Oshoongalele shomafiku atatu osho tashi ke tu tulumukifa pamhepo
1. Ouwa ulipi hatu dulu oku ka mona poshoongalele shoshitukulwa shoneudo?
1 Ofimbo ovanhu mounyuni waSatana tava fi ondjala yopamhepo, Jehova ota twikile okupalula ovapiya vaye neendja dopamhepo. (Jes. 58:11) Efiloshisho limwe olo Jehova ha longifa opo e tu pameke pamhepo olo oshoongalele shoshitukulwa osho hashi danwa omudo keshe. Ndele eshi oshoongalele shoneudo tashi ehene popepi, mbela ongahelipi hatu dulu okulilongekida opo tu ka tulumukifwe notu ka tulumukife yo vamwe pamhepo? — Omayel. 21:5.
2. Omalongekido elipi twa pumbwa okuninga komesho yefimbo?
2 Ngeenge ino ninga natango omalongekido, konga efimbo opo u liunganeke nawa nokupula efudo koilonga opo u dule oku ka kala poshoongalele shoshitukulwa omafiku aeshe atatu. Mbela omwa diladila ngoo nale kutya otashi ke mu pula efimbo li fike peni efiku keshe eshi tamu i koshoongalele opo mu dule oku ka fika kuyele nokukonga apa tamu ka kala omutumba ofimbo oshoongalele inashi hovela? Inatu hala nandenande tu pitililwe po keendja dopamhepo tadi tungu odo Jehova e tu longekidila! (Jes. 65:13, 14) Owa ninga ngoo nale omalongekido e na sha naapo to ka kala nosho yo kutya oto ka ya ngahelipi koshoongalele?
3. Omaetepo elipi tae ke tu kwafela nosho yo omaukwaneumbo etu tu mone ouwa pauyadi moipopiwa oyo tai ka yandjwa poshoongalele?
3 Oshike tashi ke ku kwafela uha ka kale to twalwatwalwa pefimbo lomitumba? Ngeenge otashi shiiva, kala ho kofa sha wana oufiku keshe pefimbo loshoongalele. Eshi taku yandjwa oipopiwa, kala to tale komupopi, to kongo omishangwa adishe mOmbibeli yoye nokuninga omadidilikoshango e li pauxupi. Otashi ka kala yo shiwa ngeenge oukwaneumbo keshe owa kala omutumba pamwe opo ovadali va dule okukwafela ovana vavo va yandje filufilu elitulemo. (Omayel. 29:15) Oukwaneumbo weni otau dulu yo okukala hau kundafana konguloshi keshe oitwa ya fimanenena oyo ya popiwa poshoongalele. Ndele opo oukwaneumbo weni u mone ouwa nokuli nokonima yoshoongalele, otamu dulu okulongifa efimbo lonhumba mEfiku lElongelokalunga lOukwaneumbo weni opo mu kundafane oitwa yonhumba yokondadalunde oyo mwa hala okutula moilonga.
4. Ongahelipi hatu dulu okukwafela vamwe momaongalo etu opo navo va ka mone ouwa poshoongalele?
4 Kwafela vamwe navo va dule oku ka mona ouwa poshoongalele: Otwa hala yo vamwe navo va ka mone ouwa poshoongalele. Mbela meongalo leni omu na ovaudifi ovanamido ile oohandimwe ovo va pumbwa ekwafo opo va dule okuya koshoongalele? Mbela ito dulu oku va kwafela? (1 Joh. 3:17, 18) Ovakulunhuongalo, naunene tuu ovo ve li ovapashukili veengudu domomapya, ove na okufya oshisho opo ovaudifi ovo va pewe ekwafo olo va pumbwa?
5. Oufo vokushiva ovanhu koshoongalele otava ka yandjwa ngahelipi? (Tala yo oshimhungu osho shi li pombada.)
5 Ngaashi twa kala hatu ningi monakudiwa, oshikonga shokushiva ovanhu koshoongalele otashi ka hovela ofimbo ku na oivike itatu oshoongalele shi danwe. Eongalo keshe oli na okulitulila po elalakano lokuyandja oufo aveshe ovo la tuminwa nokushiva vahapu moshitukulwa shalo ngaashi tashi shiiva. Ngeenge oukwaneumbo weni owa fiye po oufo konima eshi oshikonga sha pwa, omu na okuya navo koshoongalele opo mu dule oku ke va longifa ngeenge tamu yandje oundombwedi wohangelela. Otamu ka pewa ouyelele wa wedwa po u na sha naasho koshoongalele mEtitano. Oufo ovo mu shii kutya oukwaneumbo weni itau ke va longifa ofimbo mu li modoolopa omo tamu ningilwa oshoongalele otamu dulu oku va yandja kuumwe womovayakuli eshi tamu uya ponhele opo tapa ka ningilwa oshoongalele. Alikana lifiila po okafo kamwe keshivo molwaashi otaka ka longifwa moshipopiwa shaxuuninwa mOsoondaxa.
