28-قازان، سارسەنبى
بىزدە ٴماسىحتىڭ وي-ساناسى بار (قور. 1-ح. 2:16).
يسا ەحوبانى بارلىق اقىل-ويىمەن ٴسۇيدى. ول وزىنە قاتىستى قۇدايدىڭ وي-نيەتىن جاقسى ٴبىلدى جانە سول نيەتىنە ساي ارەكەت ەتۋ ٷشىن ازاپ شەگۋگە دە دايىن بولدى. اكەسىنىڭ وي-نيەتىن جۇزەگە اسىرۋعا بار نازارىن اۋدارعاندىقتان، يسا وزىنە بەرىلگەن تاپسىرمادان ٴبىر ساتكە دە الاڭدامادى. باسقا ەلشىلەر سياقتى پەتىر دە ٴجيى يسانىڭ قاسىندا ٴجۇردى. سوندىقتان ول يسانىڭ سوزدەرىنە، ارەكەتتەرىنە قاراپ، ونىڭ قالاي ويلاناتىنىن ٴتۇسىندى. پەتىر ٶزىنىڭ ٴبىرىنشى حاتىندا ماسىحشىلەردى يسانىكىندەي «وي قالىپ تانىتۋعا دايىن بولىڭدار» دەپ شاقىرعان (پەت. 1-ح. 4:1). بۇل تارماقتاعى «دايىن بولىڭدار» دەپ اۋدارىلعان تىركەس ٴتۇپنۇسقادا اسكەري تەرمين، سوزبە-ٴسوز «قارۋلانىڭدار» دەپ اۋدارىلادى. دەمەك، ٴبىز يسا سياقتى ويلانساق، بەينەلى ماعىنادا قارۋلانىپ، كۇناكار بەيىمدىلىكتەرىمىزگە جانە شايتاننىڭ دۇنيەسىنە قارسى سوعىسۋعا دايىن بولامىز (قور. 2-ح. 10:3—5؛ ەفەس. 6:12). كم25.03 8، 9-ب.، 1—3-ابز.
29-قازان، بەيسەنبى
ادامنىڭ وي-نيەتى تەرەڭ قۇدىقتاعى سۋداي، قىراعى جان ونى تارتىپ شىعارار (ناق. س. 20:5).
كەزدەسىپ جۇرگەندە ادام جايلى قانداي جايتتاردى ٴبىلىپ الۋىڭىز قاجەت؟ ادامعا قاتتى باۋىر باسپاي تۇرعاندا، ماڭىزدى جايتتاردى، مىسالى ونىڭ ماقساتتارى جايلى ٴبىلىپ العىڭىز كەلەر. ادامنىڭ ىشكى بولمىسىن كورە الۋ ٷشىن نە ىستەسەڭىز بولادى؟ مۇنىڭ ەڭ جاقسى جولى — اشىق سويلەسۋ، سۇراقتار قويۋ جانە مۇقيات تىڭداۋ. بۇل ٷشىن اڭگىمەلەسۋگە جاعداي جاسايتىن ىستەرمەن اينالىسۋعا تىرىسىڭىزدار (جاق. 1:19). مىسالى، بىرگە تاماقتانىڭىزدار، دالادا قىدىرىڭىزدار جانە بىرگە ۋاعىزداڭىزدار. دوستارىڭىزبەن نە وتباسىڭىزبەن ۋاقىت وتكىزگەندە دە ٴبىر-ٴبىرىڭىزدى جاقسى تاني الاسىزدار. سونداي-اق كەزدەسىپ جۇرگەن ادامىڭىز ٵرتۇرلى جاعدايدا، ٵرتۇرلى ادامدارمەن ٶزىن قالاي ۇستايتىنىن بايقاڭىز. ول ٷشىن سونى كورۋگە كومەكتەسەتىن ىستەردى جوسپارلاڭىز. كم24.05 28-ب.، 6، 7-ابز.
30-قازان، جۇما
سۇيىكتى بالالارى رەتىندە قۇدايعا ەلىكتەڭدەر (ەفەس. 5:1).
الداعى ۋاقىتتا ٴبىزدى اۋىر قيىندىقتار كۇتىپ تۇر. سول كەزدە ٴبىز ەحوباعا بۇرىنعىدان دا بەتەر ارقا سۇيەۋىمىز كەرەك بولادى. ەحوبانىڭ ەجەلدەگى قىزمەتشىلەرىنىڭ جانە بۇگىندەگى كۋاگەرلەرىنىڭ وقيعالارى بىزگە ەحوبا ٶز قىزمەتشىلەرىن قولداۋ ٷشىن جارتاسقا ٴتان قاسيەتتەرىن قالاي تانىتقانىن بايقاۋعا كومەكتەسەدى. سول وقيعالار جايلى ٴجىتى ويلانىڭىز. سوندا ەحوبا ٴسىزدىڭ دە جارتاسىڭىز بولادى. سونداي-اق قاۋىمدى دا كوبىرەك نىعايتا الاسىز. مىسالى، يسا شيمونعا «تاس» دەگەندى بىلدىرەتىن كەفا (گرەكشە «پەتىر») دەگەن ەسىم بەرگەن (جوح. 1:42). بۇل پەتىردىڭ باۋىرلاستار ٷشىن جۇبانىش بولىپ، قاۋىمنىڭ مىزعىماستاي بەرىك بولۋىنا ۇلەس قوساتىنىن بىلدىرگەن. بۇگىندە قاۋىمداعى اقساقالدار «الىپ جارتاستىڭ ساياسىنا» تەڭەلەدى. بۇل ولاردىڭ قاۋىمداعىلار ٷشىن قورعانىش، پانا ەكەنىن جاقسى سيپاتتايدى (يشايا 32:2). ارينە، قاۋىمنىڭ يگىلىگى ٷشىن ٴبارىمىز دە ەحوبانىڭ جارتاسقا ٴتان قاسيەتتەرىنە ەلىكتەي الامىز. كم24.06 28-ب.، 10، 11-ابز.