“Beno Vanda na Kiese Mpenza”

‘Beno sala nkinsi yai sambu na kukumisa Mfumu Nzambi. Beno vanda na kiese mpenza.’​—KULONGA 16:15.

 1. (a) Satana kubasisaka ntembe na nki mambu? (b) Na nima ya kukolama ya Adami ti Eva, Yehowa kutubaka inki?

NTANGU Satana kupusaka Adami ti Eva na kukolama na Ngangi na bo, yandi basisaka ntembe na mambu zole ya mfunu. Ntete yandi tulaka ntembe nde Yehowa keyalaka ve na masonga mpi na lunungu. Ya zole, Satana kutubaka nde bantu tasadilaka Nzambi kaka kana bo kebaka mambote. Ntembe yai ya nsuka kumonanaka pwelele na ntangu ya Yobi. (Kuyantika 3:1-6; Yobi 1:9, 10; 2:4, 5) Kansi, Yehowa kubakaka bangidika nswalu sambu na kusukisa ntembe yina. Ata ntangu Adami ti Eva kuvandaka kaka na masamba ya Edeni, Yehowa kutubaka na ntwala mutindu yandi zolaka kumanisa ntembe yina. Yandi tubilaka kukwisa ya “nkuna” yina Satana zolaka kutatika na kisingini, kansi nkuna yango zolaka kunyata Satana na ntu mpi kufwa yandi.​—Kuyantika 3:15, NW.

 2. Inki mutindu Yehowa kusadisaka bantu na kubakisa mutindu yandi talungisa mbikudulu yina kele na Kuyantika 3:15?

² Na nima ya bamvula, Yehowa kusadisaka bantu na kubakisa mbotembote mbikudulu yina sambu na kumonisa bo nde yo talungana mpenza. Mu mbandu, Nzambi songaka Abrahami nde “nkuna” zolaka kubasika na kati ya bana na yandi. (Kuyantika 22:15-18) Yakobi, mutekulu ya Abrahami, kumaka tata ya bikanda 12 ya Izraele. Na mvu 1513 N.T.B., ntangu bikanda yina kukumaka dikanda mosi, Yehowa kupesaka bo bansiku yina kuvandaka ti bankinsi mingi konso mvula. Ntumwa Polo kutubaka nde bankinsi yina kuvandaka kifwani ya “mambu yina ke kwisa.” (Kolosai 2:16, 17; Baebreo 10:1) Yo vandaka kumonisa na kiteso mosi ya fyoti kulungana ya lukanu ya Yehowa na yina metala Nkuna. Kuta bankinsi yina vandaka kunatila bantu ya Izraele kyese mingi. Yo yina, kutadila bankinsi yango na bunkufi takumisa ngolo lukwikilu ya beto ketulaka na balusilu ya Yehowa.

Nkuna Memonana

 3. Nani kuvandaka Nkuna ya Nzambi silaka, mpi nki mutindu Satana kutatikaka yandi na kisingini?

³ Na nima ya bamvula kuluta 4 000, mbikudulu ya ntete ya Yehowa kulunganaka ntangu Yezu yina kele Nkuna kumonanaka. (Galatia 3:16) Sambu Yezu vandaka muntu ya kukuka, yandi bikalaka ya kwikama tii na lufwa, mpidina yandi monisaka nde mambu yina Satana kefundilaka bansadi ya Nzambi kele ya luvunu. Dyaka, sambu Yezu kuvandaka ve na masumu, lufwa na yandi kuvandaka kimenga ya valere mingi. Na nsadisa na yo, Yezu tagulusa bana ya kwikama ya Adami ti Eva na masumu ti na lufwa. Lufwa ya Yezu na zulu ya nti ya mpasi kuvandaka mutindu Satana ‘kutatikaka Nkuna na kisingini.’​—Baebreo 9:11-14.

