Kubumbaka Ve Kimbeni

YAU LENDA kuvanda mpasi mingi na kubuya kubumba kimbeni kana muntu mekota beto nsoki. Biblia kele ti ndongisila ya mbote sambu na bamvwandilu ya mutindu yina. Ntumwa Polo kusonikaka nde: “Vanda na makasi, kansi sala masumu ve, vanda na makasi ve ti ntangu kukota.”​—⁠Efezo 4:​26, Luwawanu Yampa.

Kana muntu mesala beto imbi, yau kele imbi ve na kuwa makasi na kiteso ya mbote. Kana Polo ketuba nde “vanda na makasi,” yau kemonisa nde na ntangu ya nkaka, makasi kele mbote​—⁠mbala ya nkaka yau kekwisa sambu na nsadilu ya mbote ve to sambu na kukonda lunungu. (Fwanisa ti 2 Korinto 11:29.) Kansi kana yau mebongisama ve, ata makasi ya mbote lenda kuvanda ti malanda ya imbi, yina kenataka na disumu ya ngolo. (Kuyantika 34:​1-31; 49:​5-7; Nkunga 106:​32, 33) Na yau, inki nge fwete kusala kana muntu mepesa nge makasi?

Na mbala mingi, kana kele bifu ya fyoti, nge lenda kubongisa dikambu na ntima na nge “mpi kuvanda pima” to kukutana ti muntu yina kusalaka kifu sambu na kubongisa dyambu yango ti yandi. (Nkunga 4:4; Matayo 5:​23, 24) Na konso mutindu yina ya nge lenda kusadila, yau kele kuluta mbote na kuyidika dikambu yango ntinuntinu sambu kimpala kubasika ve mpi yau kunata mbutu ya imbi.​—⁠Efeso 4:⁠31.

Yehowa kelolulaka masumu na beto nkatu mpasi, ata masumu yina beto kesalaka nkatu kuzaba. Keti beto lenda ve mpi, na mutindu mosi, kulolula bifu ya fyoti ya bampangi na beto bantu?​—⁠Kolosai 3:13; 1 Piere 4:⁠8.

Kima ya kyese kele nde, ngogo ya Kigreki sambu na “kulolula” na sansa ya ntete ketendula “kuyambula.” Ndolula kelomba ve nde beto kufyotuna to kundima kifu. Bantangu ya nkaka, yau lenda kuvanda kaka kuyambula dyambu yango, na kubakisaka nde kubumba kimbeni tayika kaka kizitu na zulu na nge mpi kufwa bumosi ya dibundu ya Bukristu. Kuluta dyaka, kubumba kimbeni lenda kuvanda na malanda ya imbi sambu na mavimpi na nge!​—⁠Nkunga 103:⁠9.