“Beno Yibuka Bantu Yina Ke Twadisaka Beno”

MAMBU yai ya ntumwa Polo tubaka, kele na Baebreo 13:7. Banda na Pantekoti ya mvu 33 ya ntangu na beto, bantumwa ya kwikama ya Mfumu Yezu Kristu lungisaka mukumba yai mpi bo vandaka nto-kimvuka yina vandaka kutwadisa dibundu ya Bukristu yina bo katukaka kukangula. (Bis. 6:2-4) Pene-pene ya mvu 49 ya ntangu na beto, nto-kimvuka yai kumaka nene mpi bo kotisaka Bakristu ya nkaka yina vandaka ve bantumwa ya Yezu. Ntangu bo tadilaka mambu ya luyotisu, ‘bantumwa mpi bankuluntu ya Yeruzalemi’ vandaka mpi na kati ya nto-kimvuka. (Bis. 15:1, 2) Bo vandaka na mukumba ya kutadila mambu yina Bakristu vandaka kukutana ti yo na bisika yonso. Bo vandaka kutinda mikanda mpi kupesa lutwadisu yina vandaka kupesa mabundu kikesa mpi yo vandaka kusala nde balongoki kulanda kuvanda na bumosi na mabanza mpi na bisalu. Mabundu vandaka kulemfuka mpi kulanda lutwadisu ya nto-kimvuka, yo yina Yehowa vandaka kusakumuna bo mpi bo vandaka kukuma mingi.—Bis. 8:1, 14, 15; 15:22-31; 16:4, 5; Baeb. 13:17.

² Na nima ya lufwa ya bantumwa, apostazi ya ngolo kotaka na dibundu. (2 Bate. 2:3-12) Mutindu Yezu tubaka na kingana na yandi ya ble mpi matiti ya mbi, bo kunaka matiti ya mbi (Bakristu ya luvunu) na kilanga ya ble (Bakristu yina bo me tulaka mafuta). Na nima ya bamvula mingi mpenza, bo bikaka nde bimvuka yina kuyela kumosi tii na ntangu ya kukatula bambuma, na “nsukilu ya ngidika mosi ya bima.” (Mat. 13:24-30, 36-43) Na bamvula yina yonso, Yezu landaka kundima Bakristu yina bo me tulaka mafuta, kansi nto-kimvuka vandaka ve, disongidila yo vandaka ve ti kimvuka mosi ya bantu awa na ntoto yina Yezu vandaka kusadila sambu na kutwadisa balongoki na yandi. (Mat. 28:20) Kansi, yandi tubaka nde nsoba ta salama na nsungi ya kukatula bambuma.

³ “Nani kele kibeni mpika ya kwikama mpi ya mayele?” Ntangu Yezu Kristu yulaka ngiufula yai, yandi tubilaka kingana to mbandu mosi ya kele na kati ya “kidimbu” yina yandi pesaka sambu na “nsukilu ya ngidika ya bima.” (Mat. 24:3, 42-47) Yezu monisaka nde mpika yai ya kwikama ta pesaka bansadi ya Nzambi madia ya kimpeve “na ntangu ya me fwana.” Yezu vandaka kusadila kimvuka mosi ya bantu—kansi ve muntu mosi—sambu na kutwadisa dibundu na mvu-nkama ya ntete. Mutindu mosi mpika ya kwikama yina yandi ke sadilaka na bilumbu yai ya nsuka kele ve muntu mosi.

⁴ Nani Yezu ponaka sambu na kudisa balongoki na yandi? Yo fwanaka nde yandi sadila kaka Bakristu ya bo me tulaka mafuta yina kele awa na ntoto. Biblia ke bingaka bo “banganga-nzambi yina ta sala bonso bantotila” yina bo me pesaka kisalu ya “‘kuzabisa bisika yonso bikalulu ya kuluta mbote’ ya muntu yina bingaka [bo] na kukatuka na mpimpa sambu [bo] kota na nsemo na yandi ya kuyituka.” (1 Pie. 2:9; Mal. 2:7; Kus. 12:17) Keti Bakristu yonso yina bo me tulaka mafuta yina kele na ntoto kele mpika ya kwikama? Ve. Ntangu Yezu pesaka madia na mutindu ya kuyituka na bantu kiteso ya 5000 kukonda kutanga bankento mpi bana ya fioti, yandi pesaka yo na balongoki na yandi mpi balongoki pesaka yo na bimvuka ya bantu. (Mat. 14:19) Yandi sadilaka bantu fioti sambu na kudisa bantu mingi. Bubu yai, yandi ke pesaka beto madia ya kimpeve na mutindu mosi.

⁵ Yo yina, “kapita ya kwikama, [mpi] ya mayele,” kele kimvuka mosi ya fioti ya bampangi-babakala yina bo me tulaka mafuta, bayina ke yidikaka mpi ke pesaka madia ya kimpeve na ntangu yai ya Kristu me kumaka Mfumu. (Luka 12:42) Na bilumbu yai ya nsuka, bampangi-babakala ya bo me tulaka mafuta yina kele “mpika ya kwikama mpi ya mayele” ke salaka kumosi na babiro yina ke twadisaka kisalu na ntoto ya mvimba. Bubu yai, bampangi yai ya bo me tulaka mafuta kele Nto-Kimvuka ya Bambangi ya Yehowa.

