Қамыт кию

9, 10. Ертеде қамыт нені білдіретін және неге Иса адамдарды өзінің қамытын алуға шақырған?

⁹ Бәлкім, сендер Матай 11:28, 29-да (сілтемеде) Исаның: “Қамытымды қатар киісіп, үйреніңдер Өзімнен”,— деген сөздеріне көңіл аударған боларсыңдар. Ол заманда қарапайым жұмысшы өзін қамыт киіп жүргендей сезінуі мүмкін еді. Атам заманнан бері қамыт құлдықты не езгіні білдіретін метафора ретінде қолданылады (Жаратылыс 27:40; Леуіліктер 26:13; Заңды қайталау 28:48). Исаға кезіккен бір күнге жалданып істейтін жұмысшылардың көбісі тура мағынада иықтарына қамыт киіп ауыр жүктер таситын. Жасалғанына қарай қамыт мойынға немесе иыққа кигенде ыңғайлы болатын не оны жауыр қылатын. Иса өзі ағаш ұстасы болғандықтан, бәлкім, қамыт істеген де болар, әрі оны қалайша “ыңғайлы” болатындай етіп істеуді де білген болса керек. Қамыт киіп жұмыс істеу барынша жеңіл болуы үшін, сірә, ол оның денеге тиіп тұратын жерлерін былғарымен не матамен қаптайтын болған болса керек.

¹⁰ ‘Қамытымды қатар киісіңдер’ немесе басқа аудармаға сәйкес, “Менің қамытымды алыңдар” (СА) дегенде, Иса өзін жұмысшының мойны мен иықтарында “ыңғайлы” тұратын жақсы қамыт ұсынған адамға теңеген болса керек. Сосын ол: “Жүгім де жеңіл”,— деп қосты. Бұл, мұндай қамыт киіп жұмыс істеудің жағымсыз емес екенін, сондай-ақ жұмыстың да тым ауыр емес екендігін білдіретін. Негізінде, тыңдаушыларын Өзінің қамытын алуға шақырғанда Иса оларға сол уақыттың бар ауыртпалығынан лезде арылуды ұсынған жоқ. Алайда көзқарастарын Исаның іліміне сәйкес өзгерту арқылы олардың жандары жай тапқан. Үйреншікті өмір салты мен әдет-қылықтарын өзгерткендіктері де олардың өмірін жеңілдеткен болатын. Ал бәрінен бұрын, нақты, әрі берік негізі бар үміт өмірдің ауыртпалығын анағұрлым жеңілдеткен болатын.

Жанымызды рақатқа бөлеуге болады

11. Неге Иса бір қамытты екіншісіне ауыстыруды ұсынған жоқ деуге болады?

¹¹ Исаның бір қамытты екіншісіне алмастыруды ұсынбағанына көңіл аударыңдаршы. Бүгінде мәсіхшілер тұрып жатқан елдерде адамдардың үкіметі билік жүргізіп жатқаны сияқты, сол кезде де Рим үкіметі билігін жүргізе бермек еді. Римдіктердің салған салығы да сол күйінде төлене бермек еді. Ауру-сырқау мен күнкөріс мәселесі де сол күйі қалған болар еді. Адамдар бұрынғысынша күнә мен кемелсіздіктің ықпалында бола берер еді. Алайда, осыған қарамастан, Исаның ілімін қабылдайтын болса, олардың жаны рақатқа бөленер еді; бұл бүгінгі күні біз үшін де мүмкін нәрсе.

12, 13. Исаның көрсеткені бойынша, не нәрсе жанды рақатқа бөлейді және оның шақырғаны кейбіреулерге қалай әсер етті?

¹² Уақыт өте келе Исаның қамытты мысалға келтіргені әсіресе шәкірт дайындау ісіне қатысты екендігі анық болды. Иса үшін ең басты нәрсенің өзгелерге тәлім беру болғандығында күмән жоқ, әрі тәлім бергенде ол, Құдай Патшалығына ерекше көңіл аударатын (Матай 4:23). Сондықтан Исаның ‘қамытымды қатар киісіңдер’ деген сөздері оның соңынан еріп, өзі айналысқан іспен айналысу керек дегенді білдіргені сөзсіз. Ізгі хабарлардан біз Исаның қалай ақ жүректі адамдарды айналысып жүрген істерін өзгертуге талпындырғанын көреміз, ал адамдардың көпшілігі үшін айналысып жүрген істері өмірлерінде маңызды орын алатын. Петір, Әндір, Жақып пен Жохандарды Исаның қалай шақырғанын еске түсірейікші: “Соңымнан еріңдер! Мен сендерді балық аулағандарың сияқты бұдан былай адамдарды жинап әкелетін етемін” (Марқа 1:16—20). Иса өз өміріндегі ең маңызды істің сол балықшыларға өзі басшылық беріп, әрі көмектесуінің арқасында алдағы уақытта қандай қанағат әкелетінін көрсетті.

