Kuyambula Ve Kivuvu ata Fioti!

Masolo yai ke landa, ya me katuka na Grande-Bretagne ta sadisa nge na kubakisa kikuma yina nge fwete yambula ve kivuvu ata fioti. Yo ta sadisa nge mpi na kuzaba mambu yina nge lenda sala sambu na ‘kulosa dimpa na nge na zulu ya masa,’ disongidila kusadisa bantu yina me ndima ntete ve kieleka.​—Lo. 11:1, NW.

Diambu mosi ya mfunu yina nge fwete sala kele kukwamina. Nge fwete kangama na Yehowa mpi na kieleka. (Kul. 10:20) Yo kele mambu yina Georgina salaka. Ntangu yandi yantikaka kulonguka Biblia ti Bambangi ya Yehowa na mvu 1970, bakala na yandi Kyriacos waka makasi ngolo. Yandi salaka yonso sambu na kubuyisa yandi na kulonguka, yandi vandaka kuzola ve nde Bambangi kukota na nzo na bo, mpi kana yandi me mona mikanda ya Bambangi ya Yehowa na nzo, yandi vandaka kulosa yo.

Ntangu Georgina yantikaka kukwenda na balukutakanu ya dibundu, makasi ya Kyriacos kumaka ngolo diaka. Kilumbu mosi Kyriacos kwendaka na Nzo ya Kimfumu sambu na kubasisa mavwanga. Ntangu mpangi-nkento mosi bakisaka nde Kyriacos zabaka kutuba Kigreki kuluta Kingelesi, yandi bingaka na telefone mpangi-bakala mosi ya Mugreki yina vandaka na dibundu ya nkaka sambu na kukwisa kusadisa bo. Kyriacos sepelaka na mutindu mpangi-bakala yina monisilaka yandi mawete, mpi na nima ya mwa bangonda, bo yantikaka nkutu kulonguka Biblia. Kansi na nima, Kyriacos yambulaka kulonguka.

Na nsungi ya bamvula kuluta tatu, Georgina vandaka kaka kuniokwama na mbangika ya bakala na yandi. Kyriacos zabisaka Georgina nde kana yandi baka mbotika, yandi ta yambula Georgina. Na kilumbu ya mbotika, Georgina sambaka Yehowa ngolo sambu nde Kyriacos kuyambula yandi ve. Ntangu Bambangi kwisaka kubaka Georgina sambu na kukwenda na lukutakanu ya nene, Kyriacos songaka bo nde: “Beno kwendaka na ntwala. Beto ke kwisa kulanda beno na kamio na beto.” Yandi vandaka na lukutakanu yina tii na ntwala ya midi mpi monaka mutindu nkento na yandi bakaka mbotika!

Na nima mbangika ya Kyriacos lembaka mpi malembe-malembe yandi yantikaka kusala bansoba ya ngolo. Na nima ya bamvula 40 tuka kilumbu ya ntete yina yandi kwendaka na lukutakanu ya Bambangi, Georgina monaka bakala na yandi me baka mbotika! Inki sadisaka Kyriacos? Yandi ke tuba nde: “Mono sepelaka mingi mutindu Georgina bikaka ve nde ata kima mosi kukanga yandi nzila na kusambila Yehowa.” Georgina ke tuba nde: “Ata bakala na mono vandaka kubangika mono, mono lendaka ve ata fioti kuyambula kusambila Nzambi na mono. Mono vandaka kusamba Yehowa ntangu yonso, mpi mono yambulaka ve kivuvu ata fioti.”

Diambu ya nkaka yina nge lenda sala sambu na kusadisa nkwelani na nge kele kuyedisa bikalulu ya Bukristu. Ntumwa Piere longisilaka Bakristu bankento nde: “Mutindu mosi, beno bankento, beno lemfukila babakala na beno, na mpila nde, kana bankaka na kati na bo ke lemfuka ve na ndinga ya Nzambi, bo kuma kulemfuka na nzila ya bikalulu ya bankento na bo kukonda nde beno tuba ata kima mosi.” (1 Pie. 3:1) Christine landaka ndongisila yina, ata yo lombaka bamvula mingi sambu na kununga bakala na yandi. Ntangu yandi kumaka Mbangi ya Yehowa bamvula kuluta 20, bakala na yandi John vandaka ve kukwikila na Nzambi. John vandaka kuzola ve kudikotisa na mambu ya dibundu, ata mpidina yandi monaka nde dibundu ya mpa yina Christine kotaka vandaka mfunu mingi sambu na Christine. John ke tuba nde: “Mono monaka nde yo vandaka kusadisa yandi na kuvanda na kiese. Yandi kumaka ngolo, mpi yo sadisaka mono na bampasi yina mono kutanaka ti yo.”

