Mambu ya Nge Fwete Sala Sambu Dibuta na Beno Kuzinga na Kiese​—Kitini 2

Bana kele dikabu ya Yehowa. Yandi ke lombaka bibuti na kutanina mbote dikabu yai. Yehowa ke pesaka bibuti bandongisila ya mayele yina ke sadisaka bo na kulungisa mbote mukumba yai. Bandongisila yango ke monisaka mpi mambu yina bana fwete sala sambu dibuta na bo kuvanda na kiese.

1. Inki bandongisila Yehowa ke pesaka bibuti?

Yehowa ke lombaka bibuti na kuzola bana na bo mpi kulutisaka ntangu mingi ti bo. Diaka, yandi ke zolaka nde bibuti kutanina bana na bo na mambu yina lenda vanda kigonsa mpi bo sadila minsiku ya Biblia sambu na kulonga bana na bo. (Bingana 1:8) Yandi ke songa bibuti nde: “Beno landa kusansa [bana na beno] na . . . balukebisu ya Yehowa.” (Tanga Baefezo 6:4.) Yehowa ke sepelaka mingi kana bibuti ke sadila mambu yina yandi ke lombaka bo na kusala sambu na kusansa bana na bo mpi kana bo ke pesa ve mukumba yai na muntu ya nkaka.

2. Inki bandongisila Yehowa ke pesaka bana?

Yehowa ke songa bana nde: “Beno lemfuka na bibuti na beno.” (Tanga Bakolosai 3:20.) Kana bana ke zitisa mpi ke lemfukila bibuti na bo, bo ke sepedisaka Yehowa mpi bibuti na bo. (Bingana 23:22-25) Yezu me bikisilaka bana mbandu ya mbote ntangu yandi vandaka mwana ya fioti. Yezu vandaka ve muntu ya masumu, ata mpidina yandi vandaka kuzitisa mpi kulemfukila bibuti na yandi yina vandaka bantu ya masumu.​—Luka 2:51, 52.

3. Inki bantu yonso na dibuta fwete sala sambu na kukuma ti kinduku ya ngolo ti Nzambi?

Kana nge kele kibuti, ntembe kele ve nde nge ke zolaka nde bana na nge kuzola Yehowa mingi bonso nge. Inki nge fwete sala sambu bana na nge kuzola Yehowa? Nge fwete sala mambu yai ya Biblia ke tuba: “Nge fwete kotisa [malongi ya Yehowa] na bana na nge mpi kutubila yo ntangu nge ta vanda na nzo na nge, [mpi] ntangu nge ta tambula na nzila.” (Kulonga 6:7) Ngogo ‘kukotisa’ ke tendula kulonga kima mosi mbala na mbala. Ya kieleka, yo lenda lomba nde nge vutukila kima mosi mbala na mbala sambu bana na nge kuvila yo ve. Verse yai ke tendula nde konso kilumbu nge fwete sosa mabaku ya mbote sambu nge longa bana na nge mambu ya Yehowa. Yo ta vanda mbote nde bantu yonso na dibuta kubumba ntangu konso mposo sambu na kusala lusambu ya dibuta. Ata beno kele ve ti bana, beno ta baka kaka mambote kana beno ke bumba ntangu konso mposo sambu na kulonguka Ndinga ya Nzambi.

LONGUKA MAMBU MINGI

4. Longa bana na nge na zola

Kulonga mwana lenda vanda mpasi. Inki mutindu Biblia lenda sadisa nge? Beno tanga Yakobo 1:19, 20 mpi na nima beno pesa mvutu na bangiufula yai:

• Sambu na kumonisila bana na bo zola, nki bibuti fwete sala ntangu bo ke solula ti bo?

• Sambu nki yo kele ve mbote ata fioti nde kibuti kupesa bana na yandi disipline ntangu yandi kele na makasi?a

5. Tanina bana na nge

Sambu na kutanina bana na nge, yo kele mfunu mingi na kusolula ti bo mambu ya me tala kuvukisa nitu. Mbala ya nkaka nge lenda wa mwa nsoni. Beno tala VIDEO mpi na nima beno pesa mvutu na bangiufula ya ke landa.

VIDEO: Tanina Bana na Nge na Mambu ya Mbi (2:58)

• Sambu na nki bibuti ya nkaka ke kukaka ve kusolula ti bana na bo mambu ya me tala kuvukisa nitu?

• Inki mutindu bibuti ya nkaka ke tendudilaka bana na bo mambu ya me tala kuvukisa nitu?

Mutindu Biblia tubilaka yo, nsi-ntoto yai ya Satana ke landa kukuma mbi mingi kuluta. Beno tanga 2 Timoteo 3:1, 13 mpi na nima beno pesa mvutu na ngiufula yai:

• Bantu ya nkaka ya mbi yina verse 13 ke tubila, ke bebisaka bana na mambu ya kuvukisa nitu. Yo yina, sambu na nki yo kele mfunu nde bibuti kulonga bana na bo mambu ya me tala kuvukisa nitu mpi nki mutindu bo lenda sadisa bana na bo na kuditanina na bantu yina ke bebisaka bana?