¹³ Исаны тыңдаған кейбір яһудилер оның ілімін түсініп, оның соңынан ерді. Лұқа 5:1—11 дейінгі тармақтарда суреттелген теңіздің жағасында болған бір оқиғаны көз алдымызға елестетіп көрейікші. Төрт балықшы түні бойы еңбектеніп, түк ұстай алмайды. Кенет, олардың аулары балыққа толып қалады! Бұл кездейсоқ нәрсе емес еді: Исаның ісі болатын. Олар жағаға көз тастайды да, Исаның ілімін тыңдауды аңсап тұрған топ-топ халықты көреді. Бұл сол төртеуіне айтылған: “Бұдан былай адамдарды жинап әкелетін боласың”,— деген сөздерді түсінуге көмектескен еді. Мұны олар қалай қабылдады екен? “Екі қайықты жағаға шығарғаннан кейін олар бәрін тастап, Исаға шәкірт болып ерді”.

14. а) Қазіргі уақытта қалайша жанымызды рақатқа бөлеуге болады? ә) Иса жанды рақатқа бөлейтін қандай хабарды жариялаған?

¹⁴ Исаның шақыруына біз де осылай жауап беруімізге болады. Адамдарды Киелі кітаптағы шындыққа үйрету жұмысы әлі де жүріп жатыр. Дүние жүзі бойынша алты миллионға жуық Ехоба Куәгерлері Исаның ‘қамытымды қатар киісіңдер’ деген үндеуіне құлақ асып, ‘адамдарды жинап әкелушілер’ болды (Матай 4:19). Біреулері үшін бұл іс толық уақытты қызметке айналды, ал өзге біреулері толық уақытты қызмет ете алмағанымен, қолдарынан келгенше қызмет етуде. Десе де, осы іске қатысып жүргендері олардың барлығының жандарын рақатқа бөлеп, өмірдің ауыртпалығын жеңілдетуде. Өйткені олар өздеріне ұнайтын іспен, яғни өзгелерге ізгі хабарды, “Құдай Патшалығы туралы Ізгі хабарды”, тарату ісімен айналысып жүр ғой (Матай 4:23). Жақсы хабар тарату адамға әрқашан да жағымды, ал мұндай ізгі хабар тарату тіптен жағымды. Киелі кітапта өмірдің ауыртпалығын анағұрлым жеңілдетуге болатындығына адамдардың көпшілігінің көзін жеткізуге арналған ең қажетті мәліметтер бар (2 Тімотеге 3:16, 17).

15. Қалай өмір сүру керек екендігіне қатысты Исаның ілімінен сендер қандай пайда көре аласыңдар?

¹⁵ Құдай Патшалығы туралы жақында ғана білген адамдар, Исаның қалай өмір сүру керек екендігіне қатысты ілімінің қазірдің өзінде қандай да бір шамада пайдасын көруде. Көпшілігі Исаның ілімінің жанды рақатқа бөлейтінін, әрі адамның өмірін толықтай өзгертуіне көмектесетінін растайды. Исаның өмірі мен қызметінен көрінетін принциптердің кейбіреулерін әсіресе Матай, Марқа және Лұқа жазған ізгі хабарларда әңгімеленгендерін қарастыратын болсаңдар, сендер де мұның растығына көз жеткізе аласыңдар.

Жанды рақатқа бөлеудің жолы

16, 17. а) Исаның негізгі ілімдерінің кейбіреулерін қайдан табуға болады? ә) Исаның ілімін ұстанғанда жанымыз рақатқа бөлену үшін не істеу керек?

¹⁶ Б. з. 31 жылы Иса бүгінгі күнге дейін дүние жүзіне танымал баяндамасын жасады. Оны жиі Таудағы уағыз деп атайды. Аталмыш баяндама Матай жазған Ізгі хабардың 5-тен 7-дейінгі және Лұқа жазған Ізгі хабардың 6-тарауында жазылған, әрі онда Исаның ілімдерінің көпшілігі жинақталған. Ал оның өзге ілімдерін Ізгі хабарлардың басқа бөліктерінен табуға болады. Неге осы тарауларды мұқият, әрі терең ой жүгірте отырып оқып шықпасқа? Исаның ілімінің күші сенің ой қалпың мен көзқарасыңа әсер еткей.

