-
Inki Biblia Ke Tubaka na Yina Me Tala Kuvukisa Nitu?Zinga Mvula na Mvula!—Kulonguka ya Biblia Yina Ta Natila Nge Mambote
-
-
DILONGI 41
Inki Biblia Ke Tubaka na Yina Me Tala Kuvukisa Nitu?
Bantu mingi ke waka nsoni na kutubila mambu ya kuvukisa nitu. Kansi, ntangu Biblia ke tubilaka kuvukisa nitu, yo ke tubilaka yo pwelele mpi na luzitu yonso. Mambu yina yo ke tubaka ke vandaka sambu na mambote na beto. Yo kele mutindu yina sambu Biblia kele Ndinga ya Yehowa Nzambi ya me salaka beto. Yandi ke lombaka beto na kusala mambu yina ta natila beto mambote. Yandi ke songaka beto mambu yina beto fwete sala sambu na kusepedisa yandi mpi sambu na kuzinga mvula na mvula.
1. Inki mutindu Yehowa ke tadilaka kuvukisa nitu?
Kuvukisa nitu kele dikabu yina Yehowa me pesaka bantu. Yandi ke zolaka nde yo natila bakala ti nkento yina me kwelanaka kiese. Dikabu yai ke sadisaka bakala ti nkento na kubuta bana mpi na kumonisilana zola ya mingi na mutindu ya mbote mpi ya ke pesa kiese. Yo yina Ndinga ya Nzambi ke tuba nde: “Wa kiese ti nkento na nge ya kileke.” (Bingana 5:18, 19) Yehowa ke zolaka nde Mukristu ya me kwelaka kuvukisa nitu kaka ti nkento to bakala na yandi. Mpidina yandi ta sala ve ata fioti bizumba.—Tanga Baebreo 13:4.
2. Pite kele nki?
Biblia ke tuba nde: “Bantu ya ke salaka pite . . . ta baka ve Kimfumu ya Nzambi.” (1 Bakorinto 6:9, 10) Bantu yina sonikaka Biblia na Kigreki sadilaka ngogo porneia sambu na kutubila pite. Ngogo yai (porneia) ke tendula 1) kuvukisa nitua bakala ti nkento ya me kwelanaka ve, (2) kuvukisa nitu babakala ti babakala to bankento ti bankento mpi (3) kuvukisa nitu bantu ti bambisi. Kana beto ke “sala ve pite,” beto ke pesaka Yehowa kiese mpi yo ke natilaka beto mosi mambote.—1 Batesalonika 4:3.
LONGUKA MAMBU MINGI
Beto tala mambu ya nge fwete sala sambu na kutina pite mpi mambote ya nge ta baka kana nge ke landa kuvanda bunkete na mambu ya nge ke yindula mpi ke sala.
3. Tina pite
Yozefi vandaka kuwa Nzambi boma. Yandi buyaka kusala pite ti nkento mosi yina vandaka kuzola kuvukisa nitu ti yandi. Beno tanga Kuyantika 39:1-12 mpi na nima beno pesa mvutu na bangiufula yai:
Inki pusaka Yozefi na kutina pite?—Tala verse 9.
Nge ke yindula nde Yozefi salaka mbote mutindu yandi buyaka kusala pite? Sambu na nki?
Bubu yai, nki mutindu baleke lenda landa mbandu ya Yozefi mpi kutina pite? Beno tala VIDEO.
Yehowa ke zolaka nde beto yonso kubuya pite. Beno tanga 1 Bakorinto 6:18 mpi na nima beno pesa mvutu na bangiufula yai:
Inki mambu lenda nata muntu na kusala pite?
Inki nge fwete sala sambu na kutina pite?
4. Buya mambu yina lenda pusa nge na kusala pite
Inki lenda sala nde yo kuma mpasi sambu muntu kukatula bangindu ya kusala pite? Beno tala VIDEO mpi na nima beno pesa mvutu na ngiufula ya ke landa.
