Landa Kukumisa Kinduku na Nge ti Yehowa Ngolo

Kulonguka na nge ya Biblia me sadisa nge na kuzaba Yehowa mbote. Mambu ya nge me longuka me sadisa nge na kukuma kuzola yandi mingi mpi mbala ya nkaka nge me kudipesaka na yandi mpi nge me bakaka mbotika. Kana nge me salaka yo ntete ve, mbala ya nkaka nge ke kana kusala yo ntama ve. Kansi ata nge me baka mbotika, nge fwete landa kukumisa kinduku na nge ti Yehowa ngolo. Ee, nge fwete landa kukumisa ngolo kinduku na nge ti Yehowa mvula na mvula. Inki mutindu nge lenda sala yo?

1. Sambu na nki nge fwete landa kukumisa kinduku na nge ti Yehowa ngolo?

Beto fwete sala yonso sambu na kulanda kukumisa kinduku na beto ti Yehowa ngolo. Sambu na nki? “Sambu beto vila ve nzila [na yandi] ata fioti.” (Baebreo 2:1) Inki beto fwete sala sambu na kulanda kusadila Yehowa na ntima ya mvimba? Beto fwete kudipesa mingi na kisalu ya kulonga nsangu ya mbote mpi kusosa mitindu ya nkaka ya kusadila Yehowa mingi. (Tanga Bafilipi 3:16.) Kusadila Yehowa kele lukanu ya kuluta mbote na luzingu!​—Nkunga 84:10.

2. Inki diaka nge fwete sala sambu na kulanda kukumisa kinduku na nge ti Yehowa ngolo?

Ata sesepi yai nge ke zola kumanisa kulonguka Biblia, kuvila ve nde nge ta landa kuvanda kaka Mukristu. Biblia ke tuba nde beto fwete “lwata kimuntu ya mpa.” (Baefezo 4:23, 24) Yo yina, landa kutanga Ndinga ya Nzambi mpi kukwenda na balukutakanu ya dibundu sambu nge longuka mambu mingi ya nkaka sambu na Yehowa mpi bikalulu na yandi. Diaka, sala yonso sambu na kulanda mbote-mbote bikalulu ya Yehowa na luzingu na nge mpi landa kuyambula bikalulu yonso ya mbi sambu na kusepedisa yandi.

3. Inki mutindu Yehowa ta sadisa nge na kulanda kukumisa ngolo kinduku na nge ti yandi?

Biblia ke tuba nde: “Nzambi . . . yandi mosi ta manisa kulonga beno. Yandi ta kumisa beno kikesa, yandi ta kumisa beno ngolo, yandi ta tula beno fondasio ya ngolo.” (1 Piere 5:10) Bangindu ya kusala mambu ya mbi ke kwisilaka beto yonso. Kansi Yehowa ke pesaka beto bima yonso yina beto ke vandaka na yo mfunu sambu beto bikala kaka ngolo. (Nkunga 139:23, 24) Yandi me tubaka nde yandi ta pesa nge nzala mpi ngolo ya kulanda kusadila yandi na ntima ya mvimba.​—Tanga Bafilipi 2:13.

LONGUKA MAMBU MINGI

4. Landa kusolula ti Nduku na nge ya kuluta mbote

Kisambu mpi kulonguka Biblia me sadisa nge na kukuma nduku ya Yehowa. Inki mutindu kusala mambu yai ta sadisa nge na kukuma diaka nduku ya ngolo ya Yehowa?

Beno tanga Nkunga 62:8 mpi na nima beno pesa mvutu na ngiufula yai:

• Sambu kinduku na nge ti Yehowa kukuma diaka ngolo, nki mutindu nge fwete solula ti yandi na kisambu?

Beno tanga Nkunga 1:2 mpi noti na nsi ya lutiti. Na nima beno pesa mvutu na ngiufula yai:

• Sambu kinduku na nge ti Yehowa kukuma diaka ngolo, nki nge fwete sala sambu kutanga Biblia kunatila nge mambote?