¹⁷ Исаның ілімдерін әр түрлі етіп топтастыруға болады. Оларды бір ай бойы күніне бір ілімді қарастыруға болатындай етіп топтастырып көрейік, әрі ондағы мақсатымыз оларды өмірде қолдану болсын. Ол үшін не істеу керек? Оларды ат үсті қарап шыға салу жеткіліксіз. Исадан: “Мәңгілік өмірге ие болу үшін не істеуім керек?” — деп сұраған бай, әрі жас басшыны еске алайықшы. Иса Құдай Заңының маңызды талаптарын атап өткенде, әлгі кісі оның барлығын орындап жүргенін айтады. Алайда, ол мұның жеткіліксіз екенін білетін. Сонда Иса оны Құдайдың принциптерін барынша іс жүзінде орындауға, белсенді шәкірт болуға шақырады. Сірә, ол кісі мұндай құрбандыққа баруға даяр болмаған болса керек (Лұқа 18:18—23). Бұдан мынадай қорытынды шығады: бүгінде Исаның ілімін ұстанғысы келетіндердің бәрі де оларды жай ғана мойындап қоя салу мен өмірде қолданудың, ал сол арқылы оның ауыртпалығын жеңілдетудің, арасында үлкен айырмашылық бар екенін есте ұстаулары керек.

18. Мақалаға қосымша берілген қоршау қай жағынан пайдалы болатынын түсіндіріңдер.

¹⁸ Исаның ілімдерін қарастыру және оларды іс жүзінде қолдану үшін, мақалаға қосымша берілген қоршаудағы бірінші пунктке көңіл бөліңдер. Ол бізді Матай 5:3—9-ға жолдайды. Расында да, осы керемет тармақтардың үстінен ой жүгірту үшін әрқайсымыздың жеткілікті уақыт жұмсағанымыз жөн. Алайда оларға жалпы көз жүгірткен кезде, көзқарасымыздың қандай болуы керек екендігіне қатысты қандай ой түйдіңдер? Өмірдің ауыртпалығын расында да жеңілдеткілерің келсе, сендерге не нәрсе көмектескен болар еді? Ой-саналарыңнан рухани нәрселерге көбірек орын беріп, оларға ерекше көңіл қояр болсаңдар мұның қанадай керемет жемісін көресіңдер? Рухани нәрселерге көбірек көңіл қою үшін, өмірлеріңде аса көңіл бөлінбеуі керек нәрселер бар ма? Осылай етер болсаңдар, қазірдің өзінде анағұрлым бақытты боласыңдар.

19. Білімімізді қалай тереңдетуге болады?

¹⁹ Енді әрі қарай жылжиық. Неге сол тармақтарды Құдайдың өзге қызметшісімен, мысалы, жұбайыңмен, жақын туысыңмен немесе досыңмен бірге талқыламасқа? (Нақыл сөздер 18:24; 20:5). Жас басшының рухани нәрселерді өзге біреумен, яғни Исамен, талқылауды дұрыс көргенін ұмытпалық. Исаның берген жауабы оның анағұрлым бақытты, әрі мәңгілік өмірге ие болуына мүмкіндік берген еді. Сол тармақтарды бірге талқылаған бауырласымыз Исаға тең болмағанымен, оның ілімі туралы пікір алмасқанымыз өзімізге де, серігімізге де пайдалы. Кешеуілдетпей мұны іс жүзінде байқап көріңдер.

20, 21. Қандай бағдарламаны қолданып Исаның ілімдерін ұстануды үйренуге болады және жетістіктерімізге қандай баға беруге болады?

²⁰ “Көмек беретін ілімдер” деген қоршауға тағы да бір көз тастайықшы. Онда бұл ілімдер күніне кем дегенде біреуін қарастыруға болатындай етіп топтастырылған. Алдымен келтірілген тармақтардан Исаның не дегенін біліп алуларыңа болады. Сосын оның сөздерінің үстінен ой жүгіртіңдер. Оны өмірде қалай қолдануға болатынын ойлап көріңдер. Егер Құдайдан келген аталмыш ілімді қазірдің өзінде ұстанып жүрмін деп ойласаңдар, қалайша оны одан да жақсырақ қолдануға болатындығын ойланып көріңдер. Бір күн бойы сол ілімді іс жүзінде қолдануға тырысыңдар. Қандай да бір ілімді түсіну немесе іс жүзінде қолдану ауыр болса, оған тағы да бір күн арнаңдар. Алайда келесі ілімге өту үшін алдыңғысын әбден машықтаудың қажеті жоқ. Келесі күні басқа тармақтарды қарастыруға болады. Аптаның аяғында Исаның төрт не бес ілімін қаншалықты нәтижелі қолданғандарыңның үстінен ой жүгіртіңдер. Кейінгі аптада да күн санап осылай етуді жалғастыра беріңдер. Қандай да бір ілімді қолдана алмай қаласаңдар қамықпаңдар. Мұндай нәрсе мәсіхшілердің бәрімен болып тұрады (2 Шежірелер 6:36; Забур 129:3; Екклесиаст 7:20; Жақып 3:8). Қоршауда берілген ілімдерді үшінші, төртінші апталарда да ұстануды жалғастыра беріңдер.