Mutindu video me monisa yo, nki mpangi-bakala yai salaka ntangu yandi bakisaka nde bangindu na yandi mpi mambu yina yandi vandaka kusala zolaka kunata yandi na kusala bizumba?
Bantangu ya nkaka, nkutu ata Bakristu yina ke kangamaka kaka na Nzambi, ke salaka mpi bikesa sambu na kulanda kuvanda ti bangindu ya mbote. Inki nge fwete sala sambu na kukatula bangindu ya mbi? Beno tanga Bafilipi 4:8 mpi na nima beno pesa mvutu na bangiufula yai:
Mambu ya nki mutindu beto fwete yindulaka?
Sambu na nki kutanga Biblia mpi kudipesa mingi na kisalu ya Yehowa ke sadisaka beto na kukatula bangindu ya mbi yina lenda pusa beto na kusala disumu?
5. Bansiku ya Yehowa ke natilaka beto mambote
Yehowa ke lombaka beto na kusala mambu yina ta natila beto mambote. Yandi ke songaka beto mambu ya beto fwete sala sambu na kulanda kuvanda bunkete na mambu ya beto ke yindula mpi ke sala mpi mambote yina yo ta natila beto. Beno tanga Bingana 7:7-27 to beno tala VIDEO mpi na nima beno pesa mvutu na bangiufula ya ke landa.
Inki nataka leke yai na kusala pite?—Tala Bingana 7:8, 9.
Mutindu Bingana 7:23, 26 ke monisa yo, pite ke nataka bampasi mingi. Inki bampasi beto ta kutana ve ti yo kana beto ke landa kuvanda bunkete na mambu ya beto ke yindula mpi ke sala?
Inki mambote beto ta baka na bilumbu ke kwisa kana beto ke landa kuvanda bunkete na mambu ya beto ke yindula mpi ke sala?
Bantu ya nkaka ke tubaka nde mambu yina Biblia ke tubaka na yina me tala kuvukisa nitu babakala ti babakala to bankento ti bankento ke monisaka nde Nzambi kele makambu ngolo. Yo kele ve mpidina sambu Yehowa Nzambi kele zola mpi yandi ke zolaka nde bantu yonso kuzinga mvula na mvula. Sambu na kuzinga mvula na mvula, beto fwete zitisa bansiku na yandi. Beno tanga 1 Bakorinto 6:9-11 mpi na nima beno pesa mvutu na ngiufula yai:
Katula kuvukisa nitu babakala ti babakala mpi bankento ti bankento, nki mambu ya nkaka Nzambi ke buyisaka?
Sambu na kusepedisa Nzambi, beto yonso fwete yambula mambu ya mbi. Keti kusala bikesa yai kele kibeni mfunu? Beno tanga Nkunga 19:8, 11 mpi na nima beno pesa mvutu na bangiufula yai:
Nge ke yindula nde bansiku ya Yehowa kele mpasi na kuzitisa? Kana mpidina to ve, sambu na nki?
Yehowa ke sadisaka bantu mingi na kukuma kuzitisa bansiku na yandi. Yandi ta sadisa nge mpi
BANTU YA NKAKA KE TUBAKA NDE: “Yo kele ve mbi kana bantu zole ya me zolana kuvukisa nitu.”
Inki mvutu nge ta pesa?
NA BUNKUFI
Kuvukisa nitu kele dikabu yina Yehowa me pesaka bakala ti nkento yina me kwelanaka sambu yo pesa bo kiese.
Inki Nge Me Simba?
Pite kele nki?
Inki beto fwete sala sambu na kutina pite?
Inki mambote beto ke bakaka kana beto ke zitisa bansiku ya Yehowa?
TALA MPI
Tala sambu na nki Nzambi ke zolaka nde bakala ti nkento yina ke zola kuzinga kisika mosi kukwelana.
