Mambu ya Nge Fwete Sala Sambu Dibuta na Beno Kuzinga na Kiese​—Kitini 1

Bantu yina me katuka kukwelana ke yindulaka nde kiese yina bo waka na kilumbu ya feti na bo ya makwela, ta vandaka mvula na mvula. Ee, yo lenda salama mpi mpidina. Bakristu yina me kwelanaka banda ntama mpi yina ke salaka ngolo sambu na kusadila bandongisila ya Biblia ke ndimaka nde yo lenda salama.

1. Inki bandongisila Biblia ke pesaka babakala?

Yehowa me tulaka bakala mfumu ya dibuta. (Tanga Baefezo 5:23.) Yehowa ke lombaka yandi na kubaka balukanu yina ta natila dibuta na yandi mambote. Biblia ke longisilaka babakala nde: “Beno landa kuzola bankento na beno.” (Baefezo 5:25) Yo ke tendula nki? Bakala yina ke zolaka nkento na yandi, ke sadilaka yandi mambu na mawete, yo vanda bo kele bo zole na nzo to na meso ya bantu. Yandi ke taninaka nkento na yandi, ke sadisaka yandi na kuvanda na kiese mpi ke pesaka yandi bima yina yandi kele na yo mfunu. (1 Timoteo 5:8) Kima ya kuluta mfunu, yandi ke sadisaka nkento na yandi na kuvanda ti kinduku ya mbote ti Yehowa. (Matayo 4:4) Mu mbandu, yandi ke sambaka mpi ke tangaka Biblia ti nkento na yandi. Bakala ta landa kutanina kinduku na yandi ti Yehowa kana yandi ke lungisa bampusa ya nkento na yandi na zola yonso.​—Tanga 1 Piere 3:7.

2. Inki bandongisila Biblia ke pesaka bankento?

Ndinga ya Nzambi ke tuba nde nkento “fwete vanda ti luzitu ya mudindu sambu na bakala na yandi.” (Baefezo 5:33) Inki mutindu yandi ta monisa nde yandi ke zitisaka bakala? Yandi ta monisa yo kana yandi ke yindula bikalulu ya mbote ya bakala na yandi mpi bikesa yina bakala na yandi ke salaka sambu na kulungisa bampusa na yandi mpi kusansa bana. Nkento ke monisaka mpi nde yandi ke zitisaka bakala na yandi kana yandi ke pesa maboko na balukanu yina bakala na yandi ke baka, kana yandi ke solula ti bakala na yandi na mawete mpi ke tuba mambu ya mbote sambu na bakala na yandi, ata bakala yango kele ve Mbangi ya Yehowa.

3. Inki bakala ti nkento fwete sala sambu na kukumisa makwela na bo ngolo?

Biblia ke tubaka nde kana bakala ti nkento me kwelana, “bo zole [ke kumaka] nsuni mosi.” (Matayo 19:5) Yo ke tendula nde bo fwete buya mambu yonso yina lenda sala nde bo zolana diaka ve ngolo. Yo yina, bo fwete lutisaka ntangu mbala na mbala bo zole, bo fwete solulaka na masonga mpi na zola mutindu bo ke yindula mpi ke kudiwa. Bo fwete bika ve nde kima mosi to muntu mosi kukuma mfunu mingi kuluta mosi na kati na bo, katula kaka Yehowa. Bo fwete kangama ve mingi ti muntu ya nkaka na mutindu ya mbi.

LONGUKA MAMBU MINGI

4. Bakala, zola mpi lungisa bampusa ya nkento na nge

VIDEO: Babakala, Beno Zola Bankento na Beno Bonso Nitu na Beno Mosi (9:53)

• Tanga mwa mambu yina bakala lenda sala sambu na kumonisa nde yandi ke zolaka nkento na yandi mpi ke lungisaka bampusa na yandi.

Beno tanga Bakolosai 3:12 mpi na nima beno pesa mvutu na ngiufula yai:

• Inki mutindu bakala lenda monisa bikalulu yai na makwela na bo?