²¹ Бір айда немесе сол шамадағы уақытта, бәлкім, сендер 31 пункттің бәрін қарастырып шыға алатын боларсыңдар. Тіпті олардың әр қайсысын қарастырып шыға алмасаңдар да, мұның нәтижесі қандай болмақ? Күш салғандарыңның арқасында өздеріңді анағұрлым бақытты, әрі жеңіл сезінетін боласыңдар ғой, солай емес пе? Мейлі, жақсы жаққа азғана ғана өзгеретін болсаңдар да, бәрібір ауыртпалық жеңілдей түсетін болса керек; сонымен қатар сендер өмірдің ауыртпалығымен күресуді және жоспарлы түрде Исаның ілімін қолдануды үйренесіңдер. Бұл тізімге оның басқа да керемет ілімдерінің енбегенін де ұмытпаңдар. Неге оларды да тауып алып, іс жүзінде қолдануға тырысып көрмеске? (Філіпіліктерге 3:16).

22. Исаның ілімін ұстанудың нәтижесі қандай болуы мүмкін және қандай сұрақ мұқият талқылауды талап етеді?

²² Өзіміз көріп отырғандай, Исаның қамыты аса жеңіл болмаса да, өте ыңғайлы. Оның ілімінің жүгі жеңіл, оның шәкірті болу да оңай. Алпыс жылдан астам уақыт бойы Исаның ілімін ұстанған оның жақын досы елші Жохан да мұның рас екендігімен келіскен болатын: “Өсиеттерін орындағанымыз — Құдайды сүйгеніміз; оларды орындау қиын емес” (1 Жохан 5:3). Бұған біз де сенімді бола аламыз. Исаның ілімдерін неғұрлым ұзақ ұстанған сайын, көптеген адамдардың өмірінің ауыртпалығын күшейтіп жүрген нәрселерден өзіміздің аса қасірет шекпейтінімізді соғұрлым анығырақ байқай түсеміз. Өмір сүрудің анағұрлым жеңілірек болғанын байқаймыз (Забур 33:9). Десе де, Исаның ыңғайлы қамытына қатысты біз тағы да бір мәселені қарастыруымыз керек. Иса: “Жуас, кіші пейілмін шын жүректен”,— деген. Біздің Исадан үйреніп, одан үлгі алуымызбен мұның қандай байланысы бар? Келесі мақалада осы сұрақ талқыланады (Матай 11:29).

“Үйреніңдер өзімнен”

“Қамытымды қатар киісіп, үйреніңдер Өзімнен, жуас, кіші пейілмін шын жүректен, тыныштық табады сонда жандарың” (МАТАЙ 11:29, сілтемені қара).

 1. Неге Исадан тәлім алған жағымды және өмірімізді анағұрлым мағыналы етеді?

ИСА МӘСІХ әрқашан дұрыс ойлап, дұрыс тәлім берген, әрі дұрыс әрекет еткен. Жердегі өмірі қысқа болғанымен, ол зор пайдасы бар, әрі қанағаттандырарлық іспен айналысқан, сол себепті де бақытты болған. Иса шәкірттер жинап, оларға Құдайға ғибадат етуді және осы дүниені қалай жеңуді үйреткен (Жохан 16:33). Иса адамдардың жүректерін үмітке бөлеп, ‘ізгі хабар арқылы шынайы, ешқашан өшпейтін өмірді жарыққа әкелді’ (2 Тімотеге 1:10). Егер оның шәкірті болсаңдар, сендердің ойларыңша, шәкірт болу деген нені білдіреді? Исаның шәкірттер туралы айтқан сөздерін қарастыру арқылы өмірімізді қалай анағұрлым мағыналы болатынын білеміз. Мұны жүзеге асыру үшін оның көзқарасына еліктеп, кейбір басты принциптерді ұстану керек (Матай 10:24, 25; Лұқа 14:26, 27; Жохан 8:31, 32; 13:35; 15:8).

2, 3. а) Исаның шәкірті болу деген нені білдіреді? ә) Не себепті өзімізден: “Мен кімнің шәкіртімін?”— деп сұрағанның маңызы зор?

