DILONGI 33

Mambu Yina Kimfumu ya Nzambi Ta Sala

Ya Bo Me Niema na Papie

Kimfumu ya Nzambi me bandaka dezia kuyala. Kubika fioti, yo ta yidika mpenza mambu mingi na ntoto. Beto tala mwa mambu ya mbote yina Kimfumu ya Nzambi ta sala.

1. Inki Kimfumu ya Nzambi ta sala sambu bantu kuzinga diaka na ngemba mpi bo sala kaka mambu ya mbote?

Yezu, Ntotila ya Kimfumu ya Nzambi, ta fwa bantu ya mbi mpi bimfumu ya bantu na bitumba ya Armagedoni. (Kusonga 16:14, 16) Na ntangu yina, mambu yai ya Biblia tubaka ta lungana mpenza: “Kubika kaka fioti, mpi bantu ya mbi ta vanda diaka ve.” (Nkunga 37:10) Na nzila ya Kimfumu ya Nzambi, Yezu ta sala nde ngemba mpi mambu ya mbote kuvanda na ntoto.—Tanga Yezaya 11:4.

2. Luzingu ta vanda nki mutindu ntangu luzolo ya Nzambi ta salama awa na ntoto?

Ntangu Kimfumu ya Nzambi ta yala ntoto, ‘bantu ya mbote ta baka ntoto mpi bo ta zinga mvula na mvula na zulu na yo.’ (Nkunga 37:29) Yindula mutindu luzingu ta vanda na ntoto ntangu bantu yonso ta kuma bantu ya mbote, ta zolaka Yehowa mpi ta zolanaka! Ata muntu mosi ve ta belaka diaka mpi bantu yonso ta zingaka mvula na mvula.

3. Inki mambu Kimfumu ya Nzambi ta sala ntangu bantu ya mbi ta fwa?

Na nima ya lufwa ya bantu ya mbi, Yezu ta yala bamvula 1 000. Na ntangu yina, yandi mpi bantu 144 000 yina ta yala ti yandi ta sadisa bantu na kukuma bantu ya kukonda masumu. Na nsuka ya bamvula 1 000, ntoto ta kuma paladisu mosi ya kitoko mpi bantu yonso ta zingaka na kiese sambu bo ta lemfukaka na bansiku ya Yehowa. Na nima, Yezu ta vutula Kimfumu na Yehowa, Tata na yandi. “Zina [ya Yehowa ta kuma diaka] ya santu” na mutindu yina me salamaka ntete ve. (Matayo 6:9, 10) Yo ta monana pwelele nde Yehowa kele Mfumu ya mbote yina ke zolaka bantu na yandi. Na nima, Yehowa ta fwa Satana ti bademo na yandi mpi bantu yonso ya nkaka yina ta kolama na luyalu na yandi. (Kusonga 20:7-10) Kimfumu ya Nzambi ta nata luzingu ya mbote ya kukonda nsuka.

LONGUKA MAMBU MINGI

Beto tala sambu na nki beto fwete tula ntima nde Nzambi ta sadila Kimfumu na yandi sambu na kulungisa mambu yina Biblia ke tubaka sambu na bilumbu ke kwisa.

4. Kimfumu ya Nzambi ta fwa bimfumu ya bantu

“Muntu me yalaka muntu sambu na kupesa yandi mpasi.” (Longi 8:9) Yehowa ta sadila Kimfumu na yandi sambu na kumanisa mambu yai ya mbi.

Beno tanga Daniele 2:44 mpi 2 Batesalonika 1:6-8. Na nima, beno pesa mvutu na bangiufula yai:

Inki Yehowa ti Mwana na yandi Yezu ta sala bimfumu ya bantu mpi bantu yina ke pesaka yo maboko?
Inki mutindu mambu ya nge me longuka sambu na Yehowa mpi Yezu ke ndimisa nge nde mambu ya bo ta sala ta vanda ya mbote?

Yezu Ntotila ya Kimfumu ya zulu ke yala ntoto ya me kuma Paladisu.

5. Yezu kele Ntotila ya kuluta mbote

Yezu, Ntotila ya Kimfumu ya Nzambi, ta sala mambu mingi sambu na mambote ya bantu na ntoto. Beno tala VIDEO sambu na kumona mutindu Yezu monisaka nde yandi ke zolaka kusadisa bantu mpi nde Nzambi muntu me pesaka yandi ngolo ya kusala yo.