⁶ Kristu ke sadilaka kimvuka yai sambu na kubasisa bansangu ya ke tadila kulungana ya bambikudulu ya Biblia mpi sambu na kupesa bandongisila na ntangu ya mbote na mutindu ya kusadila minsiku ya Biblia konso kilumbu. Bo ke kabulaka madia yai ya kimpeve na mabundu ya Bambangi ya Yehowa. (Yez. 43:10; Bag. 6:16) Na ntangu ya ntama, mpika to kapita yina bo vandaka kutudila ntima, vandaka kutwadisa nzo ya mfumu na yandi. Mutindu mosi, mpika ya kwikama mpi ya mayele kele ti mukumba ya kutwadisa bantu ya nzo yai ya lukwikilu. Yo yina, mpika ya kwikama ke talaka mpi bima ya kinsuni, kisalu ya kusamuna, manaka ya balukutakanu ya nene mpi ya distrike, kupona bankengi yina ke salaka na bisika ya kuswaswana na organizasio mpi kubasisa mikanda yina ke tendulaka Biblia. “Bansadi” ke bakaka mambote na mambu yai yonso.—Mat. 24:45.

⁷ Ebuna, banani kele “bansadi”? Na bunkufi, bo kele bantu yina ke diaka madia yina ya kimpeve. Na luyantiku, bansadi yonso vandaka Bakristu yina bo me tulaka mafuta. Na nima, kimvuka ya nene ya “mameme ya nkaka” kumaka mpi na kati ya bansadi yina. (Yoa. 10:16) Bimvuka yonso zole ke diaka madia ya kimpeve yina mpika ya kwikama ke pesaka.

⁸ Na mpasi ya nene, ntangu Yezu ta kwisa kusambisa mpi kupesa ndola na nsi-ntoto yai ya mbi, yandi ta tula mpika ya kwikama “na zulu ya bima na yandi yonso.” (Mat. 24:46, 47) Bampangi yina kele mpika ya kwikama ta baka lufutu na bo na zulu. Bo ta vanda na kati ya bantu 144 000 yina ta yala na kimfumu ya Kristu na zulu. Ata ntangu mpika ya kwikama mpi ya mayele ta vanda diaka ve awa na ntoto, Yehowa ti Yezu ta landa kutwadisa bantu yina ta vanda na nsi ya Kimfumu ya Mesia na ntoto, na nzila ya “bamfumu.”—Nk. 45:16.

⁹ Kele ti bikuma mingi yina ke pusaka beto na ‘kuyibuka bantu yina ke twadisaka beto’ mpi na kutudila bo ntima. Sambu na nki yo kele mbote na kusala mutindu yai? Ntumwa Polo tubaka nde: “Bo ke langidilaka beno ntangu yonso bonso bantu yina ta vutula munoko, sambu bo sala yo na kiese kansi ve ti kubokuta, sambu yo ta vanda mbi sambu na beno.” (Baeb. 13:17) Yo kele mfunu nde beto lemfukila mpi beto wila bantu yina ke twadisaka beto sambu bo ke kengilaka beto sambu na lutaninu mpi mambote na beto ya kimpeve.

¹⁰ Na 1 Bakorinto 16:14, Polo tubaka nde: “Beno sala mambu yonso na zola.” Zola yina kele kikalulu ya kuluta nene ke pusaka bo na kubaka balukanu sambu na mambote ya bansadi ya Nzambi. 1 Bakorinto 13:4-8 ke tuba mambu yai sambu na zola: “Zola kele ntima ya nda mpi ntima ya mbote. Zola kele na kimpala ve. Yo ke kudisikisaka ve, yo ke fulukaka ve na lulendo, yo ke salaka ve mambu ya nsoni, yo ke sosaka ve mambote na yo mosi, yo ke waka makasi ve. Yo ke bumbaka ve mbi yina bo me sala yo. Yo ke waka ve kiese sambu na kukonda lunungu, kansi yo ke waka kiese ti kieleka. Yo ke fikaka mambu yonso, yo ke kwikilaka mambu yonso, yo ke tulaka ntima na mambu yonso, yo ke kangaka ntima na mambu yonso. Zola ke sukaka ve.” Sambu zola ke pusaka bo na kubaka balukanu yonso sambu na mambote ya bansadi ya Yehowa, beto kele ti bikuma ya mbote ya kudiwa na lutaninu na lutwadisu ya mutindu yai. Diaka, yo ke monisaka nde Yehowa ke zolaka beto.