5. Nkento, zola mpi zitisa bakala na nge

Biblia ke lombaka nkento na kuzitisa bakala na yandi yo vanda bakala yango ke sambilaka Yehowa to ve. Beno tanga 1 Piere 3:1, 2 mpi na nima beno pesa mvutu na bangiufula yai:

• Kana bakala na nge ke sambilaka ve Yehowa, ntembe kele ve nde nge ke zolaka nde yandi kuma kusambila mpi Yehowa. Nge ke yindula nde nki kele mbote mingi: Kulonga yandi nsangu ya mbote mbala na mbala to kumonisila yandi bikalulu ya mbote mpi luzitu? Sambu na nki?

Bakala ti nkento lenda baka balukanu ya mbote bo zole. Kansi bantangu ya nkaka, nkento lenda sepela ve ti lukanu yina bakala na yandi me baka. Yo yina yandi fwete tuba mambu yina yandi ke yindula na mawete mpi na luzitu kibeni. Ata mpidina yandi fwete vila ve nde Yehowa me pesaka bakala kiyeka ya kubaka balukanu sambu na mambote ya dibuta. Nkento fwete sala yonso sambu yandi pesa maboko na lukanu yina bakala na yandi me baka. Kana nkento ke sala buna, dibuta na bo ta zinga na kiese. Beno tanga 1 Piere 3:3-5 mpi na nima beno pesa mvutu na ngiufula yai:

• Inki mutindu Yehowa ke waka kana nkento ke zitisa bakala na yandi?

6. Beno yidika mambu ya mpasi yina me basika na makwela na beno

VIDEO: Mutindu ya Kukumisa Ngolo Kinduku ya Makwela (5:44)

• Mutindu video me monisa yo, nki ke monisa nde zola ya bakala yai ti nkento na yandi yantikaka kumana?

• Inki bo salaka sambu na kukumisa makwela na bo ngolo?

Beno tanga 1 Bakorinto 10:24 mpi Bakolosai 3:13. Na nima ya kutanga konso verse, beno pesa mvutu na ngiufula yai:

• Inki mutindu kusadila bandongisila yai lenda kumisa makwela ngolo?

Biblia ke tubaka nde beto fwete pesana lukumu. Kupesa muntu lukumu ke tendula mpi kusadila yandi mambu na mawete mpi ti luzitu. Beno tanga Baroma 12:10 mpi na nima beno pesa mvutu na bangiufula yai:

• Keti bakala to nkento fwete vingila nde nkwelani na yandi kuyantika kupesa yandi ntete lukumu? Kana mpidina to ve, sambu na nki?

NA BUNKUFI

Bakala ti nkento ke zingaka na kiese kana bo ke zolana, ke zitisana mpi ke sadila minsiku ya Biblia.

Inki Nge Me Simba?

• Inki bakala fwete sala sambu makwela na bo kuvanda na kiese?

• Inki nkento fwete sala sambu makwela na bo kuvanda na kiese?

• Kana nge me kwelaka, nki munsiku ya Biblia lenda sadisa nge na kukumisa makwela na beno ngolo?

TALA MPI

Tala bandongisila ya mfunu yina lenda sadisa beno na kuzinga na kiese na dibuta.

Dibuta na Nge Lenda Vanda na Kiese (kamukanda)

Landa nkunga ya ke monisa mambote yina beno ta baka kana beno ke sadila bandongisila ya Biblia na makwela na beno.

Muntu Bonso Nge (4:26)

Tala kana kulemfuka na kiyeka ya bakala ke tendula nki.

“Bankento, Sambu na Nki Kulemfuka na Kiyeka?” (Nzozulu ya Nkengi, Mayi 1, 2010)

Inki sadisaka bakala mosi ti nkento na yandi na kununga bampasi ya bo kutanaka ti yo mpi na kufwa ve makwela?

Yehowa Sadisaka Beto na Kuvutula Makwela na Beto (5:14)