbote? Beno tala VIDEO mpi na nima beno pesa mvutu na ngiufula ya ke landa.

VIDEO: Kuma Kitoko Mingi! (5:11)

• Inki lenda sadisa nge na kumona bikalulu ya mbote ya bampangi?

Yehowa ke tulaka dikebi ya mingi na bikalulu na beto ya mbote. Beno tanga 2 Bansangu 16:9a mpi na nima beno pesa mvutu na ngiufula yai:

• Inki mutindu nge ke wa mutindu nge me zaba nde Yehowa ke tulaka dikebi ya mingi na bikalulu na nge ya mbote?

NA BUNKUFI

Nge ta tanina bumosi ya dibundu kana nge kele ti kikalulu ya kulolula bampangi mpi ya kuzola bo yonso.

Inki Nge Me Simba?

• Inki lenda sadisa nge na kukatula bangindu ya mbi sambu na bantu ya nkaka?

• Inki nge fwete sala kana nge ke wakana ve ti mpangi mosi?

• Keti nge ke zola kulanda mbandu ya Yehowa na mutindu yandi ke lolulaka bantu ya nkaka? Sambu na nki?

TALA MPI

Tala mutindu mbandu mosi yina Yezu pesaka lenda sadisa nge na kubuya kikalulu ya mbi ya kusambisa bantu ya nkaka.

Katula Mutandala (7:01)

Keti beto fwete lomba pardo na muntu ata beto me sala yandi ve kima mosi ya mbi?

“Kulomba Ndolula Kesadisaka Mpenza na Kutula Ngemba” (Nzozulu ya Nkengi, Novembri 1, 2002)

Bantu ya nkaka me longukaka mpila ya kusadila bantu mambu kukonda kupona-pona.

Kusambisa Ve na Kutadila Mambu Yina Ke Monana (5:06)

Tala mutindu nge lenda yidika makambu ti muntu ya nkaka sambu yo nata ve mavwanga na dibundu.

“Yidika Makambu na Zola Yonso” (Nzozulu ya Nkengi, Mayi 2016)