Keti Nge Ke Yibuka?

Keti nge tangaka na dikebi yonso masolo ya Banzozulu ya Nkengi ya mvula yai? Tala kana nge lenda pesa bamvutu na bangiufula yai:

Ntangu Yakobo 5:11 ke tuba nde Yehowa kele “kibeni ti lutondo mpi yandi ke wilaka bantu mawa,” yo ke ndimisa beto nki?

Beto me zaba nde Yehowa ke lolulaka bifu na beto sambu na kumonisa nde yandi ke wilaka beto mawa. Yakobo 5:11 ke ndimisa beto nde yandi ke zolaka mpi kusadisa beto. Beto fwete landa mbandu na yandi.—w21.01, lut. 21.

Sambu na nki Yehowa me pesaka bantu ya nkaka kiyeka?

Yandi me salaka yo sambu yandi ke zolaka beto. Yo ke sadisaka dibuta na yandi yina ke kangamaka kaka na yandi na kuvanda na ngemba mpi na ndonga. Konso muntu yina kele na dibuta ya Yehowa ya ke zitisaka mutindu Yehowa me pesaka bantu ya nkaka kiyeka, ke zabaka muntu yina fwete baka balukanu ya nsuka mpi muntu yina fwete sala nde balukanu yango kulungana.—w21.02, lut. 3.

Sambu na nki Bakristu fwete keba ntangu bo ke sadila ba application ya kutindila bantu ba message na nzila ya Internet?

Kana muntu ke zola kusadila ba application yina, yandi fwete pona mbote banduku na yandi. Yo kele mpasi na kusala yo na bimvuka ya nene yina bantu me salaka sambu na kutindilana ba message. (1 Tim. 5:13) Yo kele mpi kigonsa na kumwanga bansangu yina beto me zaba ve kana yo kele masonga to ve mpi na kusala bimvuka ya bampangi na nzila ya ba application yina sambu na kutekila bo bima.—w21.03, lut. 31.

Sambu na nki Nzambi pesaka nzila nde bo niokula Yezu mpi bo fwa yandi?

Kikuma ya ntete, yo lombaka nde bo tula Yezu na nti sambu bo singa ve Bayuda. (Bag. 3:10, 13) Kikuma ya zole, Yehowa vandaka kupesa Yezu formasio sambu na mukumba na yandi ya Nganga-Nzambi ya Nene. Ya tatu, mutindu Yezu kangamaka kaka na Nzambi tii na lufwa na yandi, yo monisaka nde bantu lenda landa kukangama kaka na Nzambi ata ntangu bo ke kutana ti bampasi ya ngolo. (Yobi 1:9-11)—w21.04, balut. 16-17.

Inki nge lenda sala kana yo kele mpasi na kukutana ti bantu na kisalu ya kulonga nsangu ya mbote?

Nge lenda longa nsangu ya mbote na bantangu yina nge lenda kuta bo na banzo. Nge lenda longa mpi nsangu ya mbote na bisika yina nge lenda kutana ti bantu. Nge lenda sadila mpi bametode ya nkaka mu mbandu, kusonikila bantu mikanda.—w21.05, balut. 15-16.

Inki ntumwa Polo zolaka kutuba ntangu yandi tubaka nde: “Na nzila ya nsiku mono fwaka na yina me tala nsiku”? (Bag. 2:19)

Nsiku ya Moize monisaka pwelele nde bantu kele ya kukonda kukuka mpi yo nataka dikanda ya Izraele na Kristu. (Bag. 3:19, 24) Yo sadisaka Polo na kundima Kristu. Mutindu yandi ndimaka Kristu, yo monisaka nde yandi “fwaka na yina me tala nsiku”; yandi vandaka diaka ve na nsi ya Nsiku.—w21.06, lut. 31.

Inki mutindu Yehowa me pesaka beto mbandu ya kukanga ntima?

Yehowa me kangaka ntima na mambu yai yonso ya mbi: bo me fingisaka zina na yandi, bo teleminaka luyalu na yandi, bana na yandi ya nkaka kolamaka na yandi, Satana ke landaka kutuba mambu ya luvunu sambu na bansadi na yandi, bampasi yina bansadi na yandi ke kutanaka ti yo, mpasi yina yandi ke waka sambu na lufwa ya banduku na yandi, mutindu bantu ya mbi ke niokulaka bantu ya nkaka mpi bantu ke bebisa ntoto yina yandi salaka.—w21.07, balut. 9-12.

Inki mbandu ya mbote ya ntima-nda Yozefi pesaka?

Yandi kangaka ntima na mambu ya mbi yina bampangi na yandi sadilaka yandi. Mambu yina bo salaka, salaka nde bantu ya nkaka kukusila yandi makambu mpi bo tulaka yandi na boloko na Ezipte mpi yandi salaka bamvula mingi kuna.—w21.08, lut. 12.

Inki kisalu ya kunikisa Agai 2:6-9, 20-22 ke tubila?

Makanda ke buya kuwa nsangu ya Kimfumu kansi bantu mingi ke ndima kieleka. Kubika fioti bo ta nikisa makanda na mbala ya nsuka mpi bo ta fwa yo.—w21.09, balut. 15-19.

Sambu na nki beto fwete yambula ve kulonga nsangu ya mbote?

Yehowa ke monaka bikesa yina beto ke salaka mpi yandi ke vandaka na kiese. Kana beto lemba ve mpi beto yambula ve, beto ta baka luzingu ya mvula na mvula.—w21.10, balut. 25-26.

Inki mutindu Levi kapu 19 ke sadisa beto na kusadila ndongisila yai: “Beno kuma bantu ya santu na bikalulu na beno yonso”? (1 Pie. 1:15)

Yo ke monana nde mambu yina 1 Piere 1:15 ke tuba ke vutukila mambu yina kele na Levi 19:2. Kapu 19 kele ti bambandu mingi ya ke monisa mutindu beto lenda sadila mambu yina kele na 1 Piere 1:15 na luzingu na beto ya konso kilumbu.—w21.12, balut. 3-4.