“Lufutumuku ya Ntete” Meyantikaka mpi Kesalama Ntangu Yai!

“Nzambi ta tedimisa ntete bantu yina vandaka bakristo ntangu bo fwaka.”​—1 TESALONIKA 4:16.

1, 2. (a) Inki kivuvu kele sambu na bafwa? (b) Lukwikilu na nge sambu na lufutumuku mesimbama na inki? (Tala noti na nsi ya lutiti.)

BIBLIA ketuba nde “bantu yina ke na moyo, bo ke zaba nde bo ta fwa.” Dyambu yai kevandaka ya kyeleka banda Adami kusalaka disumu. Na luzingu ya bantu, konso muntu yina kebutukaka kezabaka nde nsukansuka yandi tafwa, mpi mingi kekudiyulaka nde: ‘Inki kesalamaka na nima ya lufwa? Inki kekuminaka bantu na lufwa?’ Biblia kepesa mvutu nde: “Bantu ya kufwa kuzaba kima ve.”​—Longi 9:5.

² Keti kivuvu kele sambu na bantu yina mefwaka? Ee. Ya kyeleka, kivuvu sambu na bafwa fwete vanda kana Nzambi fwete lungisa lukanu ya yandi vandaka na yo na luyantiku sambu na bantu. Banda ntama, bansadi ya kwikama ya Nzambi kekwikilaka na lusilu ya Yehowa ya metala Nkuna yina tafwa Satana mpi takatula mpasi ya yandi menataka. (Kuyantika 3:15, NW) Mingi na kati na bo mefwaka. Sambu bo mona kulungana ya lusilu yina ti ya balusilu yankaka ya Yehowa mepesaka, bo fwete futumuka na bafwa. (Baebreo 11:13) Keti kima ya mutindu yai lenda salama? Ee. Ntumwa Polo kutubaka nde: “Bantu ya mbote ti bantu ya mbi ta telama na lufwa.” (Bisalu 24:15) Kilumbu mosi, Polo kufutumunaka mwana bakala mosi na zina ya Etike. Mwana yango kubwaka katuka na fenetre ya etaze ya tatu, mpi yandi “vandaka me fwa dezia” ntangu bo bakaka yandi. Yai kele lufutumuku ya nsuka na kati ya balufutumuku uvwa yina Biblia ketubila.​—Bisalu 20:7-12.a

 3. Inki kikesa nge mebakaka na bangogo ya Yezu yina kele na Yoane 5:28, 29, mpi sambu na inki?

³ Balufutumuku yina uvwa kele fondasio ya lukwikilu na beto na mambu yina Polo tubaka. Yo kekumisaka ngolo kivuvu na beto na mambu yina Yezu kutubaka nde: “Na ntangu ke kwisa, bantu yonso yina me fwaka kele na maziamu, bo ta wa ndinga [ya Yezu]; ebuna bo ta basika na maziamu na bo.” (Yoane 5:28, 29) Bangogo yai kepesaka kyese kibeni! Yo kepesaka mpenza kikesa na bantu yina mefwisaka bantu ya bo kezolaka!

4, 5. Tanga balufutumuku yina Biblia ketubila, mpi nki lufutumuku beto tatubila na disolo yai?

⁴ Bantu mingi yina tafutumuka takwisa kuzinga na ntoto mosi ya ngemba na nsi ya luyalu ya Kimfumu ya Nzambi. (Nkunga 37:10, 11, 29; Yezaya 11:6-9; 35:5, 6; 65:21-23) Kansi, bantu yankaka fwete futumuka na ntwala nde lufutumuku yina kusalama. Yo lombaka nde Yezu kufutumuka ntete sambu na kumonisa valere ya kimenga na yandi na Nzambi sambu na beto. Yezu kufwaka mpi kufutumukaka na mvu 33 T.B.

⁵ Na nima, bantu ya “Israele ya Nzambi” fwete vukana ti Mfumu Yezu Kristu na lukumu ya zulu, kisika bo “ta vandaka ti Mfumu Yesu ntangu yonso.” (Galatia 6:16; 1 Tesalonika 4:17) Biblia kebingaka dyambu yina nde “lufutumuku ya ntete.” (Filipi 3:10, 11; Kusonga 20:6, NW) Lere lufutumuku yina tasalama imene, ntangu talunga sambu mafunda ya bantu kufutumuka na ntoto ti kivuvu ya kubaka luzingu ya mvula na mvula na Paladisu. Yo yina, ata kivuvu na beto kele ya kuzinga na ntoto to na zulu, beto fwete tula dikebi mingi na “lufutumuku ya ntete.” Yo kele lufutumuku ya nki mutindu? Inki ntangu yo kesalama?

