Bangyufula ya Batangi

Na mukanda na yandi na Bakristu ya Ebreo, ntumwa Polo kutubilaka ‘kutula maboko.’ Keti yandi vandaka kutubila kuponama ya bankuluntu to kima yankaka?​—Baeb. 6:2.

Beto lenda pesa ve mvutu ya sikisiki na ngyufula yai. Kansi, yo fwete vanda nde Polo vandaka kutubila kutula maboko sambu na kupesa makabu ya mpeve.

Biblia kesadilaka kutula maboko sambu na kutubila kuponama ya bantu yina kesadilaka Nzambi. Moize ‘kutulaka Yozue maboko’ ntangu yandi ponaka yandi na kuvanda kilandi na yandi. (Kul. 34:9) Na dibundu ya Bukristu, bo vandaka kutula maboko na babakala yankaka yina vandaka ya kufwana, sambu na kupona bo. (Bis. 6:6; 1 Tim. 4:14) Polo kukebisaka na kutula muntu maboko ntinu-ntinu.​—1 Tim. 5:22.

Kansi, Polo kulongisilaka Bakristu ya Ebreo na ‘kukwenda na ntwala’ ntangu yai ya bo bikisaka malongi “ya ntetentete.” Na nima, yandi tubilaka “kubikisa mambu ya mpamba, malongi sambu na kutula ntima na Nzambi, malongi sambu na bambotika ya mutindu na mutindu, malongi sambu na bisambu yina ya bo ke sambaka ntangu bo ke tulaka bakristo maboko.” (Baeb. 6:​1, 2) Keti kuponama ya bankuluntu kele kaka kima ya ntetentete yina fwete pusa Bakristu na kukwenda na ntwala? Ve. Kansi, kuvanda nkuluntu kele lukanu yina bampangi-babakala ya kuyela na kimpeve fwete lungisa mpi kusepela na yo.​—1 Tim. 3:1.

Kansi, Biblia kesadilaka mpi kutula maboko na mutindu yankaka. Na mvu-nkama ya ntete, Yehowa kubuyaka Izraele ya kinsuni mpi kupesaka balusakumunu na yandi na Izraele ya kimpeve, disongidila dibundu ya Bakristu ya kupakulama. (Mat. 21:43; Bis. 15:14; Gal. 6:16) Makabu ya kuyituka ya mpeve, bonso kutuba na ndinga, kuvandaka nzikisa yina kumonisaka nde Nzambi kundimaka Izraele ya kimpeve. (1 Kor. 12:4-11) Ntangu Korneye ti dibuta na yandi kukumaka Bakristu, bo bakaka mpeve santu, mpi yo monanaka ntangu bo ‘tubaka’ na ndinga.​—Bis. 10:44-46.

Bantangu yankaka, bantu vandaka kubaka makabu ya kuyituka ntangu bo vandaka kutula bo maboko. Ntangu Filipi kulongaka nsangu ya mbote na Samaria, bantu mingi kubakaka mbotika mpi Nto-Kimvuka kutindaka Piere ti Yoane kuna. Sambu na nki? Beto ketanga nde: “Ntangu yai, Piere ti Yoane tulaka [bantu yina katukaka kubaka mbotika] maboko, ebuna bo bakaka mpeve ya Nzambi.” Yo fwete vanda nde bo bakaka makabu ya mpeve, disongidila bo kumaka kusala mambu yina vandaka kumonana pwelele na meso ya bantu. Beto ketuba mutindu yai sambu Simoni, yina vandaka ntete nganga-nkisi, kumonaka mutindu mpeve vandaka kupusa bo na kusala mambu. Ebuna, yandi sosaka na bwimi yonso kupesa mbongo sambu yandi mpi kukuma ti ngolo ya kutula bankaka maboko sambu na kupesa bo mpeve santu yina tasadisaka bo na kusala bidimbu ya nkumbwa. (Bis. 8:5-20) Na nima, bantu 12 ya bwala Efezo kubakaka mbotika. Beto ketanga nde: “Ntangu Paulo me tula bo maboko imene, mpeve ya Nzambi kwisaka kukulumuka na zulu ya ntu na bo, ebuna bo yantikaka kutuba [na ndinga, NW], bo yantikaka kupesa malongi yina ya bo bakaka na Nzambi.”​—Bis. 19:1-7; fwanisa ti 2 Timoteo 1:6.

Yo yina, yo fwete vanda nde, na Baebreo 6:2, Polo vandaka kutubila kutula maboko sambu na kupesa makabu ya mpeve na bantu yina mekatuka kukuma Bakristu.