Keti nge zabaka yo?

Bambangi ya Yehowa me basisaka mikanda mpi bavideo mingi ya ke sadisaka bibuti na kulonga bana na bo mambu ya me tala kuvukisa nitu mpi na kutanina bo na bantu yina ke bebisaka bana. Mu mbandu tala video mpi tanga mikanda yai:

• Tanina Bana na Nge (video)

• Longuka na Longi ya Nene, kapu 10 mpi 32

• “ Parler de sexualité à son enfant ” (Telama! No. 5 2016 ya Kifalansa)

6. Zitisa bibuti na nge

VIDEO: Inki Mutindu Mono Lenda Solula ti Bibuti na Mono? (2:19)

• Sambu na nki yo kele mfunu mingi nde mwana kusolula ti bibuti na yandi na luzitu yonso?

• Inki mwana fwete sala sambu na kusolula ti bibuti na yandi na luzitu yonso?

Beno tanga Bingana 1:8 mpi na nima beno pesa mvutu na ngiufula yai:

• Inki mwana fwete sala ntangu bibuti na yandi ke songa yandi mambu yina yandi fwete sala?

7. Beno bumba ntangu ya kusala lusambu ya dibuta

Mabuta ya Bambangi ya Yehowa ke bumbaka ntangu konso mposo sambu na kusala lusambu ya dibuta. Inki beno lenda sala na lusambu ya dibuta? Beno tala VIDEO mpi na nima beno pesa mvutu na bangiufula ya ke landa.

VIDEO: Lusambu ya Dibuta: Bampasi mpi Mambote (8:04)

• Inki dibuta fwete sala sambu na kusala lusambu ya dibuta mbala na mbala?

• Inki konso kibuti fwete sala sambu lusambu ya dibuta kusalama mbote mpi yo natila dibuta ya mvimba mambote?​—Tala kifwanisu ya kele na luyantiku ya dilongi yai.

• Inki lenda kanga dibuta na beno nzila ya kusala lusambu ya dibuta?

Na Izraele ya ntama, Yehowa vandaka kulomba bibuti na kulonga bana na bo mbala na mbala mambu yina yandi vandaka kusonga bo. Beno tanga Kulonga 6:6, 7 mpi na nima beno pesa mvutu na ngiufula yai:

• Inki mutindu nge lenda sadila mambu ya verse yai ke tuba?

Mambu yina beno lenda sala na lusambu ya dibuta:

• Beno yidika balukutakanu ya dibundu.

• Beno tanga mpi beno tubila disolo mosi ya Biblia yina ta sepedisa dibuta na beno.

• Kana nge kele ti bana, baka (télécharger) to niema (imprimer) kifwanisu mosi sambu na bana na jw.org.

• Kana bana na nge kele ya mwa kuyela, beno tubila disolo mosi na kati ya masolo ya ke tubila batoko na jw.org.

• Beno meka kusala ti bana na beno mambu bonso bantu yina disolo mosi ya Biblia ke tubila.

• Beno tala mpi beno tubila video mosi ya kele na jw.org.

NA BUNKUFI

Yehowa ke zolaka nde bibuti kuzola bana na bo, bo longa bo mpi bo tanina bo. Yandi ke zolaka nde bana kulemfukila mpi kuzitisa bibuti na bo mpi nde bantu yonso ya dibuta kuvukana sambu na kusambila yandi.

Inki Nge Me Simba?

• Inki bibuti fwete sala sambu na kulonga mpi kutanina bana na bo?

• Inki mutindu bana lenda monisa nde bo ke zitisaka bibuti na bo?

• Inki mambote bantu yonso ya dibuta ta baka kana bo yonso ke bumba ntangu konso mposo sambu na kusala lusambu ya dibuta?

TALA MPI

Tala malongi yina ta sadisa bana na nge na kuyela mbote

“Malongi Sambanu Yina Bana Fwete Longuka” (Telama! No. 2 2019)

Tala bandongisila ya mfunu yina Biblia ke pesaka bantu yina ke kebaka bibuti na bo ya me nuna.

“Inki Biblia Ke Tubaka na Yina Me Tala Kukeba Bibuti Yina Me Kuma Bambuta?” (Disolo ya kele na jw.org)

Inki sadisaka bakala mosi yina zabaka ve mutindu ya kusansa bana na kukuma tata ya mbote kibeni?

Yehowa Ke Longaka Beto Mutindu ya Kulungisa Bampusa ya Mabuta na Beto (5:58)

Tala mutindu batata lenda kumisa ngolo kinduku na bo ti bana na bo.

“Mambu Yina Batata Fwete Sala Sambu na Kukuma Banduku ya Ngolo ya Bana na Bo ya Babakala” (Disolo ya kele na Nzozulu ya Nkengi)