 4. Inki kuvandaka kifwani ya kimenga ya Yezu?

⁴ Yezu kufwaka na Nisani 14 ya mvu 33 T.B.a Na Izraele, kilumbu ya Nisani 14 kuvandaka kilumbu ya kyese ya bo vandaka kusala nkinsi ya Paki. Konso mvula na dati yina, mabuta vandaka kudya mwana-dimeme ya kukonda kifu. Mpidina, bo vandaka kuyibuka kisalu yina menga ya mwana-dimeme kusalaka sambu na kugulusa bana ya ntete ya bantu ya Izraele ntangu wanzyo kufwaka bana ya ntete ya bantu ya Ezipte na Nisani 14 ya mvu 1513 N.T.B. (Kubasika 12:1-14) Mwana-dimeme ya Paki kuvandaka kifwani ya Yezu, yina ntumwa Polo kutubilaka nde: “Kristo yina kele bonso dimeme na beto ya Nkinsi ya Paki, yandi me fwaka ntama na zulu ya [nti ya mpasi].” (1 Korinto 5:7) Bonso menga ya mwana-dimeme ya Paki, menga ya Yezu kegulusaka bantu mingi.​—Yoane 3:16, 36.

“Muntu ya Ntete na Kutelama na Lufwa”

5, 6. (a)Inki ntangu Yezu kufutumukaka, mpi na nki kifwani Nsiku kumonisaka lufutumuku yina? (b) Inki mutindu lufutumuku ya Yezu kusalaka nde mambu yina kele na Kuyantika 3:15 kulungana?

⁵ Na kilumbu ya tatu, Yezu kufutumukaka sambu na kumonisa valere ya kimenga na yandi na Tata na yandi. (Baebreo 9:24) Nkinsi yankaka vandaka kifwani ya lufutumuku na yandi. Nkinsi ya Mampa ya Kukonda Levire vandaka kuyantika na kilumbu yina vandaka kulanda Nisani 14. Na kilumbu ya Nisani 16, bantu ya Izraele vandaka kunata bima ya ntete ya bo vandaka kukatula na bilanga mpi kupesa yo na nganga-Nzambi sambu yandi pesa yo makabu na ntwala ya Yehowa. (Levi 23:6-14) Yo fwanaka mpenza nde na mvu 33 T.B., kaka na dati yina ya Nisani 16, Yehowa kukanga nzila sambu bikesa ya ngolo yina Satana vandaka kusala kufwa ve “temwe ya kieleka” ya Nzambi! Na kilumbu yango, Yehowa kufutumunaka Yezu na bafwa mpi kupesaka yandi nitu ya kimpeve ti luzingu ya kukonda kufwa.​—Kusonga 3:14; 1 Piere 3:18.

⁶ Yezu kumaka “muntu ya ntete na kutelama na lufwa.” (1 Korinto 15:20) Na kuswaswana ti bantu yina kufutumukaka na ntwala kansi yina kufwaka na nima, Yezu kufwaka dyaka ve. Kansi, yandi tombukaka na zulu mpi kufongaka na diboko ya Yehowa ya kitata, sambu na kuvingila ntangu yina Yehowa zolaka kutula yandi Ntotila ya Kimfumu na yandi ya zulu. (Nkunga 110:1; Bisalu 2:32, 33; Baebreo 10:12, 13) Banda Nzambi metulaka yandi Ntotila, Yezu kele ntangu yai ti kiyeka ya kunyata mbeni na yandi ya ngolo, Satana, na ntu mpi kufwa yandi ti nkuna na yandi.​—Kusonga 11:15, 18; 20:1-3, 10.

Bantu Yankaka ya Nkuna ya Abrahami

 7. Nkinsi ya kukatula bima na bilanga vandaka kumonisa inki?

⁷ Yezu kuvandaka Nkuna yina Yehowa kusilaka na Edeni mpi na nsadisa na yandi, Yehowa zolaka “kufwa bisalu yina ya Satana ke salaka.” (1 Yoane 3:8) Kansi, ntangu yandi tubaka na Abrahami, Yehowa kumonisaka nde “nkuna” na yandi zolaka kuvanda ti muntu mosi kaka ve, kansi bantu mingi. Yo zolaka kuvanda mpenza ‘mingi bonso bambwetete na zulu to bonso bambuma ya zelo na lweka ya masa.’ (Kuyantika 22:17) Nkinsi yankaka ya kyese vandaka kumonisa kumonana ya bantu yankaka ya “nkuna.” Bilumbu 50 yantika na Nisani 16, bantu ya Izraele vandaka kuta Nkinsi ya kukatula bima na bilanga. Na yina metala Nkinsi yina, Nsiku vandaka kutuba nde: “Ntangu bamposo yai nsambwadi me luta imene, disongidila nde bilumbu makumi iya na uvwa (49), na kilumbu ke landa beno fweti natila mono diaka makabu ya nkaka ya bima ya mpa ya beno me katula na bilanga. Konso fami fweti nata mampa zole ya beno ta pesa mono Mfumu Nzambi mutindu nsiku ke tuba. Konso dimpa beno fweti sala yo na bakilo zole (2 kg) ya fufu ya ble ti kutula yo nkisi ya mampa. Makabu yai ya beno ta pesa mono kele makabu ya bima ya ntete ya beno me katula na bilanga.”b​—Levi 23:16, 17, 20.