“Nki Mutindu ya Nitu Bo Ta Vanda na Yo?”

6, 7. (a) Na ntwala nde Bakristu bapakulami kukwenda na zulu, inki fwete salama? (b) Bo tafutumuka ti nitu ya nki mutindu?

⁶ Na mukanda ya ntete yina Polo kusonikilaka Bakristu ya Korinto, yandi yulaka bangyufula na yina metala lufutumuku ya ntete: “Nki mutindu bantu yina me fwaka bo lenda telama diaka? Nki mutindu ya nitu bo ta vanda na yo?” Na nima yandi pesaka mvutu nde: ‘Kana nge me kuna mbuma na ntoto, yo lenda mena ve kana yo me fwa ntete ve. . . . Nzambi kepesaka [yo] nitu yina ya yandi me zodila . . . Lukumu ya banitu yina kele na zulu yo kele diswaswanu na lukumu ya banitu yai kele awa na nsi-ntoto.’​—1 Korinto 15:35-40.

⁷ Bangogo ya Polo kemonisa nde Bakristu bapakulami fwete fwa ntete na ntwala ya kubaka dikabu na bo na zulu. Na lufwa na bo, nitu ya bo kevandaka na yo awa na ntoto kevutukaka na mfututu. (Kuyantika 3:19) Na ntangu yina Nzambi metulaka, bo kefutumukaka ti nitu ya mutindu mosi yina mefwana sambu na kuzinga na zulu. (1 Yoane 3:2) Nzambi kepesaka bo mpi luzingu ya kukonda kufwa. Yo kele ve kima mosi ya bo kebutukaka na yo, bonso nde Nzambi ketulaka na kati na bo moyo yina bantu yankaka ketubaka nde yo kefwaka ve. Polo ketuba nde “muntu yina ke fwaka fweti baka nitu yina lenda fwa ve.” Luzingu ya kukonda kufwa kele dikabu ya Nzambi, mpi bantu ‘kebakaka’ yo kele bayina kefutumukaka na lufutumuku ya ntete.​—1 Korinto 15:50, 53; Kuyantika 2:7; 2 Korinto 5:1, 2, 8.

 8. Inki mutindu beto kezaba nde Nzambi kuponaka ve bantu 144000 na mabundu ya kuswaswana?

⁸ Kaka bantu 144 000 mpamba kefutumukaka na lufutumuku yina ya ntete. Yehowa yantikaka kupona bo na Pantekoti ya mvu 33 T.B., ntangu fyoti na nima ya kufutumuna Yezu. Bo yonso kele ti ‘zina ya Yezu mpi ya Tata na yandi ya kusonika na bilungi na bo.’ (Kusonga 14:1, 3) Yo yina, Yehowa meponaka bo ve na mabundu ya kuswaswana, kansi bo yonso kele balongoki ya Kristu mpi bo kesepelaka na kunata zina ya Yehowa. Ntangu bo kefutumukaka, Nzambi kepesaka bo kisalu na zulu. Kivuvu ya kusadila Nzambi na ntwala na yandi kesepedisaka bo mingi mpenza.

Keti Yo Kesalama Ntangu Yai?

 9. Inki mutindu Kusonga 12:7 ti 17:14 kesadisa beto na kuzaba ntangu lufutumuku ya ntete kuyantikaka?

⁹ Inki ntangu lufutumuku ya ntete kuyantikaka? Nzikisa mosi ya nene kemonisa nde yo meyantikaka mpi kesalama ntangu yai. Mu mbandu, beto fwanisa bakapu zole ya mukanda ya Kusonga. Ntete, tala na Kusonga kapu ya 12. Kuna beto ketanga nde Yezu Kristu, yina Nzambi katukaka kupesa kimfumu, kumosi ti bawanzyo na yandi ya santu kunwanaka bitumba ti Satana ti bademo na yandi. (Kusonga 12:7-9) Mutindu zulunalu yai memonisaka yo mbala mingi, bitumba yina kuyantikaka na 1914.b Kansi, simba nde ata kisika mosi ve bo ketuba nde balongoki ya kupakulama ya Kristu kuvandaka ti yandi na bitumba yina kusalamaka na zulu. Ntangu yai tala na kapu ya 17 ya Kusonga. Beto ketanga nde na nima ya kufwa ya ‘Babilone ya Nene,’ Mwana-dimeme tanunga makanda. Ebuna, yo keyika nde: “Mwana-dimeme ti bantu na yandi bo ta bedisa bo; bantu na yandi, yandi muntu solaka bo, bo ke lemfukaka na yandi.” (Kusonga 17:5, 14) Kana bantu yina ‘Yezu solaka mpi ya kelemfukaka na yandi’ tavanda ti yandi sambu na kufwa na mbala ya nsuka inza ya Satana, yo ketendula nde bo tavanda mefutumuka dezia. Yo yina, beto lenda tuba nde bapakulami yina mefwaka na ntwala ya Armagedoni kuyantikaka kufutumuka ziku na nsungi yina kele na kati ya mvu 1914 ti Armagedoni.

