Longuka na Ndinga ya Nzambi

Sambu na Nki Bakristu Kebakaka Mbotika?

Disolo yai kepesaka bamvutu na bangyufula yina ziku nge mekudiyulaka mpi kemonisaka kisika nge lenda baka bamvutu na Biblia na nge. Bambangi ya Yehowa tasepela na kusolula ti nge na yina metala bangyufula yango.

1. Mbotika ya Bukristu ketendula nki?

Mbotika kele mfunu sambu na kuvanda ti bangwisana ya mbote ti Nzambi. Yo yina, Mukristu fwete baka ve mbotika ntangu yandi kele mwana fyoti kansi ntangu yandi meyela sambu na kulonguka mambu yina metala Nzambi mpi kukuma longoki ya Yezu. (Bisalu 8:12; 1 Piere 3:21) Ntangu beto kelongukaka mpi kesadilaka mambu yina Yezu tumaka beto, beto kekumaka balongoki na yandi.​—Tanga Matayo 28:19, 20.

Na bilumbu ya bantumwa ya Yezu, bantu mingi sukininaka ve na kulonguka mambu ya metala Nzambi mpi Yezu. Mumbandu, ntangu muntu mosi zabaka nde lufwa ya Yezu mekangulaka nzila sambu na luguluku, kukonda kusukinina yandi kumaka longoki. Bubu yai, bantu mingi ya masonga meponaka na kukuma balongoki ya Yezu.​—Tanga Bisalu 8:26-31, 35-38.

 2. Sambu na nki Yezu bakaka mbotika?

Yezu vandaka ti bamvula kiteso ya 30 ntangu Yoane Mbotiki botikaka yandi na Nzadi Yordani. Mbotika ya Yezu monisaka lukanu na yandi sambu na kusala luzolo ya Nzambi. (Baebreo 10:7) Dyambu yai ketadila mpi luzingu yina yandi pesaka bonso kimenga sambu na masumu ya bantu. Nkutu, na ntwala ya kukwisa na ntoto Yezu vandaka kuzola mpi kulemfukila ntangu yonso Tata na yandi Yehowa.​—Tanga Marko 1:9-11; Yoane 8:29; 17:5.

 3. Sambu na nki Mukristu fwete baka mbotika?

Luzingu na beto meswaswana ti ya Yezu sambu beto butukaka bantu ya masumu. Kansi, lufwa ya kimenga ya Yezu mesalaka nde beto vanda ti bangwisana ya mbote ti Nzambi. (Roma 5:10, 12; 12:1, 2) Ya kyeleka, beto lenda kuma bantu ya dibuta na yandi. (2 Korinto 6:18) Inki mutindu beto kezwaka dibaku yina? Beto kekudipesaka na Yehowa ntangu beto kesalaka kisambu na kinsweki mpi kesilaka na kusala luzolo na yandi na luzingu na beto ya mvimba. Na nima ya kudipesa mutindu yina, beto kemonisaka yo na mbotika yina beto kebakaka na meso ya bantu yonso.​—Tanga Matayo 16:24; 1 Piere 4:2.

 4. Inki mutindu nge lenda kudibongisa sambu na kubaka mbotika?

Bambangi ya Yehowa kelongukaka Biblia ti konso muntu yina kezola kukwenda penepene na Nzambi. Kulonguka Biblia mpi kukwenda na balukutakanu ya Bukristu takumisa zola mpi lukwikilu na nge ngolo na Nzambi. Yo tasadisa nge mpi na kuyedisa bikalulu ya mbote. Kuyedisa zola, lukwikilu mpi bikalulu yankaka yina kesepedisaka Nzambi tasadisa nge na kuzinga na kuwaka ti lusilu na nge ya kusadila Yehowa kimakulu.​—Tanga Yoane 17:3; Baebreo 10:24, 25.

Sambu na kuzaba mambu mingi, tala kapu 18 ya mukanda yai, Inki Biblia Kelongaka Mpenza?, yina Bambangi ya Yehowa mebasisaka.