 8. Inki dyambu ya kuyituka kusalamaka na Pantekoti ya mvu 33 T.B.?

⁸ Ntangu Yezu kuvandaka na ntoto, bantu vandaka kubinga Nkinsi ya kukatula bima na bilanga nde Pantekoti (ngogo ya Kigreki yina ketendula kilumbu “ya makumi tanu”). Na Pantekoti ya mvu 33 T.B., Yezu Kristu yina kufutumukaka, mpi yina kele Nganga-Nzambi ya kuluta Nene kutyamunaka mpeve santu na kimvuka ya fyoti ya balongoki 120 yina kuvukanaka na Yeruzalemi. Mpidina, balongoki yina kukumaka bana ya kupakulama ya Nzambi mpi bampangi ya Yezu Kristu. (Roma 8:15-17) Bo kumaka dikanda ya mpa, to “Israele ya Nzambi.” (Galatia 6:16) Na luyantiku, bana yina ya kupakulama kuvandaka fyoti, kansi nsukansuka bo zolaka kukuma 144 000.​—Kusonga 7:1-4.

9, 10. Inki kuvandaka kifwani ya dibundu ya Bakristu bapakulami na kilumbu ya Pantekoti?

⁹ Mampa zole ya kutula levire yina bo vandaka kupesa bonso makabu na ntwala ya Yehowa na konso nsungi ya Pantekoti, kuvandaka kifwani ya dibundu ya Bakristu bapakulami. Mutindu mampa yina kuvandaka ti levire kumonisaka nde Bakristu bapakulami kuvandaka ti masumu ya bo bakaka na bibuti ya ntete. Kansi, bo lenda kwenda penepene na Yehowa na nsadisa ya kimenga ya nkudulu ya Yezu. (Roma 5:1, 2) Sambu na nki mampa zole? Ziku yo vandaka kumonisa nde bana ya kupakulama ya Nzambi zolaka kukatuka na bimvuka zole: ntete na Bayuda ya kinsuni, na nima na bantu ya Makanda.​—Galatia 3:26-29; Efezo 2:13-18.

¹⁰ Mampa zole yina bo vandaka kupesa na Pantekoti vandaka kukatuka na bima ya ntete yina bo vandaka kukatula na bilanga. Mutindu mosi, Biblia kebingaka Bakristu yina mebutukaka na mpeve nde “bantu ya ntete na kati ya bima yonso ya yandi salaka.” (Yakobo 1:18) Bo kele bantu ya ntete ya Nzambi kulolulaka masumu na nsadisa ya menga yina Yezu kutyamunaka, mpi yo pesaka bo dibaku ya kubaka luzingu ya kukonda kufwa na zulu, kisika bo tayala ti Yezu na Kimfumu na yandi. (1 Korinto 15:53; Filipi 3:20, 21; Kusonga 20:6) Mutindu bo kele na zulu, ntama mingi ve “bo ta yala [makanda] ti fimbu ya kibende na maboko” mpi bo tamona mutindu ‘Nzambi ta tula Satana na nsi ya makulu na bo.’ (Kusonga 2:26, 27; Roma 16:20) Ntumwa Yoane kutubaka nde: “Bo vandaka kulanda Mwana-dimeme na bisika yonso ya yandi vandaka kwenda; yandi katulaka bo na kati ya bantu sambu na kupesa bo bonso makabu ya ntete na Nzambi ti na yandi mosi Mwana-dimeme.”​—Kusonga 14:4.

Kilumbu Yina Vandaka Kutubila Mingi Luguluku

11, 12. (a) Inki vandaka kusalama na Kilumbu ya Ndolula? (b) Inki mambote bantu ya Izraele vandaka kubaka na bimenga ya mwana-ngombe ti ya bankombo?

¹¹ Na kilumbu ya kumi ya ngonda ya Ethanim (na nima bo kumaka kubinga yo Tishri),c bantu ya Izraele vandaka kusala nkinsi mosi yina vandaka kumonisa mutindu Nzambi tasadila kimenga ya nkudulu ya Yezu sambu na kusakumuna bantu. Na kilumbu yango, dikanda ya mvimba vandaka kuvukana kisika mosi na Kilumbu ya Ndolula sambu nganga-Nzambi kupesa bimenga sambu na bo na mpila nde Nzambi kulolula masumu na bo.​—Levi 16:29, 30.