Christine sosaka ve ata fioti na kupusa bakala na yandi na ngolo na kundima dibundu na yandi. John ke tuba nde: “Christine bakisaka nde yo vandaka mbote na kuzabisa mono ve mambu ya dibundu na yandi mpi ti ntima nda yonso yandi bikaka nde mono mosi kusala bitambi mpi kulonguka na mutindu na mono mosi.” Kana Christine me mona masolo na Nzozulu ya Nkengi to na Réveillez-vous ! yina lendaka kusepedisa John, mu mbandu na mambu ya siansi mpi ya lugangu, yandi vandaka kusongisa yandi mpi kutuba nde: “Mono ke yindula nde, nge ta sepela kutanga disolo yai.”

Na nima, John bakaka pansio mpi yandi kumaka kusala mwa bisalu ya masamba. Sambu yandi kumaka ti ntangu mingi ya kuyindulula mambu ya mfunu ya luzingu, yandi yantikaka kudiyula nde: ‘Keti bantu me basikaka na kintulumukina to keti bo me gangamaka sambu na kikuma mosi buna?’ Kilumbu mosi, mpangi-bakala mosi yina vandaka kusolula mingi ti John, yulaka yandi nde “Inki mutindu kulonguka na nge ya Biblia?” Mpi John ke tuba nde: “Sambu mono yantikaka kukwikila na Nzambi, mono ndimaka kulonguka.”

Yo vandaka mfunu mpenza na mutindu Christine yambulaka ve kivuvu ata fioti! Na nima ya kusala bisambu kiteso ya bamvula 20 sambu nde John kundima kieleka, ntangu yai John bakaka mbotika. Bubu yai bo zole ke sadila Yehowa na kikesa yonso. John ke tuba nde: “Mambu zole sadisaka mono na kundima kieleka​—ntima ya mbote ya Bambangi vandaka kumonisila mono mpi mutindu bo vandaka kubaka mono bonso nduku na bo. Mpi kana nge me kwelaka nkento yina kele Mbangi ya Yehowa, nge ta vanda ti nkwelani ya kwikama, yina nge lenda tudila ntima mpi ya kukonda bwimi.” Ya kieleka, Christine sadilaka bangogo yina kele na 1 Piere 3:1 mpi yandi nungaka!

Inki beto lenda tuba sambu na balongoki ya Biblia yina sambu na kikuma mosi to ya nkaka, monisaka diaka ve mpusa na bo ya kulonguka Biblia? Ntotila Salomo sonikaka nde: “Na suka kuna bima na nge mpi tii na nkokila kubika ve diboko na nge yo pema, sambu nge ke zaba ve na wapi yo ta buta mbuma, awa to kuna, to kana yonso zole ta vanda mbote.” (Lo. 11:6, NW) Bantangu ya nkaka, yo ke bakaka bamvula sambu nde bankeni ya kieleka kuyela na ntima ya muntu. Ata mpidina, nsuka-nsuka muntu yango lenda bakisa nde yo kele mfunu na kukwenda pene-pene na Nzambi. (Yak. 4:8) Ya kieleka, kilumbu ya nkaka nge lenda yituka mpi kusepela mingi.

Beto tadila mbandu ya Alice yina katuka na Inde mpi kwendaka kuzinga na Angleterre. Na mvu 1974, yandi yantikaka kulonguka Biblia. Yandi vandaka kutuba ndinga Hindi kansi yandi vandaka na mfunu ya kuzaba Kingelesi mbote-mbote. Yandi landaka kulonguka na nsungi ya mwa bamvula, mpi yandi vandaka kukwenda na balukutakanu ya nkaka ya kimvuka mosi ya Kingelesi. Yandi zabaka nde, mambu yina yandi vandaka kulonguka vandaka ya kieleka kansi yandi vandaka ve kubakisa mbalu na yo. Katula yo, yandi vandaka kuzola mbongo mingi mpi yandi vandaka kuzola kukwenda na bafeti. Nsuka-nsuka, Alice yambulaka kulonguka Biblia.