“Inki Biblia Ke Tubaka Sambu na Luzingu ya Kimakangu?” (Disolo ya kele na jw.org)
Biblia ke tubaka nde kuvukisa nitu babakala ti babakala to bankento ti bankento kele mbi. Keti yo ke tendula nde beto fwete menga bantu ya ke salaka yo?
Tala mutindu bansiku ya Nzambi sambu na mambu yonso ya kuvukisa nitu ke taninaka beto.
“Keti Kuvukisa Nitu na Munoko Kele Mpenza Kuvukisa Nitu?” (Disolo ya kele na jw.org)
Na disolo “Bo Sadilaka Mono Mambu ti Luzitu,” tala mambu yina sadisaka bakala mosi ya vandaka kuvukisa nitu ti babakala na kuyambula kikalulu yai sambu na kusepedisa Nzambi.
“Biblia Ke Sobaka Luzingu ya Bantu” (Disolo ya kele na Nzozulu ya Nkengi)
a Ngogo porneia ke tendula mpi mambu ya mbi ya mutindu na mutindu, mu mbandu kuvukisa nitu na munoko, na kinama ya kunenina mpi kusimba-simba kinama ya kuvukisila nitu ya muntu ya nkaka yina kele ve bakala to nkento na nge sambu na kuwa kiese ya ke katukaka na kuvukisa nitu.
-
-
Inki Biblia Ke Tubaka na Yina Me Tala Makwela mpi Kukonda Kukwela?Zinga Mvula na Mvula!—Kulonguka ya Biblia Yina Ta Natila Nge Mambote
-
-
DILONGI 42
Inki Biblia Ke Tubaka na Yina Me Tala Makwela mpi Kukonda Kukwela?
Na bisika ya nkaka, bantu ke tubaka nde muntu lenda vanda ve na kiese kana yandi me kwela ve. Kansi yo kele ve mutindu yina. Sambu bantu yonso ve ya me balaka ke vandaka na kiese mpi bantu yonso ve ya me balaka ve ke vandaka mawa-mawa. Ya kieleka mutindu Biblia ke monisaka yo, makwela to kukonda kukwela kele makabu ya Yehowa.
1. Inki kele mambote ya kukonda kukwela?
Biblia ke tuba nde: “Muntu yina me kwela me sala mbote, kansi muntu yina me kwela ve [me] sala mbote kuluta.” (Tanga 1 Bakorinto 7:32, 33, 38.) Sambu na nki muntu yina me kwela ve me “sala mbote kuluta”? Sambu Mukristu yina me kwelaka ve ke vandaka ve ti bakala to nkento yina yandi fwete lungisa bampusa na yandi. Yo yina mbala mingi, yandi ke vandaka mpenza ti ntangu ya kusala mambu mingi. Bakristu ya nkaka ya me kwelaka ve ke kudipesaka mingi na kisalu ya Yehowa. Mu mbandu, bo ke kwendaka kulonga nsangu ya mbote na insi ya nkaka. Kima ya kuluta mfunu, bo ke vandaka ti ntangu mingi ya kukumisa kinduku na bo ti Yehowa ngolo.
2. Inki kele mambote ya kukwelana na ntwala ya Leta?
Makwela mpi kukonda kukwela ke nataka ve mambote ya mutindu mosi. Biblia ke tuba nde “bantu zole me luta muntu mosi.” (Longi 4:9) Mambu ke salamaka kibeni mutindu yai sambu na Bakristu yina ke zitisaka minsiku ya Biblia na makwela na bo. Bakala ti nkento yina me kwelana na ntwala ya Leta ke silaka nde bo ta zolanaka ngolo mpi ta pesanaka luzitu luzingu na bo ya mvimba. Kukwelana na ntwala ya Leta ke sadisaka bo na kudiwa kibeni na lutaninu kuluta bakala ti nkento yina ke zingaka nzo mosi na kimakangu. Diaka, bana ya bakala ti nkento yina me kwelanaka na ntwala ya Leta ke kudiwaka mpenza na lutaninu.