6. Ongahelipi hatu dulu oku ka ulika poshoongalele kutya otu na eenghedi diwa?
6 Eenghedi diwa ohadi tulumukifa vamwe: Molwaashi otu li pefimbo opo ovanhu ve ‘lihole vo vene’ noihava yavelele omaliudo avamwe, itashi ka kala tuu tashi tulumukifa okukala mokati kOvakriste vakwetu ovo tava kendabala okukala ve na eenghedi diwa! (2 Tim. 3:2) Ohatu ka ulika kutya otu na eenghedi diwa ngeenge otwa kala twa ngungumana nokuninga oinima palandulafano eshi hatu i monhele omo tamu ka ningilwa oshoongalele nosho yo okuumbulila ashike oipundi oilyo yomaukwaneumbo etu ile ovo twa enda navo mosheendifo shimwe ile ovakonakonimbibeli vetu. Otu na yo okudulika komunashipundi ngeenge okwe tu lombwele tu kale omutumba opo tu pwilikine komusika oyo tai ka tetekela omutumba keshe woshoongalele. Otashi ka kala yo shiwa okukaleka eengodi detu dopeke nosho yo oikwaelektronika ikwao monghalo omo itai piyaaneke vamwe. Ohatu ka ulika yo kutya otu na eenghedi diwa mokuhenuka okukala hatu popi, hatu tumine vamwe omatumwalaka, hatu li ile hatu endaenda nopehe na etomheno lasha fimbo oshoongalele shi li metifa.
7. Ongahelipi hatu dulu okutulumukifwa nosho yo okutulumukifa ovamwatate eshi hatu endafana navo?
7 Eendafano olo tali tulumukifa: Oyoongalele ohai tu pe omhito ya wedwa po yokuhafela oukumwe nosho yo oumwainafana wopaKriste. (Eps. 133:1-3) Omolwashike ito katuka eenghatu u ‘mbwalangadje’ moku ka popifa ovamwatate novamwameme vokomaongalo amwe ovo ve li poshoongalele? (2 Kor. 6:13) Oto dulu okulitulila po elalakano li na sha nokushiivafana nomunhu nande umwe ile oukwaneumbo umwe efiku keshe loshoongalele. Efimbo lomusha otali ka kala omhito iwa yokuninga ngaho. Onghee hano, etelela omusha u li paunafangwa opo u dule oku ka lila ponhele yoshoongalele noku ka hafela eendafano navamwe, ponhele yoku ka landa oikulya ile u ka lye korestoulanda yonhumba oyo i li popepi. Okuninga ngaho otashi dulika ku ke kupe omhito yokupanga oukaume tau kalelele navamwe ovo wa li uhe shii nale.
8. Omolwashike tu na okuliyamba tu ka kwafele poshoongalele, nongahelipi hatu dulu oku shi ninga?
8 Ihashi tulumukifa tuu okulonga pamwe novalongelikalunga vakwetu oilonga iyapuki! Mbela ito dulu okuliyamba u ka kwafele oshikondo osho shi na oshinakuwanifwa shokuwapaleka ile eongalo leni ngeenge li na olufo lokuwapaleka? (Eps. 110:3) Ngeenge ino pulwa u ka kwafele moilonga yonhumba poshoongalele, alikana ninga ekwatafano nOshikondo shOilonga yEliyambo poshoongalele. Ngeenge pe na ovanhu vahapu tava kwafele, oilonga ohai kala ipu noihafifa.