¹² Na Kilumbu ya Ndolula, nganga-Nzambi ya nene vandaka kufwa mwana-ngombe, yandi vandaka kukota ti yo na kisika ya Kuluta Santu, mpi yandi vandaka kulosa-losa mwa menga na yo mbala nsambwadi na ntwala ya Sanduku ya kuwakana, mpidina yandi vandaka kumonisa na mutindu ya kifwani nde yandi mepesa menga yina na Yehowa. Makabu yina kuvandaka sambu na masumu ya nganga-Nzambi ya nene ti ya “fami na yandi,” disongidila, bilandi ya banganga-Nzambi ti ba Levi. Na nima, nganga-Nzambi ya nene vandaka kubaka bankombo zole. Yandi vandaka kufwa nkombo mosi mpi kupesa yo “makabu sambu na masumu ya bantu yonso.” Yandi vandaka kulosa-losa mpi mwa menga na yo na ntwala ya Sanduku ya kuwakana na kisika ya Kuluta Santu. Na nima, yandi vandaka kutula maboko na yandi na zulu ya ntu ya nkombo ya zole mpi yandi vandaka kutuba mbi ya bantu ya Izraele, ebuna yandi vandaka kutinda nkombo yango na ntoto ya zelo na zelo sambu na kunata, na mutindu mosi ya kifwani, masumu ya dikanda ya mvimba.​—Levi 16:3-16, 21, 22.

13. Inki mutindu mambu yina vandaka kusalama na Kilumbu ya Ndolula kuvandaka kifwani ya mukumba yina Yezu kelungisa?

¹³ Mutindu mambu yina vandaka kumonisa yo, Yezu yina kele Nganga-Nzambi ya kuluta Nene kesadilaka valere ya menga na yandi sambu na kulolula masumu ya bantu. Ntete yandi mesadilaka yo sambu na “Nzo-Nzambi ya kimpeve” ya Bakristu ya kupakulama 144 000 sambu na kusadisa bo na mpila nde Nzambi kubinga bo bantu ya lunungu, mpi bo vanda bunkete na ntwala ya Yehowa. (1 Piere 2:5; 1 Korinto 6:11) Makabu ya mwana-ngombe vandaka kumonisa dyambu yai. Mpidina, bo kele ti dibaku ya kubaka dikabu na bo ya zulu. Ya zole, Yezu kesadilaka valere ya menga na yandi sambu na bamilio ya bantu yankaka yina kekwikilaka na yandi, mutindu makabu ya nkombo vandaka kumonisa yo. Bantu yai tabaka dikabu yina Adami ti Eva kuvidisaka, disongidila, luzingu ya mvula na mvula awa na ntoto. (Nkunga 37:10, 11) Na nsadisa ya menga na yandi yina kutyamukaka, Yezu kenataka masumu ya bantu, kaka mutindu nkombo yina ya moyo vandaka kunata na mutindu ya kifwani masumu ya bantu ya Izraele na ntoto ya zelo na zelo.​—Yezaya 53:4, 5.

Kusepela na Ntwala ya Yehowa

14, 15. Inki vandaka kusalama na Nkinsi ya Bisasa, mpi nki yo vandaka kuyibusa bantu ya Izraele?

¹⁴ Na nima ya Kilumbu ya Ndolula, bantu ya Izraele vandaka kuta Nkinsi ya Bisasa yina kuvandaka nkinsi ya kuluta kyese ya Bayuda vandaka kuta nkonso mvula. (Levi 23:33-43) Bo vandaka kuta nkinsi yina banda na kilumbu ya 15 tii na kilumbu ya 21 ya ngonda ya Ethanim, mpi bo vandaka kusukisa ti lukutakanu ya nene na kilumbu ya 22 ya ngonda yina. Yo vandaka kumonisa nsuka ya kukatula bima na bilanga mpi yo vandaka ntangu ya kuvutula matondo na Nzambi sambu na mambote mingi ya yandi vandaka kusadila bo. Sambu na kikuma yina, Yehowa kutubilaka bantu yina vandaka kuvukana na nkinsi yina nde: “Beno vanda na kiese mpenza sambu Mfumu Nzambi me sadisa beno na kukatula bima na bilanga, yandi mpi me pesa beno bima mingi.” (Kulonga 16:15) Yo fwete vanda nde ntangu yina kuvandaka ntangu ya kyese mpenza!