3. Yehowa ke zolaka nde makwela kuzinga bantangu ikwa?
Ntangu Yehowa kwedisaka bakala ti nkento ya ntete, yandi tubaka nde: “Bakala ta bikisa tata na yandi ti mama na yandi mpi yandi ta kangama ti nkento na yandi.” (Kuyantika 2:24) Yehowa ke zolaka nde bakala ti nkento kuzolana mpi bo zinga bo zole luzingu na bo ya mvimba. Yandi ke ndimaka kufwa makwela kaka kana bakala to nkento me sala bizumba. Kana bizumba me salama, Yehowa ke pesaka nzila nde bakala to nkento yina me sala ve bizumba kupona kana yandi ta fwa makwela to ve.a (Matayo 19:9) Yehowa ke zolaka ve nde Mukristu kukwela bankento to babakala mingi.—1 Timoteo 3:2.
LONGUKA MAMBU MINGI
Beto tala mambu ya nge fwete sala sambu na kuvanda na kiese mpi kusepedisa Yehowa yo vanda nge me kwelaka to ve.
4. Kana nge me kwelaka ve, sadila mbote dikabu yai
Sambu na Yezu, kukonda kukwela vandaka dikabu. (Matayo 19:11, 12) Beno tanga Matayo 4:23 mpi na nima beno pesa mvutu na ngiufula yai:
Yezu kwelaka ve. Kansi nki mutindu yandi sadilaka dikabu yai sambu na kusadila Tata na yandi mpi kusadisa bantu?
Bonso Yezu, Bakristu yina me kwelaka ve lenda vanda na kiese mpi kusadila mbote dikabu yai. Beno tala VIDEO mpi na nima beno pesa mvutu na ngiufula ya ke landa.
Inki mutindu Bakristu yina me kwelaka ve lenda sadila mbote dikabu yai?
Keti nge zabaka yo?
Biblia me tulaka ve mvula yina muntu fwete lungisa sambu yandi kwela. Kansi yo ke tubaka nde na ntwala ya kukwela, muntu fwete “lutisa [ntete] nsungi ya kileke,” sambu na ntangu yai banzala ya ngolo ya kuvukisa nitu lenda sala nde yandi pona ve mbote muntu yina yandi fwete kwelana ti yandi.—1 Bakorinto 7:36.
5. Pona mbote muntu yina nge fwete kwelana ti yandi
Kupona muntu yina nge ta kwelana ti yandi kele mpi lukanu ya kuluta mfunu. Beno tanga Matayo 19:4-6, 9 mpi na nima beno pesa mvutu na ngiufula yai:
Sambu na nki Mukristu fwete nwanina ve na kukwela?
Biblia ta sadisa nge na kuzaba bikalulu yina muntu fwete vanda ti yo sambu yandi vanda nkwelani ya mbote. Kima ya kuluta mfunu, muntu yina nge ke zola kukwelana ti yandi fwete zola Yehowa.b Beno tanga 1 Bakorinto 7:39 mpi 2 Bakorinto 6:14. Na nima beno pesa mvutu na bangiufula yai:
Sambu na nki beto fwete kwelana kaka ti mpangi na beto Mukristu?
Nge ke yindula nde Yehowa ta wa nki mutindu kana Mukristu me kwelana ti muntu yina ke zolaka ve Yehowa?
Kana bo me kangisa bambisi zole ya me swaswana kisika mosi, yo zole ta niokwama. Mutindu mosi mpi, kana Mukristu kukwelana ti muntu yina ke zolaka ve Yehowa, yandi ta kutana ti bampasi mingi
6. Zitisa makwela mutindu Yehowa ke zolaka
Na Izraele ya ntama, babakala ya nkaka vandaka kufwa makwela ti bankento na bo sambu na bikuma ya kukonda mfunu. Beno tanga Malaki 2:13, 14, 16 mpi na nima beno pesa mvutu na ngiufula yai:
Sambu na nki Yehowa ke mengaka kufwa makwela kana nkwelani mosi me sala ve bizumba?