² Мәсіхшілердің Грек Жазбаларында “шәкірт” деп аударылып жүрген сөз, негізінде, бар ойын қандай да бір нәрсеге бағыттап жүрген адамды, немесе үйреніп жүрген адамды білдіреді. Осы мақала негізделген тармақта, яғни Матай 11:29-да, осыған мәндес сөз қолданылған: “Қамытымды қатар киісіп, үйреніңдер Өзімнен, жуас, кіші пейілмін шын жүректен, тыныштық табады сонда жандарың”. Иә, шәкірт, ол — үйреніп жүрген адам. Әдетте Ізгі хабарларда “шәкірт” деп Иса уағыз айтқанда оның соңынан еріп жүріп, одан тәлім алған адал ізбасарлары аталады. Исаның ілімдерінің дұрыс екенін тек мойындап қана қоятын, тіпті кейде мұны жасырын түрде істейтін, адамдар да болған (Лұқа 6:17; Жохан 19:38). Ізгі хабарларда “Жақия пайғамбардың [Шомылдырушының] және парызшылардың шәкірттері” де бар екендігі айтылған (Марқа 2:18). Исаның өз ізбасарларын ‘парызшылдардың тәлімдерінен сақтандырғанын’ ескере отырып, өзімізден: “Мен кімнің шәкіртімін?” — деп сұрауымызға болады (Матай 16:12).

³ Егер біз Исаның шәкірті болып, одан тәлім алған болсақ, онда біздің қасымызда өзгелер рухани жағынан жандарына тыныштық тапқанын сезінулері керек. Олар біздің анағұрлым жуас, әрі шын жүректен кішіпейіл болғанымызды байқауы керек. Егер біз жұмыста лауазымды қызмет атқаратын болсақ, ата-ана немесе мәсіхшілердің қауымында бақташы болсақ, өзіміз қамқорлық көрсетіп жүрген адамдар біздің Исаға еліктейтінімізді сезіне ме?

Исаның адамдарға қалай қарағандығы

4, 5. а) Исаның қиыншылықтарға кезігіп жүрген адамдарға қалай қарағанын білу неге қиын емес? ә) Иса парызшылдың үйінде тамақтанып жатқанда қандай оқиға болды?

⁴ Біз Исаның адамдарға, әсіресе үлкен қиыншылықтарға кезігіп жүргендерге, қалай қарағанын білуге тиіспіз. Мұны білу қиын нәрсе емес: Киелі кітапта Исаның, қиыншылықтарға кезігіп жүргендерді қоса алғанда, адамдарға қалай қарағанын көрсететін көптеген оқиғалар жазылған. Дін басыларының, атап айтқанда парызшылдардың, сондай қиыншылықтарға кезігіп жүргендерге қалай қарағанына да көңіл аударалық. Иса мен парызшылдардың арасындағы айырмашылықты қарастырғанымыз біз үшін аса пайдалы болады.

⁵ Б. з. 31 жылы Иса Ғалилеяда уағыздап жүргенде ‘парызшылдар тобының бір мүшесі Исаны тамаққа шақырады’. Ол бас тартпайды. “Ол парызшылдың үйіне келіп, дастарқан басына жантайды. Қалада тұратын бір күнәкар әйел Исаның парызшылдың үйінде дастарқан басында отырғанын естіп, иісмайға толған мөлдір тас құтысын алып келді. Исаның аяқ жағында тұрып, жылай берді де, көз жасын Оның аяғына төгіп, шашымен сүрте бастады. Сосын аяқтарын сүйіп, үстіне иіс май құйды” (Лұқа 7:3—38).

 6. Парызшылдың үйіне “күнәкар” әйел қандай себептермен келген болуы мүмкін?

⁶ Осы оқиғаны көз алдарыңа елестете аласыңдар ма? Бір анықтамалықта былай делінген: “Ол әйел (37 тармақ) қонақасы берілгенде мұқтаж адамдарға сарқыттан ауыз тиюге мүмкіндік беретін дәстүрді қолданған”. Мұнымен қонақасы берілетін үйге шақырылмаған адамның да келе беруіне болатындығы түсіндірілетін болса керек. Онда қонақасынан кейін сарқыттан ауыз тиюге үміттенген өзге де адамдарың болуы әбден мүмкін. Алайда ол әйел әдеттен тыс қылық жасайды. Ол қонақасының аяқталғанын күтіп, алыстан бақылап тұрмайды. Ізгі хабарларда ол әйелдің аты шулы “күнәкар” болғаны, тіпті “оның көптеген күнәлары” барын Исаның да білгені жөнінде жазылған (Лұқа 7:47).

7, 8. а) Лұқа 7:36—38 тармақтарында суреттелген жағдайда сендер не істер едіңдер? ә) Шимон қандай көзқараста болды?

⁷ Исаның орнында өздеріңнің болғандарыңды елестетіп көріңдерші. Сендер не істеген болар едіңдер? Бәлім, сол әйелдің жандарыңа келгеніне ыңғайсызданып қалған болар ма едіңдер? Бойларыңды қандай сезім билер еді? (Лұқа 7:45). Бәлкім, өне бойларың түршігіп, өздеріңді масқара болғандай сезінер ме едіңдер?