Kiteso ya bamvula 30 na nima, Stella yina vandaka kulonguka Biblia ti Alice, bakaka mukanda mosi yina Alice tindilaka yandi. Mukanda yango vandaka kutuba nde: “Mono ke ndima nde nge ta sepela mingi na kuzaba nde, muntu mosi yina nge longukaka ti yandi Biblia na mvu 1974, me katuka kubaka mbotika na lukutakanu ya distrike yina me katuka kusalama. Nge salaka kisalu ya ngolo na luzingu na mono. Nge kunaka nkeni ya kieleka na kati na mono, mpi ata na ntangu yina mono lungisaka ntete ve malombo sambu na kudipesa na Nzambi, mono bumbaka nkeni yina ya kieleka na mabanza mpi na ntima na mono.”

Inki salamaka? Alice ke tendula nde, yandi kumaka kuniokwama na mabanza na nima ya lufwa ya bakala na yandi na mvu 1997. Yandi sambaka Nzambi. Minuta kumi lungaka ve Bambangi zole ya ke tubaka ndinga Punjabi kokulaka na kielo na yandi mpi bikilaka yandi trakiti Inki kivuvu kele sambu na bafwa? Alice monaka nde, yo vandaka mvutu ya kisambu na yandi mpi yandi bakaka lukanu ya kuvukana ti Bambangi ya Yehowa. Kansi na wapi yandi lendaka kumona bo? Kilumbu mosi, yandi monaka karne mosi ya ntama yina yandi sonikaka adresi yina Stella pesaka yandi ya dibundu ya Punjabi. Alice kwendaka na Nzo ya Kimfumu mpi bampangi ya babakala mpi ya bankento yina ke tubaka Punjabi yambaka yandi na zola yonso. Yandi ke tuba nde: “Mono landaka kuwa zola yina bo monisilaka mono mpi yo sadisaka mono na kubaka kikesa na mpasi na mono.”

Yandi yantikaka kukwenda mbala na mbala na balukutakanu mpi vutukilaka kulonguka Biblia. Yandi longukaka kutuba mpi kusonika mbote-mbote ndinga Punjabi. Na mvu 2003 yandi bakaka mbotika. Mukanda yina yandi tindilaka Stella sukaka ti bangogo yai: “Matondo mingi na mutindu nge kunaka bankeni yai bamvula 29 me luta mpi mutindu nge bikilaka mono mbandu ya mbote ya kulanda.”

“Matondo mingi na mutindu nge kunaka bankeni yai bamvula 29 me luta mpi mutindu nge bikilaka mono mbandu ya mbote ya kulanda.”​—Alice

Inki dilongi nge lenda baka na masolo yai? Yo lenda baka ntangu mingi kuluta yina nge ke yindula, kansi kana muntu yango ke zola mpenza kuzaba Nzambi, mpi yandi kele muntu ya masonga ti ya kudikulumusa, Yehowa ta sala nde kieleka yina kuyela na ntima na yandi. Yibuka bangogo yina Yezu tubaka na kingana mosi: “Bankeni ke mena mpi ke yela​—kansi yandi ke zaba ve mutindu yo ke salama. Na yo mosi, ntoto ke buta mbuma malembe-malembe, ntete mwa-nti, na nima ntu, na nsuka mbuma ya mvimba na kati ya ntu yango.” (Mar. 4:27, 28) Kuyela ya mutindu yina ke salamaka malembe-malembe mpi ke basikaka “yo mosi.” Ya kieleka, konso nsamuni ya Kimfumu ke zabaka ve mutindu kuyela yina ke salamaka. Yo yina, landa kukuna bankeni mingi. Mbala ya nkaka, nge ta katula bambuma mingi.

Mpi kuvila ve nde kisambu kele mfunu mingi. Georgina mpi Christine landaka kusamba Yehowa. Kana nge “kwamina na kisambu” mpi kuyambula ve kivuvu ata fioti, “na nima ya bilumbu mingi,” nge lenda mona diaka “dimpa” yina nge losaka na zulu ya masa.​—Bar. 12:12; Lo. 11:1, NW.