Мұсаның 1-жазбасы

19 Екі періште кешке қарай Содом қаласына келді. Лұт бұл кезде қала қақпасының жанында отыр еді. Оларды көргенде, орнынан тұрып, алдарынан шықты да, жерге дейін иіліп тағзым етті+. 2 Сосын: “Мырзалар, құлыңыздың үйіне кіріп, түнеп шығыңыздар. Аяқтарыңызды жуатын су әкелейік. Ертең ертемен тұрып, жолға шығарсыздар”,— деді. Олар: “Рақмет, біз қала алаңында түнеп шығамыз”,— деп бас тартты. 3 Бірақ Лұт өтініп қоймаған соң, екеуі оған еріп, үйіне келді. Лұт мол дастарқан жайып, ашытқысыз қамырдан нан пісіріп әкелді. Қонақтар тамақтанып алды.

4 Олар ұйқыға жатар алдында, Содом қаласындағы ер адамдардың бәрі, жас баласынан кәрісіне дейін, топырлап келіп, үйді қоршап алды. 5 Лұтты айғайлап шақырып: “Кешкісін үйіңе келген ер кісілер қайда? Оларды бізге алып шық, олармен жақындасқымыз келеді”+,— деп тұрып алды.

6 Сонда Лұт сыртқа шығып, артынан есікті жапты да, 7 былай деді: “Бауырларым, зұлымдық жасамаңдаршы. 8 Менің пәк екі қызым бар. Сол екеуін шығарып берейін, оларға қалағандарыңды істеңдер. Тек бұл кісілерге тиіспеңдер, өйткені олар менің үйімді пана етіп келіп отыр ғой”+. 9 Бірақ тобыр: “Былай кет! Мынау өзі осында тұруға келген жалғыз жатжерлік бола тұра, бізге билік айтпақ қой. Қазір бізден тартатын сазайың олардікінен бетер болады!”— деді. Сөйтіп, Лұтты итермелеп, есікке ұмтылды да, оны бұзуға кірісті. 10 Сонда үйдегі кісілер қолдарын созып, Лұтты ішке тартып кіргізді де, есікті жауып қойды. 11 Ал есік алдында тұрған үлкенді-кішілі еркектердің бәрін соқыр етіп тастады. Олар кіретін есікті таба алмай, дал болды.

12 Содан соң үйдегі кісілер Лұтқа мынаны айтты: “Мұнда тағы жақындарың бар ма? Күйеубалаларыңды, ұл-қыздарың мен қалада тұратын барлық туыстарыңды осы жерден алып шық! 13 Біз бұл жерді жоймақпыз. Себебі Ехобаға қала тұрғындарының үстінен шағымданып зарлаған дауыстардың зор болғаны сонша+ — Ехоба бізді осы қаланы жою үшін жіберді”. 14 Сонда Лұт қыздарына үйленгелі жатқан күйеубалаларына барып: “Тезірек бұл жерден кетіңдер! Ехоба қаланы жоймақшы!”— деді. Бірақ күйеубалалары оны қалжыңдап тұр деп ойлады+.

15 Таң бозарып атып келе жатқанда, періштелер Лұтты асықтырып: “Бол, әйеліңді, қасыңдағы екі қызыңды ал да, осы қаланың күнәсіна бола өліп кетпес үшін, бұл жерден кет!”— деді+. 16 Лұт кетпей жүріп алған соң, Ехобаның оған жаны ашығандықтан+, олар Лұтты, әйелі мен екі қызын қолдарынан ұстап жетелей жөнелді де, қала сыртына алып шықты+. 17 Шыға салысымен, біреуі: “Жан сауғалап қаш! Артыңа қарама+, осы аймақтың еш жеріне де бөгелме+! Аман қалу үшін тауға қаш!”— деп бұйырды.

18 Сонда Лұт былай деді: “Ехоба, ол жаққа жібере көрмеші! 19 Сен құлыңа шапағатыңды түсіріп, жанымды аман сақтап+, зор мейірім* көрсеттің. Бірақ мен тауға қаша алмаймын, апатқа ұшырап, өліп қалам ба деп қорқамын+. 20 Жақын жерде кішкентай қалашық бар, соған қашайыншы. Соны паналасам бола ма? Ол кішкентай ғана қалашық қой. Сол жерде жаным аман қалар еді”. 21 Сонда ол Лұтқа: “Жарайды, тілегіңді орындап+, сен айтып тұрған қаланы жоймай-ақ қояйын+. 22 Тездет! Сол жаққа қаш, өйткені сен жеткенше, мен ештеңе істей алмаймын+”,— деді. Сондықтан да бұл қала Сиғор*+ деп аталатын болды.

23 Лұт Сиғорға күн шыға жетті. 24 Сол уақытта Ехоба Содом мен Ғомораның үстінен күкірт пен от жаудырды. Мұны Ехоба көктен жіберген еді+. 25 Осылай сол қалаларды, тұрғындары мен өсімдіктерін қоса алғанда, бүкіл аймақтың түгін қалдырмай күл-талқан етті+. 26 Ал Лұттың артында келе жатқан әйелі болса кері бұрылып қарады. Сонда ол тұз бағанаға айналды+.

27 Ыбырайым таң ата ерте тұрып, кеше өзі Ехобаның алдында тұрған жерге барды+. 28 Ол төменде жатқан Содом мен Ғомораға және олардың төңірегіндегі бүкіл аймаққа көз тастап еді, қорқынышты көріністі көрді: сол жерден кірпіш күйдіретін пештен шыққандай түтін будақтап көтеріліп жатты+! 29 Сонымен, Құдай Лұт тұрып жатқан аймақтағы қалаларды жоймақ болғанда, Ыбырайымды ескеріп, сол жерден Лұтты алып шыққан еді+.

30 Кейінірек Лұт Сиғорда+ тұруға қорқып, екі қызымен одан көшіп кетті. Ол таулы өңірге барып+, қыздарымен бір үңгірде тұрып жатты. 31 Бір күні үлкен қызы сіңлісіне: “Әкеміз қартайды, жұртта қалыптасқан әдет бойынша бізге үйленетін бұл маңда еркек жоқ. 32 Әкемізді шарапқа тойғызып, ұрпағын жалғастыру үшін онымен жатып шығайық”,— деді.

33 Олар сол түні әкелеріне көп шарап берді. Кейін үлкен қызы әкесімен жатып шықты, бірақ әкесі оның жатқанын да, тұрғанын да білмеді. 34 Келесі күні үлкені кішісіне: “Кеше түнде мен әкеммен жатып шықтым. Бүгін түнде оны тағы да шарапқа тойғызайық. Сен де онымен жат, осылай әкеміздің ұрпағын жалғастырайық”,— деді. 35 Олар сол түні тағы да әкелеріне көп шарап берді. Кейін кіші қызы әкесімен жатып шықты, бірақ әкесі оның жатқанын да, тұрғанын да білмеді. 36 Содан Лұттың екі қызы да әкесінен жүкті болды. 37 Үлкен қызы ұл туып, оның атын Моаб*+ деп қойды. Ол — бүгінгі моабтықтардың түп атасы+. 38 Кіші қызы да ұл туып, оны Бенамми* деп атады. Ол — қазіргі аммондықтардың+ түп атасы.