Johannesimut Saqqummersitat
2 Efesossimi ilagiit inngiliat allaffigissavat: Ullorissanik arfineq-marlunnik talerpimminik tigumiartoq qullilerfiillu kuultiusut arfineq-marluk akornganni pisuttoq ima oqarpoq: 2 ‘Iliuutsitit, tamaviaarnerit, pinertusaarnerit, inunnik ajortunik akuersaannginnerit, apustiliunngikkaluarlutik apustiliunerartunik misiliinerit sallutuujunerannillu qulaarinerit ilisimavakka. 3 Pinertusaarlutillu atera pillugu tunniutiinnarnallu qasulinngilatit. 4 Aallaqqaammulli asannissimanittut asannikkunnaarsimagavit oqaaqqissaarpakkit.
5 Taamaattumik sumit nakkarsimanerlutit eqqaamassavat, aamma peqqissimillutillu siullermik iliuuserisatit iliuuserissavatit. Taamaaliunngikkuit ornissavakkit peqqissiminngikkuillu qullilerfiit inissisimavianiit piissallugu. 6 Nikkulaalli ilinniartitsissutaanik malinnittut* iliuusii uumigisakka uumigigakkit nersualaarpakkit. 7 Anersaap ilagiinnut oqaasii siuteqartup tusarligit: Ajugaasup orpimmit inuussutaasumit, Guutip paratiisianiittumit, nerinissaa akuerissavara.’
8 Smyrnamilu ilagiit inngiliat allaffigissavat: ‘Siulleq Kingullerlu’, toqusoq uummaqqittorlu, ima oqarpoq: 9 ‘Annikillioraluarlutit piitsuugaluarlutillu pisuujunerit juutiunngikkaluarlutillu juutiunerartunit, Saatanip synagogianit, mitallerneqarnerit ilisimavakka. 10 Naalliuutigisassatit sioorageqinagit. Tamakkiisumik misilinneqaqqullusi Diaavulup ilasi parnaarussaatittuassavai, ullunilu qulini annikilliussaasi. Toqumut allaat aalajaakkuit inuusussatut niaqorusissavakkit. 11 Anersaap ilagiinnut oqaasii siuteqartup tusarligit: Ajugaasoq toqup aappaanit ajoquserneqanngilluinnassaaq.’
12 Pergamonnimi ilagiit inngiliat allaffigissavat: Illugiittut kiinalimmik takisuumik ipittumik panaqartoq ima oqarpoq: 13 ‘Nalunngilara Saatanip issiavissaarsuata inigisaani najugaqaraluarlutit atera aalajangiusimajuarit. Antipassillu nalaani ilisimannitsiga aalajaatsoq illit illoqarfinni, Saatanip najugaqarfiani, toqutaagaluartoq uannut uppernerit aalajangiusimavat.
14 Ilatilli Biilearmip ilinniartitsissutaanik maleruaammata oqaaqqissaalaarpakkit. Biilearmip Baalarki Israalip qitornaanik guutilianut pilliutinik nerinissamik atoqatigiinnikkullu eqqunngitsuliornissamik* kajumissaareqqullugu ilitsersorpaa. 15 Tamatuma saniatigut Nikkulaap ilinniartitsissutaanik* malinnittunik ilaqarputit. 16 Taamaattumik peqqissimigit. Taamaaliunngikkuit ornipallassavakkit, qaninniillu panaq takisooq anisoq atorlugu saassutissavakka.
17 Anersaap ilagiinnut oqaasii siuteqartup tusarligit: Ajugaasoq mannat isertorneqarsimasut ilaannik tunissavara, ujaqqamillu qaqortumik tunissavara, aterlu nutaaq tunineqartup kisimi ilisimasaa ujaqqami allassimassaaq.’
18 Tyatiirami ilagiit inngiliat allaffigissavat: Guutip ernera, ikualasutut ittunik isilik kanngussattullu minguitsutut ittunik isigalik, ima oqarpoq: 19 ‘Iliuutsitit, asanninnerit, uppernerit, kiffartornerit, pinertusaarnerit aallaqqaammullu sanilliullugu iliuuseqarnerunerit ilisimavakka.
20 Arnarli Jeezabeeli, pruffiitiunerartoq inussiaatinnillu atoqatigiinnikkut eqqunngitsuliornissamik* guutilianullu pilliutinik nerinissamik ilinniartitsinermigut tammartitsisoq, akuersaarakku oqaaqqissaarpakkit. 21 Peqqissiminissamut periarfissippara, atoqatigiinnikkulli eqqunngitsuliortarnini* peqqissimissutigiumanngilaa. 22 Napparsimalersissavara nikuissinnaajunnaarsillugu, taassuminngalu allasioqateqartut tammartinneqarnermikkut iliuutsitik peqqissimissutiginngippatigit annikilliortingaassavakka. 23 Ilagiit tamarmik paasiniassammassuk eqqarsaatit* ilorlerpaat uummatillu misissuiffigisarikka qitornai perulunnartumik napparsimalersinnerisigut toqussavakka, tamassilu immikkut iliuutsisi naapertorlugit akilerumaarpassi.
24 Ilissili allat Tyatiiramiittusi, ilinniartitsissummik tamatuminnga maleruaanasilu “Saatanip itissusiinik” taaneqartartunik ilisimanninngitsusi tamassi, oqarfigaassi: Allamik nammagassinngilassi. 25 Pigisasili tikiunnissama tungaanut aalajangiusimasigit. 26 Ajugaasoq naggatissarlu tikillugu iliuutsinnik aalajangiusimannittoq inuiaqatigiinnut oqartussaasunngortissavara 27 Ataatannit oqartussaassusilerneqarnittut. Taassumalu inuit immersakkatut marraasutut sequminniassammata ajaappiaq saviminiusoq atorlugu pillassavai. 28 Qaasiummillu tunissavara. 29 Anersaap ilagiinnut oqaasii siuteqartup tusarligit.’