9. Omolwashike tu na okuyandja elitulemo la wedwa po kelihumbato nosho yo keholokepo letu pefimbo loshoongalele?
9 Ohatu dulu okutulumukifa vamwe okupitila melihumbato letu liwa: Otu na okukala hatu lihumbata nawa oule womafiku aeshe atatu oshoongalele ndele hapefimbo ashike lomitumba. Ovo tave tu tale ofimbo tu li modoolopa omo tamu ningilwa oshoongalele ove na okukala ve shi liwetele kutya otwa yooloka ko kwaavo vehe fi Eendombwedi. (1 Pet. 2:12) Otu na yo okudjala nokuliwapeka monghedi oyo tai fimanekifa Jehova, kutya nee osheshi hatu i konhele oko taku ka ningilwa oshoongalele, ile otu li meenhele omo hatu di ile omeerestoulanda. (1 Tim. 2:9, 10) Ngeenge otwa kala twa djala oukalata vetu voshoongalele, ovatali otave ke shi didilika mo kutya fye Eendombwedi daJehova. Osho otashi dulika shi ke tu pe omhito yoku va shiva koshoongalele noku va pa oundombwedi wa wedwa po.
10. Oshike tu na okuninga po opo ovanailonga vomeehotela nosho yo vomeerestoulanda va kale ve na etaleko liwa li na sha noshoongalele shetu?
10 Ongahelipi hatu dulu okulongela kumwe novanailonga vomeehotela, meerestoulanda nosho yo meenhele dikwao dokuyakula ovaenda? Katu na okuninga oshilaye tu fiilwe po eenduda dihapu di dulife pwaado twa pumbwa, molwaashi osho otashi ka imba ovaenda vamwe va mone eenhele. Ngeenge mohotela ile meenhele dovaenda omu yadi pefimbo opo twa hala okuya mo ile twa hala okufuta opo tu dje mo, otu na okuulika oukwatya welididimiko nonghenda. (Kol. 4:6) Otu na yo okupa ovanailonga vomeenhele odo okamaliwa kolupandu ngeenge ove tu kwafela okuhumbata ko keendjato detu, va wapaleka eenduda detu nomolwomayakulo makwao.
11. Oimoniwa ilipi tai ulike kutya ohatu dulu okuyandja oundombwedi muwa okupitila melihumbato letu lopaKriste?
11 Elihumbato letu liwa pefimbo loshoongalele otali ka ningifa vamwe va kale ve na etaleko la tya ngahelipi li na sha nafye? Oshifokundaneki shimwe osha popya shi na sha namwene wonhele imwe omo Eendombwedi hadi danene oyoongalele, oo a ti: “Ovanhu ovo ove na eenghedi diwa nohatu kala twa hafa ngeenge hatu va pe onhele ei omudo keshe.” Odula ya dja ko, omunhu umwe oo ehe fi Ondombwedi okwa li a kanifila ondjato yaye yoimaliwa mohotela imwe omo mwa li Eendombwedi daJehova pefimbo loshoongalele. Eshi Ondombwedi imwe ya li ya toola nokushunifa ondjato oyo noinima aishe oyo ya li mo komukulunhu wohotela oyo, omukulunhu oo okwa li a lombwela mwene wondjato oyo a ti: “Owa ninga ashike elao eshi Eendombwedi daJehova da li tadi danene oshoongalele shado monhele imwe oyo i li popepi [nohotela] nodo adike da li di yadi mo mohotela, ngeno ondjato yoye otashi dulika ino i mona vali.”
12. Eshi oshoongalele tashi ehene popepi, otu na okulitulila po elalakano lilipi, nomolwashike?
12 Oshoongalele shomudo ou oshi li poduka. Osha pula efimbo lihapu neenghono nopa ningwa eenghendabala dihapu opo oipopiwa nosho yo ashishe osho tashi ka ningwa poshoongalele shi kale odjo yetulumuko. Onghee hano, lilongekida oku ka kala poshoongalele osho omafiku aeshe atatu opo u dule oku ka hafela osho Jehova nehangano laye ve ku longekidila. Kala wa tokola toko oku ka tulumukifa vamwe okupitila meenghedi doye diwa, mokweendafana navamwe nehafo nosho yo okupitila melihumbato loye liwa. Opo nee, ove nosho yo vamwe otashi dulika mu ka kale mu udite ngaashi umwe oo a li poshoongalele shodula ya dja ko, oo a ti: “Itandi dimbuluka oshiningwanima shimwe vali sha li shitunhula shi dulife eshi!”