¹⁵ Na nsungi ya nkinsi yina, bantu ya Izraele vandaka kuzinga bilumbu nsambwadi na bisasa. Mpidina yo vandaka kuyibusa bo nde bo zingaka ntangu mosi na bisasa na ntoto ya zelo na zelo. Nkinsi yina vandaka kupesa bo mpenza dibaku ya kuyindula mutindu Yehowa vandaka kudibanza sambu na bo mpila tata ya zola kesalaka. (Kulonga 8:15, 16) Dyaka, mutindu bo yonso, bamvwama ti bansukami, vandaka kuzinga na bisasa ya mutindu mosi, yo vandaka kuyibusa bo nde na nsungi ya ntangu yina ya nkinsi, bo yonso kuvandaka kiteso mosi.​—Nehemia 8:14-16.

16. Nkinsi ya Bisasa vandaka kumonisa inki?

¹⁶ Nkinsi ya Bisasa kuvandaka nkinsi ya kyese yina bo vandaka kukatula bima na bilanga, mpi yo vandaka kumonisa na ntwala kisalu ya kyese ya kuvukisa bantu yina kekwikilaka na Yezu Kristu. Kisalu yina ya kuvukisa kuyantikaka na Pantekoti ya mvu 33 T.B., ntangu balongoki ya Yezu 120 kubakaka mpeve santu sambu na kukuma “banganga-Nzambi.” Mutindu bantu ya Izraele kuzingaka bilumbu fyoti na bisasa, bapakulami kezabaka nde bo kele kaka “banzenza,” mpi bantu yina kezingaka ntangu fyoti na inza yai ya mbi. Bo kevandaka ti kivuvu ya kuzinga na zulu. (1 Piere 2:5, 11) Na ‘bilumbu yai ya nsuka,’ kisalu yina ya kuvukisa Bakristu bapakulami mebanda kukuma na nsuka na yo, mpi ntangu yai bo kevukisa bantu ya nsuka na kati ya bantu 144 000.​—2 Timoteo 3:1.

17, 18. (a) Inki kemonisa nde katula Bakristu bapakulami, bantu yankaka kebakaka mambote na kimenga ya Yezu? (b) Banani bubu yai kebakaka mambote na Nkinsi ya Bisasa ya kifwani, mpi nki ntangu nkinsi yina ya kyese takuma na nsuka na yo?

¹⁷ Yo kele mfunu na kuzaba nde na Nkinsi yina ya Bisasa bo vandaka kutambika bangombe 70. (Kutanga 29:​12-34) Ntalu 70 kemonisa 7 fokula na 10, mpi bantalu yai zole na Biblia kevandaka kidimbu ya bima ya kukuka na zulu mpi na ntoto. Yo yina, bantu ya kwikama ya mabuta yonso 70 ya bana ya Noa tabaka mambote ya kimenga ya Yezu. (Kuyantika 10:1-29) Na kuwakana ti dyambu yai, kisalu ya kuvukisa bantu na ntangu na beto metandukaka na bantu ya makanda yonso yina kekwikilaka na Yezu mpi kevandaka ti kivuvu ya kuzinga na paladisu ya ntoto.

¹⁸ Ntumwa Yoane kumonaka na mbona-meso kisalu ya kuvukisa bantu yina kesalama na bilumbu na beto. Ntete yandi waka ndinga kutubaka na kutula kidimbu na bantu ya nsuka na kati ya 144 000. Na nima, yandi monaka “kibuka mosi ya nene ya bantu yina ata muntu mosi ve takuka na kutanga,” bo telemaka na ntwala ya Yehowa ti Yezu, mpi bo vandaka ti “mandalala na maboko na bo.” Bantu yango “kele bantu yina mekatuka na mpasi ya nene” sambu na kukota na inza ya mpa. Bo mpi kele ntangu yai banzenza yina kezinga sambu na ntangu fyoti na ngidika ya bima yai ya ntama, mpi bo kevingila ti kivuvu yonso ntangu yina “Mwana-dimeme . . . ta kebaka bo mutindu ngungudi ke kebaka mameme na yandi, yandi ta nataka bo na banto ya masa ya moyo.” Na ntangu yina, “Nzambi ta kusula mansanga yonso yina kele na meso na bo.” (Kusonga 7:1-10, 14-17) Nkinsi ya Bisasa ya kifwani takuma na nsuka na yo, na nima mpi na nsuka ya Luyalu ya Bamvula Mfunda ya Kristu, ntangu kibuka ya nene kumosi ti bantu yina tafutumuka, tabaka luzingu ya mvula na mvula.​—Kusonga 20:5.

