Timuutiusimut allakkat aappaat
1 Paulusimit, Guutip piumasaanut Kristusilu Jiisusi aqqutigalugu inuuneq pillugu neriorsuummut naapertuuttumik Kristusimit Jiisusimit apustilinngortinneqartumit, 2 qitornannut asasannut Timuutiusimut:
Ajunngisaangaarnermik, nallittuinermik eqqissinermillu Ataatamit Guutimit Naalakkatsinnillu Kristusimit Jiisusimit pisumik kissaappakkit.
3 Guuti qutsavigaara siuaasama pisimanerattut kiffartorfigisinnaagakku taamaaliorsinnaagamalu minguitsumik nalunngeqatiginnissuteqarlunga. Unnuakkut ullukkullu qamannga pisumik qinusarninni eqqaajuarpakkit. 4 Qullilinitit eqqaagaangakkit kipilertarpunga. Nuannissagaluaqaaq takoqqillutit. 5 Ilumoortuusaarnak uppernerit eqqaasarpara. Upperneq taanna siullermik illit aananni Luuisimiippoq anaanannilu Ennikimiilluni, qularinngilaralu maanna ilinniittoq.
6 Taamaattumik eqqaasippakkit taamani assannik attorakkit Guutimit tunissutisiat* innertut ilinni ikumatittuaqqullugu. 7 Guutimmi anersaamik uagutsinnik qunutuunngortitsisumik tuninata pissatsitsisumik, asannilersitsisumik isumakkullu peqqissuutitsisumik tunivaatigut. 8 Taamaattumik Naalagaq pillugu oqaluussineq kanngusuutiginagulu uanga, Naalagaq pissutigalugu parnaarussaaqqasunga, kanngusuutigissanngilarma. Guutilli pissaanera tatigalugu nutaarsiassat nuannersut pillugit naallioqataagit. 9 Iliuutsigut pissutiginagit siunertanili ajunngisaangaarninilu pissutigalugit aniguisillutalu illernartooqqulluta qaaqquaatigut. Kristusimut Jiisusimut tunngatillugu qangarsuarli ajunngisaangaarnermik tunivaatigut. 10 Maannali Aniguisitsisitta, Kristusip Jiisusip, toqumik atuukkunnaarsitsisup, saqqummerneratigut ajunngisaangaarneq paasinarsilluinnarpoq. Taassuma nutaarsiassat nuannersut atorlugit inuuneq mikiarsinnaanngissuserlu* qinngorpai. 11 Nutaarsiassat taakku pillugit oqaluussisartunngortinneqarlungalu apustilinngortinneqarlungalu ilinniartitsisunngortinneqarpunga.
12 Taamaattumik tamakkuninnga naalliuuteqarpunga. Guutili upperfigisara ilisarisimagakku ullussallu nalliunnissaata tungaanut tunniussannik illersuisinnaasoq qularinnginnakku kanngusunngilanga. 13 Oqaatsit ineriartornartut* tunngavigalugit malittarisassiaq* uannit tusakkat Kristusimik Jiisusimik ataasioqateqarnerup kingunerisaanik upperlutit asannillutillu aalajangiusimajuaruk. 14 Erlinnartoq tamanna ilinnut tunniunneqartoq anersaaq illernartoq, uatsinniittoq, ikiortigalugu paarilluaruk.
15 Nalunngisattut Aasiamiittut* tamarmik, aamma Fygelusip Hermogenesillu, tunuppaannga. 16 Oniisifoorusip nakussatsikulasarmanga kalunnernillu qilersugaaqqanera kanngusuutiginngimmagu qanortoq taanna illuaniittullu Naalakkamit nallittorneqarilik. 17 Allaammi Romamiilluni ujaqqissaarpaanga nanillungalu. 18 Qanortoq ulloq nalliuppat Naalakkap Jehovap* nallittoriliuk. Aamma nalunngilat Efesossimi qanoq ikiortigigaanga.