VIDEO: Yezu Monisaka Mambu Yina Kimfumu ya Nzambi Ta Sala (1:13)

Ntangu Yezu vandaka awa na ntoto, yandi salaka mwa mambu yina Kimfumu ya Nzambi ta sala. Na kati ya mambu yai ya ke landa, nki yo nge ke vingila kumona ti nzala ya ngolo? Beno tanga baverse ya kele na lweka ya mambu yango sambu na kubakisa yo mbote.

NTANGU YEZU VANDAKA NA NTOTO, YANDI . . .	NA ZULU, YEZU . . .
lembikaka nzadi-mungwa mpi mupepe ya ngolo.—Marko 4:36-41.	ta yidika bisika yonso yina ntoto me bebaka.—Yezaya 35:1, 2.
disaka bantu mingi na mutindu ya kuyituka.—Matayo 14:17-21.	ta manisa nzala na ntoto.—Nkunga 72:16.
belulaka bantu mingi.—Luka 18:35-43.	ta sala nde bantu yonso kuvanda ti sante ya mbote kibeni.—Yezaya 33:24.
vutulaka bantu na luzingu.—Luka 8:49-55.	ta futumuna bantu ya kufwa mpi ta manisa bampasi yina lufwa ke nataka.—Kusonga 21:3, 4.

6. Kimfumu ya Nzambi ta sala nde bantu kuvanda ti luzingu ya mbote na bilumbu ke kwisa

Kimfumu ya Nzambi ta lungisa mbote-mbote mambu yina Yehowa kanaka ntete sambu na bantu. Bantu ta zinga mvula na mvula na paladisu na ntoto. Beno tala VIDEO sambu na kumona mutindu Yehowa ke sadila Mwana na yandi Yezu sambu na kulungisa mambu yina yandi ke kana kusala sambu na bantu.

VIDEO: Mambu ya Kitoko Yina Nzambi Ta Sala na Bilumbu Ke Kwisa (4:38)

Beno tanga Nkunga 145:16 mpi na nima beno pesa mvutu na ngiufula yai:

Inki mpila nge ke kudiwa mutindu nge me zaba nde Yehowa ta “lungisa nzala ya konso kima ya kele na luzingu”?

BANTU YA NKAKA KE TUBAKA NDE: “Bampasi lenda mana kana bantu ya mbote kukota na guvernema.”

Inki bampasi Kimfumu ya Nzambi ta manisa yina bimfumu ya bantu lenda kuka ve?

NA BUNKUFI

Kimfumu ya Nzambi ta lungisa mambu yina Nzambi ke kana kusala. Yo ta kumisa ntoto ya mvimba paladisu mpi bantu yonso ya mbote ta zinga kuna mpi ta sambilaka Yehowa mvula na mvula.

Inki Nge Me Simba?

Inki mutindu Kimfumu ya Nzambi ta santisa zina ya Yehowa?
Inki ke ndimisa nge nde Kimfumu ya Nzambi ta sala mambu ya Biblia ke tubaka?
Na kati ya mambu yina Kimfumu ya Nzambi ta sala, nki yo nge ke vingila kumona ti nzala ya ngolo?

Dati ya beno me manisa kitini yai:

Mambu ya Kusala

Sadila trakiti Kimfumu ya Nzambi Kele Nki? sambu na kuyantika disolo ti muntu.

Mambu ya Nkaka:

Your other goal

TALA MPI

Tala kana Armagedoni kele nki.

“Bitumba ya Armagedoni Kele Nki?” (Disolo ya kele na jw.org)

Tala mambu yina ta salama na nsungi yina Yezu bingaka nde “mpasi ya nene.”

“Mpasi ya Nene Kele Inki?” (Disolo ya kele na jw.org)

Tala mutindu mabuta lenda yindula mambote yina Kimfumu ya Nzambi ta natila beto na Paladisu.

Kudimona na Paladisu (1:50)

Na disolo “Bangiufula Mingi ya Mono Vandaka Kudiyula Vandaka Kuyangisa Mono,” tala mutindu muntu mosi ya mubulu zwaka bamvutu na bangiufula yina yandi vandaka kudiyula.

“Biblia Ke Sobaka Luzingu ya Bantu” (Disolo ya kele na Nzozulu ya Nkengi)