¹¹ Mutindu yo vandaka na mvu-nkama ya ntete, bantu yina Yehowa ke sadilaka sambu na kutwadisa bansadi na yandi bubu yai kele bantu ya kukonda kukuka. Ata na ntangu ya ntama, Yehowa vandaka kusadila bantu ya kukonda kukuka sambu na kulungisa luzolo na yandi. Noa tungaka maswa mpi samunaka nsangu yina vandaka kutubila lufwa ya bantu ya bilumbu na yandi. (Kuy. 6:13, 14, 22; 2 Pie. 2:5) Yehowa ponaka Moize sambu na kubasisa bantu na yandi na Ezipte. (Kub. 3:10) Nzambi pesaka bantu ya kukonda kukuka mpeve sambu bo sonika Biblia. (2 Tim. 3:16; 2 Pie. 1:21) Mutindu Yehowa ke sadilaka bantu ya kukonda kukuka bubu yai sambu na kutwadisa kisalu ya kusamuna mpi ya kukumisa bantu balongoki, kele ve kikuma yina lenda pusa beto na kutudila diaka ve organizasio na yandi ntima. Nkutu, yo ke pesaka beto kikesa sambu beto ke zabaka nde kukonda lusadisu ya Yehowa, organizasio yai lenda sala ve ata fioti mambu yonso yina yo ke salaka. Sambu mpika ya kwikama me kutanaka ti bampasi mingi mpi me kangilaka yo ntima, yandi me monisaka nde mpeve ya Nzambi ke twadisaka mambu. Kitini ya organizasio ya Yehowa yina kele na ntoto me bakaka balusakumunu mingi bubu yai. Yo yina, beto ke pesaka yo maboko na ntima ya mvimba mpi ke tudilaka yo ntima na mambu yonso.

¹² Bampangi yina kele ti mikumba na dibundu ke monisaka nde bo ke tudilaka mpika ya kwikama ntima ntangu bo ke ndimaka na kiese yonso mikumba yina bo me pesaka bo mpi ke lungisaka yo na kwikama yonso. (Bis. 20:28) Sambu beto kele bansamuni ya Kimfumu, beto ke samunaka na kikesa yonso nzo na nzo, beto ke salaka bamvutukilu ya mpa mpi beto ke longukaka Biblia ti bantu na banzo na bo. (Mat. 24:14; 28:19, 20) Sambu na kubaka mambote mingi na madia ya kimpeve yina mpika ya kwikama ke pesaka, beto fwete vanda ti kikalulu ya kuyidika mpi ya kukwenda na balukutakanu na beto ya dibundu, balukutakanu ya nene mpi ya distrike. Beto ke bakaka mambote mingi na kikesa yina beto ke pesanaka ntangu beto ke vukanaka ti bampangi na beto na balukutakanu yai ya Bukristu.—Baeb. 10:24, 25.

¹³ Ntangu beto ke pesaka organizasio bima na beto ya kinsuni, beto ke monisaka nde beto ke tudilaka yo ntima. (Bing. 3:9, 10) Ntangu beto ke monaka nde bampangi na beto kele na mfunu ya bima ya kinsuni, beto ke sadisaka bo mbala mosi. (Bag. 6:10; 1 Tim. 6:18) Zola ya kimpangi ke pusaka beto na kusala mutindu yina. Beto ke sosaka ntangu yonso mabaku ya kumonisa Yehowa mpi organizasio na yandi nde beto ke bakaka na valere bumbote yina bo ke monisilaka beto.—Yoa. 13:35.

¹⁴ Beto ke monisaka mpi nde beto ke tudilaka organizasio ya Yehowa ntima ntangu beto ke ndimaka balukanu yina yo ke bakaka. Yo ke tadila mpi kuzitisa na kudikulumusa yonso lutwadisu ya bampangi yina bo me tulaka sambu na kutwadisa beto, mu mbandu bankengi ya nziunga mpi bankuluntu. Bampangi yai kele na kati ya “bantu yina ke twadisaka” beto mpi yina beto fwete lemfukila mpi kuwila. (Baeb. 13:7, 17) Ata beto ke bakisa ve mbote-mbote kikuma yina me pusa bo na kubaka balukanu ya nkaka, beto me zaba nde kundima balukanu yina ta natila beto mambote mingi. Yo yina, Yehowa ke sakumunaka beto sambu beto ke lemfukaka na Ndinga na yandi mpi na organizasio na yandi. Na mutindu yina, beto ke monisaka bulemfu na Yezu Kristu, Mfumu na beto.

¹⁵ Ya kieleka, beto kele ti bikuma mingi ya kutudila mpika ya kwikama mpi ya mayele ntima. Satana, nzambi ya nsi-ntoto yai, ke salaka yonso sambu na kufingisa zina ya Yehowa mpi organizasio na yandi. (2 Bak. 4:4) Kubwa ve na mitambu ya mbi ya Satana! (2 Bak. 2:11) Yandi me zaba nde yandi kele kaka ti “ntangu fioti” na ntwala nde bo losa yandi na dibulu ya nda. Yo yina, lukanu na yandi kele ya kupusa bansadi mingi ya Yehowa na kuyambula kusadila yandi. (Kus. 12:12) Beto fwete landa kukwenda pene-pene na Yehowa sambu Satana ke landa kusala bikesa ya mingi. Beto fwete tula ntima na Yehowa mpi na bantu yina yandi ke sadila sambu na kutwadisa bansadi na yandi bubu yai. Kana beto ke sala mutindu yai, beto ta vanda na kimvuka ya bampangi yina kele na bumosi.