Bangiufula ya Batangi

Beto tala bamvutu yina Biblia ke pesa na bangiufula yina.

Bisalu 24:15 ke monisa nde ‘lufutumuku ta vanda sambu na bantu ya lunungu mpi bantu ya kukonda lunungu.’ Bantu ya lunungu kele bantu yina vandaka kulemfukila Nzambi na ntwala nde bo fwa. Yo yina bazina na bo kele na mukanda ya luzingu. (Mal. 3:16) Na kati ya bantu ya lunungu, beto lenda tanga mpi bantu yina zwaka ve dibaku ya mbote ya kulonguka mambu ya Yehowa. Yo yina bazina na bo kele ve na mukanda ya luzingu.

Yoane 5:28, 29 ke tubila mpi bimvuka yina zole ya Bisalu 24:15 ke tubilaka. Yezu tubaka nde “bayina salaka mambu ya mbote” ta futumuka “sambu na lufutumuku ya luzingu, mpi bayina salaka mambu ya mbi sambu na lufutumuku ya kusambisa.” Bantu ya lunungu kele bantu yina salaka mambu ya mbote na ntwala nde bo fwa. Bo ta futumuka sambu na luzingu sambu bazina na bo kele dezia na mukanda ya luzingu. Kansi bantu ya kukonda lunungu kele bantu yina salaka mambu ya mbi na ntwala nde bo fwa. Bo ta futumuka sambu na lufutumuku ya kusambisa. Bazina na bo kele ntete ve na mukanda ya luzingu mpi Yehowa ta pesa bo ntangu sambu bo monisa kana bo ta sadila yandi to ve. Na ntangu yina, bo ta vanda ti dibaku ya kulonguka mambu ya Yehowa mpi ya kusala mambu yina ta pusa Yehowa na kusonika bazina na bo na mukanda ya luzingu.

Kusonga 20:12, 13 ke tendula nde bantu yonso ya ta futumuka fwete lemfuka na ‘mambu yina ta vanda ya kusonika na barulo’ disongidila, bansiku ya mpa yina Nzambi ta pesa beto na nsi-ntoto ya mpa. Yehowa ta fwa bantu yina ta lemfukila yandi ve.—Yez. 65:20.

Daniele 12:2 ke tuba nde bantu ya nkaka yina me fwaka ta telama “sambu na luzingu ya mvula na mvula mpi bankaka sambu na nsoni mpi sambu na kuvweza ya mvula na mvula.” Verse yina ke tubila mambu yina ta kumina bantu yina ta futumuka. Bankaka ta futumuka sambu na “luzingu ya mvula na mvula” kansi bankaka sambu na “kuvweza ya mvula na mvula.” Yo yina na nsuka ya bamvula 1 000 bantu ya nkaka ta baka luzingu ya mvula na mvula, kansi bankaka ta fwa kimakulu.—Kus. 20:15; 21:3, 4.

Beto tadila mbandu mosi. Beto lenda fwanisa bimvuka zole ya bantu yina ta futumuka ti bantu yina ke zola kuzinga na insi ya nzenza. Bantu ya lunungu kele bonso bantu yina bo me pesa viza ya kisalu to viza ya kuzinga sambu na kuzinga na kimpwanza na insi yina. Kansi bantu ya kukonda lunungu kele bonso banzenza yina bo me pesa viza ya bilumbu fioti to viza ya bo ke pesaka bantu yina ke zola kutala insi. Banzenza yina fwete zitisa bansiku ya insi yina sambu bo pesa bo nswa ya kulanda kuzinga na insi yina ya mpa. Mutindu mosi, bantu ya kukonda lunungu yina ta futumuka fwete lemfukila bansiku ya Yehowa mpi bo fwete monisa nde bo kele bantu ya lunungu sambu bo bikala na Paladisu. Bo lenda pesa ntete bantu yina ke kwenda na insi ya nkaka konso viza yina kansi banzenza ya nkaka lenda bikala na insi yina bantangu mingi, kansi bankaka bo lenda kula bo. Bankwa ya insi ta baka lukanu na kutadila bikalulu ya banzenza yina na insi. Mutindu mosi mpi, Yehowa ta sambisa bantu yonso yina ta futumuka na kutadila kwikama na bo mpi bikalulu na bo na nsi-ntoto ya mpa.

Yehowa kele Nzambi ya zola mpi Nzambi ya lunungu. (Kul. 32:4; Nk. 33:5) Yandi ta monisa zola na yandi mutindu yandi ta futumuna bantu ya lunungu mpi bantu ya kukonda lunungu. Yehowa ta lomba nde bo yonso kulemfukila bansiku na yandi ya me tala mambu ya mbote mpi mambu ya mbi. Kaka bantu yina ta zola Yehowa mpi ta lemfukila bansiku na yandi bantu ta zinga mvula na mvula na nsi-ntoto ya mpa.