Inki nge lenda sala sambu kulonguka na nge mosi kunatila nge mambote? Sambu nge mona mwa mambu ya nge lenda sala, beno tala VIDEO mpi na nima beno pesa mvutu na bangiufula ya ke landa.

VIDEO: Yidika Mbote Mutindu na Nge ya Kulonguka (5:22)

• Na bangindu yonso yina bo me tubila na video, nki yo nge ta zola kusadila?

• Inki masolo nge ta zola kulonguka?

5. Baka lukanu ya kusala mingi na kisalu ya Yehowa

Kana nge me baka lukanu ya kusala mingi na kisalu ya Yehowa, yo ta sadisa nge na kulanda kukumisa kinduku na nge ti yandi ngolo. Beno tala VIDEO mpi na nima beno pesa mvutu na ngiufula ya ke landa.

VIDEO: Luzingu ya Kuluta Mbote (3:31)

• Mutindu video me monisa yo, balukanu yina mpangi Cameron bakaka natilaka yandi nki mambote?

Bantu yonso ve lenda kwenda kulonga nsangu ya mbote na insi ya nkaka. Ata mpidina, beto yonso lenda baka lukanu ya kusala mambu yina beto lenda kuka kusala. Beno tanga Bingana 21:5 mpi na nima beno tubila balukanu yina nge ta zola kubaka . . .

• na dibundu.

• na kisalu ya kulonga nsangu ya mbote.

Inki mutindu mambu ya verse yai ke tuba lenda sadisa nge na kulungisa balukanu ya nge me baka?

Balukanu yina nge lenda baka

• Kuyidika mutindu na nge ya kusamba.

• Kutanga Biblia ya mvimba.

• Kuzabana ti bantu yonso na dibundu na beno.

• Kuyantika kulonguka Biblia ti muntu.

• Kukuma mupasudi-nzila nsadisi to mupasudi-nzila ya ntangu yonso.

• Kulungisa mambu ya bo ke lombaka sambu na kukuma nsadi ya kisalu, kana nge kele mpangi-bakala.

NA BUNKUFI

Landa kukumisa kinduku na nge ti Yehowa ngolo mpi baka lukanu ya kusala mingi na kisalu na yandi. Kana nge ke sala mambu yai, nge ta zinga na kiese banda bubu yai mpi mvula na mvula!

Inki Nge Me Simba?

• Inki ke ndimisa nge nde Yehowa ta sadisa nge sambu nge landa kusadila yandi na ntima ya mvimba?

• Inki nge fwete sala sambu na kulanda kukumisa kinduku na nge ti Yehowa ngolo?

• Inki mutindu kubaka lukanu ya kusala mingi na kisalu ya Yehowa ta sadisa nge na kulanda kukumisa kinduku na nge ti yandi ngolo?

TALA MPI

Keti kima ya mfunu mingi sambu na Yehowa kele kusala mbala mosi mpamba kima mosi ya kuyituka sambu na kumonisa nde beto me kudipesaka na yandi to keti yo kele kulanda kukangama na yandi luzingu na beto ya mvimba?

Landa Kukangama na Nzambi Bonso Abrahami (9:20)

Ata nsadi mosi ya Yehowa yina ke kangamaka kaka na yandi lenda vidisa mpi kiese. Tala mambu ya nge lenda sala sambu na kuvutukila diaka kiese na nge.

Baka Diaka Kiese na Nzila ya Kulonguka mpi Kuyindulula (5:25)

Tala mambu ya nge lenda sala sambu na kubaka lukanu ya kusala mingi na kisalu ya Nzambi mpi kulungisa yo.

“Baka Lukanu ya Kusala Mingi na Kisalu ya Ngangi na Nge Sambu na Kukumisa Yandi” (Disolo ya kele na Nzozulu ya Nkengi)

Tala sambu na nki yo kele mfunu na kukuma Mukristu ya kuyela na kimpeve mpi mutindu nge lenda yela na kimpeve.

“Landa na Kuyela Sambu ‘Kilumbu ya Nene ya Nzambi Mekuma Penepene’” (Nzozulu ya Nkengi, Mayi 1, 2009)