[Eendjovo dididilikwedi pepandja 4]
Ngaashi twa kala hatu ningi monakudiwa, oshikonga shokushiva ovanhu koshoongalele otashi ka hovela ofimbo ku na oivike itatu oshoongalele shi danwe
[Eendjovo dididilikwedi pepandja 6]
Otu na okudjala nokuliwapeka monghedi oyo tai fimanekifa Jehova, kutya nee osheshi hatu i konhele oko taku ka ningilwa oshoongalele, ile otu li meenhele omo hatu di ile omeerestoulanda
[Eendjovo dididilikwedi pepandja 7]
Kala wa tokola toko oku ka tulumukifa vamwe okupitila meenghedi doye diwa, mokweendafana navamwe nehafo nosho yo okupitila melihumbato loye liwa
[Oshimhungu pepandja 4]
Omadimbulukifo e na sha noshoongalele shoshitukulwa shomo 2011
◼ Efimbo: Oshoongalele shoshitukulwa otashi ka hovela po 9:00 wongula omafiku aeshe atatu. Ngeenge okwa ningwa eshiivifo kutya omusika oyo hai tetekele omutumba woshoongalele otai ka hovela, atusheni otu na okukala omutumba opo oshoongalele shi hovele monghedi i shii okufimanekwa. MEtitano, oshoongalele otashi ka dimbuka po 4:15 komatango, mOlomakaya opo 4:30 komatango, nomOsoondaxa opo 3:05 komatango.
◼ Eenhele dokupaakinga: Poyoongalele aishe yoitukulwa, ovanhu otava ka paakinga eehauto oshali, notaku ka paakingwa palandulafano. Ovanhu otava ladipikwa va longife oshihauto shimwe apa tashi shiiva molwaashi eenhele dokupaakinga ohadi kala alushe dinini.
◼ Eenhele dokunangala: Ovaudifi ovo va hala okuninga eindilo leenhele dokunangala ove na okuyadeka ofooloma yedina Special Needs Room Request (CO-5). Okomitiye yOilonga yEongalo oi na okushilipaleka ngeenge omuudifi okwa wana ngoo okupewa onhele yokukala, tai landula omifindalandu odo di li mofooloma nosho yo odo di li monhumwafo yo 14 Desemba 2010, oyo ya li ya shangelwa ovakulunhuongalo aveshe. Ovaudifi ovo tava dulu okukongelwa eenhele ovovo ashike ve na edina liwa meongalo nosho yo ovo ve na ounona ve na elihumbato liwa.
◼ Okuumbulila vamwe oipundi: Oipundi otai dulu ashike okuumbulilwa ovo to ende pamwe navo mohauto ile ovo hamu di navo meumbo limwe nosho yo ovo to konakona navo Ombibeli. — 1 Kor. 13:5.
◼ Omusha: Oto indilwa u etelele omusha woye opo uha fiye po onhele yoshoongalele u ka lande oikulya pefimbo lomusha. Oto dulu okulongifa okandjato kanini kokutalaleka oikulya, oko taka dulu okutulwa koshi yoshipundi. Eendjato dinene domaukwaneumbo dokutalaleka oikulya odi na okutulwa opo to ulikilwa kovayakuli. Oikwatelwa yoikwamakende nosho yo oikunwa yoalkoholi inai pitikilwa mo monhele yoshoongalele.
◼ Omayambidido: Ohatu dulu okuulika olupandu letu omolwomalongekido oshoongalele mokuyandja omayambidido nehalo liwa e na sha noilonga yomounyuni aushe kOlupale lOuhamba letu ile poshoongalele. Ngeenge owa hala okuyambidida notyeke, shilipaleka nOkomitiye yOshoongalele kutya ou na okushanga ko edina lilipi.
◼ Oiponga nosho yo ekwafo lopaulumomumbwe: Ngeenge opa holoka onghalo oyo tai pula omunhu a pewe ouhaku meendelelo poshoongalele, ninga ekwatafano nomuyakuli oo e li popepi naave, oo ta ka shiivifila diva oshikondo shEkwafo lOtete opo ovo tava longo moshikondo osho va konakone kutya onghalo oyo oya kwata moiti shi fike peni nokuyandja ekwafo.
◼ Omiti: Ngeenge oho nu omiti odo wa shangelwa kundokotola, alikana etelela da wana molwaashi itadi ka kala po opo hapa pewa ovanhu omakwafo opaulumomhumbwe.