Bizumba mpi kufwa makwela, ke pesaka nkwelani yina me sala ve bizumba mpi bana mpasi mingi
Beno tala VIDEO mpi na nima beno pesa mvutu na ngiufula ya ke landa.
Kana nge me kwelanaka ti muntu mosi ya ke zolaka ve Yehowa, nki nge fwete sala sambu nge zinga na kiese na makwela na beno?
7. Sadila minsiku ya Yehowa sambu na makwela
Yo ke lombaka bikesa mingi sambu muntu kusadila minsiku ya Nzambi sambu na makwela.c Kansi Yehowa ke sakumunaka bantu yina ke sadilaka yo. Beno tala VIDEO.
Beno tanga Baebreo 13:4 mpi na nima beno pesa mvutu na bangiufula yai:
Nge ke ndima nde minsiku ya Yehowa sambu na makwela kele mbote? Kana mpidina to ve sambu na nki?
Yehowa ke lombaka Bakristu na kusonikisa makwela to kufwa makwela na ntwala ya Leta kaka mutindu bansiku ya bansi mingi ke lombaka bantu na kusala. Beno tanga Tito 3:1 mpi na nima beno pesa mvutu na ngiufula yai:
Kana nge me kwelaka, keti nge me sonikisaka makwela na nge na Leta?
MUNTU YA NKAKA LENDA YULA NGE NDE: “Sambu na nki kukwela? Bakala ti nkento lenda zinga mpi na kimakangu.”
Inki mvutu nge ta pesa?
NA BUNKUFI
Makwela mpi kukonda kukwela kele makabu ya Yehowa. Bantu ya me kwelaka mpi bayina me kwelaka ve ta zinga na kiese kana bo ke sala luzolo ya Yehowa.
Inki Nge Me Simba?
Inki mutindu muntu ya me kwelaka ve lenda sadila mbote dikabu yai?
Sambu na nki Biblia ke lombaka beto na kukwelana kaka ti mpangi na beto Mukristu?
Inki kele kikuma mosi mpamba yina Biblia ke pesaka nswa ya kufwa makwela?
TALA MPI
Tala kana kukwela “kaka na Mfumu” ke tendula nki.
Tala bavideo zole ya nkufi ya bo me vukisa ya lenda sadisa nge na kupona mbote muntu ya nge ke zola kubanda kutalana ti yandi sambu na makwela mpi kukwelana ti yandi.
Tala sambu na nki bakala mosi tubaka nde bima yina Yehowa me pesaka yandi kele mfunu mingi kuluta bima yonso yina yandi yambulaka.
Mono Vandaka Kutula Ntima nde Yandi Ta Longuka Kieleka (1:56)
Tala mwa mambu yina nkwelani fwete yindula na ntwala ya kubaka lukanu ya kufwa makwela to ya kukabwana ti nkwelani na yandi.
“Zitisa ‘Yina ya Nzambi Me Vukisaka’” (Nzozulu ya Nkengi, Desembri 2018)
a Tala Noti 4 ya ke tubila mambu ya lenda sala nde bankwelani kukabwana yo vanda bizumba me salama ve.
b Na bisika ya nkaka, bibuti ke ponaka bakala to nkento sambu na mwana na bo. Kana yo kele mutindu yina na kisika beno ke zingaka, kima ya ntete yina bibuti ya zola ke sosaka kele ve mbongo to kiyeka yina muntu ya bo ke zola kukwedisa na mwana na bo kele na yo. Kansi bo ke sosaka ntete kuzaba kana muntu yango ke zolaka Yehowa to ve.
c Kana nge ke zingaka na kimakangu ti muntu mosi, nge mosi fwete pona kana nge fwete kwelana ti yandi to kukabwana ti yandi.
-