10, 11. (a) Bankuluntu 24 kemonisaka banani, mpi nkuluntu mosi kusongaka Yoane inki? (b) Inki beto lenda tuba sambu na lufutumuku ya ntete?

¹⁰ Keti beto lenda tuba na sikisiki yonso ntangu lufutumuku ya ntete kuyantikaka? Kidimbu mosi ya mfunu yina lenda sadisa beto na kubakisa kele na Kusonga 7:9-15, kisika ntumwa Yoane ketendula mbona-meso ya yandi monaka yina ketubila “kibuka mosi ya nene ya bantu yina ata muntu mosi ve takuka na kutanga.” Muntu kupesaka Yoane ntendula ya kibuka yina ya nene ya bantu, kele nkuluntu mosi na kati ya bankuluntu 24, mpi bankuluntu yai kemonisaka bantu 144 000 yina tayala ti Kristu na lukumu na bo ya zulu.c (Luka 22:28-30; Kusonga 4:4) Yoane yandi mosi kuvandaka ti kivuvu ya kuzinga na zulu. Kansi, yo fwete vanda nde na mbona-meso yai yandi vandaka kumonisa bapakulami yina kele na ntoto, bayina mebakaka ntete ve dikabu na bo na zulu, sambu yandi vandaka kaka na ntoto ntangu nkuluntu yina kusolulaka ti yandi.

¹¹ Inki beto lenda tuba na mutindu nkuluntu mosi na kati ya bankuluntu 24 kupesaka Yoane ntendula ya kibuka ya nene? Yo kemonana nde bubu yai, ziku Nzambi kesadilaka bantu ya kimvuka yai ya bankuluntu 24 yina mefutumukaka dezia sambu na kuzabisa bakyeleka na yandi. Sambu na nki dyambu yai kele mfunu? Sambu bansadi ya kupakulama ya Nzambi kuzabaka ntendula ya kyeleka ya kibuka ya nene na mvula 1935. Kana Nzambi kusadilaka nkuluntu mosi na kati ya bankuluntu 24 sambu na kuzabisa kyeleka yina ya mfunu, yo fwete vanda nde yandi futumukaka na ntwala to na mvula 1935. Kana yo kele mpidina, yo kesonga nde lufutumuku ya ntete kuyantikaka ziku na nsungi yina kele na kati ya 1914 ti 1935. Keti beto lenda pesa mvutu ya sikisiki?

12. Tendula sambu na nki beto lenda tuba nde mvu 1918 lenda vanda ntangu yina lufutumuku ya ntete kuyantikaka?

¹² Na kisika yai, yo lenda vanda mfunu na kutadila mutindu mambu yai kewakana ti mambu yina Biblia kutubaka. Na nsuka ya mvu 29 T.B., Nzambi pakulaka Yezu Kristu mafuta sambu na kuvanda Ntotila yina tayala na Kimfumu ya Nzambi. Bamvula tatu ti ndambu na nima, na nsungi ya mvula ya mvu 33 T.B., Yezu futumukaka bonso kigangwa ya ngolo ya kimpeve. Keti beto lenda yindula nde sambu Nzambi kupesaka Yezu kimfumu na nsuka ya mvula 1914, yo fwete vanda nde lufutumuku ya balongoki na yandi ya kwikama ya kupakulama kuyantikaka bamvula tatu ti ndambu na nima, disongidila, na mvula 1918? Yo lenda vanda mutindu yina. Ata Biblia kemonisa ve pwelele dyambu yai, yo kewakana ti baverse yankaka yina kemonisa nde lufutumuku ya ntete kuyantikaka ntangu fyoti na nima ya kuvanda ya Kristu.

13. Na nki mutindu 1 Tesalonika 4:15-17 kepesa dibanza nde lufutumuku ya ntete kubandaka na luyantiku ya kuvanda ya Kristu?