19. Inki mambote beto kebakaka na kutadilaka bankinsi yina vandaka kusalama na Izraele?

¹⁹ Kana beto keyindulula na ntendula ya bankinsi ya ntama yina Bayuda vandaka kusala, beto mpi lenda “vanda na kiese mpenza.” Yo kepesa kyese na kuzaba nde Yehowa kumonisaka na kiteso ya fyoti mutindu mbikudulu yina yandi pesaka na Edeni zolaka kulungana, mpi yo kele dyaka kyese na kumona mutindu yo kelungana malembe-malembe na ntangu na beto. Bubu yai beto kezaba nde Nkuna memonanaka dezia, mpi nde Satana metatikaka yandi na kisingini. Ntangu yai yandi kele Ntotila na zulu. Dyaka, mingi na kati ya Bakristu bapakulami 144 000 memonisaka dezia kwikama na bo tii na lufwa. Inki mebikala na kusala? Inki mutindu mbikudulu yango yonso talungana? Beto tatadila mambu yai na disolo yina kelanda.

[Banoti na nsi ya lutiti]

Keti Nge Lenda Tendula?

• Mwana-dimeme ya Paki kuvandaka kifwani ya inki?

• Nkinsi ya Pantekoti vandaka kumonisa kisalu ya kuvukisa banani?

• Inki mambu vandaka kusalama na Kilumbu ya Ndolula yina vandaka kumonisa mutindu Yezu tasadila kimenga ya nkudulu na yandi?

• Inki mutindu Nkinsi ya Bisasa vandaka kumonisa kisalu ya kuvukisa Bakristu?

[Tablo ya kele na lutiti 24, 25]

(Sambu na kumona mambu yonso, tala mukanda)

Kifwani ya: Paki

Nisani 14

Dyambu to Nkinsi:

Mwana-dimeme ya Paki

Kifwani ya:

Kimenga ya Yezu

Nkinsi ya Bagato Kukonda Levire Nisani (Nisani 15-21)

Nisani 15

Dyambu to Nkinsi:

Kisabatu

Nisani 16

Dyambu to Nkinsi:

Makabu ya bima ya ntete ya bilanga

Kifwani ya:

Yezu kufutumukaka

Bilumbu 50

Nkinsi ya kukatula bima na bilanga (Pantekoti)

Sivani 6

Dyambu to Nkinsi:

Mampa zole yina bo vandaka kupesa

Kifwani ya:

Yezu kumonisaka bampangi na yandi bapakulami na ntwala ya Yehowa

Kilumbu ya Ndolula

Tishri 10

Dyambu to Nkinsi:

Mwana-ngombe ti bankombo zole yina bo vandaka kupesa makabu

Kifwani ya:

Yezu kupesaka valere ya menga na yandi sambu na bantu yonso

Nkinsi ya Bisasa (Kisalu ya kuvukisa, Tabernakle)

Tishri 15-21

Dyambu to Nkinsi:

Bantu ya Izraele vandaka kuzinga na kyese yonso na bisasa, kukatula bima na bilanga na kyese, mpi kutambika bangombe 70

Kifwani ya:

Kisalu ya kuvukisa bapakulami ti “kibuka ya nene”

[Bifwanisu ya kele na lutiti 23]

Bonso menga ya Mwana-dimeme ya Paki, menga yina Yezu kutyamunaka kegulusaka bantu mingi

[Bifwanisu ya kele na lutiti 24]

Bima ya ntete ya bo vandaka kukatula na bilanga mpi ya bo vandaka kupesa makabu na Nisani 16 kuvandaka kifwani ya lufutumuku ya Yezu

[Bifwanisu ya kele na lutiti 25]

Mampa zole yina bo vandaka kupesa na Pantekoti kuvandaka kifwani ya dibundu ya Bakristu bapakulami

[Bifwanisu ya kele na lutiti 26]

Nkinsi ya Bisasa kuvandaka kifwani ya kisalu ya kuvukisa bapakulami ti “kibuka ya nene” ya bantu ya makanda yonso