⁸ Егер шақырылған қонақтардың арасында болсаңдар, сендерде парызшыл Шимондікіне біршама ұқсас ой тур ма еді? “Исаны қонаққа шақырған парызшыл мұны көргенде іштей: “Егер Бұл нағыз пайғамбар болса, Өзіне қолын тигізгеннің кім екенін және қандай әйел екенін білер еді. Ол күнәкар қатын ғой”,— деді” (Лұқа 7:39). Ал Исаның болса, адамдарға қатты жаны ашитын. Иса ол әйелдің жағдайының қаншалықты ауыр екенін көріп, оның қаншалықты қасірет шегіп жүргенін сезген. Киелі кітапта оның қандай себептермен күнәкарлыққа салынғаны жөнінде ештеңе айтылмаған. Егер расында да ол әйел жезөкше болған болса, онда сол қаланың ер кісілерінің, яғни құдайшыл яһудилердің, оның өзгеруіне көмектеспегені сөзсіз.

 9. Иса не істеді және мұның нәтижесі қандай болған болуы мүмкін?

⁹ Иса ол әйелге көмектескісі келген. Ол оған: “Сенің күнәларың кешірілді!” — деді. Сосын: “Сен сенімің арқылы құтқарылдың. Аман-есен қайта бер”,— деп қосты (Лұқа 7:48—50). Осымен әңгіме аяқталады. Бәлкім, әлдекім: “Иса ол әйелге айтарлықтай еш нәрсе істеген жоқ қой”,— дер. Батасын беруімен, негізінде, Иса оның енді қайта беруіне болатынын білдірген. Сірә, бұдан кейін ол қайтадан жеңіл жүріске салып кетті ғой деп ойларсыңдар? Біз сенімді түрде бұлай дей алмаймыз, алайда Лұқа жазған Ізгі хабарда әрі қарай не делінгеніне көңіл аударыңдаршы. Онда Исаның ‘қалалар мен ауылдарды аралап, уағыз айтып Құдай Патшалығы туралы ізгі хабарды жариялап’ жүргендігі жөнінде әңгімеленеді. Сонымен қатар Лұқа Иса мен оның шәкірттеріне ‘қолдарындағы барымен қызмет көрсетіп’, ‘көптеген әйелдердің еріп жүргенін’ жазған. Күнәсына өкінген, көңілі ризашылыққа толы сол әйелдің бұдан былай ар-ұжданын таза сақтайтындай етіп өмір сүруді бастап, өмірінде мән-мағына пайда болып, Құдайға деген терең сүйіспеншілік дамытып, енді Иса мен оның шәкірттеріне еріп жүруі мүмкін екенін жоққа шығаруға болмайды (Лұқа 8:1—3).

Иса мен парызшылдардың арасындағы айырмашылық

10. Неге Шимонның үйінде болған Иса мен әйел туралы оқиға жөнінде ой жүгірткен пайдалы?

¹⁰ Осы керемет оқиғадан біз қандай үлгі аламыз? Оның бізді қызықтыратыны сөзсіз, солай емес пе?! Өздеріңнің Шимонның үйінде отырғандарыңды елестетіп көріңдерші. Сендер қандай сезімде болар едіңдер? Исаға ұқсап әрекет етер ме едіңдер, әлде оған арнап қонақасы берген парызшылдың сезіміне ұқсастау сезімде болар ма едіңдер? Иса Құдайдың Ұлы болған, сондықтан біз тап ол іспетті сезініп, ол іспетті әрекет ете алмаймыз. Ал басқа жағынан алып қарайтын болсақ, әрине, біз парызшыл Шимон сияқты болғымыз келмес еді. Ешкімнің де парызшылдарға ұқсағысы келмейтіні айдан анық.

11. Не себепті біз парызшылдарға ұқсағымыз келмейді?

¹¹ Киелі кітаптағы және басқа да мәлімет көздеріндегі мағлұматтарды қарастырғаннан кейін, біз парызшылдар — өздері туралы жоғары ойлайтын, өздерін өзге жұрттың жарылқаушысы деп есептейтін, әрі өздерін халықтың жоғын жоқтаушыға теңейтін адамдар болған деген тұжырымға келеміз. Құдай Заңының анық, әрі түсінуге оңай болғандығы оларға ұнамайтын. Егер Заң онша анық емес сияқты болып көрінетін болса, олар ар-ұжданға сәйкес әрекет етуден аулақ болу үшін, қағиданың қалай қолданылуы керек екенін тәптіштеп түсіндіріп, саңлау бар болып көрінген жерлерді бітеуге тырысып бағатын. Дін басылары өмірдің әрбір саласына, тіпті ұсақ-түйек нәрселерге де қатысты, нұсқаулар ойлап табуға тырысатынa.