¹³ Mu mbandu, Polo kusonikaka nde: “Beto bantu yina ta vanda ke zinga na kilumbu yina ya Mfumu Yesu ta kwisa [na nsuka ya kuvanda na yandi ve], beto ta yita ntete ve na ntwala bantu yina ta vanda me fwa. Ndinga mosi ya ngolo ta wakana; ndinga ya mfumu ya bawanzio mpi ta wakana ti mpungi ya Nzambi, ebuna Mfumu Yesu yandi mosi ta katuka na zulu, yandi ta kwisa kukulumuka tii na kati-kati ya zulu ti ntoto. Nzambi ta tedimisa ntete bantu yina vandaka bakristo ntangu bo fwaka; na nima, beto bantu ta vanda na moyo na kilumbu yina, Nzambi ta baka beto nzila mosi ti bo, ebuna yandi ta nata beto na matuti sambu beto kwenda kukutana ti Mfumu Yesu kuna na kati-kati ya zulu ti ntoto. Mpidina, beto ta vandaka ti Mfumu Yesu ntangu yonso.” (1 Tesalonika 4:15-17) Yo yina, bapakulami yina mefwaka na ntwala ya kuvanda ya Kristu kufutumukaka mpi kukwendaka na zulu na ntwala ya bapakulami yina kele ntete na moyo na nsungi ya kuvanda ya Kristu. Yo ketendula nde ziku lufutumuku ya ntete kubandaka na luyantiku ya kuvanda ya Kristu, mpi yo kefula “na ntangu ya kuvanda na yandi.” (1 Korinto 15:23, NW) Na kisika nde bo yonso kufutumuka na mbala mosi, lufutumuku ya ntete kesalama na nsungi mosi ya nda.

“Na Konso Muntu Yina Me Fwaka, Bo Pesaka Yandi Mvwela Mosi ya Mpembe”

14. (a) Bambona-meso yina kele na Kusonga kapu ya 6 kelungana nki ntangu? (b) Inki bo kemonisa na Kusonga 6:9?

¹⁴ Beto tadila mpi nzikisa yankaka yina kele na Kusonga kapu ya 6. Kuna bo kemonisa Yezu bonso Ntotila ya ketambwisa mpunda mpi kekwenda sambu na kununga. (Kusonga 6:2) Makanda mekudikotisa na bitumba yina ya ngolo. (Kusonga 6:4) Nzala kele bisika yonso. (Kusonga 6:5, 6) Bamaladi ya mbi kefwa bantu mingi. (Kusonga 6:8) Mambu yai yonso yina Biblia kutubaka na ntwala kewakana mpenza ti mambu yina kesalama na inza banda 1914. Kansi, kima yankaka kesalama. Beto tula dikebi na mesa-kimenga. Na nsi na yo, Yoane monaka “moyo ya bantu yina fwaka sambu bo vandaka kuzabisa nsangu ya Nzambi ti kupesa malongi ya kieleka.” (Kusonga 6:9) Sambu “moyo [to luzingu] ya konso kima ke vandaka na menga,” kima ya bo kemonisa mpenza yina kele na nsi ya mesa-kimenga kele menga ya bansadi ya kwikama ya Yezu yina bo fwaka sambu bo vandaka kuta kimbangi ti kikesa yonso.​—Levi 17:11.

15, 16. Tendula sambu na nki bangogo yina kele na Kusonga 6:10, 11 ketubila lufutumuku ya ntete?

¹⁵ Bonso menga ya Abeli, menga ya Bakristu yina bo fwaka keboka na Yehowa sambu yandi zenga mambu na lunungu. (Kuyantika 4:10) “Bo vandaka kutuba na ndinga ya ngolo nde: ‘Mfumu Nzambi, nge kele muntu ya santu mpenza, nge kele muntu ya kieleka. Nki nge ke vingila na kusambisa bantu ya nsi-ntoto ti na kupesa bo ndola sambu bo fwaka beto?’” Inki kusalamaka na nima? “Na konso muntu yina me fwaka, bo pesaka yandi mvwela mosi ya mpembe, ebuna bo tubilaka bo na kupema mwa-ntangu fioti diaka sambu na kuvingila bampangi na bo yonso ya bakristo yina ta fwa mutindu bo fwaka.”​—Kusonga 6:10, 11.

