Sambu na Nki Beto Ke Monaka Mpasi, Ke Nunaka mpi Ke Fwaka?

“Disumu kotaka na nsi-ntoto na nzila ya muntu mosi mpi lufwa na nzila ya disumu, mutindu mosi mpi lufwa me mwanganaka na bantu yonso.”—BAROMA 5:12.

Nzambi salaka bibuti na beto ya ntete disongidila, Adami ti Eva, ti mabanza ya kukuka mpi nitu ya kukuka. Yandi tulaka bo mpi na paladisu, kilanga mosi ya kitoko ya bo vandaka kubinga kilanga ya Edeni. Yandi songaka bo nde bo lenda dia bambuma ya banti yonso yina vandaka na kilanga, katula kaka mbuma ya nti mosi. Kansi, Adami ti Eva bakaka lukanu ya kudia mbuma ya nti yango yina mpi bo salaka disumu. (Kuyantika 2:15-17; 3:1-19) Mutindu bo lemfukilaka ve Nzambi, yandi kulaka bo na kilanga yina. Yo yina luzingu na bo kumaka mpasi. Na nima, bo butaka bana mpi luzingu ya bana yina mpi kumaka mpasi. Bo yonso, bo nunaka mpi bo fwaka. (Kuyantika 3:23; 5:5) Beto ke belaka, beto ke kumaka minunu mpi beto ke fwaka sambu beto kele bana ya Adami ti Eva.

“Nsi-ntoto ya mvimba kele na nsi ya kiyeka ya muntu ya mbi.”—1 YOANE 5:19.

‘Muntu yango ya mbi’ zina na yandi Satana. Yandi kele wanzio yina lemfukilaka ve Nzambi. (Yoane 8:44; Kusonga 12:9) Na nima, bawanzio ya nkaka mpi lemfukilaka ve Nzambi mpi landaka Satana. Bo ke bingaka bo bademo. Bampeve yai ya mbi ke sadilaka ngolo na bo sambu na kukusa bantu sambu bo lemfukila ve muntu yina salaka bo. Bo ke pusaka bantu ya nkaka na kusala mambu ya mbi. (Nkunga 106:35-38; 1 Timoteo 4:1) Satana ti bademo na yandi ke zolaka nde bantu kumona mpasi.

“Konso kima yina muntu ke kuna, yandi ta katula yo mpi.”—BAGALATIA 6:7.

Mbala mingi beto ke niokwamaka sambu na disumu yina beto me bakaka na bibuti na beto ya ntete mpi sambu Satana ke pusaka bantu na kusala mambu ya mbi. Kansi bantangu ya nkaka, beto mosi bantu ke kumisaka luzingu na beto mpasi. Inki mutindu? Kana beto ke sala mambu ya mbi to ke baka balukanu ya mbi, mbala mingi beto ke kutanaka ti bampasi. Na ndambu ya nkaka, kana bantu ke sala mambu ya mbote, bo ke bukaka mbuma ya mbote. Mu mbandu, bakala mpi tata ya dibuta yina kele masonga, ya ke salaka ngolo mpi ya ke zolaka dibuta na yandi ta baka mambote mingi mpi ta pesa dibuta na yandi kiese. Kansi kana yandi ke nwaka malafu mingi, ke bulaka bansaka ya mbongo to yandi kele molo, yandi lenda sala nde dibuta na yandi kuzinga na kinsukami. Yo yina yo ta vanda mbote kana beto ke widikila muntu yina salaka beto. Yandi ke zola nde beto baka mambote mingi, mu mbandu “ngemba mingi.”—Nkunga 119:165.

“Na bilumbu ya nsuka . . . , bantu ta vanda bantu ya ke kudizolaka, bantu ya ke zolaka mbongo, . . . bantu ya ke lemfukaka ve na bibuti, . . . bantu ya me konda kudiyala, bantu ya nku, bantu ya ke zolaka ve mambu ya mbote.”—2 TIMOTEO 3:1-5.

Bubu yai, bantu mingi ke salaka mambu yina verse yai ke tubila. Bikalulu na bo ke monisa mpi nde beto ke zinga na “bilumbu ya nsuka” ya nsi-ntoto yai. Verse yai ke monisa mpi nde bitumba, nzala, kunikana ya ntoto mpi bamaladi ta sadisa beto na kuzaba nde beto ke zinga na “bilumbu ya nsuka.” (Matayo 24:3, 7, 8; Luka 21:10, 11) Mambu yai ke salaka nde bantu kuzinga na mpasi mpi bo fwa.