◼ Eenghaku: Omudo keshe poshoongalele ohapa holoka oiponga ihapu oyo hai etifwa keenghaku. Oshiwa okulanda eenghaku tadi wapalele, odo omunhu to wana mo nawa, odo tadi ke ku kwafela uhe limonife oshiponga ngeenge to ende keetalapa nosho yo peenhele di lili noku lili.
◼ Okukwata omawi: Oilongifo yokukwata omawi kai na okutulwa keepulaka dolusheno ponhele yoshoongalele ile komambako, nokai na okulongifwa monghedi oyo tai piyaaneke vamwe.
◼ Outemba vokulonga ounona okweenda: Outemba vokulonga ounona okweenda kave na okweetwa monhele yoshoongalele. Ashike outemba vounona vokukala omutumba va mangelwa mo otava dulu okulongifwa nokukala polwaamba lovadali.
◼ Omaadi okulishasha: Oyoongalele yoshitukulwa ihapu ohai ningilwa meenhele dihe na omhepo ya wana omo hamu longifwa ashike omashina okupepela omhepo. Onghee hano, otashi ka kala shiwa okuhalongifa omaadi okulishasha oo e na edimba li na eenghono, olo tali dulu okuninga nai ovo ve na oupyakadi wokufuda ile omaupyakadi amwe. — 1 Kor. 10:24.
◼ Ofooloma yokulandula ovanhu ovo ve na ohokwe: Ofooloma yedina Please Follow Up (S-43) otai dulu okulongifwa opo ku yandjwe ouyelele u na sha novanhu ovo va ulika ohokwe eshi va pewa oundombwedi wohangelela pefimbo loshoongalele. Ovaudifi ove na okweetelela ofooloma imwe ile mbali koshoongalele. Eefoloma odo da yadifwa otadi dulu okuyandjwa konduda yomambo ile kuhamushanga weongalo leni ngeenge mwa shuna komaongalo. — Tala okafo Oukalele Wetu wOuhamba kaNovemba 2009, ep. 4.
◼ Eerestoulanda: Natu fimanekifeni edina laJehova okupitila melihumbato letu liwa ngeenge twa ya keerestoulanda. Moilongo ihapu, oshi li onghedindjikilile okuyandja olupandu lokamaliwa keepresenda 10 fiyo 15, she likolelela keyakulo.
◼ Oilonga yeliyambo: Okukala poshoongalele otaku ke tu etela ehafo linene, unene tuu ngeenge otwa kufa ombinga moilonga yeliyambo. (Oil. 20:35) Keshe oo a hala okukufa ombinga moilonga yeliyambo poshoongalele oku na okuya kOshikondo shOilonga yEliyambo. Ovanyasha ovo ve li meni lomido 16 navo otava dulu okukwafela poshoongalele tava longo mepashukilo lovadali ile lovatekuli vavo ile lovakulunhu vamwe ngeenge ova pewa epitikilo kuumwe womovadali.
◼ Omaimbilo: Omaongalo otaa dulu okulideula komesho yefimbo omaimbilo oo taa ka imbwa poshoongalele. Omaimbilo oo taa ka imbwa mEtitano: 5, 18, 31, 30, 86 nosho yo 19. Omaimbilo oo taa ka imbwa mOlomakaya: 93, 40, 59, 24, 89 nosho yo 134. Nomaimbilo oo taa ka imbwa mOsoondaxa: 109, 99, 133, 69, 64 nosho yo 2.
[Oshimhungu pepandja 5]
Ongahelipi hatu dulu okuyandja oufo vokushiva ovanhu koshoongalele?
Otu na okuyelifila omunhu pauxupi shi na sha nokafo, opo tu dule okushiiva ovanhu vahapu moshitukulwa shetu. Ohatu dulu okutya: “Mwa lele po! Ohatu kufa ombinga moshikonga shokushiva ovanhu koshoongalele osho tashi ka danwa mounyuni aushe. Okafo koye oko aka. Ouyelele muhapu u na sha noshoongalele osho owa yelifwa mokafo.” Ulikila omuneumbo epandja lotete lokafo keshivo molwaashi olihokwifa neenghono. Popya nexwamo. Ngeenge to yandje okafo oko momaxuliloshivike, oto dulu yo okuyandja oifo opo tashi wapalele.