12. Парызшылдар өздері жайлы қандай ойда болған?

¹² Бірінші ғасырдағы көне еврей тарихшысы Иосиф Флавидің еңбектерінен парызшылдардың өздерін мейірімді, кішіпейіл, адал, тіпті өзгелерге тәлім беруге өздерін әбден лайықты деп есептегендіктері байқалады. Әрине, кейбір парызшылдардың осы сипаттамаға біршама сай келген болуы әбден мүмкін. Нікөдемді еске алуымызға болады (Жохан 3:1, 2; 7:50, 51). Уақыт өте келе олардың кейбіреулері мәсіхшілік жолға түскен (Елшілердің істері 15:5). Елші Пауыл кейбір яһудилер жөнінде, олардың ішінде парызшылдар да бар болатын, былай деп жазған: “Олардың Құдай үшін ынта көрсетіп жүргендеріне куәмін, алайда ынталары дұрыс түсінікке негізделмеген” (Римдіктерге 10:2). Алайда Ізгі хабарларда олар қарапайым халықтың көзқарасымен, яғни өркөкірек, өзімшіл, өздерін әділ есептейтін паң, қазымыр, сынап-мінегіш, сондай-ақ өзгелерді түкке тұрғысыз есептейтін адамдар ретінде суреттелген.

Исаның көзқарасы

13. Парызшылдар туралы Иса қандай ойда болған?

¹³ Иса дін мұғалімдері мен парызшылдарды аяусыз айыптаған. Олар “халықтың мойнына ыңғайсыз, тым ауыр борыштар жүктеп, соларды көтеруге қол ұштарын да бермейді”. Иә, олардың адамдарға артқан жүгі ауыр, ал кигізген қамыты жауыр ететін болған. Иса бұдан да қатты айтып, оларды “түйсіксіздер” деп атады. Түйсіксіз адам өзгелерге қауіп төндіреді. Сонымен қатар Иса оларды “көр соқыр жетекшілер” деп, олардың ‘Таурат заңының әділдік, мейірімділік және адалдық туралы [анағұрлым] маңызды қағидаларына көңіл бөлмегендері’ үшін айыптады. Өзін Исаның парызшылдарға теңегенін кім қалайды дейсің?! (Матай 23:1—4, 16, 17, 23).

14, 15. а) Исаның Матай Леуіге қалай қарағанынан парызшылдар жайында не білеміз? ә) Бұл әңгімеден біз қандай маңызды сабақ аламыз?

¹⁴ Ізгі хабарларды оқығандардың барлығы дерлік парызшылдардың көпшілігінің сынап-мінегіш болғандарын байқайды. Иса Леуі деген салық жинаушыны өзінің шәкірті ету үшін соңынан еруге шақырғаннан кейін, Леуі оған арнап үлкен қонақасы береді. Ізгі хабарда былай делінген: “Дін мұғалімдері мен парызшылдар күңкілдеп, Исаның шәкірттеріне: — Неге салықшылармен және басқа күнәкарлармен бірге тамақ ішіп-жеп отырсыңдар?!” — деп наразылық білдірді. Иса оларға былай деп жауап береді: “...Мен “әділдерді” емес, күнәкарларды теріс жолдан қайтуға шақыру үшін келдім” (Лұқа 5:27—32).

¹⁵ Леуі Исаның сол бір кеште айтқан тағы бір сөзінің мәнін түсінеді: “Құрбандық шалғандарыңнан гөрі мейірімділік көрсеткендеріңді қалаймын” деген сөздің мағынасын ұғынып алыңдар” (Матай 9:13). Парызшылдар ертедегі еврей пайғамбарларының жазғандарына сенеміз дегенімен, Ошия 6:6-да жазылған сөздерді ұстанбайтын. Олар қате болса да, қайтпастан өз дәстүрлерін ұстана беруге тырысатын. Әрқайсысымыз өзімізден былай деп сұрағанымыз жөн: “Мен қандай да бір мәселені шешкенде жеке ойымды не көпшілік мақұлдаған көзқарасты қызғыштай қорғайтын адам ретінде белгілімін бе? Жоқ әлде, өзгелер мені қайырымды да, мейірімді адам ретінде біле ме?”

16. Парызшылдар қандай қағидаға сәйкес өмір сүрген және соларға ұқсас болмау үшін не істеуіміз керек?