¹⁶ Keti bo pesaka bamvwela yina ya mpembe na menga yina kuvandaka na nsi ya mesa-kimenga? Ve! Bo pesaka yo na bantu yina menga na bo kutyamukaka na zulu ya mesa-kimenga na mutindu ya kifwani. Bo tambikaka luzingu na bo na zina ya Yezu mpi ntangu yai Nzambi mefutumunaka bo bonso bampeve. Inki mutindu beto mezaba yo? Na mukanda ya Kusonga beto ketanga nde: “Bantu yina ta nunga, bo ta lwata bilele ya mpembe mpidina; mono ta katula bazina na bo ve na mukanda ya moyo.” Yibuka mpi nde bankuluntu 24 “vandaka me lwata bilele ya mpembe ti bampu ya wolo ya kimfumu.” (Kusonga 3:5; 4:4) Yo yina, ntangu bitumba, nzala, mpi maladi yantikaka kumonisa bantu mpasi na ntoto, bapakulami yina mefwaka ya bo kemonisa na menga yina kele na nsi ya mesa-kimenga, kufutumukaka sambu na kubaka luzingu na zulu mpi kulwataka lele ya mpembe ya kifwani.

17. Na nki mutindu bantu yina kebakaka bilele ya mpembe fwete ‘pema’?

¹⁷ Bantu yina ya mekatuka kufutumuka fwete ‘pema.’ Bo fwete vingila ti ntima ya nda kilumbu yina Nzambi tapesa ndola na bantu yina kusalaka bo mbi. “Bampangi na bo,” disongidila, bapakulami yina kele ntete na ntoto, fwete monisa kwikama na bo na ntwala ya bampasi. Kana ntangu ya kusambisa mekuma, “kupema” na bo tamana. (Kusonga 7:3) Na ntangu yina, bantu yina mefutumukaka tavukana ti Mfumu Yezu Kristu sambu na kufwa bantu ya mbi mpi bantu yina metyamunaka menga ya Bakristu yina kusalaka kwa bo kima ya mbi ve.​—2 Tesalonika 1:7-10.

Ntendula na Yo Sambu na Beto

18, 19. (a) Sambu na nki nge lenda tuba nde lufutumuku ya ntete kesalama ntangu yai? (b) Inki mutindu nge kekudiwa na mpila nge mebakisa mambu ya metala lufutumuku ya ntete?

¹⁸ Ndinga ya Nzambi kepesa ve dati ya sikisiki sambu na lufutumuku ya ntete, kansi yo kemonisa nde lufutumuku yango kesalama na nsungi ya kuvanda ya Kristu. Bantu ya ntete na kufutumuka kele bapakulami yina mefwaka na ntwala ya kuvanda ya Kristu. Mutindu nsungi yina ya kuvanda ya Kristu kekwenda na nsuka, bapakulami yina kemanisa luzingu na bo ya kwikama awa na ntoto kebalukaka “na mbala mosi, na nswalu yonso” mpi kekumaka bigangwa ya ngolo ya kimpeve. (1 Korinto 15:52) Keti bapakulami yonso tabaka dikabu na bo ya zulu na ntwala ya bitumba ya Armagedoni? Beto kezaba ve. Kansi, beto kezaba kaka nde na ntangu yina Nzambi metulaka, bapakulami 144 000 yonso tavanda ya kutelama na zulu na Ngumba ya Sioni.

¹⁹ Beto kezaba mpi nde bantu mingi na kati ya 144 000 mevukanaka dezia ti Kristu. Kaka ndambu fyoti mpamba mebikala na ntoto. Dyambu yai kele kidimbu ya nene yina kemonisa nde kilumbu yina Nzambi tasambisa bantu mefinama mpenza! Ntama mingi ve, bo tafwa inza ya mvimba ya Satana, ebuna yandi mosi Satana bo talosa yandi na dibulu ya nda. Na nima, lufutumuku ya bantu yonso tayantika, mpi na nsadisa ya kimenga ya nkudulu ya Yezu, bantu ya kwikama tabaka luzingu ya kukuka bonso yina Adami kuvidisaka. Mbikudulu yina Yehowa kupesaka na Kuyantika 3:15 ke na kulungana na mutindu mosi ya kuyituka. Beto kele ti dibaku ya nene ya kuzinga na ntangu yai!

[Banoti na nsi ya lutiti]

Keti Nge Lenda Tendula?

Inki mutindu baverse yai kelanda kesadisa beto na kubakisa ntangu “lufutumuku ya ntete” kesalama?

• Kusonga 12:7; 17:14

• Kusonga 7:13, 14

• 1 Korinto 15:23; 1 Tesalonika 4:15-17

• Kusonga 6:2, 9-11

[Bifwanisu ya kele na lutiti 31]

Lufutumuku ya banani kesalama na ntwala ya lufutumuku ya bantu yonso?