¹⁶ Парызшылдың басты қағидасы — сынап-мінеу, сынап-мінеу тағы да сынап-мінеу болған. Мейлі, бар болсын, жоқ болсын олар болар-болмас қателіктерді іздейтін. Халық қашан олар мінеп-сынар екен, қашан ескерту жасар екен деп бағып отыратын. Парызшылдар жалбыз, аскөк, зере сияқты арзан тұратын ұсақ-түйек шөптердің оннан бірін садақа етіп жүргендерін мақтан тұтатын. Олардың киім киістерінен құдайшылдықтарын көрсеткісі келетіндіктері байқалып тұратын, сондай-ақ олар халықты өздеріне бағындыруға тырысатын. Іс-әрекетіміздің Исаның үлгісіне сай болғанын қалайтын болсақ, әрине, біз үнемі өзгелерден кемшілік іздеп, сосын оларға ерекше көңіл аударудан аулақ болуымыз керек.

Исаның проблемаларға деген көзқарасы

17—19. а) Үлкен проблемаға айналуы мүмкін жағдайда Иса өзін қалай ұстаған? ә) Жағдайды ауырлатып, әрі жағымсыз еткен не нәрсе? б) Сендер әлгі әйел Исаға жақындағанда сол жерде болсаңдар, не істеген болар едіңдер?

¹⁷ Исаның проблемаларға деген көзқарасы парызшылдардікінен мүлдем өзгеше болған. Үлкен проблемаға айналуы мүмкін жағдайда Исаның өзін қалай ұстағанын қарастырып көрейікші. Аталмыш жағдай он екі жыл бойы қансырап қиналып жүрген әйелге қатысты болатын. Бұл оқиға Лұқа 8:42—48-де әңгімеленген.

¹⁸ Марқа жазған Ізгі хабарда әйелдің “қорыққаннан дірілдеп” кеткені жөнінде жазылған (Марқа 5:33). Не себепті? Өйткені, ол, Құдай Заңын бұзған, әрі мұнысын өзі білген. Леуіліктер 15:25—28-ге сәйкес, ерекше ұзақ уақыт бойы қан кетіп ауыратын әйел, айыққанға дейін және одан кейін тағы да бір апта бойы таза емес болып есептелетін. Оның қолы тиген нәрсенің бәрі, оған жанасқан адамның бәрі арамдалатын. Исаға жақындау үшін ол әйел ығы-жығы адамдардың арасынан өтуі керек болатын. Бұл оқиғаны біз 2 000 жыл өткеннен кейін оқығанның өзінде, жүрегіміз езіліп, сол әйелді аяп кетеміз.

¹⁹ Егер сол жерде болғандарыңда осы жағдай сендерге қалай әсер етер еді? Сендер не айтар едіңдер? Исаның ол әйелге қайырымдылық пен сүйіспеншілік танытқанын, оның жағдайын барынша түсінгенін, сондай ақ ол әйелдің қандай да бір қиыншылық тудыруы мүмкін екендігінде тіпті меңземегенін ескерелік (Марқа 5:34).

20. Егер Леуіліктер 15:25—28-де қойылған талап бүгінгі күні күшінде болса, біз қандай жағдайға кездескен болар едік?

²⁰ Бұл оқиғадан қандай сабақ алуымызға болады? Сен мәсіхшілердің қауымында ақсақал ретінде қызмет етесің делік. Сонымен қатар Леуіліктер 15:25—28-дегі талап бүгіндегі мәсіхшілерге де қатысты деп есептелік және салы суға кетіп, дәрменсіздік күй кешкен әйел бауырласымыз осы заңды бұзды делік. Сен бұған қалай қарар едің? Оның әрекетін қатаң айыптап, жұрттың көзінше оны кемсітер ме едің? “Жоқ, о не дегенің — дерсің сен. — Мен Исаның үлгісіне еліктеп, қайырымдылық пен сүйіспеншілік танытар едім, оның жағдайын барынша түсінуге тырысар едім”. Өте жақсы! Енді тек Исаның үлгісіне еліктеп, мұны іс жүзінде көрсету керек.

21. Иса адамдарды Құдай Заңына қатысты не нәрсеге үйреткен?

²¹ Исаның қасында адамдар жандарына тыныштық тапқан, ол оларға дем беріп, жігерлендірген. Егер Құдайдың Заңы бір мағыналы болса, оны тап солай түсіну керек болған. Ал егер ол жалпы айтылған болса, ар-ұжданға негізделіп әрекет ету керек болатын, әрі осылайша шешім қабылдағанда Құдайға сүйіспеншілік танытудың мүмкіндігі туатын. Құдай Заңының аясы тар емес-тін (Марқа 2:27, 28). Құдай өзінің халқын сүйеген, әрқашан оның игілігі үшін әрекет еткен, сондай-ақ жолдан адасқан қызметшілеріне мейірімділік танытуға даяр болған. Иса да тап солай еткен (Жохан 14:9).